Elm və Təhsil Nazirliyi və “Bir Könüllü” Tələbələrin Əməkdaşlığı İctimai Birliyinin birgə təşkilatçılığı ilə “StudentFest2023” tələbə düşərgəsinin rəsmi açılış mərasimi baş tutub.
Düşərgənin açılış mərasimində Təhsilin İnkişafı Fondunun İdarə Heyətinin sədri Elnur Nəsibov, İnsan Resursları Mərkəzinin direktoru Nurlan İsmayılbəyli və “Bir Könüllü” Tələbələrin Əməkdaşlığı İctimai Birliyinin sədri Leyla Zeynalova iştirak edib.
Qonaqlar tələbələri salamlayaraq, sertifikasiya prosesində, müəllimlərin işə qəbulu müsabiqəsində, həmçinin digər tədbirlərdə göstərdikləri dəstək üçün könüllülərə xüsusi təşəkkürlərini bildiriblər. Tələbələrin şəxsi inkişafı və uğurlu sosial münasibətlərinin qurulmasında bu bu cür düşərgələrin böyük əhəmiyyəti olmasından bəhs edilib.
Çıxış edən Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyəti və icra etdiyi layihələr barəsində tələbələri məlumatlandırıb, gənclər üçün maraq doğura biləcək fəaliyyət istiqamətlərinə dair fikir mübadiləsi edib. Tələbələr universitetlərə işəgötürənlərin və sənaye nümayəndələrinin cəlb edilməsi, dövlət-özəl tərəfdaşlığı, tələbələr üçün təcrübə və iş proqramlarının həyata keçirilməsi, dil təcrübə imkanları, oxu klublarının yaradılması və digər istəklərini bildiriblər.
Günün ikinci yarısında düşərgə iştirakçıları voleybol, futbol və basketbol kimi müxtəlif idman növlərində bir-birləri ilə yarış keçiriblər. Düşərgənin ilk gününün sonunda isə iştirakçılar üçün əyləncəli musiqili proqram təşkil olunub.
İyulun 18-də Azərbaycan Texniki Universitetində (AzTU) yerləşən universitet-sənaye işbirliyi mərkəzində İKT sahəsində ixtisaslaşmış şirkətlər ilə görüş keçirilib. Görüşün məqsədi universitet-sənaye tərəfdaşlığının gücləndirilməsi istiqamətində dialoqun qurulması, həmçinin sənaye nümayəndələrinin Təhsilin İnkişafı Fondu (TİF) və “Women in Tech” təşkilatının Azərbaycan nümayəndəliyinin birgə təşkilatçılığı ilə təsis olunan Maya Hacıyeva adına “İKT bacarıqları” təqaüd proqramı haqqında məlumatlandırılmasıdır.
Tədbirdə açılış nitqi ilə çıxış edən Azərbaycan Texniki Universitetinin rektoru Vilayət Vəliyev “Universitet-sənaye işbirliyi və İT” mövzusunda təqdimatla çıxış edib. Rektor bildirib ki, universitet-sənaye işbirliyinin inkişafı sahibkarlıq universiteti modelinin formalaşdırılması üçün imkan yaradır. Bu işbirliyində İT sektorunun inkişafı da mühüm amildir. Bunun üçün öyrətmə prosesi kamil olmalı, universitet-sənaye işbirliyini dəstəkləyən innovasiya ekosistemi yaradılmalı, mühəndislik istiqamətində həyata keçirilən tədris prosesi proqram təminatı vasitəsilə aparılmalı, İT təşkilat və şirkətləri ilə əməkdaşlıqlar qurulmalıdır.
Daha sonra çıxış edən Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq Fondun fəaliyyət istiqamətləri haqqında məlumatı diqqətə çatdırıb. TİF İdarə Heyətinin sədri müasir işəgötürənin tələblərinə cavab verən gənclərin yetişdirilməsində, həmçinin önəmli tədqiqat işlərinin aparılmasında sənaye nümayəndələrinin iştirakının vacib rol oynadığını bildirib. Universitet-sənaye işbirliyinin başlıca hədəflərindən biri insan kapitalının inkişafıdır. Bu əməkdaşlıq həm tərəfdaş müəssisələrin mövcud heyətinin, həm də iş həyatında ilk addımlarını atan tələbələrin təlimləndirilməsinə və təcrübə qazanmasına dəstək ola bilər. Ən mühim dəyər isə yaranacaq innovativ ideyaların məhsullara və xidmətlərə çevrilə bilməsidir.
