Gəncə-Daşkəsən regionunda fəaliyyət göstərən təhsil işçilərinə TəhsilPlus kartları təqdim olunub

İyunun 4-də Gəncə-Daşkəsən regionu üzrə ali və ümumi təhsil müəssisələrində fəaliyyət göstərən təhsil işçilərinə TəhsilPlus kartlarının təqdimetmə mərasimləri keçirilib.

TəhsilPlus kartlarının ölkə üzrə ilk kütləvi təqdimatına Gəncə-Daşkəsən regionundan start verilib. Layihənin regionlarda fəaliyyət göstərən təhsil işçilərinin sosial rifahına töhfə verməsi və onların müxtəlif güzəşt imkanlarından faydalanmasını genişləndirməsi məqsədilə ilk mərhələdə region üzrə xüsusi tərəfdaş şəbəkəsi də formalaşdırılıb.

Gəncə Dövlət Universitetində təşkil olunan ilk tədbirdə Təhsilin İnkişafı Fondunun İdarə Heyətinin sədri Nicat Məmmədli, Kapital Bank-ın İdarə Heyəti sədrinin müavini, Baş Korporativ satış inzibatçısı Fərid Hidayətzadə, Gəncə Dövlət Universitetinin rektoru Yusif Yusibov, Azərbaycan Dövlət Aqrar Universitetinin rektoru Zəfər Qurbanov və Azərbaycan Texnologiya Universitetinin rektoru Yaşar Ömərov, millət vəkili Pərvin Kərimova, eləcə də ali təhsil müəssisələrinin professor-müəllim heyətinin nümayəndələri iştirak ediblər.

Çıxışlar zamanı təhsil işçilərinin sosial rifahının gücləndirilməsi, onlar üçün nəzərdə tutulan güzəşt və imtiyazlardan istifadə imkanlarının genişləndirilməsinin əhəmiyyəti vurğulanıb. Bildirilib ki, təhsil sahəsində çalışan şəxslərin sosial təminatının dəstəklənməsi istiqamətində həyata keçirilən layihələr müəllim nüfuzunun artırılması, onların motivasiyasının gücləndirilməsi və peşə fəaliyyətinin stimullaşdırılması baxımından mühüm rol oynayır. Eyni zamanda dövlət-özəl tərəfdaşlığı çərçivəsində reallaşdırılan bu kimi təşəbbüslərin təhsil işçiləri üçün yeni imkanlar yaratdığı diqqətə çatdırılıb.

Tədbir çərçivəsində TəhsilPlus kartı barədə təqdimat keçirilib. Təqdimatda kartın təqdim etdiyi üstünlüklər, tərəfdaş şəbəkələrində mövcud olan endirim və bonus imkanları haqqında məlumat verilib, həmçinin TəhsilPlus kartına dair videoçarx nümayiş etdirilib. Qeyd olunub ki, Gəncə-Daşkəsən regionu üzrə ilk tərəfdaşlardan olan “Referans” tibb mərkəzinin Gəncə filialı TəhsilPlus kart istifadəçilərinə 10% endirim təqdim edir. Bununla yanaşı, “CityCard” ilə əldə olunmuş ilkin razılığa əsasən, növbəti aylardan etibarən TəhsilPlus kart istifadəçiləri üçün ictimai nəqliyyatda xüsusi güzəşt mexanizmləri istifadəyə veriləcək.

Tədbirin gedişatında universitet rektorlarına və ali təhsil müəssisələrinin professor-müəllim heyətinin bir qrup nümayəndəsinə TəhsilPlus kartları təqdim edilib.

Eyni gündə keçirilən ikinci tədbir Gəncə-Daşkəsən Regional Təhsil İdarəsində baş tutub. Tədbirdə Təhsilin İnkişafı Fondunun, Kapital Bank-ın rəsmi nümayəndələri, Regional Təhsil İdarəsinin müdiri Elçin Kərimov, idarənin tabeliyində olan 6 rayon üzrə sektor müdirləri, region üzrə fəaliyyət göstərən ümumi təhsil müəssisələrinin müəllimləri iştirak ediblər.

