Author: redaktr

Azərbaycan Milli Konservatoriyası ilə Təhsilin İnkişafı Fondu (TİF) arasında “TələbəPlus” çərçivəsində əməkdaşlıq müqaviləsi imzalanıb.

13 yanvar 2025-ci il tarixində baş tutan imzalama mərasimində AMK və TİF-in rəhbərliyi, Kapital Bankın nümayəndələri, AMK-nın Elmi Şura üzvləri və professor-müəllim heyəti iştirak ediblər.

Görüş zamanı AMK-nın rektoru – əməkdar incəsənət xadimi, sənətşünaslıq doktoru, professor Kamilə Dadaş-zadə Təhsilin İnkişafı Fondu, Kapital Bank, və “VISA” beynəlxalq ödəmə texnologiyaları şirkətinə minnətdarlığını bildirib, vahid tələbə kartlarının istifadəyə verilməsinin təhsil sahəsində mühüm yeniliklərə imza atacağını, tələbələrin akademik və sosial imkanlarını genişləndirməyə kömək edəcəyini qeyd edib.

Konservatoriyanın bu il öz 25 illik yubileyi ərəfəsində olduğunu vurğulayan rektor, dörddə bir əsrdir fəaliyyət göstərən təhsil ocağının min əsrlik musiqi tarixçəsini tədris etməklə yaşatdığını bildirib.

Çıxışın ardından Təhsilin İnkişafı Fondunun fəaliyyəti və layihələrini əks etdirən videoçarx izlənilib.

Təhsilin İnkişafı Fondunun İdarə Heyətinin sədri Elnur Nəsibov öz çıxışında “TələbəPlus”un imtiyazlarından bəhs edib və AMK ilə əməkdaşlıqdan məmnun olduğunu vurğulayıb. Elnur Nəsibov “TələbəPlus” kartının sahiblərinin alış-veriş mərkəzlərində, müxtəlif iaşə obyektlərində, eləcə də, Mədəniyyət Nazirliyi ilə əldə olunan ilkin razılaşmaya əsasən, muzeylər, qalereyalar və sərgi salonlarında  xüsusi güzəştlər əldə edəcəklərini vurğulayıb.

Müzakirələrdən sonra AMK-nın rektoru Kamilə Dadaş-zadə və TİF-in İdarə Heyətinin sədri Elnur Nəsibov “TələbəPlus” layihəsi çərçivəsində əməkdaşlıq müqaviləsinə imza atıblar.

Azərbaycan Dövlət İqtisad Universitetində (UNEC) Təhsilin İnkişafı Fondu (TİF) və Təhsildə Keyfiyyət Təminatı Agentliyinin (TKTA) rəhbərləri və əməkdaşları, eləcə də VISA və Kapital Bankın nümayəndələri ilə görüş keçirilib.

Görüşün məqsədi UNEC-də “TələbəPlus” və “IELTS imtahanına təşviq” layihələrinə dair müqavilələrin imzalanması olub.

Rektor professor Ədalət Muradov qonaqları salamlayaraq, “UNEC” brendinin yaradılması, tələbə məmnuniyyətinin təmin olunması, eləcə də müəllim və tələbələrin ingilis dili bacarıqlarının daha da inkişaf etdirilməsi istiqamətlərində görülmüş işlərdən danışıb. Rektor 2015-ci ildən təsdiqlənmiş “UNEC” brendinin dünyanın bir çox ölkələrində tanındığını diqqətə çatdıraraq, bu istiqamətdə qarşıda duran hədəflərdən bəhs edib. Həmçinin UNEC-də APTİS imtahanlarında bütün bacarıqlar üzrə “C” və IELTS nəticəsi 8.0 olan ingilis dili müəllimlərinin əmək haqlarının 15 faiz, 8.5 olanların isə 30 faiz artırıldığını bildirib. Prof.Ədalət Muradov IELTS nəticəsi 7.0 və daha yuxarı olan tələbələrin isə XDİAK fənlərindən azad olaraq, 100 balla qiymətləndirildiklərini diqqətə çatdırıb.

