Azərbaycanın aparıcı ali təhsil ocaqlarından biri olan Bakı Dövlət Universitetində (BDU) müəllim və inzibati heyətin iştirakı ilə “TəhsilPlus” kartı mövzusunda müzakirə formatında görüş baş tutub.
Tədbirdə ilk olaraq, Bakı Dövlət Universitetinin Humanitar məsələlər və gənclər siyasəti şöbəsinin müdiri Ramin Səmədov çıxış edərək müəllimlərin sosial rifahının artırılması yönündə atılan bu cür təşəbbüslərin əhəmiyyətini vurğulayıb. O, qeyd edib ki, “TəhsilPlus” layihəsi təhsil işçilərinin gündəlik həyatına real töhfə verməklə yanaşı, onların motivasiyasını və peşəkar fəaliyyətə bağlılığını da gücləndirəcək.
Daha sonra Təhsilin İnkişafı Fondunun İdarə Heyəti sədrinin müavini Xanım Daşdəmirova layihənin əsas məqsədləri, hədəf qrupları və təqdim olunan güzəştlər haqqında çıxış edib. O, bildirib ki, “TəhsilPlus” kartı vasitəsilə müəllimlər müxtəlif partnyor şəbəkəsində endirimli xidmətlərdən istifadə edə, gündəlik ehtiyaclarını daha sərfəli şəkildə qarşılayaraq sosial təminat baxımından əlavə dəstək əldə edə biləcəklər.
Görüş çərçivəsində layihənin tətbiqi mexanizmi, partnyor strukturların fəaliyyəti, müəllimlərin bu imkanlardan necə yararlana biləcəyi və gələcək genişləndirmə planları barədə sual-cavab formatında geniş fikir mübadiləsi aparılıb.
Qeyd edək ki, layihə Azərbaycan Təhsil İşçiləri Azad Həmkarlar İttifaqının (ATİAHİ) tərəfdaşlığı ilə həyata keçirilir.
Azərbaycan Texnologiya Universitetində (ATU) pedaqoji və inzibati heyətin iştirakı ilə “TəhsilPlus” kartı mövzusunda müzakirə formatında görüş təşkil edilib. Görüşdə təhsil işçiləri üçün müxtəlif güzəşt və imtiyazlar təqdim edən yeni layihə ətrafında fikir mübadiləsi aparılıb.
Təhsilin İnkişafı Fondunun İnzibati idarəetmə şöbəsinin müdiri Ramin Cəfərov giriş nitqi ilə çıxış edərək, təhsil işçiləri üçün tətbiq olunacaq güzəşt sahələri haqqında məlumat verib. “Layihənin əsas məqsədi yalnız güzəşt imkanları təqdim etməklə məhdudlaşmır, eyni zamanda müəllimlik peşəsinin ictimai nüfuzunun artırılmasına, təhsil işçilərinə göstərilən diqqət və dəyərin gücləndirilməsinə xidmət edir.” – deyə Ramin Cəfərov çıxışında bildirib.
Layihənin paytaxtla yanaşı, regionlarda fəaliyyət göstərən təhsil işçilərinin də güzəştli imkanlardan faydalanmasını təmin edərək, bərabər dəstək prinsipi əsasında qurulması görüş iştirakçılarının diqqətinə çatdırılıb.
Daha sonra geniş müzakirələr aparılıb, müəllimlərin rəy və təklifləri dinlənilib.
Qeyd edək ki, layihə Azərbaycan Təhsil İşçiləri Azad Həmkarlar İttifaqının (ATİAHİ) tərəfdaşlığı ilə həyata keçirilir.
Təhsilin İnkişafı Fondunun “NEQSOL Holding” ilə birgə tələbə qızlar üçün təsis etdiyi “Parla” təqaüd və inkişaf proqramı çərçivəsində “Süni intellektə dair maarifləndirmə” adlı təlim sessiyası baş tutub.
“Azerconnect Group”un dəstəyi ilə təşkil olunan və süni intellekt sahəsində bilik və təcrübəyə malik mütəxəssis Nihat Abdullayev tərəfindən keçirilən maarifləndirici sessiya zamanı iştirakçılara süni intellektin əsas anlayışları, tətbiq sahələri və gündəlik həyatımıza təsiri haqqında ətraflı məlumat verilib. Təlimdə, həmçinin süni intellektin gələcəkdə əmək bazarına və müxtəlif peşə sahələrinə göstərə biləcəyi təsirlər, texnoloji trendlər də müzakirə olunub.
