Author: redaktr

Sentyabrın 12-də Bakı Slavyan Universiteti (BSU) və Təhsilin İnkişafı Fondu (TİF) arasında tələbələrin sosial və akademik həyatında yenilik yaratmağa yönəlmiş “TələbəPlus” kartı ilə bağlı müqavilə imzalanıb.

Müqavilə BSU-nun rektoru Anar Nağıyev və TİF İdarə Heyətinin sədri Elnur Nəsibov tərəfindən imzalanıb.

Qeyd edək ki, “TələbəPlus” layihəsi TİF, “Kapital Bank” və “Visa” beynəlxalq ödəmə texnologiyaları şirkətinin əməkdaşlığı çərçivəsində gerçəkləşdirilir və vahid tələbə kartlarının tətbiq edilməsi nəzərdə tutur, eləcə də cari tədris ilindən etibarən tətbiq olunan vahid tələbə kartı universitetə giriş-çıxış, debet, ödəniş kartı kimi istifadə ilə yanaşı, tələbələrə endirim, güzəşt və keşbek imkanları təklif edir.

Müqavilənin əsas məqsədi tələbələrə təhsil müddətində bir sıra güzəştlərdən, xidmətlərdən və imkanlardan faydalanmaq imkanı verməkdir.

BSU-nun rektoru Anar Nağıyev çıxış edərək, bu görüşün TİF ilə üçüncü rəsmi görüşün olduğunu və bunun universitet ilə Fond arasında olan əməkdaşlığın davamlı inkişafının göstəricisi olduğunu qeyd edib. İlk rəsmi görüşün ötən ilin 13 iyun tarixində keçirildiyini xatırladaraq, bu tarixin BSU üçün xüsusi əhəmiyyət kəsb etdiyini vurğulayan rektor 2000-ci ilin 13 iyun tarixində Ulu Öndər Heydər Əliyevin imzaladığı Sərəncama əsasən Bakı Slavyan Universiteti təsis edildiyini və bununla da universitet yeni inkişaf mərhələsinə qədəm qoyduğunu, təhsildə daha böyük məsuliyyətlərin daşıyıcısına çevrildiyini bildirib. Rektor çıxışında həmin tarixdə bağlanan müqavilə əsasında universitetin elmi-pedaqoji heyəti və tələbələrinin beynəlxalq İELTS imtahanına hazırlığını və təşviqini nəzərdə tutan layihə icra edilməyə başlandığını bildirib və layihə çərçivəsində İELTS imtahanında iştirak edən, yüksək nəticə göstərən akademik heyət üzvlərinə əlavə maliyyə dəstəyi təmin edildiyini vurğulayıb. Eyni zamanda, A.Nağıyev çıxışında İELTS imtahanında yüksək bal toplayan tələbələrdən biri Dövlət Proqramı vasitəsilə Böyük Britaniyanın nüfuzlu Sheffield Universitetində magistr təhsilini davam etdirmək hüququnu qazandığını qeyd edib.

Rektor Anar Nağıyev çıxışında Təhsilin İnkişaf Fondunun yeni “TələbəPlus” kartı layihəsi haqqında fikirlərini bildirərək, bu layihənin tələbələr və təhsil işçiləri üçün geniş imkanlar yaradan, rahat bir platforma formalaşdıracağını vurğulayıb. O, tələbə kartlarının yaradılmasının sosial dəstək çərçivəsində təhsilin müasirləşdirilməsinə yönəlmiş vacib bir addım olduğunu qeyd edib. Rektor həmçinin layihənin bütün ali təhsil sistemini əhatə etməsi ilə onun genişmiqyaslı olduğunu və bunun yalnız təhsilə deyil, həm də iqtisadiyyat üçün dəyər zənciri formalaşdırdığını xüsusi vurğulayıb.

Rektor çıxışının sonunda bütün layihələrə görə təşəkkürünü ifadə edərək, xüsusilə Təhsilin İnkişaf Fondu ilə Ailə, Qadın və Uşaq Problemləri üzrə Dövlət Komitəsinin birgə əməkdaşlığı çərçivəsində həyata keçirilən “Gənc qızların təhsilinə dəstək” layihəsinin qızların inkişafı baxımından mühüm əhəmiyyətə malik olduğunu qeyd edib.

