Dünya Təhsil Forumunun direktoru Dominik Savaj Təhsilin İnkişafı Fondunun qonağı olub.
TİF İdarə Heyətinin sədri Elnur Nəsibov qonağı Fondun kollektivi ilə tanış edib, həyata keçirilən layihələr haqqında geniş məlumat verib.
Otuz ildən çox Britaniya Təhsil Təchizatçıları Assosiasiyasının baş direktoru olan Dominik Savaj Dünya Təhsil Forumunun təbliğ etdiyi əsas ideyanın dünyaya açıq olmaq, yaradıcılığı, öyrənmək həvəsini dəstəkləmək, həyatda müxtəlif yeni sahələri kəşf etmək, öyrənməkdən ibarət olduğunu vurğulayıb.
Qeyd edək ki, Dünya Təhsil Forumu təhsil və bacarıqlar nazirlərinin ən böyük illik toplantısıdır. Hər il Londonda keçirilən Dünya Təhsil Forumunda dünya əhalisinin 80 faizindən çoxunu təmsil edən nazirlər və onların baş məsləhətçiləri gələcək təhsil siyasətini müzakirə etmək üçün bir araya gəlirlər.
Oktyabrın 4-də ADA Universitetində Təhsildə Yeni Çağırışlar V Beynəlxalq Forumu keçirilib.
Beynəlxalq Forum Elm və Təhsil Nazirliyi, Dünya Təhsil Forumu və Təhsilin İnkişafı Fondunun tərəfdaşlığı, “T-Network” təhsil işçilərinin təcrübə və kommunikasiya platformasının və ADA Universitetinin təşkilatçılığı, “Azərbaycan müəllimi” qəzeti, Təhsil TV və “Azərbaycan məktəbi” jurnalının media dəstəyi ilə hibrid formada reallaşıb.
“Yaşıl dünya naminə həmrəylik ili”nə həsr edilən və COP29 ideyasını özündə ehtiva edən beynəlxalq forum “Daha təhsilli gələcək” devizi ilə baş tutub.
Forum Dövlət Himninin səsləndirilməsi ilə başlayıb, şəhidlərimizin xatirəsi birdəqiqəlik sükutla yad edilib.
Açılış nitqi ilə çıxış edən elm və təhsil naziri Emin Əmrullayev sözügedən forumun təhsil haqqında müzakirələri peşəkar səviyyəyə qaldıran bir platforma olaraq əhəmiyyətini vurğulayıb və artıq 5-ci dəfə keçirilməsini yüksək qiymətləndirib. Dünyanın bütün təhsil sistemlərində oxşar problemlər olduğunu və onların müzakirəsinin faydalılığını qeyd edən Emin Əmrullayev ölkəmizin təhsil fəlsəfəsi, təhsil liderliyi, elmi tədqiqatlara əsaslanan təhsil prosesi, təhsilin məzmunu, müəllimlər üçün bilik qədər insani keyfiyyətlərin də əhəmiyyətli olması, ali təhsilə baxış məsələlərinə toxunub.
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Azərbaycanda keçirilməsinin təhsil sahəsində qlobal trendlərə qoşulmaq üçün çox geniş imkanlar yaradacağına inamını ifadə edən Emin Əmrullayev məktəblərdə ətraf mühit savadlılığı ilə bağlı ölçmələr aparılmasının, yeni mədəniyyət və davranışların formalaşmasının vacibliyini vurğulayıb.
Nazir sonda müəllim adının məsuliyyətini bir daha xatırladaraq 5 oktyabr – Beynəlxalq Müəllimlər Günü münasibətilə bütün müəllimləri təbrik edib və onlara fəaliyyətlərində uğurlar arzulayıb.
Forumun moderatoru, T-Network platformasının rəhbəri Cəfər Mənsimi qonaqları salamlayaraq forumun məqsəd və əhəmiyyəti barədə danışıb. Bildirib ki, forumun təşkilində əsas məqsəd təhsildə yeni çağırışları müzakirə etmək, ekoloji təhsilə, xüsusilə “yaşıl təhsil” ideyasına diqqəti artırmaq, yeni dövrün təhsil tələblərini nəzərdən keçirərək keyfiyyətin daha da yüksəldilməsinə nail olmaqdır. Forum “Ekoloji savadlılıq və davranış mədəniyyəti, təhsildə yaşıl çağırışlar və öhdəliklər, yaşıl bacarıqlar strategiyası: təhsilin gələcəyi və ekoloji innovasiyalar, təhsildə liderlik və ekoloji səmərəlilik, yaşıl öyrənmə mühiti və müəllim hazırlığı, təhsildə iştirakçılıq və əməkdaşlıq ekosistemi” mövzularını əhatə edir.
