Author: redaktr

Təhsilin İnkişafı Fondu və “NEQSOL Holding” birgə əməkdaşlığı çərçivəsində həyata keçirilən “Parla” təqaüd və inkişaf proqramının iştirakçıları “NEQSOL Holding”in tərkibinə daxil olan “Nobel Energy” şirkətinin törəmə müəssisəsi olan “Glensol”un əməliyyat sahəsinə səfər etmək imkanı qazanıblar.

Səfərin təşkilində başlıca məqsəd, iştirakçıların nəzəri biliklərini praktiki təcrübə ilə tamamlamalarına şərait yaratmaq və bu istiqamətdə inkişaflarına töhfə vermək olub.

Sahə səfəri Sağlamlıq, Təhlükəsizlik və Ətraf Mühit (SƏTƏM) üzrə ətraflı məlumatlandırma ilə başlayıb və enerji sektorunda təhlükəsizlik mədəniyyətinin əhəmiyyəti vurğulanıb. Daha sonra iştirakçılar “Glensol”un əsas sahə xidmətləri olan fırlanan avadanlıqlar üzrə mexaniki işlər, diaqnostika və təmir xidmətləri ilə tanış olublar. Təcrübəli mühəndis və texniki heyətin rəhbərliyi ilə iştirakçılar emalatxana sahələrini gəzərək avadanlıqların texniki qulluq prosesləri barədə məlumat əldə ediblər.

Qeyd edək ki, sözügedən proqram çərçivəsində hazırda 86 tələbə qız aylıq təqaüdlə təmin olunur, təcrübə, mentorluq, təlimlərdə iştirak edir, “NEQSOL Academy” və “LinkedIn Learning” vasitəsilə dünyanın aparıcı universitetlərinin proqramlarına çıxış imkanı qazanırlar.

Mayın 26-da Qarabağ Dirçəliş Fondunun (QDF) və “Opalus Partners Group” şirkətinin birgə təşkilatçılığı ilə işğaldan azad edilmiş ərazilərin bərpası və yenidən qurulması istiqamətində görülən işlərə dəstək göstərilməsi məqsədilə “Qarabağın dirçəlişi üçün korporativ dəstək: ianə və təşviqat” mövzusunda görüş keçirilib.

“Qarabağ Dirçəliş Fondunun Dostları” işgüzar platforması çərçivəsində baş tutan tədbirdə Təhsilin İnkişafı Fondunun İdarə Heyətinin sədri Elnur Nəsibov, Veysəloğlu Şirkətlər Qrupunun təsisçisi və Baş icraçı direktorun müşaviri İlqar Nuri, “Opalus Partners Group” şirkətinin direktoru Çimnaz Qasımova, eləcə də Fondun donor və tərəfdaşları, bir sıra dövlət qurumlarının və şirkətlərin nümayəndələri iştirak edib.

Görüşün məqsədi işğaldan azad edilmiş ərazilərdə aparılan bərpa-quruculuq işləri, o cümlədən Fondun fəaliyyəti və həyata keçirdiyi layihələrlə bağlı məlumatların təqdim olunması, eləcə də qurumların/şirkətlərin əməkdaşları arasında ianəçilik mədəniyyətinin təşviq olunması istiqamətində fikir və təcrübə mübadiləsinin aparılması olub.

Tədbirdə çıxış edən Qarabağ Dirçəliş Fondunun İdarə Heyətinin sədri Rəhman Hacıyev Azərbaycan Respublikasının Prezidenti cənab İlham Əliyevin rəhbərliyi ilə işğaldan azad edilmiş ərazilərdə irimiqyaslı bərpa-quruculuq işlərinin sürətlə davam etdirildiyini bildirərək, Fondun bu istiqamətdə həyata keçirdiyi layihələrdən danışıb.