TİF İdarə Heyətinin sədri Elnur Nəsibov çıxışında son illərdə BSU-da aparılan dəyişikliklər, yeniliklər təhsil ictimaiyyətini sevindirdiyini və buna görədə rektor Anar Nağıyevə eləcə də, BSU kollektivinə öz təşəkkürünü bildirib. Sonra E.Nəsibov layihənin yaranma prosesi və bu istiqamətdə aparılan danışıqlar barədə məlumat verib. Fond rəhbəri layihənin əsas məqsədinin ölkə üzrə tələbələrin eyni güzəşt və endirimlərdən bərabər şəkildə faydalanmalarını təmin etmək olduğunu bildirərək, ilkin mərhələdə 150 min tələbə kartının istifadəyə verilməsinin planlaşdırıldığını vurğulayıb. Elnur Nəsibov həmçinin qeyd edib ki, Fond öz tərəfdaşları ilə birgə alış-veriş mərkəzləri və tələbələr arasında populyar olan müxtəlif iaşə obyektlərində xüsusi güzəştlərin tətbiqi üçün 200-dən çox şirkətlə razılığa gəlib. Eyni zamanda, gələcəkdə bütün təhsil ictimaiyyətini əhatə edəcək bu kimi layihələrin həyata keçirilməsi istiqamətində planların olduğu da söhbət zamanı müzakirə olunub.

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və ABŞ-nin “Coursera” şirkəti tərəfindən birgə həyata keçirilən “4Sİ Akademiyası”nın pilot mərhələsi yekunlaşıb. Qeydiyyatdan keçən 10 min nəfər 1 il ərzində mərhələli şəkildə “Coursera” onlayn təhsil platformasından ödənişsiz yararlanmaq imkanı əldə edib. İştirakçılar 32 mindən çox kursa qatılıblar, təlimləri uğurla tamamlayanlar ümumilikdə 4 mindən çox  beynəlxalq sertifikat əldə ediblər.

Layihənin məqsədi ölkədə rəqəmsal bacarıqların inkişafı, qabaqcıl texnologiyalar sahəsində biliklərin artırılması və əmək bazarında ixtisaslı kadrların hazırlanmasına dəstək olmaqdır. Təqdim edilən kurslar 4-cü sənaye inqilabı, rəqəmsal transformasiya, karyera və dil biliklərinə hazırlıq kimi kateqoriyalara bölünür. İstifadəçilərə Yel, Dyuk, Miçiqan, London, İllinois, Virciniya kimi 40 universitet və “Microsoft”, “IBM”, “Meta” və “Google” kimi şirkətlərin 800-ə yaxın kursundan yararlanmaq təklif edilib. Kursların umumi müddəti 4-6 həftə olmaqla, video mühazirələr, tapşırıqlar və testlərdən ibarətdir.

Qeyd edək ki, “Coursera” onlayn təhsil platformasından ödənişsiz yararlanmaq istəyənlər üçün yaş və digər məhdudiyyətlər qoyulmayıb. Həyat boyu öyrənmənin təminatı layihənin məqsədlərindən biridir. Kursları uğurla başa vuran iştirakçılar “Coursera”nın beynəlxalq səviyyədə tanınan sertifikatlarını əldə edirlər. “4Sİ Akademiyası” istifadəçilərinin ən çox müraciət etdiyi kurs “DeepLearning.AI” tərəfindən təklif olunan “Hamı üçün süni intellekt” (3,5 min istifadəçi) proqramı olub. IBM şirkətinin “Data elmi nədir?” və Nyu-York Dövlət Universitetinin “Blokçeynin əsasları” kurslarının hər birindən 3 min nəfər yararlanıb.

Layihənin milli proqram şəklində davam etdirilməsi nəzərdə tutulub.

Bakı Dövlət Universiteti (BDU) ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Müqaviləni BDU-nun rektoru Elçin Babayev və TİF-in İdarə Heyətinin sədri Elnur Nəsibov imzalayıb.

