Author: redaktr

Oktyabrın 28-də elm və təhsil naziri Emin Əmrullayev “Maarifçi” tələbə-məzun təcrübə proqramının ikinci mərhələsinin iştirakçıları ilə görüşüb.    

“Maarifçi”ləri salamlayan elm və təhsil naziri Emin Əmrullayev proqramın gənclərə böyük təcrübə qazanmaq imkanı yaratdığını deyib və bu təşəbbüsün mahiyyəti haqqında danışıb. Emin Əmrullayev bildirib ki, proqram iştirakçıları hazırda nazirliyin müxtəlif struktur bölmələrində təcrübə keçməklə iş prosesi ilə tanış olurlar və bu da onların peşəkar kadr kimi formalaşmalarında mühüm rol oynayır.  

Elm və təhsil naziri həmçinin iştirakçılardan gözləntilər və yaxşı mütəxəssis olmaq üçün vacib şərtlər barədə danışıb. 

Görüşdə “Maarifçi”lər gənclərə belə bir fürsət yaradıldığı üçün təşəkkürlərini ifadə ediblər və proqramın üstünlüklərini vurğulayıblar. 

Tədbirdə iştirakçıları maraqlandıran suallar da cavablandırılıb. 

Qeyd edək ki, 37 nəfər “Maarifçi” tələbə-məzun təcrübə proqramının II mərhələsində iştirak hüququ qazanıb. 3 ay davam edəcək proqram çərçivəsində iştirakçılar Elm və Təhsil Nazirliyi, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçəcəklər. 

Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilən proqramın məqsədi tələbə və məzunlara nəzəri biliklərini real iş mühitində tətbiq etmək və təcrübə imkanı yaratmaq, iştirakçıların bilik və bacarıqlarını artırmaq, eləcə də gənclərə peşəkar vərdişlər qazandırmaqdır.

Təhsilin İnkişafı Fondu və “STP Şirkətlər Qrupu”nun birgə əməkdaşlığı çərçivəsində həyata keçirilən “Zərif Mühəndislər” təqaüd proqramının iştirakçıları üçün “İqlim dəyişikliyi və Azərbaycan” mövzusunda məlumat sessiyası təşkil olunub.

Ətraf mühit üzrə ekspert Tural Məhərrəmov tərəfindən keçirilən təlim zamanı əsas diqqət iqlim dəyişikliyi və Azərbaycanda bu sahədə görülən işlərə yönəlib . Belə ki, təlim zamanı iqlim dəyişikliyinə təsir edən əsas səbəblər, istilik effekti yaradan qazlar və onların törətdiyi fəsadlar haqqında məlumat verilib, eləcə də bu təsirlərin aradan qaldırılması mövzusunda fikir mübadiləsi aparılıb.

Fərdi “Karbon ayaq izi”nin hesablanması üzrə nümunələr göstərən ekspert həmçinin “Dayanıqlı İnkişaf Məqsədləri”nin önəmi və bu məqsədlərə çatmaq üçün görülməsi vacib olan tədbirlər üzrə beynəlxalq praktikalar haqqında ətraflı danışıb.

Təlim tələbə qızlar tərəfindən çox böyük maraqla qarşılanıb.  Sessiyanın sonunda iştirakçılar ilə interaktiv fəaəliyyətlər keçirilib, onları maraqlandıran suallar cavablandırılıb. 

Oktyabrın 24-ü Azərbaycan Dövlət Mədəniyyət və İncəsənət Universiteti (ADMİU) ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Müqavilə universitetin rektoru professor Ceyran Mahmudova və TİF-in İdarə Heyətinin sədri Elnur Nəsibov tərəfindən imzalanıb.

İmzalanma mərasimində qonaqları salamlayan rektor C.Mahmudova təhsil sahəsindəki son nailiyyətlər və gələcək inkişaf planları barədə söhbət açıb. Rektor qeyd edib ki, insan ömrünün ən yaddaqalan dövrlərindən biri olan tələbəlik illərinin daha yaxşı keçirilməsi, tələbələrin rifahının nisbətən yaxşılaşdırılması baxımından onlar üçün bir sıra güzəştlər nəzərdə tutan “TələbəPlus” layihəsi son dərəcə ümidverici və sevindiricidir.