Təhsil Sisteminin İnformasiyalaşdırılması İdarəsinin rəisi Vüsal Xanlarov beynəlxalq konsaltinq şirkəti olan “Accenture” şirkətinin araşdırmasından maraqlı məlumatı görüş iştirakçıları ilə paylaşıb. Şirkət, dünyada qızların İKT sahəsinə marağının az olması səbəblərini araşdırıb. Birinci səbəb İT və STEM sahəsinin kreativliyinin az olması, ikinci səbəb isə İT sahəsində müəllimlərin 70%-nin kişilərdən ibarət olmasıdır. Bu stereotip təhsilalanlara 4-cü sinifdən sonra təsir etməyə başlayır. V. Xanlarov bu məsələnin həllinin İT təhsilinin kütləvi və hər kəsə əlçatan olmasında gördüyünü vurğulayıb.
“Women in Tech” təşkilatının Azərbaycandakı nümayəndəliyinin səfiri Leyla Seyidzadə bildirib ki, təşkilat Azərbaycan daxil olmaqla 50-dən çox ölkədə qadınların İKT sahəsində təşəbbüslərinin reallaşmasına dəstək göstərir, lakin bənzər təqaüd proqramları çox az ölkədə var. Bu cür proqramların olmasının ölkəmizin imici üçün də vacib olduğunu qeyd edib. L.Seyidzadə təqaüd proqramının şərtləri barədə ətraflı məlumat verib. Bildirilib ki, əsas məqsəd qadınların İnformasiya Texnologiyaları və Yüksək Texnologiyalar üzrə bilik və bacarıqlarının artırılması və cəmiyyətdə müvafiq olaraq öz rollarını tuta bilmələri məqsədilə onlara bu sahədə təqaüdlərin ayrılmasıdır. Təqaüd fiziki və hüquqi şəxslər tərəfindən sözügedən layihəyə köçürülmüş ianələr, qrantlar və ya digər daxilolmalar hesabına ayrılacaqdır. Proqramda iştirak üçün Azərbaycan vətəndaşı olan 15 – 40 yaş aralığında olan qadınlar müraciət edə bilər.
Sənaye və biznes nümayəndələri tədbirdə fəal iştirak ediblər. Azərbaycan Kibertəhlükəsizlik Təşkilatları Assosiasiyasının İdarə Heyətinin sədri Elvin Balacanov, Azərbaycan Beynəlxalq Bankının İdarə Heyəti sədrinin müşaviri Zaur Ələkbərov, “Edumedia Azərbaycan” MMC-nin rəhbəri Orxan Abbasov, Azərbaycan İnternet Forumunun prezidenti Osman Gündüz, “Azerbaijan Global İT Technology” şirkətinin icraçı direktoru Rəşad Əhmədov, “CAE” MMC-nin rəhbəri Rahim Xasıyev, “BestComp Group” MMC-nin insan resursları şöbəsinin rəhbəri Fuad Qənbərov və digər nümayəndələr bir sıra maraqlı suallar və təkliflər səsləndiriblər.
Yekunda TİF sədri E.Nəsibov universitet-sənaye işbirliyi çərçivəsində dövlət-özəl təşkilatlar arasında dialoqun və tərəfdaşlığın davamlı şəkildə aparılmasının vacibliyini vurğulayıb və bütün iştirakçılara təşəkkürünü bildirib.
Təhsilin İnkişafı Fondunun nümayəndə heyəti ABB Tech Akademiyası və ABB İnnovasiya Mərkəzinin qonağı olub.
