Təhsilin İnkişafı Fondunun “NEQSOL Holding” ilə birgə tələbə qızlar üçün həyata keçirdiyi “Parla” təqaüd və inkişaf proqramının ikinci məzun günü baş tutub.
Proqram çərçivəsində bu il 27 istedadlı gənc qadın təhsilini uğurla başa vuraraq “Parla məzunları” sırasına qoşulub. Beləliklə, indiyədək 41 iştirakçı proqramı bitirib, 59 nəfər isə hazırda təhsilini davam etdirir. Ümumilikdə “Parla” təqaüd və inkişaf proqramı 100 tələbə qız üçün təqaüd imkanı yaradıb.
Məzun Günündə “NEQSOL Holding”in nümayəndələri Meriç Tunc və Ana Nakaşidze, eləcə də Təhsilin İnkişafı Fondunun Layihələrin idarə olunması şöbəsinin müdiri Rəsul Həşimov çıxış edərək, iştirakçılarla fikirlərini bölüşüb, onlara gələcək karyera inkişafında uğurlar arzulayıblar.
Tədbir zamanı məzunlara sertifikatlar və hədiyyələr təqdim olunub.
Qeyd edək ki, “Parla” təqaüd və inkişaf proqramı maddi dəstəklə yanaşı, iştirakçıların şəxsi və peşəkar inkişafına dəstək göstərmək məqsədilə ingilis dili və IELTS hazırlığı, yumşaq bacarıqlar üzrə təlimlər, “NEQSOL Holding” və onun qrup şirkətlərində təcrübə proqramları, “NEQSOL Academy” və “NEQSOL WellWave” platformalarına çıxış, eləcə də mentorluq düşərgəsi kimi imkanları özündə birləşdirib.
10 oktyabr tarixində Yüksək Texnologiyalar Parkı, Təhsil İnkişafı Fondu və “SABAH.HUB” şirkətinin nümayəndələrinin iştirakı ilə “Texnologiya transferi” layihəsi qaliblərinin təqdimat tədbiri baş tutub.
Tədbir çərçivəsində qalib komandalar öz layihələrini təqdim edərək, prototiplərini nümayiş etdiriblər. Təqdimatlar zamanı iştirakçılar tərəfindən layihələrin texniki və innovativ tərəfləri ilə bağlı geniş məlumat verilib, həmçinin mövcud nəticələr və qarşıdakı mərhələlər ətrafında müzakirələr aparılıb.
Görüşün məqsədi layihələrin hazırkı inkişaf mərhələsini qiymətləndirmək, növbəti addımları müəyyənləşdirmək və tərəfdaş qurumlar arasında əməkdaşlığın gücləndirilməsini təşviq etmək olub.
Oktyabr ayından etibarən “Peerstack Academy”də 3-cü kohort üzrə tədris proqramına start verilib.
Tədrisin ilk günündə tələbələr arasında tanışlıq keçirilib, yeni kohort iştirakçıları “Peer-to-Peer” metodologiyası və “Project-based learning” (layihə əsaslı öyrənmə) yanaşması haqqında ətraflı məlumat əldə ediblər. Bu metodologiyalar sayəsində tələbələr həm praktiki bacarıqlarını inkişaf etdirir, həm də komanda daxilində bilik mübadiləsi aparmaq imkanı qazanırlar.
Akademiya proqramlaşdırma sahəsində peşəkar karyera qurmaq istəyən gənclərə 100%-dək təqaüd imkanı, bütün tələbələr üçün kompüter təminatı, xarici təcrübəyə əsaslanan “Full-Stack”, “Front-End” və “Back-End” proqramlaşdırma tədrisi təqdim edir. Proqram çərçivəsində tələbələr əldə etdikləri bilik və bacarıqları gələcəkdə yerli və xarici şirkətlərdə iş imkanlarına çevirmək şansı qazanırlar.
Qeyd edək ki, “Peerstack Academy” layihəsi “NEQSOL Academy”, Təhsilin İnkişafı Fondu və “Technology SNI” şirkətinin birgə tərəfdaşlığı ilə həyata keçirilir. Layihənin əsas məqsədi gənclərin rəqəmsal bacarıqlarını inkişaf etdirmək və onları əmək bazarının tələblərinə uyğun yüksək ixtisaslı mütəxəssislərə çevirməkdir.
