Author: redaktr

Təhsilin İnkişafı Fondu və “NEQSOL Holding” tərəfindən tələbə qızların təhsil və şəxsi inkişafına dəstək məqsədilə həyata keçirilən “Parla” təqaüd və inkişaf proqramına müraciətlər başladı.

Proqram çərçivəsində seçiləcək 50 tələbə qıza aylıq 200 manat təqaüd veriləcək. Bununla yanaşı, iştirakçılar peşəkar və şəxsi inkişaflarına töhfə verəcək müxtəlif imkanlardan yararlanacaqlar. Proqram iştirakçıları təcrübə, mentorluq və təlimlərə, həmçinin “NEQSOL Academy” və “LinkedIn Learning” platformaları vasitəsilə dünyanın aparıcı universitetlərinin tədris proqramlarına çıxış əldə edəcəklər.

Proqramın davamlılığının təmin olunması, məzunlar arasında peşəkar əlaqələrin möhkəmləndirilməsi, bilik və təcrübə mübadiləsinin təşviqi, eləcə də onların şəxsi və peşəkar inkişafının dəstəklənməsi məqsədilə “Parla” Məzunlar İcması yaradılıb.  İcmanın yaradılması proqram iştirakçıları üçün məzun olduqdan sonrakı dövrdə də inkişaf, əməkdaşlıq və şəbəkələşmə imkanlarının davamlı şəkildə dəstəklənməsinə xidmət edir. İcma çərçivəsində müxtəlif təlimlər, mentorluq görüşləri, peşəkar inkişaf sessiyaları və şəbəkələşmə tədbirləri keçirilir. 

Proqrama kimlər müraciət edə bilər?

“Parla” təqaüd və inkişaf proqramına aşağıdakı tələblərə cavab verən tələbə qızlar müraciət edə bilərlər:

• Azərbaycan Respublikasının vətəndaşı olmaq;
• Azərbaycan Respublikasında fəaliyyət göstərən ali təhsil müəssisələrində əyani təhsilalma forması üzrə bakalavriat səviyyəsində təhsil almaq;
• Proqram üçün müəyyən edilmiş ixtisaslardan biri üzrə təhsil almaq;
• Ali təhsil müəssisəsinə qəbul imtahanında minimum 450 bal toplamaq;
• Ümumi orta müvəffəqiyyət göstəricisinin 80%-dən yuxarı olması;
• Dərsdənkənar, o cümlədən könüllülük və sosial fəaliyyətlərdə fəal iştirak etmək;
• Aşağıdakı sosial meyarlardan ən azı birinə cavab vermək:
  • ünvanlı dövlət sosial yardımı alan ailənin üzvü olmaq;
  • valideynləri olmayan və ya uşaq evində böyümüş şəxs olmaq;
• Hər iki valideyninin (tək valideyn olduğu halda həmin şəxsin) aşağıdakı kateqoriyalardan hər hansı birinə aid olması:
  • Orqanizmin funksiyalarının 31-60, 61-80 və ya 81-100 faiz pozulmasına görə əlilliyi müəyyən edilmiş şəxs;
  • işsiz kimi qeydiyyatda olan şəxs;
  • iş yeri olmayan və yaşa görə əmək pensiyası alan şəxs;
  • iş yeri olmayan və yaşa görə sosial müavinət alan şəxs.

Qeyd: Yuxarıda qeyd olunan sosial meyarlara cavab verən I kurs tələbələrinin seçimində qəbul imtahanında topladıqları bal əsas götürüləcək.

Seçim necə aparılacaq?

Proqrama qəbul 3 mərhələdən ibarətdir:

1. Onlayn müraciət
Namizədlər müəyyən edilmiş müddət ərzində elektron müraciət formasını dolduraraq qeydiyyatdan keçirlər.

2. Qiymətləndirmə
Namizədlərin akademik göstəriciləri və təqdim etdikləri məlumatlar qiymətləndirilir.

3. Müsahibə
Növbəti mərhələyə keçən namizədlər müsahibəyə dəvət olunur. Müsahibə zamanı namizədlərin məqsədləri, sosial vəziyyəti, tələbəlik fəaliyyəti və digər meyarlar nəzərə alınır.