Mərasim zamanı sertifikatlaşdırma imtahanlarında yüksək nəticə göstərən müəllimlərə TəhsilPlus kartları təqdim olunub.

Qeyd edək ki, TəhsilPlus kartı Təhsilin İnkişafı Fondu, Kapital Bank və “Mastercard” qlobal texnologiyalar şirkəti ilə birgə əməkdaşlıq çərçivəsində həyata keçirilir. Layihə təhsil işçiləri üçün əlavə sosial dəstək imkanlarının yaradılması, onların müxtəlif xidmətlərdən daha sərfəli şərtlərlə faydalanmasına şərait yaradılması və sosial rifahının yüksəldilməsinə töhfə vermək məqsədi daşıyır.

Yaşıl texnologiyalar üzrə innovativ layihələr Təhsilin İnkişafı Fondu tərəfindən dəstəklənib

Təhsilin İnkişafı Fondu innovativ təşəbbüslərin dəstəklənməsi məqsədilə keçirilən “GreenTech III” Startap və Yaşıl Texnologiyalar müsabiqəsinin qaliblərinə pul mükafatları təqdim edib.

“Yaşıl dünya naminə həmrəylik ili” çərçivəsində keçirilən müsabiqədə respublikanın müxtəlif ali təhsil müəssisələrini təmsil edən komandalar alternativ enerji, rəqəmsal həllər, robototexnikalar, inklüziv və sosial innovasiyalar istiqamətləri üzrə layihələr irəli sürüblər.

I yerin qalibləri sırasında Bakı Ali Neft Məktəbinin “Biosenatorlar” komandasının “Eko-Beton”, Milli Aviasiya Akademiyasının “Dəmir qanad” komandasının “Eko-sistemlərin mühafizəsində PUA-ların intellektual nəzarət sistemlərinin tətbiqi” və Azərbaycan Dövlət İqtisad Universitetinin “Ecob” komandasının “Biznes mobil tətbiq” layihələri yer alıb.

II yerə Bakı Dövlət Universitetinin “Nanotech” komandasının “Su hövzələrində mikroplastiklərin toplanması və emalında innovativ texnologiyanın hazırlanması” layihəsi, Mingəçevir Dövlət Universitetinin “AgroRover” komandasının eyniadlı layihəsi və Azərbaycan Dövlət Neft və Sənaye Universitetinin “Co-Brain Medical” komandasının “AI əsaslı tibbi təhlükəsizlik və həyati risk monitorinq sistemi” layihəsi layiq görülüb.

III yerin qalibləri Xəzər Universitetinin “Yüksəliş” komandasının “BioPhyt”, Azərbaycan Texnologiya Universitetinin “Termal instruksiya” komandasının “Termal soyutma sistemi” və Azərbaycan Kooperasiya Universitetinin “Kod21” komandasının “Ağıllı əsa” layihələri olub.

Qeyd edək ki, Təhsilin İnkişafı Fondu universitetlərarası əməkdaşlığın gücləndirilməsi, innovativ təşəbbüslərin təşviqi və dayanıqlı inkişaf istiqamətində həyata keçirilən layihələrin dəstəklənməsini davam etdirir.

TİF-in təşkilatçılığı ilə “Kampusdan karyeraya: AI (Süni İntellekt)” mövzusunda təlim keçirilib

Təhsilin İnkişafı Fondunun (TİF) təşkilatçılığı ilə Azərbaycan Texniki Universitetinin (AzTU) Davamlı İnkişaf Mərkəzində “Code Academy”nin Yaradıcı Süni İntellekt üzrə proqram rəhbəri Ümid Salayev tərəfindən “Kampusdan karyeraya: AI (Süni İntellekt)” mövzusunda təlim sessiyası keçirilib.

Sessiyada TİF-in təqaüd proqramlarının iştirakçıları, eləcə də AzTU tələbələri iştirak ediblər.

