Təhsilin İnkişafı Fondu ilə Azərbaycan Gənc Müəllimlər Assosiasiyası arasında əməkdaşlıq imkanlarının müzakirəsinə həsr olunmuş görüş keçirilib.
Görüş zamanı tərəflər təhsil sahəsində birgə təşəbbüslərin həyata keçirilməsi, gənc müəllimlərin peşəkar inkişafının dəstəklənməsi, innovativ tədris yanaşmalarının təşviqi və müəllimlərin resurslara çıxış imkanlarının genişləndirilməsi istiqamətində əməkdaşlıq perspektivlərini müzakirə ediblər.
Təhsilin İnkişafı Fondunun İdarə Heyətinin sədri Nicat Məmmədli Fondun həyata keçirdiyi layihələr, təqaüd və inkişaf proqramları, eləcə də təhsil ekosistemində davamlılığın təmin olunmasına yönəlmiş təşəbbüslər barədə məlumat verib. Azərbaycan Gənc Müəllimlər Assosiasiyasının sədri Pərvinə Qədimova isə regionlarda fəaliyyət göstərən gənc müəllimlərlə iş təcrübəsi, onların peşəkar ehtiyacları və mövcud çağırışlar barədə fikirlərini bölüşüb.
Görüş çərçivəsində birgə layihələrin icrası imkanları müzakirə olunub. Tərəflər əməkdaşlığın davam etdirilməsi və fəaliyyət planının hazırlanması barədə razılığa gəliblər.
Təhsilin İnkişafı Fondu və Milli Aviasiya Akademiyası arasında əməkdaşlıq memorandumu imzalanıb. Akademiya, həmçinin TələbəPlus layihəsinə qoşulub. Xatırladaq ki, ötən il Kapital Bank, Təhsilin İnkişafı Fondu və “Visa” beynəlxalq ödəmə texnologiyaları şirkəti arasında bağlanan memoranduma əsasən, TələbəPlus layihəsi start götürüb. Layihə tələbələrə yüzlərlə tərəfdaş mağazada endirimlərdən yararlanmaq imkanı yaradır və təqaüd, bank kartı, eləcə də universitetlərə giriş-çıxış funksiyalarını birləşdirərək bütün bu imkanları vahid kartda cəmləşdirir.
Tədbiri giriş sözü ilə açan Milli Aviasiya Akademiyasının birinci prorektoru Ədalət Səmədov qonaqlara təhsil ocağının fəaliyyəti, strukturu və inkişaf mərhələləri barədə məlumat verib.
Daha sonra prorektor Gülnarə Əhmədova Akademiyanın rektoru, akademik Arif Paşayevin Azərbaycan elminin, xüsusilə mülki aviasiya sahəsinin inkişafındakı töhfələrindən söhbət açıb.
Gənclərin maliyyə savadlılığının artırılmasına yönələn layihə ilə bağlı çıxış edən Təhsilin İnkişafı Fondunun İdarə Heyətinin sədri Nicat Məmmədli bildirib ki, TələbəPlus layihəsinin əsas məqsədi tələbələri dəstəkləmək, onların sosial rifahını yaxşılaşdırmaq və təhsillərinə daha çox vaxt ayırmaları üçün əlverişli şərait yaratmaqdır. Onun sözlərinə görə, Milli Aviasiya Akademiyasının layihəyə qoşulması ilə ali təhsil müəssisələrinin sayı 27-yə çatıb, layihədən faydalanan tələbələrin sayı isə 200 mindən çoxdur.
Bir ekosisteminin və Kapital Bank-ın Baş İcraçı direktoru Fərid Hüseynov isə Akademiya ilə əməkdaşlığın bankın gələcəyə baxışını daha da gücləndirildiyini vurğulayıb. “Bu gün imzaladığımız memorandum əməkdaşlığımızı yeni mərhələyə daşıyır. Biz istəyirik ki, tələbələriniz sabahın mütəxəssisləri kimi yetişərkən bizim ekosistemin imkanlarından, təcrübə proqramlarımızdan və real layihələrimizdən maksimum faydalansınlar”.
Təhsilin İnkişafı Fondu və tərəfdaş qurumlar TələbəPlus layihəsi çərçivəsində ali təhsil müəssisələri ilə əməkdaşlığın genişləndirilməsini və tələbələr üçün təqdim olunan imkanların artırılmasını davam etdirməyi planlaşdırır. Layihənin əhatə dairəsinin genişlənməsi gənclərin daha əlçatan, funksional və müasir imkanlardan yararlanmasına, eləcə də universitet-biznes əməkdaşlığının daha da möhkəmlənməsinə töhfə verəcək.