Yekun seçim zamanı müsahibədə göstərilən nəticə əsas götürülür.

Proqram çərçivəsində müəyyən edilmiş ixtisasların siyahısı ilə buradan tanış olmaq mümkündür.

Müraciət etmək üçün: https://anket.edu.az/user/371

Son müraciət tarixi: 4 oktyabr 2026-cı il

Qeyd: Təhsilin İnkişafı Fondunun digər təqaüd proqramlarından yararlanmış şəxslər “Parla” proqramına müraciət edə bilməzlər.

TələbəPlus kart istifadəçiləri üçün yeni bonus imkanı təqdim olunub.

Artıq tələbələr BakıKart üzrə gediş haqqını TələbəPlus kartı ilə ödədikdə 10% bonus əldə edə biləcəklər. Bonus həm fiziki TələbəPlus kartı, həm də QR ödənişləri zamanı keçərlidir.

Beləliklə, ilin sonunadək tələbələr BakıKart üzrə nəqliyyat ödənişlərinə xərclədikləri məbləğin 10%-ni bonus şəklində gündəlik say limiti olmadan geri qazana biləcəklər.

Bilik Günü münasibətilə təqdim olunan yeni bonus imkanı tələbələrin gündəlik nəqliyyat xərclərinin müəyyən hissəsini geri qazanmasına şərait yaratmaqla yanaşı, TələbəPlus kartının gündəlik istifadəsi üzrə üstünlükləri də genişləndirir.

Qeyd edək ki, təhsil işçiləri üçün Təhsilin İnkişafı Fondu tərəfindən istifadəyə verilən TəhsilPlus kartı ilə ictimai nəqliyyatdan istifadə zamanı da güzəştlər təqdim olunur. TəhsilPlus istifadəçiləri “City Card” və BakıKart üzrə QR ödənişlərində 10% endirimdən yararlana bilirlər.

TələbəPlus kartı Təhsilin İnkişafı Fondu, Kapital Bank və “Visa” tərəfindən tələbələr üçün həyata keçirilən birgə layihədir. Kart tələbələrə nəqliyyatdan istifadə ilə yanaşı, müxtəlif xidmət və məhsullardan yararlanarkən bonus və endirim imkanları təqdim edir.

Elm və təhsil naziri Emin Əmrullayev IV “Maarifçi” tələbə-məzun proqramının iştirakçıları ilə görüşüb.

Görüşdə Təhsilin İnkişafı Fondunun İdarə Heyətinin sədri Nicat Məmmədli də iştirak edib.

Proqram iştirakçılarını salamlayan elm və təhsil naziri “Maarifçi” tələbə-məzun proqramının gənclərin elm və təhsil sahəsində həyata keçirilən prosesləri yaxından tanımaları, real iş mühitində praktiki təcrübə qazanmaları və peşəkar inkişaf etmələri baxımından əhəmiyyətini vurğulayıb.

Nazir qeyd edib ki, gənclərin inkişafı yalnız nəzəri biliklərin əldə olunması ilə məhdudlaşmamalı, onların real iş mühitində formalaşan təcrübə və bacarıqları ilə tamamlanmalıdır. Bu baxımdan “Maarifçi” proqramının iştirakçılara həm müxtəlif istiqamətlər üzrə təcrübə qazanmaq, həm də elm və təhsil sahəsində çalışan mütəxəssislərlə birbaşa ünsiyyət qurmaq imkanı yaratdığını bildirib.

Emin Əmrullayev gənclərə proqram müddətində əldə etdikləri bilik və təcrübədən yararlanmağı tövsiyə edib. 

Görüşdə “Maarifçi”lərin təhsil sistemi ilə bağlı sualları cavablandırılıb, prioritet məsələlər ətrafında fikir mübadiləsi aparılıb. Emin Əmrullayev müasir dövrün tələbləri, dəyişən əmək bazarı, gənclərin gələcək karyera istiqamətlərini düzgün müəyyənləşdirməsi və ixtisas seçiminə məsuliyyətlə yanaşmasının əhəmiyyəti barədə danışıb. Nazir, həmçinin gənclərin elm və təhsil sistemində fəal iştirakı, onların bilik və bacarıqlarının gələcək inkişaf üçün əhəmiyyətini vurğulayıb.