Təlim zamanı iştirakçılara universitet mühitindən əmək bazarına keçid prosesində süni intellekt texnologiyalarının rolu, real bazar trendləri və müxtəlif peşələrə təsiri praktiki nümunələr əsasında izah olunub. Eyni zamanda tələbələr gündəlik iş proseslərində istifadə olunan əsas süni intellekt alətləri ilə tanış olub və onların karyera inkişafında tətbiq imkanları barədə məlumat əldə ediblər.

Təlim interaktiv formatda keçib və iştirakçıların sualları cavablandırılıb. Məqsəd gənclərin süni intellekt sahəsində bilik və bacarıqlarını artırmaq, onların gələcək karyera planlamasında daha hazırlıqlı olmalarına dəstək vermək olub.

Təhsilin İnkişafı Fondu Ümumdünya Şəhərsalma Forumu (WUF13) çərçivəsində təşkil olunan tədbirdə iştirak edib

Mayın 19-da Bakı şəhərində keçirilən Ümumdünya Şəhərsalma Forumunun 13-cü sessiyası (WUF13) çərçivəsində Pakistan İslam Respublikasının Pəncab əyalətinin pavilyonunun rəsmi açılış mərasimi keçirilib. Tədbirdə Təhsilin İnkişafı Fondunun nümayəndələri də iştirak edib.

Pəncab əyalətinin Baş naziri Məryəm Nəvaz Şərif pavilyonun açılışını edib və çıxışı zamanı şəhərsalma, dayanıqlı inkişaf, təhsil və qadınların cəmiyyət həyatında rolunun gücləndirilməsi istiqamətində həyata keçirilən təşəbbüslərdən bəhs edib.

Tədbir çərçivəsində Fondun təqaüd proqramlarının iştirakçıları öz uğur hekayələrini bölüşüblər.

“Zərif mühəndislər” təqaüd proqramının məzunu proqramın ona mühəndislik sahəsində inkişaf etmək və yeni imkanlar qazanmaq baxımından yaratdığı şəraitdən danışıb. “Parla” təqaüd və inkişaf proqramının iştirakçısı proqram çərçivəsində əldə etdiyi təcrübə və gələcək hədəfləri barədə məlumat verib. “Hənifə Məlikova adına qızların təhsilinə dəstək” proqramının iştirakçısı isə təhsil imkanlarının genişləndirilməsinin gənc qızların inkişafı baxımından əhəmiyyətini vurğulayıb.

“Qızların təhsilinə dəstək” layihəsinin inkişaf perspektivləri müzakirə olunub

Mayın 12-də Ailə, Qadın və Uşaq Problemləri üzrə Dövlət Komitəsinin sədri Bahar Muradova və Təhsilin İnkişafı Fondunun İdarə Heyətinin sədri Nicat Məmmədli arasında görüş keçirilib.

Görüş zamanı “Qızların təhsilinə dəstək” layihəsinin icra vəziyyəti, əldə olunan nəticələr və gələcək inkişaf perspektivləri ətrafında fikir mübadiləsi aparılıb.

Bahar Muradova qızların təhsil imkanlarının genişləndirilməsinin cəmiyyətin davamlı inkişafı baxımından mühüm əhəmiyyət daşıdığını vurğulayıb. Bildirilib ki, bu istiqamətdə həyata keçirilən təşəbbüslər uzun illər formalaşmış dəyərlərin davamı olmaqla yanaşı, mühüm sosial missiyanı da əhatə edir. O, Dövlət Komitəsi ilə Fond arasında formalaşmış əməkdaşlığın layihənin uğurlu icrasına töhfə verdiyini qeyd edib, gələcəkdə beynəlxalq tərəfdaşlarla əməkdaşlıq imkanlarının genişləndirilməsinin əhəmiyyətini diqqətə çatdırıb.

