Author: redaktr

28 yanvar 2025-ci il tarixində Təhsilin İnkişafı Fondu və “Referans Medical Group” arasında əməkdaşlıq müqaviləsi imzalanıb.

Sənədi Təhsilin İnkişafı Fondunun İdarə Heyətinin sədri Elnur Nəsibov və “Referans Medical Group”un direktoru Elgiz Dadaşov imzalayıblar.

İdarə Heyətinin sədri Elnur Nəsibov çıxış edərək Fond tərəfindən həyata keçirilən layihələr haqqında məlumat verib. Elnur Nəsibov vurğulayıb ki, TələbəPlus layihəsi bütün ölkə üzrə tələbələrin eyni güzəşt və endirimlərdən yararlanmalarını təmin etmək, eyni zamanda onların sosial həyatlarına dəstək göstərmək məqsədi daşıyır. Sədr bu təşəbbüsün tələbələrin sağlamlıqla bağlı ehtiyaclarını qarşılamaq üçün yeni imkanlar yaratdığını və onların həyat keyfiyyətinin artırılmasına dəstək olduğunu bildirib. Qeyd olunub ki, bu əməkdaşlıq çərçivəsində tələbələr təkcə təhsil deyil, həm də sağlamlıq baxımından mühüm imkanlar əldə edirlər.

“Referans Medical Group”un direktoru Elgiz Dadaşov şirkətin tələbələrin rifahına töhfə vermək üçün daim yeni təşəbbüslər həyata keçirdiyini diqqətə çatdırıb. Tələbələrin sağlamlığının həmişə prioritet olduğunu bildirən direktor, Təhsilin İnkişafı Fonduna təşəkkürünü edib və bu əməkdaşlıq vasitəsilə tələbələrin “Referans Medical Group”un təqdim etdiyi güzəşt və fürsətlərdən yararlana biləcəklərini vurğulayıb.

İmzalanmış müqaviləyə əsasən tələbələr TələbəPlus kartı ilə “Referans Medical Group”un ölkə üzrə bütün filiallarında təqdim olunan tibbi xidmətlər üçün 10% endirim əldə edə biləcəklər. Eyni zamanda, tələbələr Bakıda yerləşən bütün filiallarda ildə bir dəfə olmaqla ödənişsiz çek-ap müayinəsindən yararlanmaq imkanı əldə edirlər.

Çek-ap-a aşağıdakı xidmətlər daxildir:

* Terapevt müayinəsi

* Görmənin yoxlanması

* Boy, çəki, bədən kütlə indeksi monitorinqi

* Ağciyərlərin rentgen müayinəsi

* Qarın boşluğu USM

* Qanın ümumi analizi

Qeyd: Çek-ap müayinəsi ilə bağlı öncədən qeydiyyat mütləqdir və çağrı mərkəzi ilə *0033 nömrəsi vasitəsilə əlaqə saxlanılmalıdır.

17 yanvar 2025-ci il tarixində Təhsilin İnkişafı Fondu və “STP Şirkətlər Qrupu”nun birgə əməkdaşlığı çərçivəsində həyata keçirilən “Zərif Mühəndislər” təqaüd proqramının iştirakçıları üçün “Şəxsi inkişaf və özünü tanıma” mövzusunda təlim sessiyası təşkil olunub.

Azərbaycan Respublikası Mərkəzi Bankının sədrinin müavini Gülər Paşayeva tərəfindən keçirilən təlim zamanı iştirakçıların şəxsi və peşəkar inkişafı ilə bağlı bir sıra mühüm mövzular müzakirə edilib, iştirakçılara hədəflərini müəyyənləşdirmək və uğurlu bir inkişaf planı hazırlamaq bacarıqları aşılanıb.

Təlimin sonunda iştirakçılar SWOT analizi həyata keçirib və əldə olunan nəticələr əsasında SMART (Spesifik, Ölçüləbilən, Əldə edilə bilən, Realist və vaxt çərçivəli) hədəflər müəyyən ediblər. Bu yanaşma, iştirakçıların praktik bacarıqlarını artıraraq onların şəxsi və peşəkar məqsədlərinə daha effektiv şəkildə çatmasına töhfə verib.