ABB-nin İdarə Heyəti sədrinin müşaviri Zaur Ələkbərov hər iki qurumun fəaliyyəti, gələcək planları, İnnovasiya Mərkəzinin inkubasiya proqramları, rezidentlərin əldə etdikləri nəticələr, Akademiyanın təlim proqramları, məzunları, onların uğur hekayələrindən danışıb.
Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyət istiqamətləri haqqında məlumatı diqqətə çatdıraraq bildirib ki, qurumun məqsədi ölkəmizdə təhsil sisteminin inkişafına yönəlmiş proqram və layihələri dəstəkləmək, təhsilin və iqtisadiyyatın inteqrasiyasına və gücləndirilməsinə töhfə vermək, dövlət təhsil müəssisələrinin infrastrukturunun inkişafı ilə bağlı proqramlar həyata keçirməkdir. E.Nəsibov universitet-sənaye işbirliyinin inkişaf etdirilməsi, peşəkar kadr hazırlığının təmin olunması və innovasiya sisteminin inkişafı istiqamətində ABB Tech Akademiyası və ABB İnnovasiya Mərkəzi ilə əməkdaşlıq əlaqələrinin qurulmasının əhəmiyyətini qeyd edib.
Görüşün gedişatında iki qurum arasında əməkdaşlıq perspektivləri müzakirə olunub.
Bakı Gənclər Mərkəzinin və “MLK Tech Group” MMC şirkətinin təşkilatçılığı, Təhsilin İnkişafı Fondunun birgə tərəfdaşlığı ilə ümummilli lider Heydər Əliyevin anadan olmasının 100-cü ildönümü ilə əlaqədar “Green Energy” Startup PitchFest layihəsi baş tutub.
Tədbirdə Azərbaycan Respublikası Milli Məclisinin deputatları Ceyhun Məmmədov, Vüqar İskəndərov, BP-nin Xəzər bölgəsində Xarici əlaqələr və kommunikasiya üzrə vitse prezidenti Bəxtiyar Aslanbəyli, Təhsilin İnkişafı Fondunun İdarə Heyətinin sədri Elnur Nəsibov, Bakı Gənclər Mərkəzinin direktoru Nərgiz Babayeva, “MLK Tech Group” MMC şirkətinin təsisçisi və direktoru Mələk Mahmudova, ictimaiyyət, media nümayəndələri və gənclər iştirak ediblər.
Aparıcı Günay Talıbovanın moderatorluğu ilə baş tutan tədbir Azərbaycan Respublikasının Dövlət Himninin səsləndirilməsi ilə açıq elan olunub. Tədbirin ilk hissəsində Təhsilin İnkişafı Fondunun İdarə Heyətinin sədri Elnur Nəsibov, Bakı Gənclər Mərkəzinin direktoru Nərgiz Babayeva, “MLK Tech Group” MMC şirkətinin təsisçisi və direktoru Mələk Mahmudova çıxış edərək tədbirin məqsədi və hədəfləri haqqında məlumatı tədbir iştirakçılarının diqqətinə çatdırıblar.
Daha sonra tədbirin qonaqları “Green Energy” Startup PitchFest layihəsi və gənclərin fəaliyyəti ilə bağlı fikirlərini bölüşüblər.
Startup PitchFest-in qeydiyyat mərhələsi 10.06.2023 tarixində başlamış 27.07.2023 tarixində bitmişdir. Bu müddət ərzində yarış üçün 96 komanda qeydiyyatdan keçib. Yüksək potensiallı 20 komanda seçilərək Startup Pitchfest-də iştirak hüququ qazanıb.
Komandalar “Alternativ enerji”, “Yaşıl enerji”, “Enerji sərfiyyatı və idarəetmə” “Yenilənən enerji istehsalı”, “Ağıllı şəbəkələr”, “Enerji saxlanması” mövzuları üzrə öz startap ideyalarını münsiflər heyətinə təqdim ediblər.
İyulun 7-də Azərbaycan Texniki Universitetində Təhsilin İnkişafı Fondu və “Women in Tech” təşkilatının Azərbaycan nümayəndəliyi arasında Maya Hacıyeva adına “İKT bacarıqları” təqaüd proqramının təsis edilməsi məqsədi ilə Anlaşma Memorandumu imzalanıb.
