“Baku EduEXPO 2024” təhsil sərgisinin rəsmi açılış mərasimi baş tutub.

Təhsilin İnkişafı Fondu və Kiçik və Orta Biznesin İnkişafı Agentliyinin rəsmi tərəfdaşlığı, Kiçik və Orta Biznes Subyektləri və Klublarının Assosiasiyası və “Baku Design Academy”nin birgə təşkilatçılığı ilə “Yaşıl dünya naminə öyrənək” şüarı ilə “Baku EduEXPO 2024” Beynəlxalq təhsil sərgi-satış yarmarkasının açılış mərasimi keçirilib.

Kiçik və Orta Biznes Subyektləri və Klublarının Assosiasiyasının İdarə Heyətinin sədri Nigar Ələsgərova açılış nitqi ilə çıxış edib. Daha sonra çıxış edən Azərbaycan Respublikası Elm və Təhsil Nazirliyinin Aparat rəhbəri Mətin Kərimli, Təhsilin İnkişafı Fondunun İdarə Heyətinin sədri Elnur Nəsibov, Bakı Dövlət Universitetinin rektoru Elçin Babayev, Azərbaycan Texniki Universitetinin rektoru Vilayət Vəliyev, Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov və Kiçik və Orta Biznesin İnkişafı Agentliyinin İdarə Heyətinin sədrinin müavini Hikmət Məmmədov dövlət-özəl əməkdaşlığının önəmindən, vətəndaş cəmiyyətinin əməkdaşlığı ilə keçirilən layihələrin əhəmiyyətindən və cari layihənin müsbət təsirləri haqqında fikirlərini bölüşüblər.

Dövlət rəsmilərinin, Azərbaycan Dövlət Pedaqoji Universitetinin, Azərbaycan Dövlət Neft və Sənaye Universitetinin, Bakı Slavyan Universiteti və Bakı Ali Neft Məktəbinin rektorlarının qatıldığı sərginin ilk günündə 5000 çox ziyarətçi iştirak edib.

Sərgidə ali təhsil müəssisələri, yerli və beynəlxalq özəl məktəblər,  xarici dil kursları və imtahan mərkəzləri, psixoloji xidmət göstərən mərkəzlər, xaricdə təhsil xidmətləri göstərən qurumlar, uşaq inkişaf mərkəzləri və bağçalar, təlim-tədris mərkəzləri və s. kimi təhsil sektoruna aid şirkətlər təmsil olunub. Sərgi-satış yarmarkası 25 may tarixində də davam edəcəkdir. Tədbirdə müxtəlif ekspertlərin çıxışları və konsert proqramının keçirilməsi nəzərdə tutulub.

“4Sİ Akademiyası” istifadəçilərinin sayı 7000 oldu

Mayın 24-də 1000 nəfər yeni istifadəçi “4Sİ Akademiyası” çərçivəsində Coursera platformasında 6 həftəlik təlimlərə başlayır. Beləliklə layihə başladığı tarixdən (15 sentyabr 2023-cü il) bu günə kimi 7000 nəfər ondan faydalana bilib.

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və ABŞ-nin “Coursera” şirkətinin birgə əməkdaşlığı ilə həyata keçirilən “4Sİ Akademiyası” layihəsi çərçivəsində onlayn təhsil platforması olan “Coursera”-da 4-cü sənaye inqilabı komponentləri olan süni intellekt, böyük verilənlər (Big Data), maşın öyrənməsi, blokçeyn və bulud texnologiyaları, həmçinin, liderlik, kommunikasiya və ingilis dili bacarıqları da daxil olmaqla 40 nüfuzlu universitetin və aparıcı texnologiya şirkətlərinin 800-ə yaxın kursu təqdim olunur.

 “4Sİ Akademiyası”nın istifadəçiləri bu günə kimi 2500-ə yaxın kursu uğurla bitirərək Coursera platformasında sertifikatlar əldə ediblər. Bu günədək “4Sİ Akademiyası” çərçivəsində 4-cü Sənaye İnqilabına hazırlıq istiqaməti üzrə 2415 nəfər, Data Analitikası istiqaməti üzrə 5001 nəfər, Karyera və dil bilikləri üzrə 1528 nəfər, Şəxsi inkişaf üzrə kurslardan isə 1775 nəfər istifadə edib.