Təhsilin İnkişafı Fondunun İdarə Heyətinin sədri Elnur Nəsibov Fondun təhsilin inkişafına yönəlmiş proqramlarından, o cümlədən “TələbəPlus” və “IELTS imtahanına təşviq” layihələrinin önəmindən bəhs edib. O, “TələbəPlus” layihəsi çərçivəsində Mədəniyyət Nazirliyinin tabeliyində olan muzey və teatrlarda, eləcə də alış-veriş və iaşə obyektlərində tələbələrin güzəştlər əldə edə biləcəyini və gələcəkdə bu siyahının daha da genişləndiriləcəyini qeyd edib.

“IELTS imtahanına təşviq” layihəsindən söz açan TİF sədri bildirib ki, layihə elmi-pedaqoji heyətin və təhsilalanların ingilis dili biliklərinin artırılmasını təşviq etmək məqsədilə reallaşdırlılır. UNEC-in müəllim və tələbələri 6.5 və daha yüksək IELTS nəticəsi əldə etdikləri halda, onların ödənişlərinin geri qaytarılması Fond tərəfindən təmin ediləcək.

Təhsildə Keyfiyyət Təminatı Agentliyinin İdarə Heyətinin sədri Tural Əhmədov “IELTS imtahanına təşviq” layihəsinin əhəmiyyətindən söz açıb. Tələbələrin xarici dil biliklərinin olmasının onların beynəlxalq akademik mühitdə daha rahat fəaliyyət göstərmələrinə imkan yaratdığını, eləcə də IELTS sertifikatı qazanmış gənclərin yerli və beynəlxalq əmək bazarında rəqabətqabiliyyətli kadrlar ola biləcəyini diqqətə çatdırıb.

Çıxışlardan sonra “TələbəPlus” və “IELTS imtahanına təşviq” layihələri çərçivəsində ikitərəfli və üçtərəfli birgə əməkdaşlıq müqavilələri imzalanıb.

10 yanvar 2025-ci il tarixində Bakı Avrasiya Universiteti (BAAU) ilə Təhsilin İnkişafı Fondu (TİF) arasında “TələbəPlus” layihəsi ilə bağlı əməkdaşlıq müqaviləsi imzalanıb. Müqaviləni BAAU-nun rektoru dosent Səyavuş Qasımov və TİF-in İdarə Heyətinin sədri Elnur Nəsibov imzalayıblar.

İmzalanma mərasimində TİF-in İdarə Heyətinin sədri Elnur Nəsibov, İdarə Heyəti sədrinin müavini Xanım Daşdəmirova, Layihələrin idarə olunması şöbəsinin müdiri Rəsul Həşimov, şöbənin baş mütəxəssisi Aysel Məhərrəmova, Kapital Bankın Korporativ satış meneceri Nərmin İsayeva, “VISA” şirkətinin Biznesin inkişafı üzrə baş meneceri Mahmud Səfərov və BAAU-nun akademik-inzibati heyəti iştirak edib.

İmzalanma mərasimini giriş nitqi ilə açıq elan edən rektor universitetin maddi-texniki bazası, professor-müəllim heyəti, tələbə kontingenti, qəbul aparılan ixtisaslar və təhsil səviyyələri haqqında geniş məlumat verib. O, BAAU-nun beynəlmiləlləşməsi və beynəlxalq layihələrdə uğurlu iştirakı barədə də nümayəndə heyətini məlumatlandırıb. S.Qasımov tələbələrə sosial dəstək xarakterli ideya və təşəbbüslərin həmişə vacib olduğunu, eyni zamanda bu cür təşəbbüslərin və layihələrin reallaşdırılmasının əhəmiyyətini vurğulayıb.