Memorandumu Təhsilin İnkişafı Fondunun İdarə Heyətinin sədri Elnur Nəsibov və “Women in Tech” təşkilatının Azərbaycandakı nümayəndəliyinin səfiri Leyla Seyidzadə imzalayıblar.
Tədbirdə Elm və Təhsil Nazirliyinin, Nazirlik yanında İctimai Şuranın, Azərbaycan Texniki Universitetinin, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin, Dördüncü Sənaye İnqilabının Təhlili və Koordinasiya Mərkəzinin, Azərbaycan Mətbuat Şurasının, dövlət və özəl qurumların, təlim və tədris müəssisələrinin nümayəndələri iştirak ediblər.
Açılış sözü ilə çıxış edən Azərbaycan Texniki Universitetinin rektoru Vilayət Vəliyev bu təşəbbüsü yüksək qiymətləndirərək bildirib ki, təqaüd proqramının Azərbaycanın ilk riyaziyyatçı qadın alimi, riyaziyyat elminin inkışafında böyük töhfəsi olan Maya xanım Hacıyeva adına olması xüsusi əhəmiyyətə malikdir. Maya Hacıyevanın əslən Şuşalı olması isə, təqaüd proqramını hər birimiz üçün doğmalaşdırır.
Daha sonra çıxış edən Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq tədbirin başlıca məqsədi haqqında məlumat verib. E.Nəsibov müasir işəgötürənin tələblərinə cavab verən gənclərin yetişdirilməsində, həmçinin önəmli tədqiqat işlərinin aparılmasında sənaye və biznes nümayəndələrinin iştirakının əvəzsiz rol oynadığını bildirib. Qeyd olunub ki, innovativ mühitin yaradılmasını sənayenin iştirakı və tərəfdaşlığı olmadan təsəvvür etmək mümkün deyil. Dəyişən dünyada universitetlərin də dəyişən rolunu nəzərə almağa gərək var. Yekunda E.Nəsibov bütün iştirakçıları AzTU-da əsası qoyulan universitet-sənaye işbirliyi mərkəzindən yararlanmağa dəvət edərək, digər ali təhsil ocaqlarında da bu cür mərkəzlərin yaradılacağına umid etdiyini bildirib.
Dövlət Məşğulluq Agentliyinin İdarə Heyətinin sədri Mustafa Abbasbəyli formalaşan əmək bazarının açarının hər zaman təhsil olduğunu vurğulayıb. M.Abbasbəyli qeyd edib ki, təhsil dedikdə ənənəvi təhsili deyil, təhsildə yeni metodlar və yanaşmalar nəzərdə tutulur. Müasir dünyada gənclərin inkişafı, fərdi şəkildə əmək bazarına hazırlanması prosesində bu kimi layihələr çox böyük önəm daşıyır.
İnnovasiya və Rəqəmsal İnkişaf Agentliyinin sədr əvəzi İnarə Vəliyeva vətəndaşlarımızın hazırda dövlət və özəl qurumları tərəfindən yaradılmış imkanlardan faydalana bildiyi üçün çox şanslı olduqlarını vurğulayıb. İ.Vəliyeva Azərbaycanda müxtəlif qurumlar tərəfindən verilən təqaüdlərin yalnız 35%-nin qadınlar tərəfindən əldə edildiyini bildirərək bu tip təqaüd və dəstək proqramlarında qadınların xüsusi ehtiyaclarının nəzərə alınması vacibliyini vurğulayıb.
“Women in Tech” təşkilatının Azərbaycandakı nümayəndəliyinin səfiri Leyla Seyidzadə bildirib ki, təşkilat Azərbaycan daxil olmaqla 50-dən çox ölkədə qadınların İKT sahəsində təşəbbüslərinin reallaşmasına dəstək göstərir, lakin bənzər təqaüd proqramları çox az ölkədə var. Bu cür proqramların olmasının ölkəmizin imici üçün də çox vacib olduğunu qeyd edib.