İmzalanma mərasimində çıxış edən BDU-nun rektoru Elçin Babayev bildirib ki, yarandığı gündən Təhsilin İnkişafı Fondu təhsil müəssisələrində ideyaların reallaşdırılmasına böyük dəstək göstərir: “2021-ci ildən fəaliyyət göstərən Fond ölkədə elm və təhsil istiqamətində mühüm işlərin görülməsində yaxından iştirak edir. BDU da bu prosesə daim öz töhfəsini verir. Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə icra olunan “Maarifçi” tələbə-məzun təcrübə proqramını başa vuraraq, nazirliyin müxtəlif strukturlarında əmək fəaliyyətinə başlayan 9 nəfərdən 3-nün BDU-nun məzunu olması da bunun əyani göstəricisidir. Təhsilin İnkişafı Fondu və Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə “Gənc qızların təhsilinə dəstək” layihəsi də qızlarımızın inkişafı baxımından böyük layihədir. Fond tərəfindən IELTS imtahanında iştirak edən və yüksək bal toplayan tələbələrin bu imtahan üzrə ödənişlərinin Təhsilin İnkişafı Fondu tərəfindən vahid layihə əsasında qarşılanması, onlardan 17-sinin BDU tələbəsi olması da sevindiricidir. Fond Dayanıqlı İnkişaf Məqsədləri və IV sənaye inqilabı çərçivəsində də müxtəlif işlər görür və biz BDU olaraq bu istiqamətdə də birgə işlər görməyə hazırıq”.

BDU ilə “Kapital Bank”ın birgə əməkdaşlığından da söz açan rektor vurğulayıb ki, digər ölkələrdə istifadə olunan bu təcrübənin birgə layihə əsasında ölkəmizdə tətbiqi təqdirəlayiq addımdır və  imzalanan əməkdaşlıq müqaviləsi real işlərə hədəflənib: “İnanıram ki, yeni tələbə kartı özəllikləri ilə fərqlənəcək. Tələbələr üçün müxtəlif xidmətlərdən istifadəni rahatlaşdıracaq və genişləndirəcək”.

Təhsilin İnkişafı Fondunun İdarə Heyətinin sədri Elnur Nəsibov Fondun əsas missiyasının təhsilin dayanıqlı inkişafına nail olmaq, cəmiyyətə fayda vermək, dövlətin təhsil siyasətinin təmin edilməsində yaxından iştirak etmək olduğunu bildirib. Qeyd edib ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Fondun öz tərəfdaşları ilə birlikdə 250-dən çox şirkətlə razılaşma əldə edilib. Bundan əlavə, Mədəniyyət Nazirliyi, Dövlət Turizm Agentliyi ilə müəyyən istiqamətlərdə tələbələr üçün xüsusi güzəştlər nəzərdə tutulur. Hazırda ictimai nəqliyyatda da güzəştlərin tətbiq edilməsi ilə bağlı müzakirələr davam etdirilir. İlkin mərhələdə 150 min tələbə kartının istifadəyə verilməsi planlaşdırılır. Sonradan layihə özəl təhsil müəssisələri, kollec və peşə təhsili müəssisələrinin təhsilalanları üçün də mərhələli şəkildə icra ediləcək: “Oktyabr ayının sonundan “TələbəPlus” kartları ilkin istifadəyə veriləcək”.

Azərbaycan Memarlıq və İnşaat Universiteti (AzMİU) ilə Təhsilin İnkişafı Fondu arasında (TİF) “TələbəPlus” layihəsi çərçivəsində əməkdaşlıq müqaviləsi imzalanıb. Sənədi AzMİU-nun rektoru professor Gülçöhrə Məmmədova və Fondun İdarə Heyətinin sədri Elnur Nəsibov imzalayıblar.

Bununla bağlı AzMİU-da iki qurumun rəhbərləri və nümayəndə heyətləri arasında görüş keçirilib. Görüşdə vurğulanıb ki, “TələbəPlus” layihəsi TİF, “Kapital Bank” və “Visa” beynəlxalq ödəmə texnologiyaları şirkətinin əməkdaşlığı çərçivəsində gerçəkləşdirilir və vahid tələbə kartlarının tətbiq edilməsini nəzərdə tutur. Builki tədris ilindən etibarən tətbiq olunan vahid tələbə kartı universitetə giriş-çıxış, debet, ödəniş kartı kimi istifadə ilə yanaşı, tələbələrə endirim, güzəşt və kəşbək imkanları təklif edir.