Nicat Məmmədli Təhsilin İnkişafı Fondu tərəfindən həyata keçirilən təhsilə yönəlmiş sosial layihələr, eləcə də tələbələr və müəllimlər üçün nəzərdə tutulan müxtəlif dəstək mexanizmləri barədə məlumat verib. Bildirilib ki, təhsilalanların və təhsilverənlərin sosial rifahının yaxşılaşdırılması və təhsil imkanlarının genişləndirilməsi Fondun əsas fəaliyyət istiqamətlərindən biridir. Xüsusilə gənc qızların ali təhsilə əlçatanlığının artırılmasına yönəlmiş təşəbbüslərin prioritet istiqamət kimi diqqətdə saxlanıldığı vurğulanıb.

Görüş çərçivəsində layihənin gələcək inkişaf istiqamətləri, əməkdaşlığın genişləndirilməsi və yeni təşəbbüslərin həyata keçirilməsi ilə bağlı müzakirələr aparılıb.

Təhsilin İnkişafı Fondu ali təhsil müəssisələrində keçirilən karyera sərgilərində iştirak edib

1 və 5 may 2026-cı il tarixlərində Azərbaycan Memarlıq və İnşaat Universiteti (AzMİU) və Bakı Dövlət Universiteti (BDU) tərəfindən təşkil olunan karyera sərgilərində Təhsilin İnkişafı Fondu (TİF) təmsil olunub.

1 may tarixində AzMİU-da keçirilən VII karyera sərgisində universitetin rektoru, memarlıq doktoru, professor Gülçöhrə Məmmədova çıxış edərək bildirib ki, bu cür sərgilər tələbə və məzunların peşəkar inkişafında mühüm rol oynayır. Qeyd olunub ki, belə platformalar gənclərə əmək bazarının tələblərini yaxından öyrənmək, ixtisaslarına uyğun qurumlarla birbaşa əlaqə yaratmaq və karyera istiqamətlərini düzgün müəyyənləşdirmək imkanı verir.

TİF-in İdarə Heyətinin sədri Nicat Məmmədli çıxışında Fondun həyata keçirdiyi layihələr və ali təhsil müəssisələri ilə əməkdaşlıq istiqamətində görülən işlər barədə məlumat verib. Xüsusilə beynəlxalq imtahanlara çıxış imkanlarının genişləndirilməsi istiqamətində həyata keçirilən təşəbbüslər diqqətə çatdırılıb. Bildirilib ki, “IELTS imtahanına təşviq” layihəsi çərçivəsində universitetlərə dəstək göstərilir, təhsilalan və təhsilverənlərin imtahan xərcləri Fond tərəfindən qarşılanır.

Sərgidə dövlət və özəl sektorun nümayəndələri iştirak edib, tələbə və məzunlara çoxsaylı vakansiya və təcrübə imkanları təqdim olunub.

5 may tarixində isə BDU-da keçirilən “Peşəkar gələcəyə doğru körpü” adlı ixtisaslaşmış karyera sərgisində TİF stendlə təmsil olunub. Sərgi çərçivəsində Fondun nümayəndələri tələbə və məzunlara təqaüd proqramları, inkişaf imkanları və həyata keçirilən layihələr barədə ətraflı məlumat veriblər.

Qeyd edək ki, Təhsilin İnkişafı Fondu ali təhsil müəssisələri ilə əməkdaşlıq edərək tələbələrin inkişafına yönəlmiş layihələri dəstəkləyir, onların bilik və bacarıqlarının artırılması və beynəlxalq imkanlara çıxışı üçün müxtəlif təşəbbüslər həyata keçirir.

Beynəlxalq İKT-də Qızlar Günü ərəfəsində “Parla” iştirakçıları üçün rəqəmsal bacarıqlar üzrə təlim təşkil olunub

Beynəlxalq İKT-də Qızlar Günü ərəfəsində “Peerstack Academy”nin təşkilatçılığı ilə “Parla” təqaüd və inkişaf proqramının iştirakçıları üçün rəqəmsal bacarıqların gücləndirilməsinə yönəlmiş 2 günlük praktiki təlim proqramı təşkil olunub.