Bu ildən Coursera platformasında 2500-dən çox kursu süni intellekt əsaslı Azərbaycan dilində alt yazı ilə də izləmək mümkündür. Bu istifadəçilərin ana dilimizdə yeni biliklər əldə etməsini xeyli asanlaşdıracaq.

Hazırda 4SİM, TİF və Coursera şirkəti bu layihənin Milli Proqram şəklində davam etdirilməsi istiqamətində işlər görür. Milli Proqram çərçivəsində 200000 vətəndaş ödənişsiz olaraq Coursera platformasında öz bilik və bacarıqlarını inkişaf etdirə biləcək.

“Parla” təqaüd və inkişaf proqramı çərçivəsində növbəti təlim keçirilib

“Parla” təqaüd və inkişaf proqramının iştirakçıları üçün “Ünsiyyət bacarıqları” mövzusunda təlim keçirilib.

“NEQSOL Holding”in Korporativ kommunikasiya üzrə meneceri Əli Verdiyev tərəfindən keçirilən təlim zamanı əsas diqqət ünsiyyət bacarıqlarının yaxşılaşdırılması, o cümlədən emosional intellektin, liderliyin və effektiv ünsiyyət üsullarının bəzi aspektlərinə yönəlib.

Təlim tələbə qızlar tərəfindən çox böyük maraqla qarşılanıb, belə ki, tələbə qızların əksəriyyəti diqqətin yumşaq bacarıqlara yönəlməsini vacib hesab ediblər. “Bu sessiyada emosional intellekt və liderliklə bağlı əldə etdiyimiz məlumat və biliklər bizə öz təhsilimizdə  və peşəkar həyatımızda məqsədlərə nail olmağa çox kömək edəcək”, deyə tələbə qızlardan biri vurğulayıb.

“Parla” təqaüd və inkişaf proqramı çərçivəsində tələbə qızlara təqaüdlə yanaşı, onların inkişaf etdirilməsi üçün mentorluq və təcrübə keçmə imkanları, habelə NEQSOL Akademiyası vasitəsilə beynəlxalq təhsil resurslarına, o cümlədən “Enocta Premium Catalogue”, “Skillsoft” və ADA Universitetinin kurslarına çıxış təmin edilir. Onlayn kurslarla yanaşı “Parla” proqramının iştirakçıları “Roof Academic Training” ilə birlikdə artıq ingilis dili və IELTS dərslərinə başlayıb.

Xatırladaq ki, “Parla” təqaüd və inkişaf proqramı Təhsilin İnkişafı Fondu və “NEQSOL Holding”in birgə əməkdaşlığı çərçivəsində həyata keçirilir. Proqrama tərəflərin birgə müəyyən etdiyi meyarlar əsasında 674 namizəd arasından 50 uğurlu iştirakçı seçilib.

Bakı Mühəndislik Universitetində “CareerFest BEU 2024” adlı karyera festivalı keçirilib

Bakı Mühəndislik Universitetində (BMU) “CareerFest BEU 2024” adlı karyera festivalı təşkil olunub. Azərbaycanın bütün ali təhsil ocaqlarının tələbə və məzunları üçün açıq olan festivalda 104 nüfuzlu şirkət tərəfindən 1000-dən artıq aktiv vakansiya və təcrübə proqramları təqdim edilib. Tədbirdə Təhsilin İnkişafı Fondunun, Dövlət Məşğulluq Agentliyinin, Təhsil Tələbə Krediti Fondunun və digər qurumların rəhbər şəxsləri iştirak ediblər.

Festivalın açılışında çıxış edən BMU-nun rektoru Yaqub Piriyev dövlətin gənclərin məşğulluğunun təminatı istiqamətində həyata keçirdiyi mühüm tədbirlərə diqqət çəkib və Prezident İlham Əliyev tərəfindən bu məqsədlə təsdiq olunmuş dövlət proqramlarının uğurla gerçəkləşdirildiyini bildirib. Karyera festivalının tələbə və məzunlar üçün önəmini vurğulayan rektor belə tədbirlərin həm mövcud əmək bazarındakı tələbat barədə məlumat əldə etmək, həm də iş, təcrübə imkanları, müxtəlif şirkətlərin insan resursları üzrə mütəxəssisləri ilə birbaşa ünsiyyət qurmaq baxımından mühüm rol oynadığını söyləyib.