Tələbə qızlar tərəfindən böyük maraqla qarşılanan sessiyanın sonunda iştirakçılarla interaktiv fəaliyyətlər təşkil edilib və onları maraqlandıran suallar cavablandırılıb.

Londonda keçirilən “Təhsil və Texnologiya sərgisi Bett 2025” sərgisi davam edir. Təhsilin İnkişafı Fondunun İdarə Heyətinin sədri Elnur Nəsibov Bett 2025 çərçivəsində  Dünya Təhsil Forumunun direktoru Dominik Savaj  və Birləşmiş Krallığın Təhsilin İnkişafı Fondunun təsisçisi və sədri Karl Vard ilə görüş keçirib.

Görüş zamanı müasir təhsil sistemlərinin inkişafına dair bir sıra aktual mövzular müzakirə edilib. Xüsusilə, ekoloji dayanıqlı təhsil infrastrukturunun yaradılması, iqlim dəyişikliyi ilə mübarizədə təhsilin rolu və süni intellektin tədris prosesinə inteqrasiyası məsələləri diqqət mərkəzində olub. Tərəflər, təhsildə sıfır emissiya prinsiplərinin tətbiqinin əhəmiyyətini və ekoloji cəhətdən təmiz təhsil müəssisələrinin təşviqini vurğulayıb. Bununla yanaşı, təhsilin iqtisadiyyatla əlaqələndirilməsi və təhsilin iqtisadi inkişafın sürətləndirilməsində oynadığı roldan da bəhs edilib.

Müasir dövrün ən mühüm çağırışlarından biri olan süni intellektin tədris prosesinə inteqrasiyası mövzusu da geniş şəkildə müzakirə edilib. Elnur Nəsibov süni intellektin müəllimlərin və tələbələrin fəaliyyətini necə dəyişə biləcəyi, tədris metodlarının necə daha səmərəli hala gətirilə biləcəyi barədə fikirlərini paylaşıb.

Bundan əlavə, görüşdə universitetlərin beynəlxalq reytinqlərdə mövqeyinin yaxşılaşdırılması, elmi tədqiqatların gücləndirilməsi və tədqiqat universitetlərinin inkişafı məsələləri müzakirə olunub.

Tərəflər həmçinin dövlət-özəl tərəfdaşlığı (PPP) çərçivəsində təhsil layihələrinin maliyyələşdirilməsi və universitetlərin beynəlxalq reytinqlərdə mövqelərinin yaxşılaşdırılması istiqamətində təcrübə mübadiləsi aparıblar.

Elnur Nəsibov, təhsil sahəsində dövlət-özəl tərəfdaşlığının (PPP) təhsil layihələrinin maliyyələşdirilməsi və təhsil infrastrukturunun inkişafında mühüm rol oynadığını bir daha vurğulayıb. O, qeyd edib ki, Təhsilin İnkişafı Fondu bu istiqamətdə xüsusi fəaliyyət göstərir və artıq bir sıra mühüm addımlar atılıb. Məsələn, Fondun vasitəçiliyi ilə 7 məktəb, PPP çərçivəsində təmir olunur, bu da təhsil infrastrukturunun modernləşdirilməsinə və tədris mühitinin yaxşılaşdırılmasına yönəlmiş mühüm bir layihədir.

Müzakirələr zamanı Təhsilin İnkişafı Fondu ilə Dünya Təhsil Forumu və Birləşmiş Krallığın Təhsilin İnkişafı Fondu arasında əməkdaşlıq barəsində razılıq əldə edilib.

Təhsilin İnkişafı Fondunun İdarə Heyətinin sədri Elnur Nəsibov Londonda keçirilən beynəlxalq “Təhsil və Texnologiya sərgisi Bett 2025”də iştirak edir.

Bett dünya miqyasında təhsil sektorunda yeni texnologiyaların tətbiqi və innovativ həllərin müzakirəsi üçün əhəmiyyətli və ən böyük platformadır.