Xatırladaq ki, “Maarifçi” tələbə-məzun proqramı Elm və Təhsil Nazirliyinin təşəbbüsü, Təhsilin İnkişafı Fondunun dəstəyi ilə 2024-cü ildən həyata keçirilir. İndiyədək proqramdan 102 gənc məzun olub. IV tələbə-məzun proqramında isə 53 nəfər Elm və Təhsil Nazirliyinin struktur bölmələri və tabeli qurumlarında, regional təhsil idarələrində, həmçinin Naxçıvan Muxtar Respublikasının Təhsil Nazirliyində təcrübə keçmək imkanı qazanıb.

Təhsilin İnkişafı Fondunun “NEQSOL Holding” ilə əməkdaşlığı çərçivəsində həyata keçirdiyi “Parla” təqaüd və inkişaf proqramının məzunlarını bir araya gətirən “Parla” Məzunlar İcmasının ilk görüşü keçirilib.

“Parla” Məzunlar İcması proqramın davamlılığının təmin olunması, məzunlar arasında peşəkar əlaqələrin möhkəmləndirilməsi, bilik və təcrübə mübadiləsinin təşviqi, eləcə də onların şəxsi və peşəkar inkişafının dəstəklənməsi məqsədilə yaradılıb.

Hazırda icmanın tərkibinə proqramın əvvəlki buraxılışlarından olan 40 məzun daxildir. Növbəti illərdə yeni məzunların da şəbəkəyə qoşulması ilə icmanın daha da genişlənməsi nəzərdə tutulur.

Tədbir giriş nitqləri ilə başlayıb. Çıxışlarda proqram məzunları üçün yaradılan yeni inkişaf platformasının əhəmiyyəti, güclü məzun şəbəkəsinin formalaşdırılması, davamlı öyrənmə imkanlarının genişləndirilməsi və gələcək fəaliyyət istiqamətləri barədə məlumat verilib.

Görüş çərçivəsində məzunların şəxsi və peşəkar inkişafını dəstəkləməyə yönəlmiş təlim proqramı təşkil olunub. Tədbirin ilk hissəsində şəxsi inkişaf üzrə interaktiv sessiya keçirilib. Sessiya zamanı iştirakçılar liderlik, özünüinkişaf, məqsədlərin müəyyənləşdirilməsi və peşəkar inkişaf istiqamətində praktiki yanaşmalarla tanış olublar.

Daha sonra neyroqrafika üzrə praktiki seminar təşkil olunub. Seminar çərçivəsində iştirakçılar özünürefleksiya, yaradıcı düşüncə və fərdi inkişaf bacarıqlarının gücləndirilməsinə yönəlmiş interaktiv fəaliyyətlərdə iştirak ediblər.

“Parla” Məzunlar İcmasının yaradılması proqram iştirakçıları üçün məzun olduqdan sonrakı dövrdə də inkişaf, əməkdaşlıq və şəbəkələşmə imkanlarının davamlı şəkildə dəstəklənməsinə xidmət edir. İcma çərçivəsində gələcəkdə müxtəlif təlimlərin, mentorluq görüşlərinin, peşəkar inkişaf sessiyalarının və şəbəkələşmə tədbirlərinin keçirilməsi nəzərdə tutulur.

Qeyd edək ki,  “Parla” təqaüd və inkişaf proqramı ali təhsil müəssisələrində təhsil alan tələbə qızların akademik, şəxsi və peşəkar inkişafının dəstəklənməsinə yönəlmiş proqramdır. Proqram çərçivəsində iştirakçılara təqaüdlə yanaşı, mentorluq, təlim və karyera inkişafı imkanları təqdim olunur. 

Təhsilin İnkişafı Fondu ilə Dünyagöz Xəstəxanası arasında “TəhsilPlus” layihəsi çərçivəsində əməkdaşlıq müqaviləsi imzalanıb.