Daha sonra Dünya Təhsil Forumunun direktoru Dominik Savaj “Məktəblər yaşıl bacarıqları effektiv inkişaf etdirmək üçün hansı təşəbbüsləri həyata keçirə bilərlər?” mövzusunda təqdimatla çıxış edib. Dominik Savaj ətraf mühitin qorunmasında gənc nəslin rolunun daha önəmli olduğunu, buna görə də ailədə və məktəbdə onların özlərinə dəyər verən şəxsiyyət kimi formalaşmasının vacibliyini vurğulayıb. Onun sözlərinə görə, özünü dəyərli hiss etməyən insan planetə də hörmət etməz və ona dəyər verməz.
Dominik Savaj bildirib ki, dünya iqlim dəyişikliyinin təsirləri ilə mübarizə apararkən adətən onun təhsilə təsiri nəzərdən qaçırılır. Halbuki planetin artan temperaturu və istilik dalğaları təkcə ətraf mühiti təhdid etmir, həm də bütün dünyada milyonlarla uşağın təhsilinə mane olur. O qeyd edib ki, məktəblər yaşıl bacarıqları effektiv inkişaf etdirmək üçün təşəbbüslər həyata keçirə bilər.
Uşaqlarda yaşıl bacarıqların formalaşmasında COP29-un yaxşı bir fürsət olduğunu deyən Dominik Savaj əlavə edib ki, ölkələrin kurikulum sistemində də iqlim dəyişikliyi mütləq nəzərə alınmalıdır.
Foruma onlayn qatılan İqtisadi Əməkdaşlıq və İnkişaf Təşkilatının təhsil və bacarıqlar üzrə direktoru Andreas Şleyxer isə “Dayanıqlı inkişaf yolunda təhsil” mövzusunda geniş təqdimat edib. Andreas Şleyxer PISA tədqiqatları əsasında müxtəlif ölkələrdə 15 yaşlı məktəblilərin ekoloji savadlılığının təhlil nəticələri və təbiət fənlərinə diqqəti artırmaqla planetin gələcəyinə sərmayə qoymağın vacibliyindən danışıb.
Forum çərçivəsində Estoniyada ekoməktəblər üzrə koordinator Maris Məgi “Ekoloji şüurlu şagirdləri necə yetişdirmək olar? Ekoməktəblərdən dərslər”, ADA Universitetinin prorektoru Vəfa Kazdal “Təhsildə iştirakçılıq və əməkdaşlıq ekosistemi”, pedaqogika üzrə tanınmış alim, təhsil tədqiqatçısı Özgür Bolat “Təbiət uşaqların nailiyyətlərinə və xoşbəxtliyinə necə təsir edir?” mövzularında təqdimatlarla çıxış ediblər. Təqdimatlarda ekoməktəblərin təcrübəsindən, fənlərarası inteqrasiyanın artırılmasının yaşıl dünya tələblərinə cavab vermək baxımından vacibliyindən, valideyn-övlad, müəllim-şagird münasibətlərindən danışılıb.
Beynəlxalq forum çərçivəsində “Təhsildə hansı yaşıl çağırışlar var və bu çağırışlar hansı öhdəliklər yaradır?”, “Təbiətlə dost olan şagirdlərin yetişdirilməsi üçün hansı addımların atılmasına ehtiyac var?”, “Ekoloji savadlılıq və davranış mədəniyyətinin inkişafına təkan vermək üçün təhsildə hansı ənənəvi yanaşmaları yeni yanaşmalarla əvəz etmək lazımdır?”, “Yaşıl məktəb ideyası mövcud kurikulumlara necə inteqrasiya olunmalıdır?” sualları ətrafında da müzakirələr aparılıb.
Qeyd edək ki, forumun əsas tərəfdaşlarından biri sayılan Dünya Təhsil Forumu təhsil və bacarıqlar nazirlərinin ən böyük illik toplantısıdır. Hər il Londonda keçirilən Dünya Təhsil Forumunda dünya əhalisinin 80 faizindən çoxunu təmsil edən nazirlər və onların baş məsləhətçiləri gələcək təhsil siyasətini müzakirə etmək üçün bir araya gəlirlər.