Bett 2025-in əsas məqsədi – təhsil və texnologiyanın birləşdiyi nöqtələrdə, müasir tədris metodlarının və rəqəmsal alətlərinin araşdırılmasıdır. Bu ilki sərgi, təhsil sahəsində aparıcı yenilikləri təqdim etməklə yanaşı, təhsil işçiləri, texnoloji ekspertlər arasında müzakirələrə və əməkdaşlığa imkan yaratmaq məqsədi daşıyır.

Fondun İdarə Heyətinin sədri Elnur Nəsibov sərgi zamanı “Təhsildə innovativ metodlar”, “Təhsil və tərəfdaşlıq”, “Təhsil trendləri və süni intellekt dövrü”, “Təhsildə bərabərlik”, Ədalətli təhsil imkanları”, “Qızlar və texnologiya”, “Məktəbəqədər təhsil”, “Layihə əsaslı öyrənmə”, “Rəqəmsal təhsil və süni intellekt”, “Texnologiyanın müəllimlərə dəstəyi” və digər mövzularda keçirilən panel müzakirələrində iştirak edərək, Azərbaycandakı təhsil sisteminə dair mövcud məlumatları təqdim edib, Fondun təhsil sahəsində həyata keçirdiyi layihələr və fəaliyyətləri haqqında ətraflı danışıb.

Sərgidə iştirakçılar arasında dünya səviyyəsində tanınmış təhsil mütəxəssisləri, texnologiya şirkətləri və innovativ startaplar yer alır.

Yanvarın 16-da Elm və Təhsil Nazirliyinin təşəbbüsü və Təhsilin İnkişafı Fondunun birgə təşkilatçılığı ilə həyata keçirilən 2-ci “Maarifçi” tələbə-məzun təcrübə proqramının iştirakçıları ilə görüş olub. 

Əvvəlcə “Maarifçi” tələbə-məzun təcrübə proqramına dair videoçarx nümayiş olunub. 

Daha sonra təcrübə proqramının iştirakçıları öz uğur hekayələrini paylaşaraq layihə barədə fikirlərini bölüşüb, təcrübə müddətində əldə etdikləri bilik və bacarıqların onların şəxsi və gələcək karyera inkişaflarında mühüm rol oynayacağını qeyd ediblər.

Sonra çıxış edən elm və təhsil naziri Emin Əmrullayev sözügedən proqramın gənc kadrların dövlət qulluğunu düzgün dərk etməsi, istedadlı gənclərin dövlət qurumlarında işləməyə həvəs göstərməsi baxımından faydalı olduğunu qeyd edib və iştirakçılara uğurlar arzulayıb. 

Görüş çərçivəsində “Maarifçi”lərin mentorların rəhbərliyi ilə proqram müddətində fəaliyyətləri, layihənin faydalılığı haqqında fikir mübadiləsi aparılıb, həmçinin təkliflər dinlənilib. 

Sonda proqram iştirakçılarına sertifikatlar təqdim edilib, xatirə şəkli çəkdirilib.

Qeyd edək ki, Elm və Təhsil Nazirliyi, eləcə də qurumlarında təcrübə imkanları yaradan və 3 ay davam edən 2-ci “Maarifçi” proqramını 35 nəfər müvəffəqiyyətlə bitirib. Proqramın təşkilində məqsəd elm və təhsil sahəsində insan resurslarının formalaşdırılması, praktiki fəaliyyətlə tələbə və məzunların sahəvi bilik, bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək göstərmək olub.

Təhsilin İnkişafı Fondu və “Park Bulvar” AVM arasında əməkdaşlıq müqaviləsi imzalanıb.

Sənədi Təhsilin İnkişafı Fondunun İdarə Heyətinin sədri Elnur Nəsibov və “Park Bulvar” AVM-nin direktoru Ali E.Yüksel imzalayıblar.

Müqavilənin məqsədi Azərbaycan Respublikasının təhsil müəssisələrində təhsil alan və TələbəPlus kartları ilə əməliyyat aparan tələbələr üçün “Park Bulvar” AVM və AVM-də yerləşən ticarət obyektlərində xüsusi endirimlərin tətbiq edilməsini təşkil edir.