Qeyd edək ki, 2024-cü ildə “Parla” təqaüd və inkişaf proqramına 2-ci dəfə qeydiyyat açıq elan edilib. Proqrama ümumilikdə 791 nəfər müraciət edib, bütün seçim şərtlərinə cavab verən 128 namizəd müsahibə mərhələsinə vəsiqə qazanıb. 120 tələbə qız hədəfləri, sosial vəziyyəti, dərsdənkənar fəaliyyətləri, tələbə həyatı ilə bağlı müsahibə olunub. Bütün mərhələlərdən uğurla keçən 50 tələbə qız “Parla” təqaüd və inkişaf proqramının qalibi olub. Beləliklə, sözügedən təqaüd proqramında iştirak edən gənc qızların sayı 86 nəfərə çatıb.
Bu gün azad Xankəndi şəhərində 37 ildən sonra orta məktəbdə “Son zəng” tədbiri keçirilib. Məzun günündə, həmçinin orta məktəbdə 1988-ci il məzunları üçün vaxtilə baş tuta bilməyən “Son zəng” tədbiri də qeyd olunub.
Qürurverici gündə təşkil edilən tədbirdə Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov, Təhsilin İnkişafı Fondunun İdarə Heyətinin sədri Elnur Nəsibov, Elm və Təhsil Nazirliyinin əməkdaşları, məktəb heyəti, şagirdlər, valideynlər, şəhid ailələri və müharibə veteranları da iştirak edib.
“Son zəng” günü Dövlət Himni səsləndirilib, Azərbaycan Respublikasının ərazi bütövlüyü uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.
Tədbirdə çıxış edən Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov Prezident İlham Əliyevin rəhbərliyi ilə Azərbaycan təhsilinin inkişafı istiqamətində həyata keçirilən tədbirlərin gənclərin savadlı, həm də əsl vətəndaş kimi yetişməsində əvəzsiz rol oynadığını söyləyib. Bildirib ki, bu gün Azərbaycanın gələcəyi üçün layiqli, vətənpərvər gənclər yetişir. Səbuhi Qəhrəmanov dünyanın aparıcı ali təhsil müəssisələrində ölkəmiz üçün prioritet hesab olunan ixtisaslar üzrə gənclərin təhsil almalarına hər cür şərait yaradıldığını deyib.
Təhsilin İnkişafı Fondunun İdarə Heyətinin sədri Elnur Nəsibov çıxışında Xankəndi şəhərində, eləcə də ümumilikdə Qarabağ bölgəsində illər sonra ilk dəfə keçirilən “Son zəng” gününün əlamətdar və rəmzi bir hadisə olduğunu vurğulayıb.
O bildirib ki, bu gün məzunlar üçün bir təhsil mərhələsinin başa çatması ilə yanaşı, azad olunmuş torpaqlarda həyatın, o cümlədən təhsilin bərpasının parlaq nümunəsidir.
O, bütün məzunlara gələcək həyat yollarında uğurlar arzulayıb, məktəb kollektivinə isə bu şərəfli və məsuliyyətli işlərində uğurlar diləyib.
“Son zəng” tədbirləri məktəblilərin musiqili-bədii çıxışları ilə davam edib.
Qeyd edək ki, bu il Xankəndi şəhər N.Gəncəvi adına 4 nömrəli orta məktəbi 14 şagird bitirərək məzun olub.
Elm və Təhsil Nazirliyinin tərəfdaşlığı, bp şirkəti və Azərbaycan Texniki Universitetinin (AzTU) maliyyə dəstəyi ilə AzTU-da beynəlxalq standartlar səviyyəsində qurulan Kitabxana İnformasiya Mərkəzinin açılış mərasimi keçirilib.
Tədbirdə elm və təhsil nazirinin müavini İdris İsayev, bp şirkətinin Azərbaycan, Gürcüstan və Türkiyə üzrə regional prezidenti Qəri Counz, Elm və Ali Təhsil üzrə Dövlət Agentliyinin direktoru Ülkər Səttarova, millət vəkili Fariz İsmayılzadə, Təhsilin İnkişafı Fondunun İdarə Heyətinin sədri Elnur Nəsibov, AzTU-nun rektoru Vilayət Vəliyev və digər rəsmi şəxslər iştirak edib.