“Maya Hacıyeva adına İKT Bacarıqları” təqaüd proqramının ilk iştirakçılarının məzun günü baş tutub. Proqram çərçivəsində 2 ay ərzində “QA tester” və “Rəqəmsal Marketinq” sahələri üzrə təhsil alan gənclər uğurla təhsillərini başa vuraraq sertifikatlarını əldə ediblər.
Qeyd edək ki, Təhsilin İnkişafı Fondu və “Women in Tech” təşkilatının Azərbaycan nümayəndəliyinin birgə əməkdaşlığı çərçivəsində həyata keçirilən “Maya Hacıyeva adına İKT Bacarıqları” təqaüd proqramının təsis məqsədi qadınların İnformasiya Texnologiyaları və Yüksək Texnologiyalar üzrə bilik və bacarıqlarının artırılmasıdır. Layihə Azərbaycan vətəndaşı olan 15-40 yaş arası xanımların İKT sahəsində yeni bilik və bacarıqlar əldə etməsinə yönəlmişdir.
Oktyabrın 4-də ADA Universitetində Təhsildə Yeni Çağırışlar V Beynəlxalq Forumu keçiriləcək.
Beynəlxalq Forum Elm və Təhsil Nazirliyi, Dünya Təhsil Forumu və Təhsilin İnkişafı Fondunun tərəfdaşlığı, “T-Network” təhsil işçilərinin təcrübə və kommunikasiya platformasının və ADA Universitetinin təşkilatçılığı, “Azərbaycan müəllimi” qəzeti, Təhsil TV və “Azərbaycan məktəbi” jurnalının media dəstəyi ilə hibrid formada reallaşacaq.
Əsas məqsəd təhsildə yeni çağırışları müzakirə etmək, ekoloji təhsilə, xüsusilə təhsilin yaşıllaşdırılması ideyasına diqqəti artırmaq, yeni dövrün təhsil tələblərini nəzərdən keçirərək keyfiyyətin daha da yüksəldilməsinə nail olmaqdır.
“Yaşıl dünya naminə həmrəylik ili”nə həsr edilən və COP29 ideyasını özündə ehtiva edən beynəlxalq forum “Daha təhsilli gələcək” devizi ilə baş tutacaq.
Forumun əsas məruzəçiləri Dünya Təhsil Forumunun direktoru Dominik Savaj ilə İqtisadi Əməkdaşlıq və İnkişaf Təşkilatının təhsil və bacarıqlar üzrə direktoru Andreas Şleyxerdir.
Forum “Ekoloji savadlılıq və davranış mədəniyyəti, təhsildə yaşıl çağırışlar və öhdəliklər, yaşıl bacarıqlar strategiyası: təhsilin gələcəyi və ekoloji innovasiyalar, təhsildə liderlik və ekoloji səmərəlilik, yaşıl öyrənmə mühiti və müəllim hazırlığı, təhsildə iştirakçılıq və əməkdaşlıq ekosistemi” mövzularını əhatə edəcək.
Forum çərçivəsində “Təhsildə hansı yaşıl çağırışlar var və bu çağırışlar hansı öhdəliklər yaradır?”, “Təbiətlə dost olan şagirdlərin yetişdirilməsi üçün hansı addımların atılmasına ehtiyac var?”, “Ekoloji savadlılıq və davranış mədəniyyətinin inkişafına təkan vermək üçün təhsildə hansı ənənəvi yanaşmaları yeni yanaşmalarla əvəz etmək lazımdır?”, “Yaşıl məktəb ideyası mövcud kurikulumlara necə inteqrasiya olunmalıdır?” sualları ətrafında müzakirələr aparılacaq.
“Tərəfdaşlıqdan Tərəqqiyə” şüarı ilə 8 oktyabr 2024-cü il tarixində Gülüstan Sarayıda 300 nəfər dövlət və özəl sektor nümayəndələrinin iştirakı ilə baş tutacaq Təhsilin İnkişafı Formunun spikerləri məlum olub.