Təhsilin İnkişafı Fondunun İdarə Heyətinin sədri Elnur Nəsibov təhsil müəssisəsinin uğurunun əsas göstəricilərindən birinin əmək bazarında onun məzunlarına olan tələbatlılıq səviyyəsi ilə ölçüldüyünü bildirib. O, bugünkü karyera festivalına çoxsaylı işəgötürənin qatıldığını və bunun BMU-da verilən ali təhsilin yüksək qiymətləndirilməsinin göstəricisi olduğunu fikirlərinə əlavə edib. Fondun tələbələrin uğurlu karyera qurması və digər istiqamətlərdə həyata keçirdiyi müxtəlif layihələri nəzərə çatdıran Elnur Nəsibov sahibkarlarla ali təhsil müəssisələri arasında əlaqələrin daha da gücləndirilməsinin vacib olduğunu deyib.

Dövlət Məşğulluq Agentliyinin İdarə Heyətinin sədri Mustafa Abbasbəyli təmsil etdiyi qurumun il ərzində əhalinin məşğulluğunun təmin edilməsi istiqamətində gördüyü çoxşaxəli tədbirlər barədə məlumat verib. Bu gün əmək bazarında çox ciddi transformasiyaların baş verdiyini, yanaşmaların dəyişdiyini deyən Mustafa Abbasbəyli tələbə və məzunlara bu dəyişikliklərə uyğunlaşmaqla bağlı tövsiyələrini çatdırıb.

Sonra festivalda Kiçik və Orta Biznes Subyektləri və Klublarının Assosiasiyasının sədri Nigar Ələsgərova, Azərbaycan Korporativ İş Adamları Birliyi idarə heyətinin sədri Şirin Şərifov, “Norm ASC”-nin insan resursları üzrə kordinatoru Ruslan Osmanlı çıxış ediblər. Çıxışlarda işəgötürənlərlə birbaşa ünsiyyətin qurulmasına əlverişli imkanlar yaradan karyera festivalının rolundan, həmçinin ali təhsil ocaqları ilə sənaye müəssisələri arasında əməkdaşlığın genişləndirilməsinin əhəmiyyətindən danışılıb.

Digər universitetlərdən 2500-dən artıq məzun və tələbənin qeydiyyatdan keçdiyi, ümumilikdə 5000-ə yaxın iştirakçının qatıldığı karyera festivalı çərçivəsində interaktiv fəaliyyətlər, oyunlar, əyləncəli təcrübələr təşkil olunub, tanınmış müğənnilərin ifasında musiqi nömrələri tədqim edilib.

“Zərif mühəndislər” təqaüd proqramının qaliblərinin adları açıqlandı

Təhsilin İnkişafı Fondu və STP Şirkətlər Qrupunun birgə əməkdaşlığı çərçivəsində həyata keçirilən “Zərif mühəndislər” xanımların inkişafı proqramının qaliblərinin adları açıqlandı.

Layihəyə ümumilikdə 573 müraciət daxil olub. 105 nəfərin müraciət ərizəsi təşkilat komitəsi tərəfindən baxıldıqdan sonra, müsahibə mərhələsinə vəsiqə qazanıb. Həmin mərhələni uğurla yekunlaşdıran 50 nəfər isə “Zərif mühəndislər” təqaüd proqramının qalıbi olub.

Qaliblər siyahısı ilə keçidə daxil olaraq tanış ola bilərsiniz: https://bit.ly/3Ka891t

“Zərif mühəndislər” xanımların inkişafı proqramının başlıca məqsədi yüksək akademik göstəricilərə malik, texniki sahələr üzrə fərqli ixtisaslarda təhsil alan tələbə qızların təhsilinə, onların peşəkar mütəxəssis kimi yetişdirilməsinə dəstək göstərməkdir.

Layihə çərçivəsində qalib gələn 50 nəfər qız tədris ilinin sonuna qədər STP Şirkətlər Qrupunun xüsusi təqaüdünü almaq imkanını əldə edəcəklər. Təqaüdlə yanaşı, qızlara mentorluq, təcrübə və təlimlər təşkil olunacaqdır.