Məlumat üçün bildirək ki, AVM-də yerləşən 20-dən artıq tərəfdaşla razılıq əldə edilib. Hazırda TələbəPlus kartı vasitəsilə tələbələr “Park Bulvar” AVM-də yerləşən “Park Cinema”, “Sports Cafe”, “İstanbül Köftesi”, “Tusi-Bohm Planetarium”, “AKS Pro”, “Happyland”, “Gallery for kids”, “Lufian” və digər şirkətlərdən endirimlərdən yararlanacaqlar.

Milli Aviasiya Akademiyası ilə Təhsilin İnkişafı Fondu və Təhsildə Keyfiyyət Təminatı Agentliyinin birgə əməkdaşlığına dair görüş keçirilib.

Əvvəlcə dəyirmi masa arxasında keçirilən görüşdə rektorun köməkçisi dosent Gülnarə Əhmədova, akademik Arif Mir Cəlal oğlu Paşayevin diqqəti və qayğısı sayəsində təhsil ocağının sürətli inkişafından bəhs edib.

Tələbələrin iştirakı ilə geniş tərkibdə davam edən tədbirdə, birinci prorektor Ədalət Səmədov Milli Aviasiya Akademiyasının uğurları, fəaliyyətinin genişləndirilməsi məqsədilə həyata keçirilən layihələr barədə məlumat verib.

Daha sonra Təhsilin İnkişafı Fondunun fəaliyyətini əks etdirən videoçarx izlənilib.

Fondun İdarə Heyətinin sədri Elnur Nəsibov təhsilin inkişafına yönəlmiş proqramlarından, o cümlədən “TələbəPlus” və “IELTS imtahanına təşviq” layihələrinin önəmindən danışıb.

Təhsildə Keyfiyyat Təminatı Agentliyinin İdarə Heyətinin sədri Tural Əhmədov IELTS proqramının tətbiqinin qlobal cəmiyyətin bir hissəsi olmaq üçün fürsət olduğunu bildirib.

Sonda “IELTS imtahanına təşviq layihəsi” çərçivəsində üçtərəfli əməkdaşlıq müqaviləsi imzalanıb. Tədbir iştirakçıları Akademiyanın Təlim Mərkəzində uçuş simulyatorlarına baxış keçiriblər. 

Azərbaycan Milli Konservatoriyası ilə Təhsilin İnkişafı Fondu (TİF) arasında “TələbəPlus” çərçivəsində əməkdaşlıq müqaviləsi imzalanıb.

13 yanvar 2025-ci il tarixində baş tutan imzalama mərasimində AMK və TİF-in rəhbərliyi, Kapital Bankın nümayəndələri, AMK-nın Elmi Şura üzvləri və professor-müəllim heyəti iştirak ediblər.

Görüş zamanı AMK-nın rektoru – əməkdar incəsənət xadimi, sənətşünaslıq doktoru, professor Kamilə Dadaş-zadə Təhsilin İnkişafı Fondu, Kapital Bank, və “VISA” beynəlxalq ödəmə texnologiyaları şirkətinə minnətdarlığını bildirib, vahid tələbə kartlarının istifadəyə verilməsinin təhsil sahəsində mühüm yeniliklərə imza atacağını, tələbələrin akademik və sosial imkanlarını genişləndirməyə kömək edəcəyini qeyd edib.

Konservatoriyanın bu il öz 25 illik yubileyi ərəfəsində olduğunu vurğulayan rektor, dörddə bir əsrdir fəaliyyət göstərən təhsil ocağının min əsrlik musiqi tarixçəsini tədris etməklə yaşatdığını bildirib.

Çıxışın ardından Təhsilin İnkişafı Fondunun fəaliyyəti və layihələrini əks etdirən videoçarx izlənilib.

Təhsilin İnkişafı Fondunun İdarə Heyətinin sədri Elnur Nəsibov öz çıxışında “TələbəPlus”un imtiyazlarından bəhs edib və AMK ilə əməkdaşlıqdan məmnun olduğunu vurğulayıb. Elnur Nəsibov “TələbəPlus” kartının sahiblərinin alış-veriş mərkəzlərində, müxtəlif iaşə obyektlərində, eləcə də, Mədəniyyət Nazirliyi ilə əldə olunan ilkin razılaşmaya əsasən, muzeylər, qalereyalar və sərgi salonlarında  xüsusi güzəştlər əldə edəcəklərini vurğulayıb.

