TələbəPlus

“TələbəPlus” layihəsi Təhsilin İnkişafı Fondu, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü ilə həyata keçirilir. Layihə ölkə üzrə bütün ali təhsil müəssisələrinin tələbələrinin eyni güzəşt və endirimlərdən yararlanmalarını təmin etmək, həmçinin onların sosial həyatlarına dəstək göstərmək məqsədi daşıyır.

Eyni anda bir neçə funksiyanı yerinə yetirən TələbəPlus kartı universitetə giriş-çıxış, təqaüd və debet bank kartı kimi istifadə ilə yanaşı, tələbələrə endirim və keşbek imkanları da təklif edir. Layihəyə 300-dək yerli və xarici partnyor qoşulub. Kart sahiblərinə tədris müəssisələri, restoran, kafe, geyim, kitab, dəftərxana ləvazimatları mağazaları, tibb müəssisələri, əyləncə və s. məkanlarda müəyyən güzəştlər təqdim edilir. Azərbaycan Respublikası Mədəniyyət Nazirliyi ilə əldə olunan razılaşmaya əsasən, muzey, qalereya və sərgi salonlarında da tələbələr üçün xüsusi güzəştlər nəzərdə tutulur. Layihə çərçivəsində həmçinin Azərbaycan Qida və İçki Sənayeçiləri Assosiasiyası və Azərbaycan Nəşriyyatları Assosiasiyası ilə Əməkdaşlıq Memorandumu imzalanıb.

2024-cü il ərzində əməkdaşlıq müqaviləsi imzalanmış 21 universitet üzrə bakalavriat, magistratura və doktorantura pillələrində təhsil alan 170000 tələbə TələbəPlus kartı ilə təmin olunmaqdadır.

Məktəblərə kitab ianəsi

“Məktəblərə kitab ianəsi” layihəsi Təhsilin İnkişafı Fondunun “İnci Group of Companies” şirkəti ilə əməkdaşlığı çərçivəsində reallaşır.

Region məktəblərinə klassik dünya və Azərbaycan ədəbiyyatı ilə bağlı kitabların ianə edilməsi məqsədilə baş tutan layihə çərçivəsində 2023-cü il ərzində Abşeron-Xızı, Mərkəzi Aran, Dağlıq Şirvan, Gəncə-Daşkəsən, Lənkəran-Astara və Quba-Xaçmaz regional təhsil idarələrinin məktəblərinə 4800 kitab ianə edilib.

2024-cü ildə əlavə 5000 kitab Qazax-Tovuz, Qarabağ, Şərgi Zəngəzur, Şirvan-Salyan, Şəki-Zaqatala regional təhsil idarələrinin tabeliyində olan məktəblərə ianə edilib.

Davamlı İnkişaf Mərkəzləri

Bu günədək 3 ali təhsil müəssisəsi – Azərbaycan Texniki Universiteti, Azərbaycan Dövlət Neft və Sənaye Universiteti və Sumqayıt Dövlət Universiteti və 1 orta ixtisas təhsili müəssisəsi – Azərbaycan Dövlət Pedaqoji Universitetinin nəzdində Azərbaycan Dövlət Pedaqoji Kollecində Davamlı İnkişaf Mərkəzləri yaradılıb və fəaliyyət göstərir.

Dövlət və özəl sektor arasında tərəfdaşlıq əlaqələrinin qurulması, müasir təhsil tələblərinə uyğun innovativ yanaşmaların tətbiq olunması və inkişaf etməkdə olan sahələr üzrə əməkdaşlıq imkanlarının artırılması mərkəzlərin fəaliyyətində əsas prioritetlərdəndir. Burada tələbələr üçün özəl şirkətlər tərəfindən müxtəlif mövzularda təlimlər, seminarlar keçirilir

4Sİ Akademiyası

Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi, ABŞ-nin “Coursera” şirkəti ilə birgə keçirilən “4Sİ Akademiyası” layihəsi çərçivəsində 1 il ərzində 10000 nəfər “Coursera” onlayn təhsil platformasında 4Sİ texnologiyaları, süni intellekt, data analitikası, blokçeyn və bulud texnologiyaları, proqramlaşdırma dilləri, liderlik, kommunikasiya bacarıqları daxil olmaqla ümumilikdə 800-ə yaxın kursdan ödənişsiz yararlanıb.

İştirakçılar 32000 saatdan çox videomühazirələrə qatılıb, təlimləri uğurla tamamlayanlar ümumilikdə 4300 beynəlxalq sertifikat əldə ediblər.
4Sİ Akademiyası 2024-cü ilin sentyabr ayında “Coursera” şirkəti tərəfindən keçirilən müsabiqədə 42 ölkə tərəfindən təqdim olunan 180 layihə arasından seçilərək “Süni İntellekt” nominasiyası üzrə “Üstün Nailiyyət Mükafatı”na layiq görülüb.