Rəmzi lent kəsildikdən sonra Kitabxana İnformasiya Mərkəzinin direktoru Xəyalə Hacıyeva mərkəzdə yaradılan imkanlar haqqında məlumat verib. O bildirib ki, iki mərtəbədən ibarət olan kitabxana eyni vaxtda 200 nəfər istifadəçiyə xidmət göstərəcək.
Mərkəzlə tanışlıqdan sonra elm və təhsil nazirinin müavini İdris İsayev çıxış edərək bildirib ki, universitet həyatını kitabxanasız təsəvvür etmək mümkün deyil və kitabxanalar müasir tələblərə uyğunlaşmalıdır.
Təhsilin İnkişafı Fondunun İdarə Heyətinin sədri Elnur Nəsibov təhsil sahəsində həyata keçirilmiş bütün innovativ layihələrdə AzTU və onun rəhbərliyinin dəstəyini xüsusi vurğulayıb və yeni qurulmuş Kitabxana İnformasiya Mərkəzinin də tələbələrə faydalı olacağını bildirib.
bp şirkətinin Azərbaycan, Gürcüstan və Türkiyə üzrə regional prezidenti Qəri Counz təhsil, elm və kitabxanaların diqqətdə saxlanmasının hər zaman şirkətin sosial investisiya layihələrinin mərkəzində olduğunu vurğulayıb.
Elm və Ali Təhsil üzrə Dövlət Agentliyinin direktoru Ülkər Səttarova rektor Vilayət Vəliyevi və AzTU ailəsini yeni və proqressiv Kitabxana İnformasiya Mərkəzinin açılışı münasibətilə təbrik edib.
Millət vəkili Fariz İsmayılzadə çıxışında vurğulayıb ki, son illərdə AzTU-nun yüksəlişi bütün təhsil ictimaiyyətinin diqqət mərkəzindədir. O, AzTU və BP şirkətinin birgə işini sənaye-təhsil, şirkət-universitet əməkdaşlığının ən gözəl nümunələrindən biri kimi dəyərləndirib.
AzTU-nun rektoru Vilayət Vəliyev qonaqları salamlayaraq bildirib ki, uzun müddətdir bp şirkəti ilə aparılan sosial layihələrin müzakirəsində diqqət daha çox beynəlxalq səviyyəli və rəqəmsal imkanları olan kitabxananın formalaşdırılmasına yönəlib.
Qeyd edək ki, AzTU Kitabxana İnformasiya Mərkəzi yerli ixtisasçılar tərəfindən ölkədə yaradılmış ilk tam beynəlxalq infrastrukturlu kitabxanadır. Belə ki, layihə beynəlxalq biliklərlə ixtisaslaşdırılmış yerli kadrlar tərəfindən ərsəyə gətirilib. Layihənin rəhbəri mərkəzin direktoru Xəyalə Hacıyeva, texnologiya, sistem və proqram təminatı üzrə məsləhətçisi isə İltifat İbrahimovdur.
11 iyun tarixində tam orta təhsilini uğurla başa vurmuş şəhid övladları üçün “Məzun Günü” tədbiri keçirilib.
“Zəfər” Şəhid Ailələrinə Dəstək İctimai Birliyi tərəfindən təşkil olunmuş tədbir, Birliyin sədri Sevinc Orucovanın giriş nitqi ilə açıq elan edilib. O, orta məktəbi müvəffəqiyyətlə başa vuran şəhid övladlarının hər birini təbrik edib və onlara gələcək həyatlarında uğurlar arzulayıb.
Tədbirdə iştirak edən millət vəkilləri Mehriban Vəliyeva, Fatma Yıldırım, Ceyhun Məmmədov, Nigar Məmmədova, Tahir Mirkişili, Mətbuat Şurasının sədri Rəşad Məcid çıxışlarında məzun olan gənclərə xoş arzularını çatdıraraq, onların təhsil nailiyyətlərini yüksək qiymətləndirdiklərini bildiriblər.