Azərbaycan Respublikası Elm və Təhsil Nazirliyi, Elm və Ali Təhsil üzrə Dövlət Agentliyi və Təhsilin İnkişafı Fondunun təşkilatçılığı, “Kapital Bank”, STP Şirkətlər Qrupu, “Bestcomp Group” və “Veysəloğlu” Şirkətlər Qrupunun baş sponsorluğu, SOCAR, bp və “Lenovo”nunsponsorluğu ilə baş tutacaq Forumun əsas məqsədi dövlət-universitet-sənaye tərəfdaşlığının dayanıqlı və davamlı inkişafı ilə yanaşı birgə dialoq üçün uyğun platformanın təmin edilməsi və prosesin hərtərəfli dəstəklənməsidir.
3 moderator və 21 spiker “Tərəfdaşlıqdan Tərəqqiyə” şüarı ilə “Biliyi dəyərə çevirən sinerji”, “Tədqiqatdan inkişafa gedən yol”, “Gələcəyi gənclərə necə hazırlamalı” panellər üzrə müxtəlif mövzular haqqında müzakirələr aparacaqlar.
Təhsilin İnkişafı Fondunun İdarə Heyətinin sədri Elnur Nəsibovun moderator olduğu “Biliyi dəyərə çevirən sinerji” panelində Elm və təhsil naziri Emin Əmrullayev, İqtisadiyyat naziri Mikayıl Cabbarov, Əmək və əhalinin sosial müdafiəsi naziri Sahil Babayev, Dövlət İmtahan Mərkəzinin İdarə Heyətinin sədri Məleykə Abbaszadə, SOCAR-ın prezidenti Rövşən Nəcəf spiker qismində, TÜBİTAK-ın prezidenti Orhan Aydın isə məzurəçi qismində öz təcrübələrini bölüşəcəklər.
Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərovun moderator olduğu “Tədqiqatdan inkişafa gedən yol” panelində Azərbaycan Texniki Universitetinin rektoru Vilayət Vəliyev, bp-nin Xəzər regionu üzrə vitse-prezidenti Bəxtiyar Aslanbəyli, Bakı Ali Neft Məktəbinin rektoru Elmar Qasımov, İnnovasiya və Rəqəmsal İnkişaf Agentliyinin sədri İnarə Vəliyeva, Kapital Bankın İdarə Heyətinin üzvü Fərid Hidayətzadə spiker qismində və TÜBİTAK TEMEG İdarə Heyətinin üzvü, “CATALYSADE” şirkətinin təsisçisi Sanem Yalçıntaş məruzəçi kimi vacib mövzulara toxunacaq.
STP Şirkətlər Qrupunun Baş İnsan Resursları İnzibatçısı Şölə Əliyevanın moderator olduğu “Gələcəyi gənclərə necə hazırlamalı” paneli Qarabağ Universitetinin rektoru Şahin Bayramov, Dövlət Məşğulluq Agentliyinin İdarə Heyətinin sədri Sadiq Əliyev, Milli Məclisin deputatı, ADA universitetinin prorektoru Fariz İsmayılzadə, Elm və Təhsil Nazirliyinin Yüksək Texnologiyalar Parkının baş direktoru Nihat Məcidov, NEQSOL Holding Azərbaycan ofisinin rəhbəri İmran Əhmədzadəninçıxışları ilə baş tutacaq.
Təhsilin İnkişafıForumu haqqında məlumat əldə etmək və tədbir ilə bağlı daha ətraflı məlumat əldə etmək üçün forumun rəsmi internet səhifəsinə (www.tif.az) keçid edə və sosial media hesablarını izləyə bilərsiniz.
Müstəqil Sənayeçi və İş Adamları Dərnəyi (MÜSİAD) Azərbaycanın İdarə Heyətinin sədri Rəşad Cabirli, Maliyyə və Planlama Komissiyasının sədri Azər Göyüşov, Təhsil və Mədəniyyət Komissiyasının sədri, İdarə Heyəti üzvü Elvin Əliyev və Gənc MÜSİAD Azərbaycan sədri, İdarə Heyəti üzvü Akif Başoğlu Təhsilin İnkişafı Fondunun qonağı olublar.
Təhsilin İnkişafı Fondunun İdarə Heyətinin sədri Elnur Nəsibov Fondun 2023-cü il ərzində gördüyü işlər, eləcə də 2024-cü il üçün təqsdiq edilən fəaliyyət istiqamətləri haqqında məlumatı diqqətə çatdıraraq, hər iki qurumun fəaliyyətinin kəsişdiyi layihələr üzrə əməkdaşlığa hazır olduğunu vurğulayıb. E.Nəsibov Fondun “Visa” beynəlxalq ödəmə texnologiyaları şirkəti və Kapital Bank ilə birgə həyata keçirilən “TələbəPlus” layihəsi haqqında ətraflı məlumat verərək, layihənin məqsədinin tələbələrin eyni güzəşt və endirimlərdən faydalanmalarını təmin etmək, onların sosial həyatına dəstək göstərmək olduğunu bildirib.