Təhsilin İnkişafı Fondunun İdarə Heyətinin sədri Elnur Nəsibov bildirib ki, Fondun əsas missiyası təhsilin dayanıqlı inkişafına nail olmaq, dövlətin təhsil siyasətinin təmin edilməsində yaxından iştirak etməkdir. Təhsilin İnkişafı Fondunun həyata keçirdiyi “TələbəPlus” layihəsi tələbələrin eyni güzəşt və endirimlərdən faydalanmalarını təmin etmək, onların sosial həyatına dəstək göstərmək məqsədi daşıyır.

Elnur Nəsibov qeyd edib ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Təhsilin İnkişafı Fondunun öz tərəfdaşları ilə birlikdə 250-dən çox şirkətlə razılaşma əldə edilib. Bundan başqa, Mədəniyyət Nazirliyi ilə müəyyən istiqamətlərdə tələbələr üçün xüsusi güzəştlər nəzərdə tutulur. Gələcəkdə “TələbəPlus” kartının ali təhsil müəssisələri ilə yanaşı, kollec və peşə təhsili müəssisələrində oxuyan tələbələrə də mərhələli şəkildə verilməsi nəzərdə tutulur.

Daha sonra Təhsilin İnkişafı Fondunun əməkdaşları ilə ADMİU-nun tələbələrinin görüşü baş tutub. Görüşdə E.Nəsibov tələbələrə Fondun həyata keçirdiyi layihələrlə bağlı ətraflı məlumat verib. Görüşün davamında tələbələrin sualları cavablandırılıb, təklifləri qeydə alınıb.

Sonda ADMİU-dan IELTS imtahanında iştirak edən və yüksək bal toplayaraq bu imtahan üzrə ödənişləri Təhsilin İnkişafı Fondu tərəfindən qarşılanan iki nəfərə sertifikatlar təqdim olunub.

“Universitetlərin elmi-pedaqoji heyət üzvləri və təhsilalanların IELTS imtahanına təşviq edilməsi haqqında” layihəsi çərçivəsində 9 ali təhsil müəssisəsindən ümumilikdə 420-dən çox tələbə və təhsilverənlərin yararlandığını diqqətə çatdırıb.

23 oktyabr 2024-cü il tarixində Nazim İsmayılov adına 80 nömrəli tam orta məktəbdə 8, 9, 10, 11-ci sinif şagird qızlar üçün  “Bəxtini özü yazan qadınlar” layihəsi həyata keçirildi.

Görüşün qonaqları Azərbaycan Respublikası Elm və Təhsil Nazirliyi nəzdində De-institutlaşma və Uşaqların Müdafiəsi İdarəsinin rəis müavini Günel Səfərova, Təhsilin İnkişafı Fondunun Layihələrin idarə olunması şöbəsinin baş mütəxəssisi Aysel Məhərrəmova və Kiçik və Orta Biznes Subyektləri və Klublarının Assosiasiyasının İdarə Heyətinin sədri Nigar Ələsgərova oldu.

Qonaqlar motivasiya çıxışları edərək məktəbli qızlarla öz təcrübələrini və tövsiyələrini bölüşüblər. Şagirdlərə doğru peşə və ixtisas seçiminin edilməsi, universitetə qəbul olduqdan sonra fəal tələbəlik həyatının olması üçün tövsiyələr verilib, uğur qazanmaq üçün disiplinli olmağın önəmi vurğulanıb.

“Bəxtini özü yazan qadınlar” layihəsi məktəbli qızların gələcək həyatına, seçimlərinə dəstək olmaq, gələcəyin ziyalı xanımlarınının formalaşdırılmasına dəstək məqsədilə həyata keçirilir.

Sözügedən layihə Nazim İsmayılov adına 80 nömrəli tam orta məktəbinin tarix müəllimi Afət Nəbiyevanın təşəbbüsü ilə həyata keçirilib.

Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilən 2-ci “Maarifçi” tələbə-məzun təcrübə proqramının iştirakçıları ilə görüş keçirilib.

Görüşdə Azərbaycan Texniki Universitetinin rektoru Vilayət Vəliyev, Təhsilin İnkişafı Fondunun İdarə Heyətinin sədri Elnur Nəsibov, Elm və Təhsil Nazirliyinin İnsan resursları şöbəsinin müdiri Çapay Məmmədov, nazirliyin və fondun nümayəndələri iştirak edib.

Azərbaycan Texniki Universitetinin rektoru Vilayət Vəliyev tələbə və məzunları salamlayaraq, bu kimi proqramların gənclərlə ünsiyyət, onların dövlət qurumlarının fəaliyyəti barədə məlumatlandırılması baxımından faydalılığını bildirib.