“Bir Könüllü” Tələbə Təşkilatında könüllü fəaliyyəti göstərən 4 gənc Təhsilin İnkişafı Fondunda (TİF) 3 ay müddətində təcrübə proqramında iştirak edib.
Təcrübə dövrü ərzində gənclər TələbəPlus layihəsi çərçivəsində aparılan işlərə cəlb olunub, layihənin müxtəlif istiqamətləri üzrə fəaliyyət göstərib, eyni zamanda təşkilati proseslərdə aktiv dəstək nümayiş etdiriblər. Onlar bu müddət ərzində praktiki bilik və bacarıqlarını inkişaf etdirmək imkanı qazanıblar.
Təcrübə proqramının sonunda Təhsilin İnkişafı Fondunun İdarə Heyətinin sədri Nicat Məmmədli təcrübəçi gənclərlə görüş keçirib. Görüş zamanı görülən işlər barədə ətraflı məlumat verilib, təcrübəçilər hazırladıqları təqdimatla çıxış ediblər. Təqdimatda TələbəPlus layihəsi çərçivəsində əldə olunan nəticələr və təcrübə müddətində qazanılan bacarıqlar vurğulanıb.
Görüşün sonunda Nicat Məmmədli təcrübə proqramını uğurla başa vuran gəncləri sertifikatlarla təltif edib və onların gələcək fəaliyyətlərində uğurlar arzulayıb.
Bu təcrübə proqramı gənclərin peşəkar inkişafına dəstək olmaqla yanaşı, onların real iş mühitində praktiki təcrübə qazanmasına mühüm töhfə verib.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM) və Elm və Təhsil Nazirliyinin tabeliyində Təhsilin İnkişafı Fondunun (TİF) birgə icra etdiyi “4Sİ Akademiyası” çərçivəsində “Milli Proqram”a daha 7500 nəfər qoşularaq təlimlərə başlayıb.Vətəndaşlar altı həftə müddətində “Coursera” onlayn təhsil platformasında rəqəmsal bacarıqlar, süni intellekt, data analitikası, proqramlaşdırma, biznes və digər prioritet sahələr üzrə beynəlxalq səviyyəli təlimlərdən yararlanacaqlar.
2025-ci ilin mart ayından start verilən “Milli Proqram”ın icrası çərçivəsində indiyədək 60 min nəfər “Coursera” platformasında 250 min təlimə qoşulub. Onlar 90 mindən çox təlimi uğurla tamamlayaraq beynəlxalq səviyyəli sertifikatlar əldə ediblər.
“Milli Proqram”ın məqsədi ölkədə rəqəmsal bacarıqların artırılması, innovasiya yönümlü təfəkkürün təşviqi və yeni texnologiyalara inteqrasiyanın sürətləndirilməsidir. Proqram vasitəsilə iştirakçılar qlobal miqyasda tanınan onlayn təhsil platforması üzərindən müasir texnologiyalar, analitik düşüncə, idarəetmə və kommunikasiya bacarıqlarının inkişafına yönəlmiş təlimlərdən faydalanıblar.
Proqram çərçivəsində “Coursera” platformasında dünyanın 375-dən çox aparıcı universiteti və texnologiya şirkətinin 18 mindən artıq təlimi vətəndaşlarımıza ödənişsiz təqdim olunur. İstifadəçi əlçatanlığının artırılması məqsədilə 2500 kurs Azərbaycan dilində altyazı ilə tərcümə edilib, ən çox tələb olunan 15 təlim isə süni intellekt əsaslı “deep fake” texnologiyası ilə dublyaj olunub. Eyni zamanda, “Coursera” platformasında “Milli Proqram”ın interfeysi Azərbaycan dilində istifadəyə verilib.
“Milli Proqram”a qoşulanlar arasında 21-30 yaş arasında vətəndaşlar üstünlük təşkil edir. Ən kiçik istifadəçinin 10, ən yaşlı istifadəçinin isə 87 yaşı var. Statistik göstəricilər qadınların proqramdakı payının 56%-dən yüksək olduğunu göstərir. Proqram ölkənin bütün regionlarını əhatə edir.
Hər bir Azərbaycan vətəndaşı https://form.4sim.gov.az saytı vasitəsilə qeydiyyatdan keçərək bu imkandan yararlana və qlobal əmək bazarında rəqabətqabiliyyətli bacarıqlar əldə edə bilər.