“Peerstack Academy” üçün qeydiyyat ilboyu açıqdır. Proqramlaşdırma sahəsində gələcəyini qurmaq istəyən hər bir gənc istənilən vaxt müraciət edə bilər. Qeydiyyat üçün link: https://peerstack.tech/apply
Oktyabrın 4-də Bakı Slavyan Universitetində (BSU) Təhsildə Yeni Çağırışlar VI Beynəlxalq Forumu keçirilib.
“Konstitusiya və Suverenlik İli”nə həsr edilən beynəlxalq forum “Daha təhsilli gələcək” devizi ilə reallaşıb.
Dövlət himninin səsləndirilməsi ilə başlanan tədbirdə şəhidlərimizin əziz xatirəsi bir dəqiqəlik sükutla yad olunub.
Forumun moderatoru, “T-Network” platformasının rəhbəri Cəfər Mənsimi giriş nitqi ilə çıxış edərək forumun məqsəd və əhəmiyyəti barədə danışıb. Bildirib ki, forumun təşkilində əsas məqsəd təhsil sahəsində yeni çağırışları müzakirə etmək, hər kəs üçün keyfiyyətli təhsil, xarakter və iradə tərbiyəsi, emosional və süni zəkanın balansı məsələlərinə diqqəti artırmaq, yeni dövrün təhsil tələblərini nəzərdən keçirərək keyfiyyətin daha da yüksəldilməsinə töhfə verməkdir.
Forumda iştirak edən elm və təhsil nazirinin müavini İdris İsayev bildirib ki, yeni texnologiyalar, süni intellekt, rəqəmsallaşma, iqlim dəyişiklikləri kimi qlobal çağırışlar artıq təhsildə də yeni yanaşmaların formalaşmasını zəruri edir. Nazir müavini qeyd edib ki, gənclərimiz bu çağırışlara uyğun olaraq yeni bilik və bacarıqlara yiyələnməlidirlər. Məhz bu səbəbdən onlardan rəqəmsal bacarıqlar, təhlil və çeviklik, komanda işi, yaradıcılıq və digər 21-ci əsr bacarıqları tələb olunur.
Təhsilin hər bir dövlətin iqtisadi gücünün formalaşmasında, əhalinin sosial rifahının təmin olunmasında, milli-mədəni dəyərlərin qorunub saxlanılmasında mühüm roluna toxunan İdris İsayev vurğulayıb ki, hansı ölkədə təhsilə diqqət və qayğı göstərilirsə, insan kapitalına investisiya yatırılırsa, həmin ölkə inkişaf edir.
Salamlama nitqi ilə çıxış edən BSU-nun rektoru Anar Nağıyev öz növbəsində xalqın, millətin gələcəyinin təhsilin inkişafından, bilikli və vətənpərvər gənclərin yetişməsindən asılı olduğunu bir daha vurğulayıb və bu işdə hər kəsin üzərinə böyük məsuliyyət düşdüyünü diqqətə çatdırıb.
Daha sonra çıxış edən İqtisadi Əməkdaşlıq və İnkişaf Təşkilatının (OECD) Təhsil və Bacarıqlar Departamentinin direktoru Andreas Şleyxer qeyd edib ki, müasir dövrdə öyrənmə prosesində düşüncə tərzinə, problem həll etmə bacarıqlarına və yaradıcı yanaşmaya önəm verilməlidir.
Süni intellektin təhsil sisteminə inteqrasiyasından da danışan Şleyxer OECD-nin “E2040 Araşdırması – Birlikdə İnkişaf: Gələcəyin Siniflərində İnsan Müəllimlər və Süni İntellekt Agentləri” (E2040 Exploration – Flourishing Together: Human Teachers and AI Agents in Future Classrooms) adlı tədqiqatına istinad edərək bildirib ki, gələcəyin tədris mühitində real müəllimlər və süni intellekt “tamamlayıcı tərəfdaşlar” kimi fəaliyyət göstərəcək. Müəllimlər tədrisin mənəvi və yaradıcı tərəflərinə fokuslanacaq, süni intellekt isə məlumat emalı, analitik rəy və fərdiləşdirilmiş dəstək funksiyalarını yerinə yetirəcək.
OECD rəsmisi vurğulayıb ki, təhsil sistemləri insan və texnologiyanın qarşıdurmasına deyil, əməkdaşlığına hazır olmalıdır. Gələcəyin uğurlu məktəbi o məktəbdir ki, texnologiyanı ağılla istifadə edir, amma insan toxunuşunu heç vaxt itirmir.