Namizədlərin seçimi onlayn müraciət, qiymətləndirmə və müsahibə mərhələsindən ibarət olub. Seçim zamanı akademik göstəricilər və motivasiya məktubu nəzərə alınıb. Yekun seçimdə müsahibə mərhələsində göstərilən nəticə əsas götürülüb. Müsahibə zamanı namizədlərə hədəfləri, sosial vəziyyəti, fəaliyyəti, tələbə həyatı ilə bağlı suallar verilib.

“Maya Hacıyeva adına İKT bacarıqları” təqaüd proqramının qaliblərinin adları açıqlandı

“Women in Tech” təşkilatının Azərbaycan nümayəndəliyi və Təhsilin İnkişafı Fondunun birgə təşkilatçılığı ilə “Maya Hacıyeva adına İKT bacarıqları” təqaüd proqramının qaliblərinin adları açıqlandı.

Layihəyə ümumilikdə 482 müraciət daxil olub. Müraciət ərizələri təşkilat komitəsi tərəfindən baxılaraq, uyğun namizədlər (115 nəfər) tərəfdaş tədris müəssisələri tərəfindən təşkil edilən müvafiq proqram üzrə imtahanda iştirak edib. İmtahandan məqbul nəticə əldə edən şəxslər yekun mərhələdə – müsahibədə iştirak haqqı qazanıblar. 70 nəfər imtahandan məqbul nəticə əldə edən şəxslər yekun müsahibə mərhələsinə qoşulub. Həmin mərhələni uğurla yekunlaşdıran 30 nəfər isə təqaüd almaq imkanı qazanıb.

30 nəfər qalibin 7-si işsiz, 8-i işləyən şəxs, 17 nəfər isə tələbə adını daşıyır.

7 nəfər Azərbaycan Dövlət Neft və Sənaye Universitetinin, 3 nəfər Azərbaycan Dövlət Pedaqoji Universitetinin, 2 nəfər Milli Aviasiya Akademiyasının, 1 nəfər Dövlət İdarəçilik Akademiyası, 1 nəfər isə Azərbaycan Dillər Universitetinin tələbəsidir.

Qaliblər siyahısı ilə keçidə daxil olaraq tanış ola bilərsiniz: https://bit.ly/3Rhtf1Z

Xatırladaq ki, təqaüd proqramının təsis məqsədi qadınların İnformasiya Texnologiyaları və Yüksək Texnologiyalar üzrə bilik və bacarıqlarının artırılmasıdır. Layihə Azərbaycan vətəndaşı olan 15-40 yaş arası xanımların İKT sahəsində yeni bilik və bacarıqlar əldə etməsinə yönəlmişdir.

Təqaüd proqramı müasir texnologiyalar sahəsində ixtisas təlimləri verən yerli kurs və akademiyalarda tədris haqqını qarşılamaqla, xanımların əmək bazarında ən çox ehtiyac duyulan peşələr üzrə biliklərə yiyələnmələrinə şərait yaradır.

Təhsilin İnkişafı Fondunun nümayəndə heyəti Türkiyə Respublikasında səfərdə olub

Təhsilin İnkişafı Fondunun nümayəndə heyəti Birləşmiş Millətlər Təşkilatının Avropa İqtisadi Komissiyasının dövlət-özəl tərəfdaşlığı çərçivəsində VIII Forumunda iştirak etmək məqsədilə Türkiyə Respublikasında səfərdə olub.

Hibrid formatında baş tutan foruma dünyanın müxtəlif ölkələrindən 600-dan çox iştirakçı qatılıb. 3 gün davam edən forumda “maraqlı tərəflərin cəlb edilməsi”, “rəqəmsal transformasiya”, “qadınların səlahiyyətləndirilməsi”, “kiçik miqyaslı dövlət-özəl tərəfdaşlıqları” və digər mövzular üzrə 28 sessiya keçirilib. Yunanıstan və Qətərdə dövlət-özəl tərəfdaşlığı çərçivəsində məktəb və yataqxanaların inşa və təmir edilməsi istiqamətində həyata keçirilən layihələrin nümunəsində geniş təqdimatlar edilib.