Qeyd edək ki, 2024-cü ildə “4Sİ Akademiyası”nın pilot mərhələsində 10 min nəfər 1 il ərzində “Coursera” platformasında kurslardan ödənişsiz faydalanıb. Təlimləri uğurla tamamlayanlar ümumilikdə 4200 beynəlxalq sertifikat əldə ediblər. Layihə 2024-cü ildə “Coursera” şirkəti tərəfindən “Üstün Nailiyyət Mükafatı 2024” müsabiqəsinin “Süni İntellekt İnnovasiyası” kateqoriyası üzrə qalibi olub.
Bu proqram SOCAR, “Paşa Holdinq”, bp, JOCAP və “Azerconnect Group” kimi aparıcı şirkətlərin tərəfdaşlığı ilə həyata keçirilir.
Yanvarın 23-də Azərbaycan İdman Akademiyasında (ASA) “TələbəPlus” layihəsi çərçivəsində Təhsilin İnkişafı Fondu (TİF) ilə birgə əməkdaşlıq müqaviləsinin imzalanmasına həsr olunmuş görüş keçirilib.
ASA-nın rektoru Fuad Hacıyev qonaqları salamlayaraq tələbə məmnuniyyətinin artırılmasının, onların sosial rifahının və gündəlik ehtiyaclarının dəstəklənməsindən danışıb.
TİF-in İdarə Heyətinin sədri Nicat Məmmədli Fondun təhsilin inkişafına yönəlmiş proqramları haqqında məlumat verərək “TələbəPlus” layihəsinin tələbələrin sosial və maliyyə imkanlarının genişləndirilməsində mühüm rol oynadığını qeyd edib.
Sonda “TələbəPlus” layihəsi çərçivəsində TİF ilə ASA arasında ikitərəfli əməkdaşlıq müqaviləsi imzalanıb. Qeyd edək ki, “TələbəPlus” layihəsi TİF, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü ilə reallaşır.
“Parla” təqaüd və inkişaf proqramı çərçivəsində növbəti təlim “Müasir biznesdə ünsiyyətdən əlaqəyə: yeni korporativ üstünlük” mövzusunda keçirilib.
İnteraktiv sessiya müasir biznes mühitində ənənəvi ünsiyyətdən kənara çıxaraq səmimi və dəyər yaradan əlaqələrin qurulmasının əhəmiyyətinə həsr olunub. İştirakçı qızlar effektiv interpersonal bacarıqlar, etimadın formalaşdırılması, eləcə də güclü əlaqələrin əməkdaşlığın, liderliyin və peşəkar təsirin artırılmasındakı rolu barədə dəyərli biliklər əldə ediblər.
Qeyd edək ki, Təhsilin İnkişafı Fondunun “NEQSOL Holding” ilə əməkdaşlığı çərçivəsində keçirilən “Parla” təqaüd və inkişaf proqramı təqaüd, təcrübə və mentorluq imkanları vasitəsilə gənc qızların akademik və peşəkar inkişafını dəstəkləməyi hədəfləyir.
Təhsilin İnkişafı Fondu və Təhsildə Keyfiyyət Təminatı Agentliyinin birgə əməkdaşlığı çərçivəsində icra olunan “Universitetlərin elmi-pedaqoji heyət üzvləri və təhsilalanlarının IELTS imtahanına təşviq edilməsi” layihəsi 2022-ci ildən etibarən sistemli şəkildə həyata keçirilir. Layihə ali təhsil müəssisələrində təhsilalanların və akademik heyətin xarici dil üzrə bilik və bacarıqlarının gücləndirilməsini, eyni zamanda onların beynəlxalq təhsil və akademik imkanlara çıxışının genişləndirilməsi məqsədi daşıyır.
Layihə çərçivəsində indiyədək 15 ali təhsil müəssisəsi ilə əməkdaşlıq müqaviləsi imzalanıb. Son olaraq, Azərbaycan-Fransız Universitetinin (UFAZ) bu təşəbbüsə qoşulması ilə tərəfdaşlıq şəbəkəsi daha da genişləndirilib.
2025-ci il üzrə statistik göstəricilərə əsasən, 634 nəfər müraciət edib. Müraciətçilərin 370 nəfəri kişi, 264 nəfəri qadın olub. Təhsil pillələri üzrə bölgüdə bakalavriat səviyyəsində təhsil alanlar (573 nəfər) üstünlük təşkil edir. Bununla yanaşı, 30 magistrant, 4 doktorant və 27 nəfər elmi-pedaqoji heyət üzvü tərəfindən müraciət daxil olub.