E.Nəsibov çıxışında TİF və onun fəaliyyəti haqqında ətraflı məlumat verib. O, əlavə edib ki, BAAU ilk özəl ali təhsil müəssisəsi kimi sözügedən layihənin tərəfdaşı olur və bu layihə çərçivəsində təqdim olunacaq vahid tələbə kartları, onlardan istifadə təhsil sahəsində mühüm yeniliklər qazandırmaqla yanışı universitetin tələbələrinə faydalı olacaq. Bu yeniliklər həmçinin tələbələrin həm akademik, həm də sosial imkanlarını genişləndirəcəyinə imkan yaradacaq. Sədr təhsilalanlar arasında aparılan sorğulara, tələbatlara, həmçinin onların sosiallaşması baxımından əhəmiyyətli olan məkanlarda tələbələr üçün xüsusi güzəştlər tətbiq olunacağını, 200-dən artıq şirkətlə razılığa gəlindiyini diqqətə çatdırıb. E.Nəsibov tələbələr üçün nəzərdə tutulan güzəştlərin əhatə dairəsinin gələcəkdə daha da genişləndirilməsi istiqamətində işlərin aparıldığını tədbir iştirakçılarına çatdırıb.

Sonra, TİF-in fəaliyyətini əks etdirən videoçarx nümayiş etdirilib və X.Daşdəmirova “TələbəPlus” layihəsi haqqında təqdimatla çıxış edib, vahid tələbə kartlarının üstünlükləri, tələbələrə edilən güzəştlər və funksionallıqları barədə məlumat verib. Çıxışlar zamanı BAAU ilə TİF arasında gələcək əməkdaşlıq istiqamətləri də müzakirə olunub.

Müzakirələrdən sonra BAAU-nun rektoru dosent Səyavuş Qasımovla TİF-in İdarə Heyətinin sədri Elnur Nəsibov “TələbəPlus” layihəsi çərçivəsində əməkdaşlıq müqaviləsini imzalayıblar. İmzalanma mərasimindən sonra TİF-in nümayəndə heyəti universitetin maddi-texniki bazası ilə tanış olublar.

Qeyd edək ki, TİF-in Kapital Bank və “Visa” beynəlxalq ödəmə texnologiyaları şirkəti ilə əməkdaşlığı çərçivəsində həyata keçirilən “TələbəPlus” layihəsi vahid tələbə kartlarının tətbiq edilməsini nəzərdə tutur. Sözügedən kart tələbələrə sosial dəstək məqsədilə hazırlanmış, müxtəlif xidmət və iaşə obyektlərində də xüsusi güzəştlərin əldə edilməsinə imkan verəcəkdir.

Təhsilin İnkişafı Fondu ilə Qırmızı Ürəklər Fondunun birgə əməkdaşlığı çərçivəsində həyata keçirilən “Qırmızı Ürəklər Təhsil Təqaüdü” proqramının müsahibə mərhələsinə dəvət olunacaq tələbələrin adları açıqlandı.

Siyahı ilə keçidə daxil olaraq tanış ola bilərsiniz – bit.ly/42q1ri2

Qeyd edək ki, təqaüd proqramına ümumilikdə 306 nəfər müraciət edib, bütün seçim şərtlərinə cavab verən 69 namizəd müsahibə mərhələsinə vəsiqə qazanıb.

Azərbaycan Milli Konservatoriyasında Təhsilin İnkişafı Fondu ilə görüş keçirilib. Görüşün məqsədi qurumlar arasında tanışlıq və əməkdaşlıq imkanlarının müzakirəsi olub. Görüşdə Azərbaycan Milli Konservatoriyasının rektoru Kamilə Dadaş-zadə, Təhsilin İnkişafı Fondunun İdarə Heyətinin sədri Elnur Nəsibov, Fondun və Konservatoriyanın nümayəndələri iştirak ediblər.

Azərbaycan Milli Konservatoriyasının rektoru Kamilə Dadaş-zadə qonaqları salamlayıb və Konservatoriyada görməkdən məmnun olduğunu bildirib. Rektor Konservatoriyanın 23 illik fəaliyyəti haqqında məlumat verib, universitetin strateji məqsədləri və hədəflərindən danışıb. O, Konservatoriyanın milli musiqi irsinin qorunması və inkişaf etdirilməsi istiqamətində gördüyü işlərə xüsusi diqqət çəkib.