Səfər çərçivəsində, həmçinin Türkiyənin Bahçeşehir Universitetinin CO-OP karyera mərkəzində görüş keçirilib. Görüşün məqsədi Türkiyə təcrübəsi, karyera mərkəzinin fəaliyyəti ilə yaxından tanış olmaq, mövcud universitet-sənaye işbirliyi, təhsil və iqtisadiyyatın inteqrasiyası mövzularına dair məlumat və mübadilə proqramının həyata keçirilməsi olub.

CO-OP karyera mərkəzi modelinin Türkiyənin Bahçeşehir Universiteti tərəfindən tətbiq edildiyini və geniş marağa səsəb olduğunu bildirən mərkəzin direktoru Bahri Toper, Təhsilin İnkişafı Fondunun birgə əməkdaşlığı nəticəsində bu təhsil modelinin Azərbaycan Universitetlərində də qurula biləcəyini vurğulayıb.

Təhsilin İnkişafı Fondunun İdarə Heyətinin sədr müavini Xanım Daşdəmirova görüşdən məmnunluğunu bildirərək, Fondun fəaliyyəti,  hazırda icra olunan, eyni zamanda yaxın gələcəkdə həyata keçiriləcək layihələr haqqında geniş məlumat verib. Universitet-sənaye tərəfdaşlığı çərçivəsində Bakının iki ali təhsil müəssisəsində fəaliyyət göstərən Davamlı İnkişaf Mərkəzi haqqında bəhs edən X.Daşdəmirova, yaxın zamanda regionlarda da yeni Davamlı İnkişaf Mərkəzlərinin yaradılacağını bildirib. Bu mərkəzlərin dövlət-özəl əməkdaşlığı çərçivəsində tələbələrin bilik və bacarıqlarının artırılması, onlara karyera və inkişaf dəstəyinin göstərilməsi məqsədilə yaradıldığı qeyd olunub.

“Təhsilin inkişafında innovativ metodlar II” müsabiqəsi qaliblərinin mükafatlandırılması mərasimi keçirilib

Mayın 14-də Təhsilin İnkişafı Fondunun təşkilatçılığı, Elm və Təhsil Nazirliyinin dəstəyi və “Lenovo Global Technology Azerbaijan” MMC-nin tərəfdaşlığı ilə ümummilli lider Heydər Əliyevin anadan olmasının 101-ci ildönümünə həsr olunmuş “Təhsilin inkişafında innovativ metodlar II” müsabiqəsinin qaliblərinin mükafatlandırılması mərasimi keçirilib.

Tədbirdə Elm və Təhsil Nazirliyinin nümayəndələri, ali təhsil müəssisələrinin rəhbər şəxsləri, özəl və dövlət qurumlarının nümayəndələri və tələbələr iştirak ediblər.

Azərbaycan Texniki Universitetinin rektoru Vilayət Vəliyev açılış nitqi ilə çıxış edərək qonaqları salamlayaraq, Təhsilin İnkişafı Fondunun təşəbbüsü ilə keçirilən müsabiqəni tələbələrin potensialının qiymətləndirilməsi istiqamətində təqdirəlayiq addım hesab edib.

Çıxış edən Təhsilin İnkişafı Fondunun İdarə Heyətinin sədri Elnur Nəsibov “Təhsilin inkişafında innovativ metodlar” müsabiqəsinin keçirilməsində əsas məqsədin Ulu Öndərin elmə, təhsilə və gənclərə qayğısını rəhbər tutaraq, tələbələrin təhsilin inkişafına töhfə verəcək ideyalarının dəstəklənməsi olduğunu qeyd edib.

Finalçılar ideyalarını tədbir iştirakçılarına təqdim etdikdən sonra 7 komanda və tələbə müsabiqənin final mərhələsində iştirakına görə Azərbaycan Texniki Universitetinin rektoru Vilayət Vəliyev tərəfindən təltif ediliblər. Tələbələr Bakı Dövlət Universitetinin tələbəsi Kəmalə Məmmədova, Bakı Mühəndislik Universitetinin (BMU-İNHA İkili Diplom Proqramının) tələbəsi Murad İbrahimov, Azərbaycan Dövlət Neft və Sənaye Universitetinin tələbəsi Kamran Murtuzov, Dövlət Gömrük Komitəsinin Akademiyasının tələbəsi Aysel Məmmədova, Bakı Ali Neft Məktəbinin tələbələri Aydan Eyvazova, Fidan Ağakişiyeva, Nübar Həsənquliyeva, Rəvan Xıdırov, Tamerlan Ağayev, Əkbər Bünyadzadə, Leyla Quliyeva, İranə Hüseynzadə və Çingiz Məmmədovdur.