Müzakirələrdən sonra AMK-nın rektoru Kamilə Dadaş-zadə və TİF-in İdarə Heyətinin sədri Elnur Nəsibov “TələbəPlus” layihəsi çərçivəsində əməkdaşlıq müqaviləsinə imza atıblar.

Azərbaycan Dövlət İqtisad Universitetində (UNEC) Təhsilin İnkişafı Fondu (TİF) və Təhsildə Keyfiyyət Təminatı Agentliyinin (TKTA) rəhbərləri və əməkdaşları, eləcə də VISA və Kapital Bankın nümayəndələri ilə görüş keçirilib.

Görüşün məqsədi UNEC-də “TələbəPlus” və “IELTS imtahanına təşviq” layihələrinə dair müqavilələrin imzalanması olub.

Rektor professor Ədalət Muradov qonaqları salamlayaraq, “UNEC” brendinin yaradılması, tələbə məmnuniyyətinin təmin olunması, eləcə də müəllim və tələbələrin ingilis dili bacarıqlarının daha da inkişaf etdirilməsi istiqamətlərində görülmüş işlərdən danışıb. Rektor 2015-ci ildən təsdiqlənmiş “UNEC” brendinin dünyanın bir çox ölkələrində tanındığını diqqətə çatdıraraq, bu istiqamətdə qarşıda duran hədəflərdən bəhs edib. Həmçinin UNEC-də APTİS imtahanlarında bütün bacarıqlar üzrə “C” və IELTS nəticəsi 8.0 olan ingilis dili müəllimlərinin əmək haqlarının 15 faiz, 8.5 olanların isə 30 faiz artırıldığını bildirib. Prof.Ədalət Muradov IELTS nəticəsi 7.0 və daha yuxarı olan tələbələrin isə XDİAK fənlərindən azad olaraq, 100 balla qiymətləndirildiklərini diqqətə çatdırıb.

Təhsilin İnkişafı Fondunun İdarə Heyətinin sədri Elnur Nəsibov Fondun təhsilin inkişafına yönəlmiş proqramlarından, o cümlədən “TələbəPlus” və “IELTS imtahanına təşviq” layihələrinin önəmindən bəhs edib. O, “TələbəPlus” layihəsi çərçivəsində Mədəniyyət Nazirliyinin tabeliyində olan muzey və teatrlarda, eləcə də alış-veriş və iaşə obyektlərində tələbələrin güzəştlər əldə edə biləcəyini və gələcəkdə bu siyahının daha da genişləndiriləcəyini qeyd edib.

“IELTS imtahanına təşviq” layihəsindən söz açan TİF sədri bildirib ki, layihə elmi-pedaqoji heyətin və təhsilalanların ingilis dili biliklərinin artırılmasını təşviq etmək məqsədilə reallaşdırlılır. UNEC-in müəllim və tələbələri 6.5 və daha yüksək IELTS nəticəsi əldə etdikləri halda, onların ödənişlərinin geri qaytarılması Fond tərəfindən təmin ediləcək.

Təhsildə Keyfiyyət Təminatı Agentliyinin İdarə Heyətinin sədri Tural Əhmədov “IELTS imtahanına təşviq” layihəsinin əhəmiyyətindən söz açıb. Tələbələrin xarici dil biliklərinin olmasının onların beynəlxalq akademik mühitdə daha rahat fəaliyyət göstərmələrinə imkan yaratdığını, eləcə də IELTS sertifikatı qazanmış gənclərin yerli və beynəlxalq əmək bazarında rəqabətqabiliyyətli kadrlar ola biləcəyini diqqətə çatdırıb.

Çıxışlardan sonra “TələbəPlus” və “IELTS imtahanına təşviq” layihələri çərçivəsində ikitərəfli və üçtərəfli birgə əməkdaşlıq müqavilələri imzalanıb.

10 yanvar 2025-ci il tarixində Bakı Avrasiya Universiteti (BAAU) ilə Təhsilin İnkişafı Fondu (TİF) arasında “TələbəPlus” layihəsi ilə bağlı əməkdaşlıq müqaviləsi imzalanıb. Müqaviləni BAAU-nun rektoru dosent Səyavuş Qasımov və TİF-in İdarə Heyətinin sədri Elnur Nəsibov imzalayıblar.