Təlimçi Məryəm Mürşüdlü tərəfindən keçirilən təlimin ilk günündə iştirakçılar “Windows” əməliyyat sisteminin əsasları ilə tanış olub, sistemin formatlanması üzrə praktiki biliklər əldə edərək texniki tapşırıqları müstəqil şəkildə yerinə yetirmək bacarıqlarını inkişaf etdiriblər. Təlimin ikinci günündə isə diqqət süni intellektin düzgün və məsuliyyətli istifadəsinə yönəldilib. İştirakçılar süni intellekt alətlərindən təhsil, məhsuldarlıq və yaradıcılıq məqsədləri üçün effektiv istifadə imkanları barədə məlumat əldə ediblər.

Sonda iştirakçılara təlim proqramını uğurla başa vurduqlarına görə sertifikatlar təqdim olunub.

Qeyd edək ki, “Parla” təqaüd və inkişaf proqramı Təhsilin İnkişafı Fondu ilə “NEQSOL Holding”in birgə əməkdaşlığı çərçivəsində həyata keçirilir və təqaüdlə yanaşı, gənc qızların şəxsi və peşəkar inkişafının dəstəklənməsinə xidmət edir.

Bakı və regional təhsil idarələrinin mühasibləri ilə TəhsilPlus kartına dair interaktiv görüş keçirilib

Bakı və regional təhsil idarələrinin mühasibləri ilə TəhsilPlus kartı barədə interaktiv görüş təşkil olunub.

Görüşdə Təhsilin İnkişafı Fondu (TİF), Kapital Bank, Məktəbəqədər və Ümumi Təhsil üzrə Dövlət Agentliyi və 13 təhsil idarəsinin mühasibləri iştirak edib.

Tədbir çərçivəsində iştirakçılara TəhsilPlus kartının təqdim etdiyi imtiyazlar və bonuslar haqqında ətraflı məlumat verilib. Kartların sifariş prosesi vizual təqdimatla izah olunub, kartların təhvil verilməsi qaydası, istifadəçi tərəfindən aktivləşdirilməsi mərhələləri və təhlükəsizlik qaydaları geniş şəkildə təqdim edilib.

Eyni zamanda kartın təhlükəsiz və düzgün istifadəsi ilə bağlı əsas prinsiplər diqqətə çatdırılıb və iştirakçıların sualları cavablandırılıb. Görüş interaktiv formatda keçirilib və mühasiblərin suallarına xüsusi yer ayrılıb.

Sonda TəhsilPlus kartı ilə bağlı proseslərin daha səmərəli təşkili, idarələrarası koordinasiyanın gücləndirilməsi və istifadəçi təcrübəsinin təkmilləşdirilməsi istiqamətində müzakirələr aparılıb.

ATU-da “GreenTech III” Startap və Yaşıl Texnologiyalar müsabiqəsi keçirilib

Azərbaycan Texnologiya Universiteti (ATU), Təhsilin İnkişafı Fondu (TİF), Azərbaycan Respublikasının Gənclər Fondu (ARGF) və Azərbaycan Tələbə Gənclər Təşkilatları İttifaqının (ATGTİ) birgə təşkilatçılığı, “Eco Az Energy”, “Coca-Cola”, “ATS Food” MMC, “Bakcell” və Birbank-ın dəstəyi ilə “GreenTech III” Startap və Yaşıl Texnologiyalar müsabiqəsinin final mərhələsi keçirilib.

Tədbirdə ATU-nun rektoru Yaşar Ömərov açılış nitqi ilə çıxış edərək bildirib ki, “GreenTech III” müsabiqəsinin əsas məqsədi yaşıl texnologiyalar və ümumilikdə texnoloji yeniliklər sahəsində inkubasiya mühitinin inkişafına dəstək olmaq, ekoloji problemlərə innovativ həllər tapmaq və gəncləri davamlı inkişaf istiqamətində təşviq etməkdir. Rektor əlavə edib ki, müsabiqə ölkə Prezidentinin sərəncamı ilə təsdiq edilmiş “Azərbaycan 2030: sosial-iqtisadi inkişafa dair Milli Prioritetlər” sənədinə uyğun olaraq rəqabətli insan kapitalının və “yaşıl artım”ın təşviqinə töhfə verir.