Təhsilin İnkişafı Fondunun İdarə Heyətinin sədri Elnur Nəsibov çıxışında şəhid övladlarının təhsil uğurlarını ölkəmizin mənəvi zənginliyi və gələcəyinə inam kimi dəyərləndirib. O, gənclərin ali təhsilə davam etmələrinin əhəmiyyətini vurğulayaraq, bu yolda onların daim dəstək və diqqət mərkəzində olacağını qeyd edib. Elnur Nəsibov bu gənclərin cəmiyyətin inkişafında mühüm rol oynayacaqlarına inandığını bildirib və onlara gələcək planlarında uğurlar arzulayıb.
4 iyun 2025-ci il tarixində Azərbaycan Həmkarlar İttifaqları Konfederasiyasının Əmək və Sosial Münasibətlər Akademiyası (AƏSMA) və Elm və Təhsil Nazirliyinin tabeliyində Təhsilin İnkişafı Fondu arasında TələbəPlus layihəsi çərçivəsində əməkdaşlıq müqaviləsi imzalanıb.
Tədbiri giriş sözü ilə açan AHİK sədrinin müşaviri Orxan Ərəbov bildirib ki, Təhsilin İnkişafı Fondu ilə imzalanan əməkdaşlıq müqaviləsi tələbələrin sosial rifahının artırılması və onlara daha geniş imkanların təqdim olunması baxımından mühüm əhəmiyyət daşıyır.
Azərbaycan Əmək və Sosial Münasibətlər Akademiyasının rektor vəzifəsini icra edən dosent Yusif Ağayev bildirib ki, Kapital Bank və Visa şirkətinin dəstəyi ilə həyata keçirilən TələbəPlus layihəsi tələbələrə eyni anda həm universitetə giriş-çıxış, həm təqaüd və debet ödənişləri, həm də müxtəlif sahələrdə güzəşt və keşbek imkanları təqdim edir. Akademiya olaraq, bu cür tələbəyönümlü təşəbbüslərin hər zaman dəstəklənəcəyini bildirən Yusif Ağayev, layihənin imkanlarının tələbələr üçün maksimum dərəcədə əlçatan edilməsinə çalışılacağını qeyd edib.
Təhsilin İnkişafı Fondunun İdarə Heyətinin sədri Elnur Nəsibov çıxış edərək qeyd edib ki, TələbəPlus layihəsi gənclərin təhsil və sosial həyatında dəyişikliklərə səbəb olacaq innovativ təşəbbüsdür. O, vurğulayıb ki, layihə vasitəsilə tələbələr həm təhsil prosesində, həm də gündəlik həyatda müxtəlif üstünlüklərdən faydalanacaq, eyni zamanda sosial-iqtisadi cəhətdən daha aktiv və müstəqil ola biləcəklər. Elnur Nəsibov bildirib ki, Təhsilin İnkişafı Fondu ali təhsil müəssisələri ilə əməkdaşlığı genişləndirərək TələbəPlus kartının əhatə dairəsini ölkə üzrə daha çox tələbəyə çatdırmağı hədəfləyir.
Çıxış edən AƏSMA-nın beynəlxalq əlaqələr üzrə prorektoru Xəyalə Məmmədova, birgə əməkdaşlığın beynəlxalq əlaqələrinin genişlənməsinə dəstək verəcəyini və yeni təhsil layihələrinə yol açacağını diqqətə çatdırıb.
Tədbir çərçivəsində Təhsilin İnkişafı Fondunun Layihələrin idarə edilməsi şöbəsinin baş mütəxəssisi Aysel Məhərrəmova TələbəPlus kartı barədə iştirakçılara geniş məlumat təqdim edib.
2 iyun 2025-ci il tarixində Xankəndi şəhərində yerləşən Qarabağ Universitetində Azərbaycanın işğaldan azad edilmiş ərazilərində təhsil və dövlət-özəl tərəfdaşlığının inkişafını təşviq etmək məqsədi daşıyan “Qarabağ Təhsil və Tərəfdaşlıq Forumu” keçirilib.
Forum “Gələcəyin Qarabağı üçün birgə addımlar” konsept mesajı ilə Azərbaycan Respublikasının Elm və Təhsil Nazirliyi və Azərbaycan Respublikasının İqtisadiyyat Nazirliyinin tərəfdaşlığı, Qarabağ Dirçəliş Fondu, Təhsilin İnkişafı Fondu, Azərbaycan Təhsil İşçiləri Azad Həmkarlar İttifaqı və Qarabağ Universitetinin birgə təşkilatçılığı ilə təşkil olunub.