Təhsilin İnkişafı Fondunun İdarə Heyətinin sədri Elnur Nəsibov işğaldan azad edilmiş ərazilərdə təhsil sisteminin yenidən qurulması və ixtisaslı kadrların hazırlanması istiqamətində Qarabağ Dirçəliş Fondu ilə əməkdaşlığın perspektivləri ilə bağlı fikirlərini bölüşüb. O, qeyd edib ki, azad edilmiş ərazilərdə təhsilin bərpası, müasir və inklüziv təhsil mühitinin yaradılması, uzunmüddətli sosial-iqtisadi inkişafın əsas sütunlarından birini təşkil edir.

“Biz bu ərazilərin yalnız fiziki yox, eyni zamanda intellektual və mənəvi dirçəlişindən danışırıq. Təhsil sahəsində atılan hər bir addım, istər məktəblərin inşası, istər müəllim hazırlığı, istərsə də təhsil proqramlarının yenilənməsi bütövlükdə regionun gələcəyinə qoyulan sərmayədir. Qarabağ Dirçəliş Fondu ilə əməkdaşlıq çərçivəsində bu istiqamətlər üzrə birgə layihələrin reallaşdırılması bizim üçün olduqca əhəmiyyətlidir.” – deyə Fondun İdarə Heyətinin sədri bildirib.

O, həmçinin insan kapitalının formalaşdırılmasının vacibliyini qeyd edərək, yalnız məktəb binalarının inşası ilə kifayətlənməyin yetərli olmadığını, burada fəaliyyət göstərəcək ixtisaslı pedaqoji kadrların hazırlanmasının və cəlb edilməsinin həlledici rol oynadığını vurğulayıb.

Elnur Nəsibov bu cür tədbirlərin və platformaların əhəmiyyətini yüksək qiymətləndirərək qeyd edib ki, Qarabağ Dirçəliş Fondunun təşəbbüsü ilə təşkil olunan bu cür görüşlər dövlət, özəl sektor və cəmiyyət arasında həmrəyliyin və qarşılıqlı dəstəyin mühüm göstəricisidir. 

Veysəloğlu Şirkətlər Qrupunun təsisçisi və Baş icraçı direktorun müşaviri İlqar Nuri Azərbaycanda ianə mədəniyyətindən və işğaldan azad edilmiş ərazilərin bərpasında ianəçiliyin rolundan danışıb. Qarabağ Dirçəliş Fondunun bir sıra layihələrində donor və tərəfdaş kimi iştirak etdiklərini deyən İlqar Nuri digər şirkətləri QDF-lə yaxından əməkdaşlıq etməyə və bununla da Qarabağın bərpasına və dirçəldilməsinə töhfə verməyə çağırıb.

Qarabağ Dirçəliş Fondunun İdarə Heyəti sədrinin müşaviri Rəşad Qasımzadə Fond tərəfindən maliyyə dəstəyi ayrılan və icra olunan layihələrlə bağlı geniş təqdimatla çıxış edib.

Daha sonra Fondun Fandreyzinq və kommunikasiya şöbəsinin müdiri Pərvin Bağırova Fondun fandreyzinq layihələri və ianə imkanları ilə bağlı məlumat verib.

Görüşün sonunda korporativ könüllülük prinsiplərinin təşviqi, əməkdaşların bilik, bacarıq və resurslarının sosial fayda naminə yönləndirilməsi, eləcə də bu istiqamətdə ictimai maraqlı təşəbbüslərin stimullaşdırılması ətrafında fikir mübadiləsi aparılıb.

22 may 2025-ci il tarixində Ailə, Qadın və Uşaq Problemləri üzrə Dövlət Komitəsi və Təhsilin İnkişafı Fondunun birgə təşkilatçılığı ilə “Hənifə Məlikova – Zərdabi adına qızların təhsilinə dəstək” təqaüd proqramının iştirakçıları üçün təlim sessiyası təşkil olunub.

“The Training Hub Azerbaijan” platformasının təsisçisi və “Aztugem” layihəsinin rəhbəri Lamiyə Xəlilovanın təqdimatında “Gənc qızların cəmiyyətə asan inteqrasiyasına hazırlıq” mövzusunda baş tutan təlimin məqsədi gənc qızların sosial, şəxsi və peşəkar həyata uğurlu inteqrasiyasına dəstək olmaq, onların effektiv ünsiyyət və özünüifadə bacarıqlarını inkişaf etdirmək, habelə ictimai aktivliklərini artırmaq olub.