Professor Gülçöhrə Məmmədova dünya təcrübəsində rast gəlinən bu cür sosialyönümlü layihələrin Azərbaycanda da tətbiq olunmasını böyük nailiyyət kimi qiymətləndirib və tələbələr adına sevindirici hal olduğunu qeyd edib. Rektor bildirib ki, tələbələrə sosial dəstək xarakterli ideya və təşəbbüslər ali təhsil almaq imkanlarını genişləndirməklə yanaşı ümumilikdə gənclərin bu istiqamətə yönəlməsinə də xidmət edir.

Elnur Nəsibov layihənin necə ortaya çıxması, bunun üçün aparılan danışıqlar barədə məlumat verib. AzMİU-nun müqavilənin imzalandığı ilk ali təhsil ocaqlarından biri olduğuna diqqət çəkən, eyni zamanda, layihənin bütün ölkə üzrə tələbələrin eyni güzəşt və endirimlərdən yararlanmalarını təmin etmək məqsədilə həyata keçirildiyini deyən Fond rəhbəri ilkin olaraq 150 min tələbə kartının istifadəyə verilməsinin planlaşdırıldığını qeyd edib. Elnur Nəsibov alış-veriş mərkəzlərində və tələbələrin ən çox istifadə etdiyi müxtəlif iaşə obyektlərində onlara özəl güzəştlər olunması üçün Fondun öz tərəfdaşları ilə birlikdə 200-dən artıq şirkətlə razılaşma əldə etdiyini diqqətə çatdırıb. Bildirib ki, Mədəniyyət Nazirliyi ilə ilkin anlaşmaya əsasən, muzeylər, qalereyalar və sərgi salonlarında da tələbələr üçün xüsusi güzəştlər tətbiq ediləcək. Əlavə edib ki, tələbələrə güzəştlərin əhatə dairəsi bundan sonra da genişləndiriləcək.

Bunlarla yanaşı, söhbət zamanı gələcəkdə bütün təhsil ictimaiyyətini əhatə edəcək belə layihələrin gerçəkləşdirilməsinin planlaşdırıldığı da qeyd edilib.

Görüşdə, həmçinin AzMİU ilə TİF arasında gələcək əməkdaşlıqlar üzrə fikir mübadiləsi aparılıb, Fond tərəfindən universitetdə Dayanıqlı İnkişaf Mərkəzinin yaradılması, elmi-pedaqoji heyətin və təhsilalanların IELTS imtahanına təşviq edilməsi və digər məsələlərlə bağlı fikir mübadiləsi aparılıb.

Sonra qonaqlar AzMİU-nun Memarlıq və Dizayn fakültələrinin tədris binalarında olublar. Rektor qonaqlara tədris binasının tarixi, memarlığı, sərgilənən diplom və kurs işləri, foto stendlər haqqında məlumat verib.

Sentyabrın 10-da “TələbəPlus” layihəsi çərçivəsində Azərbaycan Dövlət Neft və Sənaye Universiteti (ADNSU) ilə Təhsilin İnkişafı Fondu (TİF) arasında əməkdaşlıq müqaviləsi imzalanıb.

İmzalanma mərasimində ADNSU-nun rektor əvəzi, dosent Vazeh Əskərov, Təhsilin İnkişafı Fondunun İdarə heyətinin sədri Elnur Nəsibov, universitet və Fondun əməkdaşları, Kapital Bankın, eləcə də “Visa” şirkətinin nümayəndələri iştirak ediblər.

Qonaqları salamlayan ADNSU-nun rektor əvəzi, dosent Vazeh Əskərov yeni tədris ilinə hazırlıqla bağlı məlumat verdikdən sonra Fond və universitet arasındakı əməkdaşlıqdan bəhs edib. O, əməkdaşlıq çərçivəsində tələbələrə yeni tələbə kartlarının verilməsinin faydalı olacağını qeyd edib və bildirib ki, universitet olaraq digər önəmli layihələrin icrası ilə bağlı da Fondla əməkdaşlıqda maraqlıdır. 