Təhsilin İnkişafı Fondunun İdarə Heyətinin sədri Elnur Nəsibov Fondun yaradılması, məqsədləri, missiyası barəsində ətraflı məlumat verib. Sədr ali təhsil müəssisələri ilə dövlət-özəl tərəfdaşlığı çərçivəsində əməkdaşlıq imkanları barəsində bəhs edib. Elnur Nəsibov bu əməkdaşlığın milli təhsil sisteminin inkişafına töhfə verəcəyinə əminliyini ifadə edib.

Görüşdə tərəflər arasında əməkdaşlıq perspektivləri, birgə layihələrin həyata keçirilməsi və tələbələr üçün yeni imkanların yaradılması mövzularında geniş müzakirələr aparılıb.

Təhsilin İnkişafı Fondu ilə “NEQSOL Holding”in birgə əməkdaşlığı çərçivəsində həyata keçirilən “Parla” təqaüd və inkişaf proqramının qaliblərinin adları açıqlandı.

Qaliblərin siyahısı ilə buradan tanış ola bilərsiniz.

Qeyd edək ki, “Parla” təqaüd və inkişaf proqramına ümumilikdə 791 nəfər müraciət edib, bütün seçim şərtlərinə cavab verən 128 namizəd müsahibə mərhələsinə vəsiqə qazanıb. 120 tələbə qız hədəfləri, sosial vəziyyəti, dərsdənkənar fəaliyyətləri, tələbə həyatı ilə bağlı müsahibə olunub. Bütün mərhələlərdən uğurla keçən 50 tələbə qız “Parla” təqaüd və inkişaf proqramının qalibi olub. 

Dekabrın 23-də “Ədibin Evi” tərəfindən “Azərbaycan müəllimi” qəzetinin 90 illik yubileyi münasibətilə təşkil edilən “Müəllimliyin insanlıq fəlsəfəsi” adlı esse müsabiqəsinin qaliblərinin mükafatlandırılması mərasimi keçirilib.

“Ədibin Evi”ndə baş tutan tədbirdə “Ədibin Evi” Ədəbiyyata Dəstək Fondunun İcraçı direktoru Şəfəq Mehrəliyeva açılış nitqi ilə çıxış edib. Şəfəq Mehrəliyeva bildirib ki, Azərbaycan ədəbiyyatının görkəmli nümayəndəsi, yazıçı, müəllim, filologiya elmləri doktoru Mir Cəlal Paşayevin pedaqoji irsinə həsr olunmuş müsabiqənin əsas məqsədi müəllimlik üçün zəruri olan keyfiyyətlər – pedaqoji etika, empatiya və şəfqət duyğularının əhəmiyyətinin təbliği, müxtəliflik və inklüzivliyin, eləcə də peşəkar pedaqoji icma arasında tənqidi və yaradıcı düşüncə tərzinin təşviqi olub. 

Daha sonra Mir Cəlal Paşayevin “insanlıq fəlsəfəsi” ideyası barədə danışan “Ədibin Evi”nin həmtəsisçisi, Bakı Dövlət Universitetinin müəllimi, professor Təhsin Mütəllimov Mir Cəlal Paşayevin  elmi-pedaqoji məktəbinin fərqi barədə söz açıb. 
Xalq şairi Nəriman Həsənzadə də çıxış edərək müəllimi Mir Cəlal Paşayev haqda xatirələrini bölüşüb, müsabiqə iştirakçılarına uğurlar arzulayıb.

Münsiflər heyətinin rəyini ifadə edən Təhsil İnstitutunun böyük elmi məsləhətçisi, pedaqogika üzrə fəlsəfə doktoru, dosent Asif Hacıyev müsabiqəyə təqdim olunan esselərin Azərbaycanın geniş coğrafiyasını təmsil etdiyini qeyd edib. Əlavə edib ki, yazılarda həssas janr xətti ilə yanaşı, şagird-müəllim münasibətləri, müasir tədrisdə aktual məsələlər, həmçinin təhsildə beynəlxalq yanaşmaların təhlili də yer alıb.

Bildirilib ki, müsabiqəyə təqdim olunan 300-ə yaxın esse tanınmış təhsil mütəxəssislərindən ibarət münsif heyəti tərəfindən qiymətləndirilib.