Təhsilin İnkişafı Fondunun İdarə Heyətinin sədri Elnur Nəsibov proqramın mahiyyəti barəsində məlumat verib. Sədr “Maarifçi” tələbə-məzun təcrübə proqramının gənc kadrların hazırlanması baxımından faydalı olduğunu vurğulayaraq proqram iştirakçılarına uğurlar arzulayıb.

Elm və Təhsil Nazirliyinin İnsan resursları şöbəsinin müdiri Çapay Məmmədov proqrama qəbul edilən namizədləri təbrik edərək onları fəal olmağa dəvət edib, uğurlar arzu edib.

Görüşün davamında Təhsilin İnkişafı Fondunun Layihələrin idarə olunması şöbəsinin müdiri Rəsul Həşimov Fondun fəaliyyətini əks etdirən geniş təqdimatla çıxış edib.

Daha sonra I “Maarifçi” tələbə-məzun təcrübə proqramının iştirakçısı Səbinə Hüseynova öz təəssüratlarını bölüşərək, yeni iştirakçılara uğurlar arzulayıb.

Yekunda gənclərlə qarşılıqlı fikir mübadiləsi aparılıb, proqramla bağlı onları maraqlandıran suallar cavablandırılıb.

Qeyd edək ki, “Maarifçi” tələbə-məzun təcrübə proqramına II mərhələdə 37 nəfər təcrübəçi seçilib.

3 ay davam edəcək proqram çərçivəsində seçilmiş iştirakçılar Elm və Təhsil Nazirliyi, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçəcəklər. İştirakçılar onlar üçün təşkil olunan təlimlərdən yararlanacaq və sosial bacarıqlarını inkişaf etdirəcəklər.

Proqramın məqsədi tələbə və məzunlara təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmək və gənclərə peşəkar vərdişlər qazandırmaqdır.

Azərbaycan Rəssamlıq Akademiyası ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Müqavilə akademiyanın rektoru Xalq rəssamı, professor Natiq Əliyev və TİF-in İdarə Heyətinin sədri Elnur Nəsibov tərəfindən imzalanıb.

İmzalanma mərasimində çıxış edən rektor Natiq Əliyev təhsil sahəsindəki son nailiyyətlər və gələcək inkişaf planları barədə söhbət açıb. Rektor qeyd edib ki, Azərbaycan Rəssamlıq Akademiyası son illərdə tədris prosesində və mədəni sahədə böyük uğurlara imza atır, bu uğurlar tələbələrimizin inkişafına və yaradıcılıqlarının daha da təşviqinə xidmət edir. Sonuncu böyük addımlardan biri, COP 29 çərçivəsində keçirilən “Yaşıl Dünya Naminə Həmrəylik” adlı sərgi oldu. Sərgidə tələbələrimizin yüksək səviyyədə rəngkarlıq işləri nümayiş olundu və bu sərgi tələbələrə böyük ruh verməklə yanaşı, akademiyanın sənət təhsili sahəsində də nə qədər irəlilədiyinin göstəricisi oldu.

Tədbirdə çıxış edən Təhsilin İnkişafı Fondunun İdarə Heyətinin sədri Elnur Nəsibov bildirib ki, Fondun əsas missiyası təhsilin dayanıqlı inkişafına nail olmaq, dövlətin təhsil siyasətinin təmin edilməsində yaxından iştirak etməkdir. Təhsilin İnkişafı Fondunun həyata keçirdiyi “TələbəPlus” layihəsi tələbələrin eyni güzəşt və endirimlərdən faydalanmalarını təmin etmək, onların sosial həyatına dəstək göstərmək məqsədi daşıyır.

Elnur Nəsibov qeyd edib ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Təhsilin İnkişafı Fondunun öz tərəfdaşları ilə birlikdə 250-dən çox şirkətlə razılaşma əldə edilib. Bundan başqa, Mədəniyyət Nazirliyi ilə müəyyən istiqamətlərdə tələbələr üçün xüsusi güzəştlər nəzərdə tutulur. Hazırda ictimai nəqliyyatda da güzəştlərin tətbiq edilməsi ilə bağlı müzakirələr aparılır. “TələbəPlus” layihəsi çərçivəsində ilkin olaraq 150 min tələbə kartının istifadəyə verilməsi planlaşdırılır. Tələbələrin sosial və akademik həyatında yenilik yaratmağa yönələn “TələbəPlus” kartlarının oktyabr ayının sonundan ilkin istifadəyə verilməsi nəzərdə tutulur. Gələcəkdə “TələbəPlus” kartının ali təhsil müəssisələri ilə yanaşı, kollec və peşə təhsili müəssisələrində oxuyan tələbələrə də mərhələli şəkildə verilməsi nəzərdə tutulur.