Qarabağın bərpası və inkişafında bütün tərəflərin koordinasiyalı fəaliyyətinin vacibliyini bir daha gündəmə gətirən tədbirdə dövlət qurumlarının nümayəndələri, özəl sektor təmsilçiləri, Qarabağ Universitetinin professor-müəllim heyəti olmaqla, 200-dən çox iştirakçı yer alıb.
Forumun açılış mərasimində Qarabağ Universitetinin rektoru Şahin Bayramov tədbirin iştirakçılarını salamlayaraq giriş nitqi ilə çıxış edib. Daha sonra elm və təhsil naziri Emin Əmrullayev və Prezidentin Xankəndi şəhərində, Ağdərə və Xocalı rayonlarında xüsusi nümayəndəsi Elçin Yusubov çıxış edərək, Qarabağ bölgəsində təhsilin inkişafı, insan kapitalının gücləndirilməsi və dövlət-özəl sektor əməkdaşlığının strateji əhəmiyyəti barədə bir sıra mühüm fikirlər səsləndiriblər.
Fərqli sektorları təmsil edən qurumlar və şirkətlərlə Təhsilin İnkişafı Fondu arasında “Qarabağ Təqaüd Proqramı”nın təsis olunması haqqında əməkdaşlıq memorandumunun imzalanması Forumun əsas nəticələrindən biri olub. Burada əsas məqsəd regionun sosial-iqtisadi inkişafına töhfə vermək, dövlət-özəl sektor əməkdaşlığını gücləndirmək, eləcə də gəncləri Qarabağa yönləndirmək və regiona olan marağı artırmaq, tələbələrə maddi dəstək göstərmək, onların akademik və peşəkar inkişafını təşviq etməkdir.
Memoranduma əsasən, Qarabağ Dirçəliş Fondu, “Veysəloğlu” Şirkətlər Qrupu, Azərbaycan Beynəlxalq Bankı, “Kapital Bank” ASC, Azərbaycan Təhsil İşçiləri Azad Həmkarlar İttifaqı, “McDonald’s Azərbaycan” QSC Qarabağ Universitetində təhsil alan tələbələr üçün təqaüd proqramı təsis etmək öhdəliyini üzərlərinə götürüb.
Bununla yanaşı, “PSG Capital” İnvestisiya şirkəti, ASELSAN şirkəti, “GEN ilaç” şirkəti, “LANDAU School” məktəb kompleksi, Hədəf Şirkətlər Qrupu, Çaşıoğlu şirkəti, İnci Şirkətlər Qrupu, “Code Academy”, Bakı Dizayn Akademiyası və TUNA şirkəti də tələbələrə təqaüd ayıraraq bu təşəbbüsə öz töhfələrini verəcəklər.
Təqaüd proqramı bölgədə insan kapitalının formalaşdırılmasına xidmət etməklə yanaşı, sosial həssas qruplara dəstək göstərməyi və akademik nailiyyətləri yüksək olan tələbələrin motivasiyasını artırmağı hədəfləyir.
Daha sonra Forum çərçivəsində peşəkar moderator və spikerlərin iştirakı ilə iki fərqli mövzu üzrə panel müzakirəsi təşkil olunub. Təhsilin İnkişafı Fondunun İdarə Heyətinin sədri Elnur Nəsibovun moderatorluğu ilə keçirilən “Böyük Qayıdış: Çağırışlar və imkanlar” adlı I paneldə elm və təhsil naziri Emin Əmrullayev, Prezidentin Xankəndi şəhərində, Ağdərə və Xocalı rayonlarında xüsusi nümayəndəsi Elçin Yusubov, Qarabağ Dirçəliş Fondunun İdarə Heyətinin sədri Rəhman Hacıyev və Qarabağ Universitetinin rektoru Şahin Bayramov spiker qismində çıxış edərək, bölgənin yenidən qurulması və insan resurslarının inkişafı məsələlərinə toxunublar.