Azərbaycan Dövlət Neft və Sənaye Universitetində (ADNSU) keçirilən təlim zamanı iştirakçılara “Effektiv özünütəqdimetmə bacarığı və onun sosial həyatda rolu”, “Ünsiyyətin əsas qaydaları və qeyri-verbal ünsiyyətin əhəmiyyəti”, “Sosial məsafə, empati və bədən dilinin önəmi” kimi mövzularda praktiki bilik və bacarıqlar aşılanıb.

Təlim çərçivəsində təşkil olunan oyun sessiyası vasitəsilə iştirakçılarla interaktiv şəkildə real situasiyalar müzakirə edilib və sosial bacarıqların gündəlik həyatda tətbiq imkanları ətraflı izah olunub. Bu kimi təşəbbüslər gənc qızların cəmiyyətə daha sağlam və məqsədyönlü inteqrasiyası, eləcə də ictimai həyatda daha fəal iştirakı baxımından mühüm əhəmiyyət kəsb edir.

16 may tarixində Azərbaycan Dövlət Neft və Sənaye Universitetində (ADNSU) TələbəPlus kartı ilə bağlı infosessiya təşkil olunub.

Məlumat sessiyasında ilk olaraq, ADNSU-nun ictimaiyyətlə əlaqələr üzrə meneceri Günel Tağıyeva çıxış edərək, tədbirin məqsədi və əhəmiyyətindən söz açıb. “Bu gün burada toplaşmağımızın əsas məqsədi tələbələrimizi bu layihə barədə daha ətraflı məlumatlandırmaq, onların suallarını cavablandırmaq və layihənin təqdim etdiyi imkanlardan səmərəli şəkildə faydalanmalarına dəstək olmaqdır.” – deyə G. Tağıyeva qeyd edib. O, ADNSU rəhbərliyinin tələbəyönümlü layihələrə hər zaman xüsusi önəm verdiyini və bu istiqamətdə atılan addımların davamlı xarakter daşıdığını diqqətə çatdırıb.

Daha sonra çıxış edən Təhsilin İnkişafı Fondunun Layihələrin idarə olunması şöbəsinin aparıcı mütəxəssisi Almaz Axundzadə TələbəPlus kartı haqqında ətraflı təqdimatla çıxış edib. O, bildirib ki, proqram çərçivəsində tələbələrə müxtəlif sahələr üzrə – təhsil, iaşə, geyim, sağlamlıq, kitab, dəftərxana ləvazimatları və digər xidmətlərdə xüsusi endirim və güzəştlər təqdim olunur. Həmçinin TələbəPlus kartının ölkə üzrə genişlənən tərəfdaş şəbəkəsi barədə danışan Fondun nümayəndəsi, bu əməkdaşlıqların tələbələrin gündəlik həyatını asanlaşdırmaq və onların sosial rifahını artırmaq məqsədi daşıdığını vurğulayıb.

İnfosessiya çərçivəsində layihənin tərəfdaşı olan Bakı Dizayn Akademiyasının Kreativ konsultantı Əlihüseyn Rəsulov çıxış edərək, tələbərə təqdim edilən güzəştlər barədə danışıb. O, yaradıcı sahədə təhsil alan tələbələr üçün təqdim olunan imkanlar, həmçinin Akademiyanın bu istiqamətdə həyata keçirdiyi layihə və təlim proqramları barədə məlumat verib. Akademiyanın nümayəndəsi məlumat sessiyasında iştirak edən 60-a yaxın tələbəyə xidmətlərdən istifadə üçün vauçer təqdim edib.

Eyni zamanda, “NEQSOL Academy”, Təhsilin İnkişafı Fondu və “Technology SNI”nin birgə tərəfdaşlığı ilə həyata keçirilən “Peerstack Academy”nin Əməliyyatlar üzrə rəhbəri Məryəm Abbas-zadə-Poladova isə çıxışında innovasiya və texnologiya sahəsində gənclərin fəallığının artırılmasının vacibliyinə toxunaraq, tələbələrin bu sahələrdə iştirak etdiyi təşəbbüslərin gələcəyin texnoloji inkişafına töhfə verdiyini vurğulayıb.