14 oktyabr 2024-cü il tarixində Ailə, Qadın və Uşaq Problemləri üzrə Dövlət Komitəsinin, Elm və Təhsil Nazirliyinin və Təhsilin İnkişafı Fondunun əməkdaşlığı ilə “Gənc Qızların Təhsilinə Dəstək” layihəsi çərçivəsində növbəti tədbir keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb.

Tədbiri giriş sözü ilə açan Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib ki, böyük xeyriyyəçi Hacı Zeynalabdin Tağıyevin təşəbbüsü ilə Bakıda fəaliyyətə başlayan qızlar məktəbinin yaranmasının 100 illiyi ərəfəsindən balşayan və 4 ildir ki, həyata keçirilən “Gənc Qızların Təhsilinə Dəstək” layihəsi uğurla davam edir.

Hər bir xalqın inkişafı üçün onun qurduğu dövlətin və çatmaq istədiyi ən ali hədəfləri üçün ən möhkəm bünövrənin təhsil olduğunu diqqətə çatdıran Komitə sədri, təhsilin cəmiyyətin və dövlətin inkişafındakı rolunun heç nə ilə müqayisə olunmayacağını qeyd edib.

“Biz bu gün Ümummilli liderin ideyalarının və müəyyənləşdirdiyi yolun nəticəsi olaraq həm regionda, həm də dünyada Zəfərin uğur formulunu tapmış bir ölkəyə, müstəqil Azərbaycan dövlətinə malikik”- deyən B. Muradova əlavə edib ki, ölkə Prezidentinin rəhbərliyi ilə, həmçinin Birinci vitse-prezident Mehriban xanım Əliyevanın təşəbbüsü ilə elmə, təhsilə, qızların inkişafına, qadınların bərabər hüquqlarının təmin olunmasına xüsusi diqqət göstərilir. O, qarşıya qoyulan ən mühüm vəzifələrin davamı olaraq bu gün bu layihənin uğurla icra edildiyini qeyd edib.

“Gənc Qızların Təhsilinə Dəstək” layihəsinin “Hənifə Məlikova – Zərdabi adına təqaüd proqramı” nın daşıyıcısı olan qızların sayının ilbəil daha da artdığını vurğulayan B.Muradova, 144 nəfəri Komitənin benefisiarı olmaqla, ümumilikdə 265 gənc qızın proqramdan yararlandığını bildirib. Qeyd edib ki, artıq bu layihə 58 rayonu əhatə edir. Qürurverici haldır ki, bu il proqram iştirakçılarından biri ən yüksək – 700 bal toplayaraq ADA Universitetinə daxil olub. Getdikcə bu layihəyə dəstək vermək istəyənlərin sayı artır.

İki il öncə Dövlət Komitəsi ilə Elm və Təhsil Nazirliyi arasında niyyət protokolunun imzalandığını xatırladan B. Muradova, Təhsilin İnkişafı Fondunun da tərəfdaşlığı ilə layihənin çərçivəsinin daha da genişləndiyini diqqətə çatdırıb.

Sonda o, təhsil həyatının mühüm addımı kimi ölkəmizin öndə gedən ali məktəblərinə daxil olan gənc qızları təqaüd qazanmaları münasibətilə təbrik edib, layihəyə dəstək göstərən hər kəsə təşəkkürünü bildirib.

Elm və təhsil naziri Emin Əmrullayev layihə təşəbbüskarı olaraq Ailə, Qadın və Uşaq Problemləri üzrə Dövlət Komitəsinə, eləcə də təqaüd proqramının dəstəkçilərinə təşəkkürünü bildirb. Bu layihənin böyük geridönüşü olan investisiya rolunu oynayacağını bildirən nazir, layihə çərçivəsində təhsilinə dəstək göstərilən qızların gələcəkdə öz sahələrində seçilən mütəxəssislərə çevriləcəklərinə inamını ifadə edib.

Çıxışının davamında E.Əmrullayev təhsilə əlçatanlığın təmin olunması istiqamətində bir sıra müsbət rəqəmləri diqqətə çatdırıb. On beş il bundan əvvəlki dövrlə müqayisədə təhsil alanların sayının ikiqat artdığını qeyd edib. “Ali məktəblərdə tələbələrin yarısından çoxu dövlət sifarişi əsaslarla təhsil alır. Həmçinin sosial baxımdan həssas qrupdan olan tələbələrin təhsil haqqı dövlət tərəfindən qarşılanır” – deyə o əlavə edib.