Tədbirdə çıxış edən Təhsilin İnkişafı Fondunun İdarə Heyətinin sədri Elnur Nəsibov vurğulayıb ki, layihə bütün ölkə üzrə tələbələrin eyni güzəşt və endirimlərdən yararlanmalarını təmin etmək, eyni zamanda onların sosial həyatlarına dəstək göstərmək məqsədi daşıyır.

O, bildirib ki, layihə çərçivəsində ilkin olaraq 150 min tələbə kartının istifadəyə verilməsi planlaşdırılır. Gələcəkdə “TələbəPlus” kartı ölkənin ali təhsil müəssisələri ilə yanaşı, kollec və peşə təhsil müəssisələrində oxuyan tələbələrə də şamil ediləcəkdir.

Təhsilin İnkişafı Fondu  və Azərbaycan Qida və İçki Sənayeçiləri Assosiasiyası arasında Əməkdaşlıq Memorandumu imzalanıb. Sənədi Təhsilin İnkişafı Fondunun İdarə Heyətinin sədri Elnur Nəsibov və Azərbaycan Qida və İçki Sənayeçiləri Assosiasiyasının sədri Emin Dostiyari imzalayıblar.

Memorandumun məqsədi təhsil sisteminin inkişafına yönəlmiş proqram və layihələr üzrə əməkdaşlığın qurulması, eləcə də Azərbaycan Respublikasında təhsil alan tələbələrin istifadəsi üçün nəzərdə tutulmuş “TələbəPlus” kartlarına müxtəlif güzəşt və ya təkliflərin tətbiq edilməsi üçün Assosasiaya üzv sahibkarların cəlb edilməsidir.

Məlumat üçün bildirək ki, “Second Cup”, “The Bagel Bar”, “CupCup coffee”, “SocialBee coffee”, “Hazel”, “Peynirci Baba”, “Happy Moons”, “Kolorit Kafe”, “Herba Flora”, və digər şirkətlər Azərbaycan Qida və İçki Sənayeçiləri Assosiasiyasının üzvləridir.

Sentyabrın 6-da “TələbəPlus” layihəsi çərçivəsində Sumqayıt Dövlət Universiteti ilə Təhsilin İnkişafı Fondu (TİF) arasında əməkdaşlıq müqaviləsi imzalanıb.

İmzalanma mərasimində SDU və TİF nümayəndələri iştirak edib.

Universitetin rektoru, dosent Rüfət Əzizov çıxış edərək  Təhsilin İnkişafı Fondu  ilə növbəti müqavilənin imzalandığını diqqətə çatdırıb. SDU və TİF  arasında elmi-pedaqoji heyətin və təhsilalanların IELTS imtahanına təşviq edilməsi, Dayanıqlı İnkişaf Mərkəzinin yaradılması kimi  əməkdaşlıqların uğurla davam etdirildiyini bildirib və Təhsilin İnkişafı Fondu tərəfindən təqdim olunan “TələbəPlus” layihəsinin tələbələr üçün geniş imtiyazlar verəcəyini qeyd edib.

Təhsilin İnkişafı Fondunun İdarə Heyətinin sədri Elnur Nəsibov çıxış edərək  Fond tərəfindən həyata keçirilən layihələr barədə məlumat verib. Qeyd edib ki, bir müddət öncə Təhsilin İnkişafı Fondu Kapital Bank və “Visa” beynəlxalq ödəmə texnologiyaları şirkəti arasında yeni “TələbəPlus” kartlarının istifadəyə verilməsi üçün memorandum imzalanıb. Kart vasitəsilə tələbələrin güzəşt və endirimlərdən yararlanmalarını təmin etməklə yanaşı, eyni zamanda onların sosial həyatlarına dəstək göstərmək istiqamətində həyata keçiriləcək fəaliyyətlər barədə danışıb.