“Qırmızı Ürəklər Təhsil Təqaüdü” proqramı

2024-cü ilin noyabr ayında Təhsilin İnkişafı Fondu və Qırmızı Ürəklər Fondu arasında Əməkdaşlıq Memorandumu imzalanıb. Memorandumun məqsədi təhsil sisteminin inkişafına yönəlmiş proqram və layihələr üzrə əməkdaşlığın qurulması, eləcə də tələbələr üçün uzunmüddətli təqaüd proqramının təsis edilməsi və həyata keçirilməsidir.

Sözügedən Memorandum çərçivəsində “Qırmızı Ürəklər Təhsil Təqaüdü” proqramı təsis edilib. Proqram 600-dən yuxarı bal toplamış, ölkə üzrə bütün ali təhsil müəssisələrinin I kursunda bakalavriat təhsili alan və aztəminatlı ailələrdən olan tələbə oğlan və qızlar üçün nəzərdə tutulub. Proqram çərçivəsində bütün mərhələlərdən uğurla keçən 23 tələbə 2025-ci ildən etibarən təhsil müddəti ərzində aylıq 200 manat məbləğində təqaüd əldə edirlər.

Təqaüd proqramına ümumilikdə 306 nəfər müraciət edib, bütün seçim şərtlərinə cavab verən 69 namizəd müsahibə mərhələsinə vəsiqə qazanıb.
Qırmızı Ürəklər Təhsil Təqaüdü” proqramının əsas məqsədi savadlı və istedadlı gənclərin inkişafına dəstək olmaq, gələcəkdə cəmiyyətə faydalı vətəndaşlar yetişdirməkdir.

“Maarifçi” tələbə-məzun təcrübə proqramı

“Maarifçi” tələbə-məzun təcrübə proqramı Elm və Təhsil Nazirliyi və Təhsilin İnkişafı Fondunun birgə təşəbbüsü ilə hayata keçirilir. 3 ay davam edən proqram çərçivəsində “Maarifçi”lər Elm və Təhsil Nazirliyi və onun tabe qurumları, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçirlər.

2024-cü il ərzində iki qəbul proqramı həyata keçirilib. I “Maarifçi” tələbə-məzun təcrübə proqramına 1958 nəfər müraciət edib, onlardan 27-si proqramda iştirak hüququ qazanıb. II “Maarifçi” tələbə-məzun təcrübə proqramına isə 2741 nəfər müraciət edib, onlardan 37-si proqramda iştirak hüququ qazanıb.

Proqramın təşkilində məqsəd elm və təhsil sahəsində insan resurslarının formalaşdırılması, praktiki fəaliyyətlə tələbə və məzunların sahəvi bilik, bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək göstərməkdir.

“Maya Hacıyeva adına İKT bacarıqları” təqaüd proqramı

Təqaüd proqramının əsas məqsədi qadınların informasiya texnologiyaları və yüksək texnologiyalar üzrə bilik və bacarıqlarını artıraraq cəmiyyətdə müvafiq olaraq öz rollarını tuta bilmələrinə dəstəyin göstərilməsidir. Layihə Təhsilin İnkişafı Fondu və “Women in Tech” beynəlxalq təşkilatının Azərbaycan nümayəndəliyi tərəfindən həyata keçirilib.

Proqrama 15-40 yaş aralığında Azərbaycan vətəndaşı olan 482 nəfər qadın müraciət edib, onlardan 30-u bu təqaüdə layiq görülüb. Layihə müddətində iştirakçılar “UI/UX Design”, “BI Developer”, “Cybersecurity”, “QA Tester”, “Mobile App Development”, “Digital Marketing” üzrə təlimlərə qatılıb və sertifikat əldə ediblər.

“Zərif mühəndislər” təqaüd proqramı

“Zərif mühəndislər” təqaüd proqramı Təhsilin İnkişafı Fondu və STP Şirkətlər Qrupu tərəfindən birgə həyata keçirilir. Layihənin məqsədi yüksək akademik göstəricilərə malik, texniki sahələr üzrə fərqli ixtisaslarda təhsil alan aztəminatlı ailələrdən olan tələbə qızların təhsilinə, mühəndislik sahəsində peşəkar mütəxəssis kimi yetişdirilməsinə dəstək göstərməkdir.

Layihəyə ümumilikdə 573 müraciət daxil olub. Müraciət ərizələrinə təşkilat komitəsi tərəfindən baxıldıqdan sonra, 105 nəfər müsahibə mərhələsinə vəsiqə qazanıb. Həmin mərhələni uğurla yekunlaşdıran 50 nəfər isə “Zərif mühəndislər” təqaüd proqramının qalibi olaraq təqaüd almaqla yanaşı, təcrübə və təlim proqramlarından yararlanmaq imkanını əldə edib.