MÜSİAD Azərbaycanın İdarə Heyətinin sədri Rəşad Cabirli görüş iştirakçılarına qurum haqqında ətraflı məlumat verərək MÜSİAD Azərbaycanın gördüyü işlərdən danışıb. R.Cabirli 1990-cı ildə İstanbulda qurulan “MÜSİAD”in, Türkiyədə 84, 81 fərqli ölkədə isə ümumilikdə 169 məntəqə ilə xidmət edən “İşadamları Dərnəyi” olduğunu diqqətə çatdırıb. Rəşad Cabirli müxtəlif sahələrdən olan MÜSİAD Azərbaycan üzvləri ilə Fond arasında qısa zamanda geniş tərkibdə görüşün keçirilməsi istəyini bildirib.
Görüş zamanı həmçinin Təhsilin İnkişafı Fondu ilə MÜSİAD Azərbaycan arasında əməkdaşlıq perspektivləri barəsində fikir mübadiləsi aparılıb.
Sentyabrın 18-də Azərbaycan Dillər Universiteti (ADU) ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb. Müqavilə ADU-nun rektoru akademik Kamal Abdulla və TİF-in İdarə Heyətinin sədri Elnur Nəsibov tərəfindən imzalanıb.
İmzalanma mərasimində çıxış edən Azərbaycan Dillər Universitetinin rektoru akademik Kamal Abdulla son illər universitetin əldə etdiyi yüksək nailiyyətlərdən, bir çox ölkələrin ali təhsil müəssisələri arasında uğurlu əməkdaşlıq əlaqələrindən danışıb. Yeni təhsil ilinin uğurla başladığını vurğulayan rektor qeyd edib ki, beynəlxalq reytinq cədvəllərində dünyanın ən nüfuzlu universitetləri sırasına daxil olan Azərbaycan Dillər Universitetinin 2024/2025-ci tədris ilində bakalavriat pilləsi üzrə qəbul planı 99,09% dolub. Yeni tədris ilində Azərbaycan Dillər Universitetinə qəbul nəticələrinə əsasən 63 tələbə 600 baldan yüksək, dörd tələbə isə 650-dən yüksək bal toplayıb.
Tədbirdə çıxış edən Təhsilin İnkişafı Fondunun İdarə Heyətinin sədri Elnur Nəsibov bildirib ki, Fondun əsas missiyası təhsilin dayanıqlı inkişafına nail olmaq, dövlətin təhsil siyasətinin təmin edilməsində yaxından iştirak etməkdir. Təhsilin İnkişafı Fondunun həyata keçirdiyi “TələbəPlus” layihəsi tələbələrin eyni güzəşt və endirimlərdən faydalanmalarını təmin etmək, onların sosial həyatına dəstək göstərmək məqsədi daşıyır.
Elnur Nəsibov qeyd edib ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Təhsilin İnkişafı Fondunun öz tərəfdaşları ilə birlikdə 250-dən çox şirkətlə razılaşma əldə edilib. Bundan başqa, Mədəniyyət Nazirliyi, Dövlət Turizm Agentliyi ilə müəyyən istiqamətlərdə tələbələr üçün xüsusi güzəştlər nəzərdə tutulur. Hazırda ictimai nəqliyyatda da güzəştlərin tətbiq edilməsi ilə bağlı müzakirələr aparılır. “TələbəPlus” layihəsi çərçivəsində ilkin olaraq 150 min tələbə kartı kartının istifadəyə verilməsi planlaşdırılır. Tələbələrin sosial və akademik həyatında yenilik yaratmağa yönələn “TələbəPlus” kartlarının oktyabr ayının sonundan ilkin istifadəyə verilməsi nəzərdə tutulur. Gələcəkdə “TələbəPlus” kartının ali təhsil müəssisələri ilə yanaşı, kollec və peşə təhsili müəssisələrində oxuyan tələbələrə də mərhələli şəkildə verilməsi nəzərdə tutulur.