Daha sonra “Gənc qızların təhsilinə dəstək” layihəsinə həsr olunmuş videoçarx nümayiş etdirilib.

Təhsilin İnkişafı Fondunun İdarə Heyətinin sədri Elnur Nəsibov bildirib ki, ölkəmizdə aparılan təhsil, iqtisadiyyat, sənaye və digər sahələrdə islahatlar təhsil vasitəsilə əmək bazarında öz layiqli yerini tutmağın mümkünlüyünü göstərir. Adıçəkilən layihənin uzun və uğurlu yol keçdiyini vurğulayan E. Nəsibov əlavə edib ki, əsas məsələ bu layihələnin digər təşəbbüslərə də yol açması və dəstəkləməsidir.

O, layihə çərçivəsində qızların təqaüd əldə etmələri ilə yanaşı, həm də mentorluq, təcrübə və müxtəlif işlərlə təmin olunduqlarını da qeyd edərək, şəhid və qazi övladları və xanımlarının təhsilinin xüsusilə önəmli olduğunu və bununla bağlı gələcəkdə dövlət və özəl sektorun tərəfdaşlığı sayəsində yeni bir layihənin başladılmasının nəzərdə tutulduğunu da diqqətə çatdırıb.

Sonra Azərbaycan Dövlət İqtisad Universitetinin Tələbəsi, “Gənc qızların təhsilinə dəstək-2024” layihəsinin iştirakçısı Zeynəb Abbasova çıxış edərək, təşkilatçılara təşəkkürünü bildirib ve qeyd edib ki, bu layihənin bir parçası olmaq onlar üçün dəyərli bir hədiyyədir. O, əsas məqsədinin Azərbaycan qadını adına layiq vətəndaş kimi formalaşmaq və daha savadlı cəmiyyətin inkişafına töhfələr vermək olduğunu bildirib.

Davamında ali təhsil müəssəsisələrinin rektorlarının və digər məsul şəxslərin iştirakı ilə 50 qıza sertifikat və gül dəstələri təqdim edilib.

Tədbir bədii hissə ilə yekunlaşıb.

Azərbaycanın ən böyük hakaton tədbirlərindən biri olan JunctionX Baku 2024 bu gün “Yaşıl İqtisadiyyatda Süni İntellekt” mövzusu ilə start götürdü. Açılış mərasimində əsas sənaye tərəfdaşlarının iştirakı müşahidə olundu.

Elm və Təhsil Nazirliyinin nəzdində olan Təhsilin İnkişafı Fondunun dəstəklədiyi və EESTEC Baku-nun təşkil etdiyi tədbir, süni intellektdən istifadə edərək ekoloji problemlərin həllinə yönəlmiş parlaq zehinləri bir araya gətirdi.

UFAZ-ın icraçı direktoru Lətifə Nəsibova qonaqları və iştirakçıları salamlayaraq universitetin bu kimi tədbirlərin təşkilinə marağını və texnoloji ekosistemlə bağlı layihələrə dəstəyini vurğuladı.

Hakatonun beynəlxalq və lokal təmsilçiləri Junction X-dən Qlobal Əlaqələr şöbəsinin rəhbəri Daniil Frieden və EESTEC Baku-nun rəhbəri Adil Qasımov hakaton haqqında məlumat verərək Azərbaycanda ilk dəfə keçirilməsi ilə bağlı hazırlıq prosesindən bəhs etdilər.

Təhsilin İnkişafı Fondunun İdarə Heyətinin Sədri Elnur Nəsibov bu tipli layihələrə Fondun dəstəyinin hər zaman olduğunu və beynəlxalq miqyaslı proyektlərin Azərbaycanda keçirilməsinə daha çox imkan yaradılacağını bildirdi. Elm və Təhsil Nazirliyinin İctimaiyyətlə əlaqələr və kommunikasiya şöbəsinin direktoru Səbuhi Rzayev təşkilati komandanın layihənin icrası prosesinə necə başlaması, layihənin təşkilati komandasının gördüyü işlər, əməkdaşlıqların necə qurulması barəsində fikirlərini bölüşdü.