Müəllimlərin birgə fəaliyyətinin əhəmiyyətinə toxunan Andreas Şleyxer bildirib ki, məktəbdə kollektiv agentlik – yəni birlikdə qərar vermək və məsuliyyət daşımaq mədəniyyəti – təhsilin keyfiyyətini yüksəldən əsas faktorlardandır.
Forum çərçivəsində təqdimatlarla çıxış edən Baltaş Qrupun rəhbəri, tanınmış türkiyəli psixoloq Acar Baltaş, Britaniya Təhsil Təchizatçıları Assosiasiyasının baş direktoru Kəralayn Rayt, Riqa Klassik Dövlət Gimnaziyasının direktoru Roman Əliyev, Baltaş Qrupunun qurucusu, tanınmış türkiyəli psixoloq Zuhal Baltaş, xaricdə təhsil üzrə Dövlət Proqramı çərçivəsində Harvard Universitetində təhsilin siyasəti və təhlili üzrə magistratura təhsili almış Lalə Əliyeva, Estoniya Karyera Təhsil Akademiyasının rəhbəri Sənəm Əli öz təcrübələrini bölüşüblər.
Forum çərçivəsində “Təhsildə emosional və süni zəkanın balansı necə tənzimlənməlidir?, necə edək ki, keyfiyyətli təhsil hər kəs üçün əlçatan olsun və heç bir təhsilalan kənarda qalmasın?, təhsil prosesinin iştirakçıları hansı uğur anlayışına köklənməlidirlər?, təhsil prosesinin bütün tərəflərini özünün ən yaxşı versiyası olmaq prosesinə necə cəlb etmək olar?” və digər suallar ətrafında müzakirələr aparılıb.
Qeyd edək ki, beynəlxalq forum Elm və Təhsil Nazirliyi, Təhsilin İnkişafı Fondu, Elm və Təhsil İşçiləri Azad Həmkarlar İttifaqı Respublika Komitəsinin tərəfdaşlığı, Bakı Slavyan Universiteti və “T-Network” təhsil işçilərinin təcrübə və kommunikasiya platformasının təşkilatçılığı ilə hibrid formada keçirilib.
Təhsilin İnkişafı Fondunun “NEQSOL Holding” ilə birgə tərəfdaşlığı nəticəsində həyata keçirilən “Parla” təqaüd və inkişaf proqramı istedadlı qızların akademik və peşəkar inkişafını dəstəkləyir. Proqram iştirakçılarına təqaüdlə yanaşı, təcrübə proqramları və mentorluq imkanları da təqdim olunur.
Bu istiqamətdə təqaüdçü qızlar üçün “Azerconnect Group”un dəstəyi ilə təşkil olunan və Elnarə Məcidova tərəfindən təqdim edilən “Yaradıcı düşüncə” mövzusunda faydalı təlim sessiyası keçirilib.
Təlimin məqsədi iştirakçıların yaradıcılıqlarını stimullaşdırmaq, onlara çətinliklərə alternativ yanaşma formalaşdırmaq və müxtəlif sahələrdə innovativ həll üsullarını tətbiq etməyi öyrətmək olub.
Oktyabrın 4-də Bakı Slavyan Universitetində Təhsildə Yeni Çağırışlar VI Beynəlxalq Forumu keçiriləcək.
Beynəlxalq Forum Elm və Təhsil Nazirliyi, Təhsilin İnkişafı Fondu, Elm və Təhsil İşçiləri Azad Həmkarlar İttifaqı Respublika Komitəsinin tərəfdaşlığı, Bakı Slavyan Universiteti və “T-Network” təhsil işçilərinin təcrübə və kommunikasiya platformasının təşkilatçılığı ilə hibrid formada reallaşacaq.
Forumun keçirilməsində əsas məqsəd təhsildə yeni çağırışları müzakirə etmək, hər kəs üçün keyfiyyətli təhsil, xarakter və iradə tərbiyəsi, emosional və süni zəkanın balansı məsələlərinə diqqəti artırmaq, yeni dövrün təhsil tələblərini nəzərdən keçirərək keyfiyyətin daha da yüksəldilməsinə töhfə verməkdir.
“Konstitusiya və Suverenlik İli”nə həsr edilən Beynəlxalq Forum “Daha təhsilli gələcək” devizi ilə reallaşacaq.