Tədbirin sonunda sual-cavab sessiyası keçirilib. Tələbələrin ünvanladığı suallar Təhsilin İnkişafı Fondunun nümayəndələri Almaz Axundzadə və Ofelya Salmanova tərəfindən cavablandırılıb.

Qeyd edək ki, TələbəPlus layihəsi Təhsilin İnkişafı Fondu, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü, Azərbaycan Təhsil İşçiləri Azad Həmkarlar İttifaqının tərəfdaşlığı ilə həyata keçirilir.

Bakı Dövlət Universiteti (BDU) və Ailə, Qadın və Uşaq Problemləri üzrə Dövlət Komitəsinin (AQUPDK) birgə təşkilatçılığı ilə 15 May – Beynəlxalq Ailə Gününə həsr olunmuş “Ənənəvi dəyərlərin və ailə institutunun qorunması təhsil prosesində vacib amil kimi” mövzusunda konfrans təşkil edilib.

İlk olaraq, çıxış edən AQUPDK-nın sədri Bahar Muradova qeyd edib ki, ailə institutu təkcə Azərbaycanda deyil, bütün dünyada cəmiyyətin əsas sütunlarından biridir. Ənənəvi ailə dəyərlərinin tədris mühitinə inteqrasiyası, ailə və təhsil sistemlərinin qarşılıqlı fəaliyyəti cəmiyyətin uzunmüddətli inkişafında həlledici rol oynayır. O, komitə tərəfindən yeni “Ailə konsepsiyası” hazırlandığını tədbir iştirakçılarının nəzərinə çatdırıb.

BDU-nun rektoru Elçin Babayev bildirib ki, hər bir xalqın ən qiymətli sərvəti onun keçmişi ilə bu gününü birləşdirən, kimliyini yaşadan milli-mənəvi dəyərləridir. Rektor bu sahədə Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondunun mühüm rola malik olduğunu vurğulayıb.

Konfransda, həmçinin Milli Məclisin İnsan hüquqları Komitəsinin sədri, Sosial Tədqiqatlar Mərkəzinin İdarə Heyətinin sədri Zahid Oruc, Milli Məclisin deputatı Mehriban Vəliyeva, Təhsilin İnkişafı Fondunun İdarə Heyətinin sədri Elnur Nəsibov, Azərbaycan İlahiyyat İnstitutunun rektoru Aqil Şirinov, Mənəvi Dəyərlərin Təbliği Fondunun icraçı direktoru Vüsal Göyüşov və BDU-nun Psixologiya kafedrasının müəllimi Emiliya İgidova çıxış edib.

Təhsilin İnkişafı Fondunun İdarə Heyətinin sədri Elnur Nəsibov çıxışında vurğulayıb ki, təhsilin cəmiyyətin mənəvi dəyərlərinin qorunmasında və ailə institutunun möhkəmləndirilməsində mühüm rolu var. O, təhsil imkanlarının bərabər şəkildə təmin olunması və xüsusilə qızların təhsilə çıxışının genişləndirilməsinin Fondun əsas fəaliyyət istiqamətlərindən biri olduğunu qeyd edib.

Sonra mövzu ilə bağlı tədbir iştirakçılarının təklifləri dinlənilib, müzakirələr aparılıb.

Bakı Mühəndislik Universitetində (BMU) pedaqoji heyətin iştirakı ilə “TəhsilPlus” kartı mövzusunda müzakirə formatında görüş təşkil edilib. Görüşdə təhsil işçiləri üçün müxtəlif güzəşt və imtiyazlar təqdim edən bu yeni layihə ətrafında fikir mübadiləsi aparılıb.