TİF–in sədri əlavə olaraq qeyd edib ki, alış-veriş mərkəzlərində və tələbələrin ən çox istifadə etdiyi müxtəlif iaşə obyektlərində tələbələrə özəl güzəştlər edilməsi üçün Fond öz tərəfdaşları ilə birlikdə 200-dən artıq şirkətlə razılaşma əldə edib. Bundan əlavə, Mədəniyyət Nazirliyi ilə əldə olunan ilkin razılaşmaya əsasən, muzeylər, qalereyalar və sərgi salonlarında tələbələr üçün xüsusi güzəştlər nəzərdə tutulur. Layihə çərçivəsində ilkin olaraq 150 min tələbə kartının istifadəyə verilməsi planlaşdırılır. Tələbələr bütün bank əməliyyatlarını bu kart vasitəsilə rahat şəkildə yerinə yetirə biləcəklər.

Tələbələr üçün nəzərdə tutulan bu layihənin gələcəkdə təhsil işçilərinə də tətbiq olunacağının planlaşdırıldığı qeyd olunub.

Bakı Mühəndislik Universiteti (BMU)  ilə  Təhsilin İnkişafı Fondu arasında (TİF) “TələbəPlus” layihəsi çərçivəsində əməkdaşlıq müqaviləsi imzalanıb.

Sənədi BMU-nun rektoru Yaqub Piriyev və Fondun İdarə Heyətinin sədri Elnur Nəsibov imzalayıblar. 

Tədbirdə vurğulanıb ki, “TələbəPlus” layihəsi TİF, Kapital Bank və “Visa” beynəlxalq ödəmə texnologiyaları şirkətinin əməkdaşlığı çərçivəsində gerçəkləşdirilir və vahid tələbə kartlarının tətbiq edilməsini nəzərdə tutur. Builki tədris ilindən etibarən tətbiq olunan vahid tələbə kartı universitetə giriş-çıxış, debet, ödəniş kartı kimi istifadə ilə yanaşı, tələbələrə endirim, güzəşt və kəşbək imkanları təklif edir.

Rektor Yaqub Piriyev dünya təcrübəsində rast gəlinən belə sosialyönümlü layihələrin Azərbaycanda da  tətbiq olunmasını böyük nailiyyət kimi qiymətləndirib. Bildirib ki, tələbələrə sosial dəstək xarakterli ideya və təşəbbüblərə hər zaman ehtiyac var və onların reallaşması üçün atılan bütün addımlar təqdirəlayiqdir. Layihədən ölkənin bütün universitet tələbələrinin yararlanması üçün atılan addımları müsbət dəyərləndirən BMU rektoru “TələbəPlus” kartından tələbələrin məmnun qalacağına əminliyini söyləyib.

TİF-in İdarə Heyətinin sədri Elnur Nəsibov layihənin necə ortaya çıxması, bunun üçün aparılan danışıqlar barədə məlumat verib. BMU-nun müqavilənin imzalandığı ilk ali təhsil ocaqlarından biri olduğunu önə çəkən, eyni zamanda layihənin bütün ölkə üzrə tələbələrin eyni güzəşt və endirimlərdən yararlanmalarını təmin etmək məqsədilə həyata keçirildiyini deyən Fond rəhbəri ilkin olaraq 150 min tələbə kartının istifadəyə verilməsinin planlaşdırıldığını qeyd edib. E.Nəsibov alış-veriş mərkəzlərində və tələbələrin ən çox istifadə etdiyi müxtəlif iaşə obyektlərində onlara özəl güzəştlər olunması üçün Fondun öz tərəfdaşları ilə birlikdə 200-dən artıq şirkətlə razılaşma əldə etdiyini diqqətə çatdırıb. Bildirib ki, Mədəniyyət Nazirliyi ilə ilkin anlaşmaya əsasən, muzeylər, qalereyalar və sərgi salonlarında da tələbələr üçün xüsusi güzəştlər tətbiq ediləcək. E.Nəsibov tələbələrə güzəştlərin əhatə dairəsinin gələcəkdə genişləndiriləcəyini sözlərinə əlavə edib.     

Sonra tədbirdə BMU ilə TİF arasında gələcək əməkdaşlığın əsas istiqamətləri üzrə fikir mübadiləsi aparılıb.