Əməkdaşlıq çərçivəsində təhsil işçiləri Dünyagöz Xəstəxanasının təqdim etdiyi xidmətlərdən xüsusi güzəştlərlə yararlana biləcəklər. Müqaviləyə əsasən, müayinə və tomoqrafiya xidmətlərinə 50 faiz, lazer, ümumi və xüsusi əməliyyatlara isə 20 faiz endirim tətbiq olunacaq.

İmzalanma mərasimində Təhsilin İnkişafı Fondunun İdarə Heyətinin sədri Nicat Məmmədli, Dünyagöz Xəstəxanasının icraçı direktoru Mahmut Hazıroğlu, eləcə də hər iki tərəfin nümayəndələri iştirak ediblər.

Nicat Məmmədli bildirib ki, bu əməkdaşlıq təhsil işçilərinin sosial rifahının yüksəldilməsi istiqamətində həyata keçirilən tədbirlərin tərkib hissəsidir. O, təhsil işçilərinin keyfiyyətli tibbi xidmətlərə daha əlçatan şəkildə çıxışının təmin edilməsinin əhəmiyyətini vurğulayıb.

Daha sonra Mahmut Hazıroğlu təhsil sahəsində çalışan şəxslərə dəstək verməyin onlar üçün mühüm sosial məsuliyyət istiqamətlərindən biri olduğunu qeyd edib, əməkdaşlığın uzunmüddətli və faydalı olacağına inandığını ifadə edib.

Qeyd edək ki, “TəhsilPlus” layihəsi Təhsilin İnkişafı Fondu, Kapital Bank və “Mastercard” qlobal texnologiya şirkətinin birgə əməkdaşlığı ilə həyata keçirilir. Layihə çərçivəsində kartların bütün təhsil pillələri üzrə fəaliyyət göstərən təhsil işçilərinə mərhələli şəkildə təqdim edilməsi nəzərdə tutulur. Bununla yanaşı, təhsil işçiləri üçün müxtəlif sahələrdə yeni üstünlüklərin yaradılması və tərəfdaş şəbəkəsinin genişləndirilməsi istiqamətində işlər davam etdirilir.

TəhsilPlus kartı çərçivəsində təhsil işçiləri üçün nəqliyyat sahəsində təqdim olunan üstünlüklərin əhatə dairəsi genişlənir. 1 iyul-30 sentyabr 2026-cı il tarixləri ərzində Gəncə şəhərində ictimai nəqliyyat üzrə bütün TəhsilPlus kartları ilə həyata keçirilən ödənişlər zamanı məbləğin 10%-i kart hesabına geri qaytarılacaq.

Geri qaytarılan məbləğ hər bir əməliyyatdan dərhal sonra, real vaxt rejimində istifadəçinin TəhsilPlus kart hesabına köçürüləcək. Təklif çərçivəsində geri qaytarılan məbləğ və əməliyyat sayı üzrə hər hansı limit nəzərdə tutulmur.

TəhsilPlus kartı istifadəçiləri nəqliyyat sahəsində daha bir üstünlükdən də daim yararlana bilirlər. Belə ki, BakıKart QR bilet vasitəsilə həyata keçirilən ödənişlər zamanı 10% bonus hesablanır.

Nəqliyyat üstünlükləri ilə yanaşı, TəhsilPlus kartı istifadəçiləri layihənin tərəfdaş şəbəkəsinə daxil olan müxtəlif müəssisələrdə alış-veriş, sağlamlıq, xidmət, istirahət və digər kateqoriyalar üzrə xüsusi endirim və bonuslardan da yararlana bilirlər.

“TəhsilPlus” layihəsi Təhsilin İnkişafı Fondu, Kapital Bank və “Mastercard” qlobal texnologiya şirkətinin birgə əməkdaşlığı ilə həyata keçirilir. Layihə çərçivəsində kartların bütün təhsil pillələri üzrə fəaliyyət göstərən təhsil işçilərinə mərhələli şəkildə təqdim edilməsi nəzərdə tutulur. Eyni zamanda təhsil işçiləri üçün müxtəlif sahələrdə yeni üstünlüklərin yaradılması və tərəfdaş şəbəkəsinin genişləndirilməsi istiqamətində işlər davam etdirilir.