İlk olaraq, BMU-nun rektoru Yaqub Piriyev Fond tərəfindən həyata keçirilən bir sıra uğurlu sosial və təhsil yönümlü layihələr barədə danışıb. O, tələbələrə yönəlmiş “TələbəPlus” kartının üstünlüklərini vurğulayıb və Fondun müəllimlər üçün nəzərdə tutduğu yeni “TəhsilPlus” təşəbbüsünü müsbət qiymətləndirərək, onun təhsil işçiləri üçün faydalı olacağına inandığını bildirib.

Daha sonra Fondun İdarə Heyətinin sədri Elnur Nəsibov çıxış edərək, dövlət-özəl tərəfdaşlığı çərçivəsində bu günədək həyata keçirilmiş layihə və proqramlar barədə geniş məlumat verib. O, bu görüşün əsas məqsədinin təhsil sahəsində çalışan şəxslərin ehtiyaclarını və gözləntilərini müəyyənləşdirmək olduğunu qeyd edib. E.Nəsibov bu istiqamətdə aidiyyəti qurumlarla müzakirələrin davam etdirildiyini də diqqətə çatdırıb.

Görüş zamanı geniş müzakirələr aparılıb, müəllimlərin rəy və təklifləri dinlənilib.

1 may 2025-ci il tarixində Azərbaycan Memarlıq və İnşaat Universitetində keçirilən VI Karyera Sərgisi çərçivəsində Təhsilin İnkişafı Fondu da iştirak edib.

Sərginin rəsmi açılış mərasimində Fondun İdarə Heyətinin sədri Elnur Nəsibov, AzMİU-nun rektoru Gülçöhrə Məmmədova, “Veysəloğlu” Şirkətlər Qrupunun təsisçisi və baş direktoru Aydın Talıbov çıxış edib. Rəsmilər tələbələrin peşəkar inkişafında bu cür tədbirlərin mühüm rol oynadığını vurğulayıb, tələbə və məzunları sərgidə aktiv olmağa səsləyiblər. 

Sərgi müddətində Fondun nümayəndələri tələbələrə Fondun fəaliyyəti və həyata keçirdiyi proqramlar, xüsusilə də “TələbəPlus” layihəsi barədə ətraflı məlumat veriblər.

Fondun stendi sərgi iştirakçıları tərəfindən böyük maraqla qarşılanıb. Tələbələr təqdim olunan imkanlar barədə məlumatlanaraq müvafiq suallarına cavab alıblar.

26 aprel 2025-ci il tarixində Developia Engineering Academy tərəfindən Təhsilin İnkişafı Fondunun təqaüd proqramlarında iştirak edən gənclər üçün “Proqramçının addımları” mövzusunda xüsusi təlim sessiyası təşkil olunub. Təlimin məqsədi gələcəyin mühəndislərinə proqramlaşdırma sahəsində ilkin bilikləri aşılayaraq onların peşəkar inkişafına dəstək göstərmək olub.

Sessiya çərçivəsində iştirakçılara proqramlaşdırma dillərinin əsas prinsipləri, effektiv öyrənmə strategiyalarının seçilməsi, qarşıya çıxan çətinliklərin düzgün idarə olunması və keyfiyyətli inkişaf üçün zəruri metodikalar barədə ətraflı məlumat verilib. Təlim zamanı həmçinin, proqramlaşdırma dilləri arasında seçim edərkən diqqət yetirilməli məqamlar, sürətli və dayanıqlı bilik əldə etməyə imkan verən üsullar iştirakçılarla bölüşülüb.

Təlimin əsas vurğularından biri də proqramlaşdırmaya yeni başlayan şəxslər üçün motivasiyanın qorunmasının əhəmiyyəti olub. Bu baxımdan, kitab oxuma vərdişlərinin formalaşdırılması, müntəzəm qeydlərin aparılması və inkişafyönlü mühitdə öyrənmənin rolu xüsusi qeyd edilib.

Tədbirin sonunda iştirakçılara öz potensiallarını daha dərindən dərk etmələri və proqramlaşdırma sahəsində uğurlu karyera qurmaq üçün konkret və məqsədyönlü addımlar atmaları tövsiyə olunub.