2024-cü il ərzində təqaüd proqramının iştirakçıları STP Şirkətlər Qrupu və Sumqayıt Dövlət Universitetinin birgə həyata keçirdiyi “Gələcək Mühəndislər” proqramına qoşularaq peşəkarların təcrübəsini öyrənib, yeni nəzəri və praktik biliklərə yiyələniblər, GemZA Holdinqə səfər ediblər. Tələbə qızlar həmçinin “İqlim dəyişikliyi və Azərbaycan” və digər mövzularda təlimlərdə, eləcə də STP Şirkətlər Qrupu daxilində olan müəssisələrdə təcrübə proqramında iştirak ediblər.

“Parla” təqaüd və inkişaf proqramı

Təhsilin İnkişafı Fondunun “NEQSOL Holding” ilə tələbə qızlar üçün elan etdiyi təqaüd proqramıdır. İki qurum arasında əməkdaşlığa dair razılaşmaya əsasən Azərbaycanda hər il 50 tələbə qız üçün “Parla” təqaüd və inkişaf proqramı həyata keçirilir. 2023-cü ildə 674 müraciət arasından 50 nəfər qalib müəyyən edilib. Beləliklə, 2024-cü ilin sentyabr ayından etibarən 12 ay müddətinə 50 nəfər qıza 200 manat məbləğində təqaüd verilib. 50 qalib arasından 5-i şəhid yoldaşıdır.
2024-cü ilin sentyabr ayında “Parla” təqaüd və inkişaf proqramının ilk məzun günü keçirilib, 14 nəfər tələbə qız proqramdan məzun olub. Həmin tələbələrdən 3-ü “NEQSOL Holding” və şirkətlərində işlə təmin olunublar. 36 qız təqaüd almağa davam edir.
Proqram iştirakçılara aylıq təqaüdlə təmin olunma imkanı verməklə yanaşı, təcrübə, mentorluq, təlimlərdə iştirak və “NEQSOL Academy” və “LinkedIn Learning” vasitəsilə dünyanın aparıcı universitetlərinin proqramlarına çıxış imkanları yaradır. Bundan əlavə, proqram çərçivəsində qızlar ingilis dili, IELTS imtahanına hazırlıq üzrə kurslara cəlb edilir, IELTS imtahanını ödənişsiz vermək fürsəti əldə edirlər.
2024-cü il ərzində iştirakçıların şəxsi və peşəkar inkişaflarının artırılması məqsədilə ünsiyyət bacarıqları, karyera inkişafı üzrə təlimlər, xaricdə təhsil haqqında məlumat sessiyası keçirilib, “Norm” ASC-nin istehsalat zavoduna sahə turu təşkil edilib.
17 sentyabr 2024-cü il tarixində “Parla” təqaüd və inkişaf proqramına yenidən qeydiyyat açıq elan edilib. Proqrama ümumilikdə 791 nəfər müraciət edib, bütün seçim şərtlərinə cavab verən 128 namizəd müsahibə mərhələsinə vəsiqə qazanıb. 120 tələbə qız hədəfləri, sosial vəziyyəti, dərsdənkənar fəaliyyətləri, tələbə həyatı ilə bağlı müsahibə olunub. Bütün mərhələlərdən uğurla keçən 50 tələbə qız “Parla” təqaüd və inkişaf proqramının qalibi olub. Beləliklə sözügedən təqaüd proqramında iştirak edən gənc qızların sayı 86 nəfərə çatıb.

“Zərif Mühəndislər” layihəsinin iştirakçıları üçün peşəkar Excel təlimi təşkil olunub

Təhsilin İnkişafı Fondu və STP Şirkətlər Qrupunun birgə əməkdaşlığı çərçivəsində həyata keçirilən “Zərif Mühəndislər” layihəsinin iştirakçıları üçün Baku Design Academy tərəfindən peşəkar Excel təlimlər təşkil olunub.

Təlim zamanı iştirakçılar Excel proqramında məlumatların təhlili və strukturlaşdırılması üzrə dərin biliklər əldə ediblər. Onlara Pivot Table-lardan istifadə, tarix və vaxt funksiyalarının tətbiqi, mətn funksiyaları ilə işləmə metodları öyrədilib. Eyni zamanda, formul və funksiyalarla işləmək, müxtəlif hesablama və analiz üsullarını tətbiq etmək, məlumatları Excel Table formatında səmərəli şəkildə təşkil etmək bacarıqları aşılanıb.

Təlimin məqsədi iştirakçıların analitik düşünmə qabiliyyətini və gündəlik işlərdə məlumatlarla daha effektiv işləmə bacarığını inkişaf etdirmək olub. Praktiki yönümlü tapşırıqlar sayəsində iştirakçılar öyrəndiklərini dərhal tətbiq etmə imkanı qazanıblar.