Forumda İqtisadi Əməkdaşlıq və İnkişaf Təşkilatının təhsil və bacarıqlar üzrə direktoru Andreas Şleyxer, Baltaş Qrupun rəhbəri, tanınmış türkiyəli psixoloq Acar Baltaş, Britaniya Təhsil Təchizatçıları Assosiasiyasının baş direktoru Kəralayn Rayt, Riqa Klassik Dövlət Gimnaziyasının direktoru Roman Əliyev, Baltaş Qrupunun qurucusu, tanınmış türkiyəli psixoloq Zuhal Baltaş, xaricdə təhsil üzrə Dövlət Proqramı çərçivəsində Harvard Universitetində təhsilin siyasəti və təhlili üzrə magistratura təhsili almış Lalə Əliyeva, Estoniya Karyera Təhsil Akademiyasının rəhbəri Sənəm Əli təqdimatlarla çıxış edərək öz təcrübələrini bölüşəcəklər.
Forum “Emosional və süni zəkanın balansı, hər kəs üçün keyfiyyətli təhsil, sürət dövrü: xarakter və iradə tərbiyəsi, təcili təhsil yardımı: çoxnövlü savadlılıq” mövzularını əhatə edəcək.
Forum çərçivəsində “Təhsildə emosional və süni zəkanın balansı necə tənzimlənməlidir? Necə edək ki, keyfiyyətli təhsil hər kəs üçün əlçatan olsun və heç bir təhsilalan kənarda qalmasın? Sürət dövründə xarakter və iradə tərbiyəsinə diqqəti necə artıra bilərik? Bu kontektsdə hansı ənənəvi yanaşmalar yeni yanaşmalarla əvəzlənməlidir? Təhsil prosesinin iştirakçıları hansı uğur anlayışına köklənməlidirlər? Təcili təhsil yardımını təmin olunması və çoxnövlü savadlılığın təşviq edilməsi üçün hansı addımların atılmasına ehtiyac var? Təhsil prosesinin bütün tərəflərini özünün ən yaxşı versiyası olmaq prosesinə necə cəlb etmək olar?” sualları ətrafında müzakirələr aparılacaq.
Forumda onlayn iştirakçı linkini müvafiq “WhatsApp” kanalına qoşularaq əldə edə bilərsiniz.
Sentyabrın 25-də Azərbaycan Texniki Universitetinin Davamlı İnkişaf Mərkəzində Azərbaycan-Türkiyə İş Adamları Birliyi (ATİB) ilə Təhsilin İnkişafı Fondu arasında Əməkdaşlıq Memorandumu imzalanıb.
Tədbiri açıq elan edən İdarə Heyətinin sədri Elnur Nəsibov Fondun təhsil və sahibkarlığın inteqrasiyasına dəstək vermək, tələbələri innovativ təşəbbüslərə təşviq etmək niyyətində olduğunu bildirib. O, ATİB ilə birgə layihələrin dövlət-özəl tərəfdaşlığının inkişafına əhəmiyyətli töhfə verəcəyini vurğulayıb.
Azərbaycan Texniki Universitetinin Tədris işləri üzrə prorektoru Nurəli Yusifbəyli təhsil müəssisələri ilə iş dünyası əməkdaşlığının tələbələrin praktiki bacarıqlarını gücləndirəcəyini və onların əmək bazarının tələblərinə uyğun yetişməsinə xidmət edəcəyini qeyd edib.
ATİB-in İdarə Heyətinin sədri Mürsəl Rüstəmov isə Azərbaycan və Türkiyə iş adamlarının təhsilə verdiyi dəstəyin gələcək nəsillərin hazırlanmasında mühüm rol oynadığını bildirib. O, tərəflərin bu əməkdaşlıq çərçivəsində həm biznes mühitinin inkişafını, həm də gənclərin biliklərinin artırılmasını hədəflədiyini vurğulayıb.
Təhsilin İnkişafı Fondunun Layihələrin idarə olunması şöbəsinin müdiri Rəsul Həşimov Fondun həyata keçirdiyi layihələr haqqında geniş təqdimatla çıxış edib.
Tədbir çərçivəsində keçirilən sual-cavab sessiyası və “Peerstack Academy”ə infotur tərəflər üçün əlavə məlumat toplamaq və şəbəkələşmək imkanı yaradıb.