İmzalanma mərasimində TİF-in İdarə Heyətinin sədri Elnur Nəsibov, İdarə Heyəti sədrinin müavini Xanım Daşdəmirova, Layihələrin idarə olunması şöbəsinin müdiri Rəsul Həşimov, şöbənin baş mütəxəssisi Aysel Məhərrəmova, Kapital Bankın Korporativ satış meneceri Nərmin İsayeva, “VISA” şirkətinin Biznesin inkişafı üzrə baş meneceri Mahmud Səfərov və BAAU-nun akademik-inzibati heyəti iştirak edib.

İmzalanma mərasimini giriş nitqi ilə açıq elan edən rektor universitetin maddi-texniki bazası, professor-müəllim heyəti, tələbə kontingenti, qəbul aparılan ixtisaslar və təhsil səviyyələri haqqında geniş məlumat verib. O, BAAU-nun beynəlmiləlləşməsi və beynəlxalq layihələrdə uğurlu iştirakı barədə də nümayəndə heyətini məlumatlandırıb. S.Qasımov tələbələrə sosial dəstək xarakterli ideya və təşəbbüslərin həmişə vacib olduğunu, eyni zamanda bu cür təşəbbüslərin və layihələrin reallaşdırılmasının əhəmiyyətini vurğulayıb.

E.Nəsibov çıxışında TİF və onun fəaliyyəti haqqında ətraflı məlumat verib. O, əlavə edib ki, BAAU ilk özəl ali təhsil müəssisəsi kimi sözügedən layihənin tərəfdaşı olur və bu layihə çərçivəsində təqdim olunacaq vahid tələbə kartları, onlardan istifadə təhsil sahəsində mühüm yeniliklər qazandırmaqla yanışı universitetin tələbələrinə faydalı olacaq. Bu yeniliklər həmçinin tələbələrin həm akademik, həm də sosial imkanlarını genişləndirəcəyinə imkan yaradacaq. Sədr təhsilalanlar arasında aparılan sorğulara, tələbatlara, həmçinin onların sosiallaşması baxımından əhəmiyyətli olan məkanlarda tələbələr üçün xüsusi güzəştlər tətbiq olunacağını, 200-dən artıq şirkətlə razılığa gəlindiyini diqqətə çatdırıb. E.Nəsibov tələbələr üçün nəzərdə tutulan güzəştlərin əhatə dairəsinin gələcəkdə daha da genişləndirilməsi istiqamətində işlərin aparıldığını tədbir iştirakçılarına çatdırıb.

Sonra, TİF-in fəaliyyətini əks etdirən videoçarx nümayiş etdirilib və X.Daşdəmirova “TələbəPlus” layihəsi haqqında təqdimatla çıxış edib, vahid tələbə kartlarının üstünlükləri, tələbələrə edilən güzəştlər və funksionallıqları barədə məlumat verib. Çıxışlar zamanı BAAU ilə TİF arasında gələcək əməkdaşlıq istiqamətləri də müzakirə olunub.

Müzakirələrdən sonra BAAU-nun rektoru dosent Səyavuş Qasımovla TİF-in İdarə Heyətinin sədri Elnur Nəsibov “TələbəPlus” layihəsi çərçivəsində əməkdaşlıq müqaviləsini imzalayıblar. İmzalanma mərasimindən sonra TİF-in nümayəndə heyəti universitetin maddi-texniki bazası ilə tanış olublar.

Qeyd edək ki, TİF-in Kapital Bank və “Visa” beynəlxalq ödəmə texnologiyaları şirkəti ilə əməkdaşlığı çərçivəsində həyata keçirilən “TələbəPlus” layihəsi vahid tələbə kartlarının tətbiq edilməsini nəzərdə tutur. Sözügedən kart tələbələrə sosial dəstək məqsədilə hazırlanmış, müxtəlif xidmət və iaşə obyektlərində də xüsusi güzəştlərin əldə edilməsinə imkan verəcəkdir.