Çıxışlardan sonra qaliblər mükafatlandırılıb.

Mükafatları ADA Universitetinin rektoru, “Ədibin Evi” Himayəçilik Şurasının üzvü Hafiz Paşayev, Təhsilin İnkişafı Fondunun İdarə Heyətinin sədri Elnur Nəsibov, “Azərbaycan müəllimi” qəzetinin baş redaktoru Sarvan İbrahimov təqdim ediblər.

Mükafatlandırmadan sonra tədbirdə iştirak edən elm və təhsil naziri Emin Əmrullayev təbrik nitqi ilə çıxış edib. Nazir müəllim peşəsinin aliliyi haqda danışaraq əlavə edib ki, bu peşənin fəlsəfəsində insan yetişdirmək və insani dəyərlərin aşılanması dayanır. 

Çıxışının sonunda nazir bütün qalibləri təbrik edib.

Tədbir “Ədibin Evi”nin Himayəçilik Şurasının üzvü Hafiz Paşayevin yekun nitqi ilə başa çatıb. Hafiz Paşayev də öz növbəsində müsabiqənin məqsəd və məramı haqda danışaraq iştirak edən müəllimləri və qalibləri təbrik edib, onlara uğurlar arzu edib.

Sonda xatirə fotosu çəkdirilib. 

Yüksək Texnologiyalar Parkı , Təhsilin İnkişafı Fondu və SABAH.Hub tərəfindən dəstəklənən “Texnologiya transferi” layihəsinə müraciət açıq elan edilir.

Layihə ali təhsil və elmi-tədqiqat müəssisələrində olan ixtiraçıların, tədqiqatçıların və innovatorların ideyaları, konsepsiyaları və hüquqi cəhətdən qorunan texnologiyalarının funksional həllərə və yüksək kommersiyalaşdırma potensialına malik məhsullara çevrilməsini dəstəkləməyi hədəfləyir.

Layihə çərçivəsində aşağıdakı formada müxtəlif dəstək növlərinin göstərilməsi nəzərdə tutulub:

• Patentləşmə, müəllif hüquqları və əqli mülkiyyətin qorunması;
• Potensial bazarların təhlili və biznes modellərinin hazırlanması;
• Texnologiyanın təkmilləşdirilməsi və tətbiqə hazır vəziyyətə gətirilməsi;
• Real sektora inteqrasiya üçün əməkdaşlıq imkanlarının qurulması;
• Müqavilələr, hüquqi tənzimləmələr və sahibkarlıq hüquqları ilə bağlı dəstək;
• Texnologiya transferi sahəsində inkişafınız üçün təlimlər;
• Layihələrin tanıdılması və bazarda mövqeyinin möhkəmləndirilməsi;
• Layihələrin inkişafı üçün maliyyə resurslarının cəlb edilməsi.

Müraciət üçün keçid: https://forms.gle/p4U82N9TSJ5qfm7H8

Müraciətlə bağlı suallarınızı techtransfer@ytp.az elektron poçt ünvanına göndərə bilərsiniz. 

Son müraciət tarixi: 16 yanvar 2025-ci il

Qeyd: Yalnız seçilən müraciətçilərlə əlaqə saxlanacaq.

11 dekabr 2024-cü il tarixində Təhsilin İnkişafı Fondu (TİF) və Yüksək Texnologiyalar Parkı (YTP) arasında Anlaşma Memorandumu imzalanıb.

İmzalanma mərasimində TİF-in İdarə Heyətinin sədri Elnur Nəsibov, YTP-nin baş direktoru Nihat Məcidov, eləcə də hər iki qurumun nümayəndə heyəti iştirak edib.

Bu Memorandum, tədqiqatçılar, ali təhsil müəssisələri, elmi-tədqiqat institutları və sənaye tərəfdaşları arasında əlaqələri gücləndirərək texnologiyaların transferi, innovasiya və kommersiyalaşdırma sahələrində əməkdaşlıq çərçivəsini müəyyən edir.

Görüş zamanı tərəflər arasında Azərbaycanda innovasiya ekosistemini gücləndirmək üçün mümkün layihə təklifləri müzakirə olunub.