Qeyd edək ki, tərəflər əməkdaşlığı gənclərin sahibkarlıq təşəbbüslərini dəstəkləmək, “TələbəPlus” və “TəhsilPlus” kartları, təqaüd proqramları, infrastruktur təşəbbüsləri və tərəflərin razılaşdıracağı digər layihələr çərçivəsində həyata keçirəcəklər.
III “Maarifçi” tələbə-məzun təcrübə proqramının iştirakçısı Kəmalə Məmmədova hazırda Təhsilin İnkişafı Fondunda təcrübə müddətini uğurla davam etdirir.
O, 4 aylıq proqramın ilk iki ayını Azərbaycan Respublikası Elm və Təhsil Nazirliyinin Satınalmalar və qrantlar sektorunda keçirərək mövcud qrant layihələri və təhsil sahəsində həyata keçirilən təşəbbüslərlə yaxından tanış olub.
Hazırda Təhsilin İnkişafı Fondunun Layihələrin idarə olunması şöbəsində fəaliyyətini davam etdirən “Maarifçi” ilə ilk görüş Fondun İdarə Heyətinin sədri Elnur Nəsibov tərəfindən keçirilib. Görüş zamanı Fondun fəaliyyət istiqamətləri, mövcud prioritetlər, gözləntilər və digər mühüm məsələlər ətrafında ətraflı müzakirələr aparılıb.
Kəmalə Məmmədova Fondun həyata keçirdiyi proqram və layihələrin planlaşdırılması, icrası və monitorinqi proseslərində iştirak edir, layihə sənədlərinin hazırlanması və hesabatların tərtibində komandaya dəstək verir. Bununla yanaşı, o, təhsil sahəsində müasir idarəetmə yanaşmaları və layihə idarəetmə mexanizmləri üzrə praktiki bilik və bacarıqlarını genişləndirərək gələcək peşəkar inkişafı üçün təcrübə qazanır.
Təhsilin İnkişafı Fondunun İdarə Heyətinin sədri Elnur Nəsibov və Layihələrin idarə olunması şöbəsinin müdiri Rəsul Həşimov MÜSİAD Azərbaycan dərnək mərkəzini ziyarət edib.
Görüşdə MÜSİAD Azərbaycan İdarə Heyətinin sədri Rəşad Cabirli, İdarə Heyətinin üzvü Elvin Əliyev və Gənc MÜSİAD Azərbaycan sədri Akif Başoğlu iştirak edib.
Görüş zamanı universitet–sənaye əməkdaşlığı və Təhsilin İnkişafı Fondu ilə MÜSİAD Azərbaycan arasında birgə fəaliyyət imkanları müzakirə olunub. Elnur Nəsibov Fondun həyata keçirdiyi layihələrdən bəhs edib, birgə əməkdaşlığın təhsil sektoruna gətirəcəyi faydalardan, dövlət-özəl tərəfdaşlığının əhəmiyyətindən söz açıb.
Daha sonra Rəşad Cabirli MÜSİAD Azərbaycanın universitetlərlə sıx əməkdaşlıq aparıldığını və bu çərçivədə mütəmadi olaraq müxtəlif layihələrin icra edildiyini bildirib.
Tərəflər universitet–sənaye əməkdaşlığının gücləndirilməsi və gənclərdə sahibkarlıq ruhunun təşviqi istiqamətində tərəfdaşlıq barədə razılığa gəliblər. Bu istiqamətdə, yaxın zamanda Təhsilin İnkişafı Fondu ilə MÜSİAD Azərbaycan arasında Tərəfdaşlıq Memorandumu imzalanacağı qeyd olunub.
“4Sİ Akademiyası” çərçivəsində “Milli Proqram”da indiyədək 30000 nəfər təlimlərdən istifadə edib. Onlar 60000-dən çox kursu uğurla başa vurublar.
“4Sİ Akademiyası” çərçivəsində “Milli Proqram”ın 4-cü dalğasına qoşulan 7500 istifadəçi rekord sayda – 18 mindən çox kurs bitirib. Aprel ayından başlayan proqramda bu günədək 30000 nəfər “Coursera” platformasında ödənişsiz təlimlərdən istifadə edib. Onlar 60000-dən çox kursu uğurla başa vurublar. Növbəti 7500 vətəndaş proqrama qoşulub.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) və Elm və Təhsil Nazirliyinin tabeliyində Təhsilin İnkişafı Fondunun birgə əməkdaşlığı ilə həyata keçirilən “4Sİ Akademiyası” çərçivəsində “Milli Proqram”ın 5-ci dalğasına start verilib. Növbəti 7500 vətəndaş 6 həftə ərzində “Coursera” platformasından ödənişsiz istifadə imkanı qazanıb.