II panel isə “Qarabağda dövlət-özəl tərəfdaşlığı imkanları” mövzusuna həsr olunub. Peşə Təhsili üzrə Dövlət Agentliyinin direktoru Ceyhun Kərəmovun moderator qismində çıxış etdiyi paneldə “Veysəloğlu” Şirkətlər Qrupunun təsisçisi və Baş icraçı direktoru Aydın Talıbov, Azərbaycan Beynəlxalq Bankının İdarə Heyətinin sədrinin müavini Taleh Tahirli, “Kapital Bank” ASC-nin İdarə Heyətinin üzvü Fərid Hidayətzadə, Təhsil İşçiləri Azad Həmkarlar İttifaqının sədri Araz Paşayev bölgədə dövlət-özəl tərəfdaşlığının perspektivləri və qarşılıqlı əməkdaşlıq imkanlarını müzakirə ediblər.
Forum Qarabağ Universitetinin müəllim-tələbə heyətinin ifasında milli musiqilərimizin səsləndirildiyi bədii hissə ilə başa çatıb.
“Milli Proqram”ın rəsmi açılış mərasimində layihə ilə bağlı məlumat verilib, proqramın aktiv iştirakçılarına sertifikatlar təqdim edilib.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və “Coursera” şirkətinin birgə əməkdaşlığı ilə “4Sİ Akademiyası” çərçivəsində həyata keçirilən “Milli Proqram”ın rəsmi açılış mərasimi keçirilib.
Tədbirdə çıxış edən iqtisadiyyat nazirinin müavini Səməd Bəşirli müasir çağırışlara uyğun əmək bazarının formalaşması üçün insan kapitalına investisiya qoyuluşunun vacibliyini vurğulayıb. “Milli Proqram”ın insan resurslarının bilik və bacarıqlarının müasirləşdirilməsi, innovasiya potensialının inkişafı baxımından əhəmiyyət daşıdığı qeyd edilib. Bildirilib ki, aprelin 1-dən icra olunan layihənin birinci mərhələsi üzrə iştirakçıların 14000-dən çox sertifikat əldə etməsi öyrənməyə olan böyük marağın göstəricisidir.
4SİM-in icraçı direktoru Fariz Cəfərov proqramın məqsədinin ölkədə dördüncü sənaye inqilabı texnologiyaları sahəsində bilik və bacarıqların inkişaf etdirilməsi və əmək bazarında bu sahə üzrə ixtisaslı kadrların hazırlanmasına dəstək vermək olduğunu bildirib. Layihə çərçivəsində 1 il ərzində on minlərlə istifadəçi dünyanın ən böyük onlayn tədris platforması olan “Coursera”da 8000-dən çox təlimdən ödənişsiz yararlana biləcək. Bildirilib ki, proqram çərçivəsində 2500 təlim süni intellekt vasitəsilə Azərbaycan dilinə tərcümə edilərək altyazı ilə, 10 ən çox tələb olunan təlim isə “deep fake” texnologiyası ilə dublyaj edilərək istifadəçilərin ixtiyarına verilib.
TİF-in İdarə Heyətinin sədri Elnur Nəsibov “Milli Proqram” çərçivəsində dünyanın 350 aparıcı universitet və nüfuzlu texnologiya şirkətinin təqdim etdiyi təlimlərin vətəndaşlar üçün əlçatan olduğunu diqqətə çatdırıb. Tələbə və müəllimlərin proqramın əsas benfisiarlarından biri olduğu xüsusilə vurğulanıb. O, qeyd edib ki, bilik cəmiyyətinin qurulması və təhsilin rəqəmsallaşdırılması prioritet istiqamətlərdəndir və “Milli Proqram” bu baxımdan mühüm əhəmiyyət kəsb edir. Onun sözlərinə görə, proqram keyfiyyətli təhsilə bərabər çıxış imkanları yaradır və məqsəd tələbələr və pedaqoji heyətə ixtisasından asılı olmayaraq, gələcəyin bacarıqlarını öyrənmək şansı verməkdir. O, əlavə edib ki, bu təşəbbüs şəxslərin ayrı-ayrılıqda fərdi inkişafı, həm də ümumilikdə cəmiyyətin intellektual potensialının gücləndirilməsini hədəfləyir.
Bildirilib ki, “Milli Proqramda” qeydiyyatdan keçən vətəndaşlar mərhələli şəkildə layihədən yararlanırlar. İlk mərhələdə 7500 istifadəçi platformada 6 həftə ərzində 45 minə yaxın təlimə müraciət edib və onlardan 14000-dən çoxunu uğurla başa vurublar. May ayının 14-də daha 7500 istifadəçi təlimlərə başlayıb və bu günə kimi artıq 3000-dən çox təlimi başa vuraraq beynəlxalq sertifikat əldə ediblər. İstifadəçilər arasında 21–30 yaş aralığında olan gənclər üstünlük təşkil edib. Bu günə kimi “Milli Proqram”a müraciət edən ən gənc iştirakçının 12, ən yaşlı iştirakçı isə 72 yaşında olub.