Daha sonra Gəncə Şəhər İcra Hakimiyyəti başçısının müavini Adil Tağıyev, Bakı Slavyan Universitetinin rektoru Anar Nağıyev, TİF-in İdarə Heyətinin üzvü, şöbə müdiri Ramin Cəfərov, ARGF-in şöbə müdiri Nail Şükürov, ATGTİ-nin sədri Rəşad Zeynalov çıxış edərək bildiriblər ki, müsabiqə gənclərdə ekoloji düşüncə tərzinin formalaşmasına, ekoloji məsuliyyət hissinin artırılmasına mühüm töhfə verir. Qeyd olunub ki, bu kimi təşəbbüslər gənclərə nəzəri biliklərini praktikaya tətbiq etmək, eləcə də komanda şəklində işləmək bacarıqlarını inkişaf etdirmək imkanı yaradır.

Müsabiqədə respublikanın müxtəlif ali təhsil müəssisələrindən 100 komanda “Alternativ enerji və təmiz dünya”, “Rəqəmsal həllər və robototexnika” və “İnklüziv və sosial innovasiyalar” olmaqla 3 kateqoriya üzrə I, II, III və həvəsləndirici yerlər uğrunda mübarizə aparıb.

Yarışın kubokunu kateqoriyalar üzrə müvafiq olaraq Bakı Ali Neft Məktəbinin “Biosenatorlar”, Milli Aviasiya Akademiyasının “Dəmir qanad” və Azərbaycan Dövlət İqtisad Universitetinin “Ecob” komandaları əldə edib.

II yeri Bakı Dövlət Universiteti və Qarabağ Universitetinin “Nanotech”, Mingəçevir Dövlət Universitetinin “Agrorover” və Azərbaycan Dövlət Neft və Sənaye Universitetinin “Co-Brain Medical” komandaları tutub.

III yerə Xəzər Universitetinin “Yüksəliş”, Azərbaycan Texnologiya Universitetinin “Termal İnstruksiya” və Azərbaycan Kooperasiya Universitetinin “Kod21” komandaları layiq görülüb.

Həvəsləndirici yerlərdə isə Bakı Biznes Universitetinin “Pixel”, Sumqayıt Dövlət Universitetinin “SDU2” və Milli Aviasiya Akademiyasının “Synx Research” komandaları qərarlaşıb.

Qalib komandalar sertifikat və hədiyyələrlə təltif olunublar.

Təqaüd proqramlarının iştirakçıları üçün akademik məqalə yazmaq üzrə praktiki təlim sessiyası təşkil olunub

Təqaüd proqramlarının iştirakçıları üçün təşkil olunan akademik məqalə yazmaq üzrə praktiki təlim sessiyası Elm və Təhsil Nazirliyi yanında İctimai Şuranın katibi Günay Əkbərova tərəfindən həyata keçirilib.

Sessiya çərçivəsində iştirakçılara akademik məqalənin əsas xüsusiyyətləri, onun strukturunun düzgün qurulması ətraflı şəkildə izah olunub. Eyni zamanda, akademik üslubun tələbləri, düzgün ifadə formaları və yazı zamanı tez-tez rast gəlinən səhvlər praktiki nümunələr əsasında təqdim edilib.

Təlimin praktik hissəsində iştirakçılar verilmiş mövzular üzrə qısa giriş paraqrafları hazırlayaraq nəzəri biliklərini tətbiq ediblər. Bu proses onların akademik yazı bacarıqlarını inkişaf etdirməyə və daha sistemli yanaşma formalaşdırmağa imkan yaradıb.

Qeyd edək ki, təşkil olunan təlim təqaüd proqramı iştirakçılarının elmi yazı bacarıqlarının gücləndirilməsinə və onların gələcək akademik fəaliyyətinə dəstək məqsədi daşıyıb.