2026-cı ildən etibarən layihədə iştirak üçün namizədlərin IELTS imtahanından minimum 7.0 və daha yüksək bal əldə etmələri əsas şərt kimi müəyyən olunub.
Layihənin icrasına başlanıldığı 2022-ci ildən bu günədək ümumilikdə 1280 nəfərin IELTS imtahanı üzrə xərcləri Təhsilin İnkişafı Fondu tərəfindən qarşılanıb. Bu nəticə layihənin ali təhsil sistemində beynəlxalq standartlara uyğun xarici dil kompetensiyalarının gücləndirilməsinə töhfə verdiyini nümayiş etdirir.
Layihənin növbəti illərdə də universitetlərin elmi-pedaqoji heyətinin və təhsilalanların akademik və beynəlxalq imkanlarının genişləndirilməsi istiqamətində davam etdirilməsi nəzərdə tutulur.
Təhsilin İnkişafı Fondu və Qırmızı Ürəklər Fondunun birgə əməkdaşlığı çərçivəsində həyata keçirilən “Qırmızı Ürəklər” Təhsil Təqaüd Proqramı üzrə qaliblərin adları elan olunub.
Qaliblərin siyahısı ilə buradan tanış ola bilərsiniz.
Qeyd edək ki, proqrama ümumilikdə 995 nəfər müraciət edib. İlkin seçim mərhələsində müəyyən edilmiş meyarlara uyğun gələn 73 namizəd müsahibə mərhələsinə dəvət olunub. Müsahibələr zamanı namizədlərin təhsil və karyera hədəfləri, sosial vəziyyəti, eləcə də dərsdənkənar fəaliyyətləri kompleks şəkildə qiymətləndirilib.
Seçim prosesinin bütün mərhələlərini uğurla tamamlayan 20 tələbə “Qırmızı Ürəklər” Təhsil Təqaüd Proqramının qalibi olub. Qaliblərdən 10 nəfər donor şirkətin kvotasına uyğun olaraq informasiya və kommunikasiya texnologiyaları sahəsində təhsil alan tələbələrdir. Digər 10 qalib isə ixtisas məhdudiyyəti tətbiq edilmədən seçilib.
Təhsilin İnkişafı Fondu ilə “NEQSOL Holding”in birgə əməkdaşlığı çərçivəsində həyata keçirilən “Parla” təqaüd və inkişaf proqramı üzrə qaliblərin adları elan edilib.
Qaliblərin siyahısı ilə buradan tanışola bilərsiniz.
Qeyd edək ki, proqrama ümumilikdə 1170 nəfər müraciət edib. Seçim meyarlarına uyğun gələn 167 namizəd müsahibə mərhələsinə vəsiqə qazanıb. Müsahibə zamanı namizədlərin hədəfləri, sosial vəziyyəti, dərsdənkənar fəallıqları qiymətləndirilib. Seçim prosesinin bütün mərhələlərini uğurla tamamlayan 50 tələbə qız “Parla” təqaüd və inkişaf proqramının qalibi olub.
Elm və Təhsil Nazirliyinin tabeliyində Təhsilin İnkişafı Fondunun yeni İdarə Heyətinin sədri Nicat Məmmədli kollektivə təqdim edilib.
Təqdimat mərasimində çıxış edən elm və təhsil naziri Emin Əmrullayev Nicat Məmmədlini yeni vəzifəyə təyin olunması münasibətilə təbrik edib, ona gələcək fəaliyyətində uğurlar arzulayıb. Nazir Fondun təhsil sahəsində həyata keçirilən islahatların dəstəklənməsində mühüm rol oynadığını vurğulayıb, prioritet istiqamətlər və əsas hədəflər barədə fikirlərini bölüşüb.
Emin Əmrullayev fondun fəaliyyətinin səmərəliliyinin artırılmasının, innovativ təşəbbüslərin dəstəklənməsinin və dövlət-özəl tərəfdaşlığının genişləndirilməsinin vacibliyini qeyd edib.
Tədbirdə çıxış edən Nicat Məmmədli ona göstərilən etimada görə təşəkkür edib, Təhsilin İnkişafı Fondunun fəaliyyətinin inkişafı istiqamətində məqsədyönlü və sistemli işlərin aparılacağını və bunun üçün səylərini əsirgəməyəcəyini vurğulayıb.