Tədbirdə iştirak edən bp şirkətinin Yaxın Şərq və Xəzər ölkələrində kommunikasiya və təşviqat üzrə vitse-prezidenti Bəxtiyar Aslanbəyli, “Pasha Holding”in baş icraçı direktorunun müavini Ad Boon, “Azerconnect Group”un kommersiya üzrə baş direktoru Müşfiq Əliyev “Milli Proqram”ın tərəfdaşı kimi layihəyə töhfə verməkdən məmnun olduqlarını bildiriblər. Layihənin yaşından, ixtisasından və regionundan asılı olmayaraq hər kəsə öyrənməyə şərait yaratması xüsusi qeyd olunub.
“Coursera” şirkətinin Tərəfdaşlıqlar üzrə baş direktoru Larisa Vitkroft və Müştəri uğuru üzrə baş meneceri Vera İqnatyeva “Gələcəyin peşələri və bacarıqları” mövzusunda təqdimatla çıxış ediblər.
“Milli Proqram”ın iştirakçıları arasında ən yaxşı nəticə göstərən istifadəçilər təcrübələrini paylaşıblar. Aktiv iştirakçılara 4SİM, TİF və “Coursera” adından sertifikatlar təqdim edilib.
Yaşından və ixtisasından asılı olmayaraq hər kəs “Milli Proqram”da iştirak edə bilər. Qoşulmaq istəyən vətəndaşlar https://form.4sim.gov.az/ linkindən keçid edərək qeydiyyatdan keçə bilərlər.
Qeyd edək ki, ötən il “4Sİ Akademiyası”nın ilkin mərhələsində 10 000 nəfər 1 il ərzində növbəli şəkildə “Coursera” platformasında ödənişsiz kurslardan faydalanıb. İştirakçılar 32 min saatdan çox kurs dinləyiblər, təlimləri uğurla tamamlayanlar ümumilikdə 4200 beynəlxalq sertifikat əldə ediblər. Layihə 2024-cü ildə “Coursera” şirkəti tərəfindən “Üstün Nailiyyət Mükafatı 2024” müsabiqəsinin “Süni İntellekt İnnovasiyası” kateqoriyası üzrə qalibi olub.
Təhsilin İnkişafı Fondu və “NEQSOL Holding” birgə əməkdaşlığı çərçivəsində həyata keçirilən “Parla” təqaüd və inkişaf proqramının iştirakçıları “NEQSOL Holding”in tərkibinə daxil olan “Nobel Energy” şirkətinin törəmə müəssisəsi olan “Glensol”un əməliyyat sahəsinə səfər etmək imkanı qazanıblar.
Səfərin təşkilində başlıca məqsəd, iştirakçıların nəzəri biliklərini praktiki təcrübə ilə tamamlamalarına şərait yaratmaq və bu istiqamətdə inkişaflarına töhfə vermək olub.
Sahə səfəri Sağlamlıq, Təhlükəsizlik və Ətraf Mühit (SƏTƏM) üzrə ətraflı məlumatlandırma ilə başlayıb və enerji sektorunda təhlükəsizlik mədəniyyətinin əhəmiyyəti vurğulanıb. Daha sonra iştirakçılar “Glensol”un əsas sahə xidmətləri olan fırlanan avadanlıqlar üzrə mexaniki işlər, diaqnostika və təmir xidmətləri ilə tanış olublar. Təcrübəli mühəndis və texniki heyətin rəhbərliyi ilə iştirakçılar emalatxana sahələrini gəzərək avadanlıqların texniki qulluq prosesləri barədə məlumat əldə ediblər.
Qeyd edək ki, sözügedən proqram çərçivəsində hazırda 86 tələbə qız aylıq təqaüdlə təmin olunur, təcrübə, mentorluq, təlimlərdə iştirak edir, “NEQSOL Academy” və “LinkedIn Learning” vasitəsilə dünyanın aparıcı universitetlərinin proqramlarına çıxış imkanı qazanırlar.