4SİM-in Analiz və Monitorinq şöbəsinin rəhbəri Əzizə Vidadi və Gənclər Fondunun Gənclər Təşkilati ilə işlər şöbəsinin rəhbəri Orduxan Qəhrəmanzadə ekosistemdə bu kimi tədbirlərin önəmini və təmsil etdikləri qurumun bu sahəyə dəstəyindən bəhs etdilər. Code Academy-nin Marketinq Direktoru Goktug Sarı, PwC Azərbaycandan Texnoloji Menecer Zaur Mustafayev, United Payment Daxili Nəzarət şöbəsinin rəhbəri Rauf Həsənov və ATL Akademiyanın rəhbəri Aydan Həşimova da açılış mərasimində iştirak etmiş və komandalara bu önəmli yarışmada uğurlar arzu ediblər.

Hakatonun əsas mövzuları COP29 istiqamətlərinə uyğun olaraq müəyyən edilmiş şəhər iqlim dözümlülüyü, emissiyaların azaldılması və dövri iqtisadiyyat texnologiyalarını əhatə edir. İştirakçılar növbəti 36 saat ərzində süni intellekt əsaslı həllər hazırlayacaqlar, bir qalib isə Helsinkidə, Finlandiyada keçiriləcək əsas Junction tədbirində Azərbaycanı təmsil edəcəklər.

JunctionX Baku 2024 Finlandiyada yaranan və bütün dünyaya yayılan qlobal Junction hakathon hərəkatının bir hissəsidir və gənc texnologiya həvəskarları arasında innovasiyanı təşviq edir.

JunctionX Baku haqqında:

JunctionX Baku, Azərbaycanda real dünya problemlərinə texnologiya əsaslı həllər yaratmaq üçün tələbələri, inkişaf etdiriciləri və yenilikçiləri bir araya gətirir.

ABŞ-nin “Coursera” şirkətinin “Coursera for Campus” proqramı ilə bağlı məlumat sessiyası keçirilib. Proqram çərçivəsində “Coursera”nın yerli universitetlərlə tələbələrin rəqəmsal bacarıqlarının inkişafı, məşğulluğunun artırılması və digər sahələr üzrə əməkdaşlıq imkanları təqdim olunub.

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) təşəbbüsü və Elm və Təhsil Nazirliyinin tabeliyində Təhsilin İnkişafı Fondunun (TİF) dəstəyi ilə ABŞ-nin “Coursera” şirkətinin “Coursera for Campus” proqramı ilə bağlı məlumat sessiyası keçirilib. Tədbirdə Elm və Təhsil Nazirliyinin və yerli universitetlərin nümayəndələri iştirak ediblər.

“Coursera for Campus” proqramının məqsədi təhsil müəssisələrinə təlim-tədris dəstəyi göstərmək, tələbələrin karyeralarına töhfə verməkdir. Bu təşəbbüs strateji problemlərin həllində universitetlər, kolleclər və müvafiq dövlət orqanları ilə əməkdaşlığı əhatə edir. Layihə təlim proqramlarının modernləşdirilməsi, tələbələrin məşğulluğunun və nailiyyətlərinin artırılması, rəqəmsal bacarıqların inkişafı, həyat boyu öyrənmə kimi sahələri əhatə edir.

“Coursera for Campus” proqramı çərçivəsində tələbələr dünyanın tanınmış universitetlərinin və şirkətlərinin kurslarını bitirərək sertifikat əldə etmək imkanı qazanacaqlar. Həmçinin, Azərbaycan universitetləri gələcəkdə öz tədris proqramları ilə “Coursera” platformasına qoşula bilərlər.

4SİM-in icraçı direktoru Fariz Cəfərov proqramın Azərbaycanda tələbələrin şəxsi inkişafı, o cümlədən elm və sənaye 4.0 klasterinin formalaşdırılması üçün əhəmiyyətli olduğunu vurğulayıb.

TİF-in İdarə Heyətinin sədri Elnur Nəsibov “Coursera” ilə əməkdaşlığı təhsilin beynəlmiləlləşməsi istiqamətində mühüm addım kimi dəyərləndirib.

Tədbirdə “Coursera for Campus” proqramının Avropa və Böyük Britaniya üzrə direktoru Endi Pul və “Coursera”nın Hökumətlərlə Tərəfdaşlıq üzrə direktoru Akankşa Kapur “Ali təhsilin generativ süni intellekt və onlayn öyrənmə ilə transformasiyası” mövzusunda təqdimatla çıxış ediblər. Təqdimatda generativ süni intellektin təhsil sahəsinə təsirləri, süni intellektdən istifadə imkanları barədə məlumat verilib.

Sonda tədbir iştirakçılarını maraqlandıran suallar cavablandırılıb.