Təhsilin İnkişafı Fondu ilə “NEQSOL Holding”in birgə əməkdaşlığı çərçivəsində həyata keçirilən “Parla” təqaüd və inkişaf proqramına qəbul açıq elan edilir. Proqrama ölkə üzrə bütün ali təhsil müəssisələrində bakalavriat təhsili alan tələbə qızlar müraciət edə bilərlər. Proqram çərçivəsində seçilmiş tələbələr aylıq təqaüdlə yanaşı, təcrübə, mentorluq, təlimlər və “NEQSOL Academy” ilə “LinkedIn Learning” vasitəsilə dünyanın aparıcı universitetlərinin proqramlarına çıxış kimi imkanlardan yararlanacaqlar.
Seçim şərtləri
Proqrama aşağıdakı meyarlara cavab verən şəxslər müraciət edə bilərlər:
Azərbaycan Respublikasının vətəndaşı olmalı;
Azərbaycan Respublikasının elmi-müəssisə və təşkilatlarında əyani təhsilalma forması olan bakalavriat təhsili almalı;
Ali təhsil müəssisəsinin bakalavr pilləsinə qəbul imtahanında minimum 450 bal toplamalı;
Ümumi orta müvəffəqiyyət göstəriciləri 80%-dən yuxarı olmalı;
Dərsdənkənar fəaliyyətlərdə fəal iştirak etməli (könüllülük, sosial fəaliyyət və s.);
Aşağıdakı sosial meyarlardan birinə cavab verməlidir: – ünvanlı dövlət sosial yardımı alan ailənin üzvü; – valideynləri olmayan və ya uşaq evində böyümüş şəxs.
Hər iki valideyni (tək valideyni olduqda isə həmin şəxs) aşağıda qeyd olunan kateqoriyaların hər hansı birinə aid olan şəxs: – I, II və ya III dərəcə əlilliyi müəyyən edilmiş şəxslər; – İşsiz kimi qeydiyyatda olan şəxslər; – İş yeri olmayan və yaşa görə əmək pensiyası alan şəxslər; – İş yeri olmayan və yaşa görə sosial müavinət alan şəxslər.
Qeyd: Yuxarıdakı sosial meyarlara cavab verən I kurs tələbələrinin seçimi zamanı qəbul imtahanında toplanılan bal əsas götürülür.
Seçim prosesi onlayn müraciət, qiymətləndirmə və müsahibə mərhələlərindən ibarət olacaqdır. Seçim zamanı akademik göstəricilər və motivasiya məktubu nəzərə alınacaqdır. Yekun seçimdə müsahibə mərhələsində göstərilən nəticə əsas götürülür. Müsahibə zamanı namizədlərə hədəfləri, sosial vəziyyəti, fəaliyyəti, tələbə həyatı ilə bağlı suallar veriləcəkdir. Bütün mərhələlərdən uğurla keçən 50 tələbə qız aylıq 200 manat məbləğində təqaüd əldə edəcək və proqram çərçivəsində onlara təqdim olunan şəxsi və peşəkar inkişaf fəaliyyətlərində iştirak edəcəklər.
“4Sİ Akademiyası” ABŞ-nin “Coursera” şirkətinin “Üstün Nailiyyət Mükafatı 2024” üzrə finala çıxıb.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM), Elm və Təhsil Nazirliyinin tabeliyində Təhsilin İnkişafı Fondunun (TİF) birgə əməkdaşlığı ilə həyata keçirilən “4Sİ Akademiyası” ABŞ-nin “Coursera” şirkətinin “Üstün Nailiyyət Mükafatı 2024” üzrə finala çıxıb. “4Sİ Akademiyası” 42 ölkə tərəfindən təqdim edilən 170 layihə arasında əmək bazarında ixtisaslı kadrların hazırlanması, rəqəmsal bacarıqların inkişafı, qabaqcıl texnologiyalar sahəsində biliklərin artırılması, inklüzivliyin təmin edilməsi, Bakı şəhəri və regionlardan vətəndaşların proqrama cəlb edilməsi, innovativ həllərin tətbiqi üzrə verdiyi töhfələrə görə final mərhələsinə yüksəlib.
Dünya üzrə ən populyar tədris platforması olan “Coursera” hər il insan kapitalının inkişafı üzrə mühüm nailiyyətlər əldə edən tərəfdaşlara “Üstün Nailiyyət Mükafatı” təqdim edir. Seçim zamanı tədris platformasında onlayn təhsilə cəlb edilənlər və əldə edilmiş beynəlxalq sertifikatlar, qazanılan yeni biliklər əsasında karyerasında yüksələnlərin sayı və digər göstəricilər əsas götürülür. Müsabiqənin final mərhələsi sentyabrın 17-də ABŞ-nin Las Veqas şəhərində keçiriləcək.