Tədbir 4 nömrəli Uşaq-Gənclər İnkişaf Mərkəzinin şagirdlərinin xor və rəqs nömrəsi ilə davam edib.

Daha sonra 1-ci, 2-ci və 3-cü yerlərin sahibləri elan olunub, qaliblər mükafatlandırılıblar. 1-ci yerin qalibləri “Olympus” təqdimatı ilə Bakı Ali Neft Məktəbinin tələbələri Tamerlan Ağayev və Əkbər Bünyadzadə, 2-ci yerin sahibləri “LearnEd” təqdimatı ilə Bakı Mühəndislik Universitetinin (BMU-İNHA İkili Diplom Proqramının) tələbələri Ayxan Ələkbərov, Səid Quluzadə və Nihad Məhərrəmov olublar. 3-cü yerə “Cücələrim” təqdimatı ilə Bakı Ali Neft Məktəbinin tələbələri Aydan Eyvazova, Fidan Ağakişiyeva və Nübar Həsənquliyeva layiq görülüblər.

Tədbirin yekununda müsabiqənin həlledici mərhələsində böyük rolu olan münsiflər heyətinin üzvləri Təhsilin İnkişafı Fondu tərəfindən mükafatlandırılıbar.

Azərbaycan Banklar Assosiasiyası və Təhsilin İnkişafı Fondu arasında görüş keçirilib

Təhsilin İnkişafı Fondunun rəhbər heyəti Azərbaycan Banklar Assosiasiyasının qonağı olub.

ABA-nın prezidenti Zakir Nuriyev, icraçı direktoru Yunus Abdulov, Baş iqtisadçısı Əzizağa Haxverdiyev, eyni zamanda TİF-in İdarə Heyətinin sədri Elnur Nəsibov və Fondun İdarə Heyətinin sədrinin müavini Xanım Daşdəmirova görüşdə iştirak ediblər.

Azərbaycan Banklar Assosiasiyasının prezidenti Zakir Nuriyev 1990-cı ildə kommersiya bankları tərəfindən təsis edilən ABA-nın əsas məqsədinin üzv-təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə dəstək göstərmək və fəaliyyətlərini əlaqələndirməkdən ibarət olduğunu bildirib. Z.Nuriyev hazırda, 23 bank və 2 qeyri-bank kredit təşkilatı, 4 digər təşkilat olmaqla, ümumilikdə 29 təşkilatın ABA-nın üzvü olduğunu diqqətə çatdırıb.

Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyət istiqamətləri haqqında məlumatı diqqətə çatdıraraq bildirib ki, qurumun məqsədi ölkəmizdə təhsil sisteminin inkişafına yönəlmiş proqram və layihələri dəstəkləmək, təhsilin və iqtisadiyyatın inteqrasiyasına və gücləndirilməsinə töhfə vermək, dövlət təhsil müəssisələrinin infrastrukturunun inkişafı ilə bağlı proqramlar həyata keçirməkdir. Təhsilin İnkişafı Fondunun həm dövlət, həm özəl şirkətlər ilə əməkdaşlığa açıq olduğunu qeyd edən sədr, tərəfdaşlarla birgə sosial və biznes yönlü layihələrin həyata keçirildiyini vurğulayıb.

Görüş çərçivəsində bank sektoru üçün kadr hazırlığı imkanları, həmçinin də maliyyə savadlığının artırılması məsələləri, ümumilikdə ABA və TİF arasında əməkdaşlıq imkanları müzakirə edilib.

“Zərif mühəndislər” təqaüd proqramının müsahibə mərhələsinə dəvət olunacaq qızların adları açıqlandı

Təhsilin İnkişafı Fondu və STP Şirkətlər Qrupu tələbə qızlar üçün “Zərif mühəndislər” təqaüd proqramının müsahibə mərhələsinə dəvət olunacaq qızların adları açıqlandı.

Siyahı ilə keçidə daxil olaraq tanış ola bilərsiniz – https://shorturl.at/nMY68