“Milli Proqram” istifadəçiləri daha çox süni intellekt və data elmi sahəsində təlimlərə üstünlük verir. Bununla yanaşı layihələrin idarə olunması, informasiya texnologiyaları, yumşaq bacarıqlar, kommunikasiya və dil, sosial elmlər eləcə də biznes sahəsi üzrə təlimlərə də maraq artır.
Avqust ayından başlayaraq yerli universitetlər və şirkətlər öz kurs və təlimlərini “Course builder“ aləti vasitəsilə “Milli Proqram” çərçivəsində “Coursera” platformasında yerləşdirmək imkanı əldə ediblər. Ümumilikdə 25 təlim artıq platformada yerləşdirilib və 2000 təlim istifadəçilər tərəfindən başa vurulub. Yerli təlim şirkətlərinin 3 kursu proqram istifadəçilərinin ən çox müraciət etdiyi təlimlər sırasına daxildir.
“Milli Proqram” istifadəçilərinin ən çox müraciət etdiyi təlim və kurslar:
Layihələrin idarəolunmasının əsasları (Foundations of Project Management)
Data elminin əsasları: Data hər yerdə (Foundations: Data, Data, Everywhere)
Robotiksə giriş: STEM-də ağıllı sistemlər dünyası
Data elmi nədir? (What is Data Science?)
Peşəkarlar üçün tənqidi düşünmə bacarıqları (Critical thinking skills for the Professional)
Rəqəmsal transformasiya perspektivləri: Aqrobizneslər (Perspectives in Digital Transformation: Agribusiness)
Süni intellektə giriş (Introduction to Artificial Intelligence)
Liderlik bacarıqları (Leadership Skills)
Süni intellekt, biznes və gələcəyin peşələri (AI, Business & the Future of Work)
İngilis dilində peşəkar email yazışmaları (Write Professional Emails in English)
Layihələrin idarəolunmasına giriş (Introduction to Project Management)
Proqramın məqsədi ölkədə rəqəmsal iqtisadiyyata keçidi sürətləndirmək üçün dördüncü sənaye inqilabı texnologiyaları sahəsində bilik və bacarıqların inkişaf etdirilməsi və əmək bazarında bu sahə üzrə ixtisaslı kadrların hazırlanmasına dəstək olmaqdır. Azərbaycan vətəndaşları yaşından və məşğulluq vəziyyətindən asılı olmayaraq https://form.4sim.gov.az saytından qeydiyyatdan keçərək bu imkandan yararlana bilirlər.
“Coursera” platformasında Oksford, Stenford, Yel, Dyuk, London, Edinburq, Mançestr, Miçiqan, Con Hopkins, İllinoys, Florida, Sidney, eləcə də “Microsoft”, “Google”, “Meta”, IBM, “AWS”, “Oracle”, “Gitlab”, “Intel”, SAP, “Salesforce” kimi dünyanın 350-yə yaxın ən nüfuzlu universitet və aparıcı texnologiya şirkətlərinin 12000-dən çox sahəvi kurs və proqramı “Milli Proqram” istifadəçiləri üçün əlçatandır.
“Milli Proqram” istifadəçiləri platformada 2500 kursu Azərbaycan dilində altyazı ilə, ən çox tələb olunan 15 kursu isə “deep fake” texnologiyası ilə dublyajda izləyə bilərlər (kursların siyahısı – https://bit.ly/4ogG5Mw).
Proqram çərçivəsində 1 il ərzində on minlərlə istifadəçinin dünyanın ən böyük onlayn tədris platforması olan “Coursera”da təlimlərdən faydalanması nəzərdə tutulub. “Milli Proqram” SOCAR, “Paşa Holdinq”, bp, JOCAP və “Azerconnect Group” kimi aparıcı şirkətlərin tərəfdaşlığı ilə həyata keçirilir.
Qeyd edək ki, “4Sİ Akademiyası”nın ilkin pilot mərhələsində 10000 nəfər “Coursera”dan faydalanıb, 4200-dən çox beynəlxalq sertifikat əldə olunub. Layihə 2024-cü ildə “Coursera” şirkəti tərəfindən “Üstün Nailiyyət Mükafatı 2024” müsabiqəsinin “Süni İntellekt İnnovasiyası” kateqoriyası üzrə qalibi olub.