“4Sİ Akademiyası”nın məqsədi ölkədə rəqəmsal bacarıqların inkişafı, qabaqcıl texnologiyalar sahəsində biliklərin artırılması və əmək bazarında ixtisaslı kadrların hazırlanmasına dəstək olmaqdır. Layihə çərçivəsində 1 il ərzində ölkə üzrə 10 min nəfər “Coursera” onlayn təhsil platformasından ödənişsiz yararlanıb. İştirakçılara Yel, Dyuk, Miçiqan, London, İllinois, Virciniya kimi 40 universitet və “Microsoft”, “IBM”, “Meta” və “Google” kimi texnologiya şirkətlərinin 4-cü sənaye inqilabı, rəqəmsal transformasiya, karyera və dil bilikləri ilə bağlı 800-ə yaxın kursundan yararlanmaq təklif edilib. İstifadəçilər 4Sİ texnologiyaları, süni zəka, maşın öyrənməsi, böyük verilənlər, data analitika, blokçeyn və bulud texnologiyaları, proqramlaşdırma dilləri, eləcə də liderlik, kommunikasiya, biznes, idarəetmə və digər istiqamətlərdə 32 min saatdan çox video mühazirəyə qatılıblar. Təlimləri uğurla tamamlayanlar ümumilikdə 4 mindən çox beynəlxalq sertifikat əldə ediblər.
Layihənin milli proqram şəklində davam etdirilməsi nəzərdə tutulub.
13 sentyabr tarixində Beyləqan şəhər Humanitar Fənlər Təmayüllü Liseydə Mil – Muğan Regional Təhsil İdarəsinin tabeliyində fəaliyyət göstərən məktəblərin şagirdləri və müəllimləri ilə görüş baş tutub.
Görüşün əsas məqsədi Təhsilin İnkişafı Fondu ilə “Inci Group of Companies” şirkətinin birgə həyata keçirdiyi “Məktəblərə kitab ianəsi” layihəsi çərçivəsində Mil – Muğan Regional Təhsil İdarəsinə kitabların təhvil verilməsi olub.
Görüşdə Təhsilin İnkişafı Fondunun İdarə Heyətinin sədri Elnur Nəsibov, Mil – Muğan Regional Təhsil İdarəsinin müdiri Rəşad Musayev, “Inci Group of Companies” şirkətinin təsisçisi Mikayıl Yusifov iştirak ediblər.
Mil – Muğan Regional Təhsil İdarəsinin müdiri Rəşad Musayev qonaqları salamlayaraq layihənin təşəbbüskarlarına şagirdlərə hədiyyə olunan kitablar üçün təşəkkürünü bildirib. R.Musayev bu cür layihələrin şagirdləri dərsliklərdən əlavə ədəbiyyat oxumağa həvəsləndirdiyini xüsusi vurğulayıb.
Təhsilin İnkişafı Fondunun İdarə Heyətinin sədri Elnur Nəsibov görüş iştirakçılarını Fondun yaranması, əsas fəaliyyət istiqamatləri, hazırda icra edilən layihələr haqqında məlumatlandırıb. Fondun dövlət-özəl tərəfdaşlığını təşviq etdiyini bildirən sədr, layihə haqqında ideyanın yarandığı ilk günlərdən “Inci Group of Companies” şirkətinin dəstəyini vurğulayıb. E.Nəsibov layihə müddətində ötən il ianə edilən kitabların sayının 4800 ədəd olduğunu bildirib. Bu il daha 5000 kitabın ölkə üzrə ianə edilməsi gözlənilir.
“Inci Group of Companies” şirkətinin təsisçisi Mikayıl Yusifov layihənin bir hissəsi olduğu üçün özünü xoşbəxt hiss etdiyini və şirkətin gələcəkdə də məktəbin şagirdləri, əlaçıları üçün həvəsləndirici hədiyyələr təqdim edə və kitablar ianə edə biləcəyini vurğulayıb.
Görüşün davamında şagirdlərlə qarşılıqlı fikir mübadiləsi aparılıb, mütaliə ilə bağlı şagirdləri maraqlandıran suallar cavablandırılıb.