Sentyabrın 5-də Mərkəzi Aran Regional Təhsil İdarəsi üzrə təhsil işçilərinin sentyabr konfransı keçirilib. Konfransda Təhsilin İnkişafı Fondunun İdarə Heyətinin sədri Elnur Nəsibov, Mingəçevir Şəhər İcra Hakimiyyətinin başçısı İlham İsmayılov, Azərbaycan Respublikası Təhsil İnstitutunun direktor müavini Fuad Qarayev, Mərkəzi Aran Regional Təhsil İdarəsinin müdiri Elçin Kərimov, Mərkəzi Aran Regional Təhsil İdarəsinin struktur üzrə bölmə rəhbərləri və əməkdaşları, həmin ərazilərdə çalışan məktəb direktorları, müəllimlər və digər rəsmi qonaqlar iştirak ediblər.

Tədbirdən əvvəl qonaqlar ümummilli lider Heydər Əliyevin abidəsini ziyarət edib, önünə gül dəstələri düzüblər. Sonra qonaqlar şagirdlərin rəsm və əl işlərindən ibarət sərgiyə baxış keçiriblər.

Konfransda çıxış edən Təhsilin İnkişafı Fondunun İdarə Heyətinin Sədri Elnur Nəsibov təhsil sahəsində aparılan islahatlardan və ölkəmizin təhsilində baş verən nailiyyətlərdən söz açıb. Qarabağda və bütün Respublika ərazisindəki təhsil müəssisələrində həyata keçirilən əsaslı təmir və yenidənqurma işləri haqqında söz açan Elnur müəllim çıxışının sonunda bütün iştirakçılara uğurlar arzu edib.

Mingəçevir Şəhər İcra Hakimiyyəti başçısı İlham İsmayılov Azərbaycanda Təhsil sahəsində aparılan islahatlardan söz açıb. İlham müəllim çıxışında qarşıdan gələn 15 Sentyabr – Bilik Günü münasibətilə konfrans iştirakçılarını təbrik edib.

Daha sonra Azərbaycan Respublikası Təhsil İnstitutunun Direktor müavini Fuad Qarayev Mərkəzi Aran Regionunda olan IV və VI sinif şagirdlərinin monitorinq, eləcə də IX və XI siniflərin buraxılış imtahanlarının nəticələri haqqında danışıb. Dövlətimizin bir sıra təhsil müsabiqələrini maliyyələşdirməsindən söz açan Fuad müəllim şagirdlərimizin beynəlxalq müsabiqələrdəki uğurlarından danışıb. Növbəti ildə baş tutacaq təlimlərlə bağlı informasiyanı konfrans iştirakçıları ilə paylaşan Fuad Qarayev bir sıra maraqlı və vacib məqamlar haqqında konfrans iştirakçılarını məlumatlı edib.

Təsbirin sonunda Mərkəzi Aran Regional Təhsil İdarəsinin müdiri Elçin Kərimov hesabatla çıxış edib. Hesabatda Yaşıl Dünya naminə görülmüş işlər haqqında məlumat verən idarə müdiri bu sahədə həyata keçirilmiş layihələrdən danışıb. Elçin müəllim İdarənin tabeliyində olan rayonlarda həyata keçirilən bir sıra təmir və tikinti işlərindən də söz açıb. Müxtəlif statistik kəmiyyətlərə toxunan və gələcək hədəflərdən danışan idarə müdiri sonda bütün konfrans iştirakçılarına təşəkkürünü bildirib və onlara uğurlar arzu edib.

Azərbaycan Texniki Universiteti (AzTU) və Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

İmzalanma mərasimində AzTU və TİF rəhbərliyi, Kapital Bankın nümayəndələri iştirak edib.

AzTU rektoru Vilayət Vəliyev “TələbəPlus” kartının tələbələr üçün ən önəmli layihələrdən olacağını bildirib və belə təşəbbüs üçün fonda təşəkkür edib.

TİF-in İdarə Heyətinin sədri Elnur Nəsibov layihə üzrə tətbiq edilən güzəşt və endirimlərdən bütün tələbələrin yararlana biləcəyini bildirib. Layihə çərçivəsində ilkin olaraq 150 min tələbə kartının istifadəyə verilməsi planlaşdırılır.