Yekunda təqdimatla çıxış edən “Women in Tech” təşkilatının Azərbaycandakı nümayəndəliyinin təhsil proqramları üzrə tərəfdaşı Leyla Hacıyeva təqaüd proqramının şərtləri barədə ətraflı məlumat verib. Bildirib ki ki, əsas məqsəd qadınların İnformasiya Texnologiyaları və Yüksək Texnologiyalar üzrə bilik və bacarıqlarının artırılması və cəmiyyətdə müvafiq olaraq öz rollarını tuta bilmələri məqsədilə onlara bu sahədə təqaüdlərin ayrılmasıdır.
Təqaüd fiziki və hüquqi şəxslər tərəfindən sözügedən layihəyə köçürülmüş ianələr, qrantlar və ya digər daxilolmalar hesabına ayrılacaqdır. Proqrama Azərbaycan vətəndaşı olan 15 – 40 yaş aralığında olan qadınlar müraciət edə bilərlər.
Əziz şagirdlər, yay tətilinizi səmərəli keçirib mükafat qazanmaq istəyirsinizsə, marafona qoşulmağa tələsin!
Təhsilin İnkişafı Fondu və Azərbaycan Nəşriyyatlar Assosiasiyasının birgə təşkilatçılığı ilə keçiriləcək marafonun şərtləri aşağıdakı kimidir:
1. Marafona 12-16 yaşlı uşaqlar qoşula bilər. Daha az yaşı olan uşaqlar isə valideynin tövsiyəsi və nəzarəti ilə marafona qoşula bilər. Kitablar 12-16 yaşlı uşaqlar üçün nəzərdə tutulub.
2. İştirakçı marafonun rəsmi teleqram səhifəsinə qoşulmalıdır. Səhifədə kitablar, eləcə də imtahan mərhələsi ilə bağlı məlumatlar paylaşılacaq.
3. Sentyabrın 26-dək təyin olunmuş 7 kitab iştirakçı tərəfindən oxunmalıdır.
4. Qiymətləndirilmə iki mərhələdən ibarət olacaq. Suallar iştirakçıların mütaliə etdiyi 7 kitab əsasında hazırlanacaq.
5. Birinci onlayn, “KAHOOT” proqramı vasitəsilə həyata keçiriləcək. Bu mərhələdə iştirakçıya internetə qoşulan iki telefon, kompüter, yaxud notbuk lazım olacaq. Bu mərhələdə ən yüksək göstəriciyə malik on nəfər final turuna keçəcək.
6. Final mərhələsi təyin olunmuş studiyada on nəfər arasında baş tutacaq.
7. Birinci yeri tutan iştirakçıya 1000 AZN, ikinci yeri tutan iştirakçıya 500 AZN, üçüncü yeri tutan iştirakçıya isə 300 AZN mükafat, digər 7 nəfərə isə kitab hədiyyələri və sertifikaflar veriləcək.
İştirak etmək üçün oxunmalı olan 7 kitabın siyahısı:
1. Amin Sükut – “Tuflinlər”;
2. Aynur Cavid, Cəmilə Məmmədli – “Səyyah Bilgə”;
3. Əziz Sultan – “Əjdahaların sirri – Adəmin macəraları”;
İyunun 21-i Təhsilin İnkişafı Fondunun təşəbbüsü ilə ümummilli lider Heydər Əliyevin anadan olmasının 100-cü ildönümünə həsr olunmuş “Təhsilin inkişafında innovativ metodlar” müsabiqəsi finalçılarının iştirakı ilə görüş keçirilib.
Başlıca məqsəd təqdim edilmiş layihə və təkliflərin dinlənilməsi, müzakirəsi və dəstəklənməsi perspektivlərinin dəyərləndirilməsi olub.
Görüşdə Azərbaycan Respublikasının Təhsil İnstitutunun direktoru Rüfət Əzizov, Bakı Şəhər Təhsil İdarəsinin müdiri Mehriban Vəliyeva, Təhsil Sisteminin İnformasiyalaşdırılması İdarəsinin rəis müavini Zaur Kazımov, Peşə Təhsili üzrə Dövlət Agentliyinin direktor müavini Ceyhun Kərəmov və SABAH.hub-ın Baş icraçı direktoru Rəhim Bayramlı iştirak ediblər.
Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq “Təhsilin inkişafında innovativ metodlar” müsabiqəsi haqqında məlumat verib. 2 mərhələdən ibarət olan müsabiqəyə 20 gün ərzində Azərbaycanın 28 dövlət və özəl ali təhsil müəssisəsindən 150 müraciətin daxil olduğu qeyd olunub.
E.Nəsibov qonaqlara bu təşəbbüsdə iştirak etdikləri üçün minnətdarlığını bildirib.
Görüş zamanı tələbələr “İnklüziv təhsilin İnkişafı”, “Qeyri-formal təhsil metodları”, “Təhsildə texnologiyanın tətbiqi” və “Təhsildə idarəetmə” mövzuları üzrə ideya və təkliflərini təqdim ediblər. Hər çıxışdan sonra qonaqlar və tələbələr arasında layihəyələrə dair müzakirələr aparılıb.
“Caspian Energy Club”un İdarə Heyətinin sədri və qrupunun Baş İcraçı Direktoru Telman Əliyev, Təhsil komitəsinin rəhbəri Sakit Səmədov və baş icraçı direktorun müşaviri Günel Quliyeva Təhsilin İnkişafı Fondunun qonağı olublar.
Telman Əliyev “Caspian Energy Club”un fəaliyyəti haqqında geniş məlumat verərək bildirib ki, Klub dünyanın 50 ölkəsindən 5000 çox şirkəti birləşdirən, Xəzər-Qara dəniz və Baltikyanı ölkələr ərazisində fəaliyyət göstərən dinamik və inkişaf edən regional təşkilatdır.
Mənzil-qərargahı Bakıda yerləşən “Caspian Energy Club”un Türkiyə, Gürcüstan, Özbəkistan, Qazaxıstan, Çexiya, İsrail, Almaniya, Polşa, Slovakiya, BƏƏ-də rəsmi nümayəndəlikləri, həmçinin dünyanın müxtəlif ölkələrində səlahiyyətli nümayəndələri var.
Görüşün gedişatında Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyət istiqamətləri haqqında məlumatı diqqətə çatdıraraq bildirib ki, qurumun məqsədi ölkəmizdə təhsil sisteminin inkişafına yönəlmiş proqram və layihələri dəstəkləmək, dövlət təhsil müəssisələrinin infrastrukturunun inkişafı ilə bağlı proqramlar həyata keçirmək, təhsilin və iqtisadiyyatın inteqrasiyasına və gücləndirilməsinə töhfə verməkdir.
E. Nəsibov Fond tərəfindən həyata keçirilən və yaxın müddətdə planlaşdırılan layihələrdən söz açıb. Sədr “Caspian Energy Club”la potensial əməkdaşlıq perspektivləri barədə fikirlərini bölüşüb.
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyində Elm və Təhsil Nazirliyinin tabeliyində Təhsilin İnkişafı Fondunun nümayəndələri ilə görüş olub.
Əməkdaşlıq istiqamətlərinin müzakirə edildiyi görüşdə Agentliyin İdarə Heyətinin sədri Mustafa Abbasbəyli aktiv məşğulluq tədbirlərinin ildən-ilə genişləndiyini, yeni əməkdaşlıqlar hesabına bir sıra layihələrin icra edildiyini diqqətə çatdırıb. O, eyni zamanda peşəkar kadrların hazırlanması istiqamətində Agentlik tərəfindən görülən tədbirlər, peşə hazırlığının təşkili mexanizmi barədə də məlumat verib.
Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyəti, həyata keçirilən layihələr və proqramlardan danışıb. Universitet-sənaye işbirliyinin möhkəmləndirilməsi, peşəkar kadr hazırlığının təmin olunması və sosial cəhətdən həssas kateqoriyadan olan vətəndaşların dəstəklənməsini hədəfləyən layihələrdə Agentlik ilə əməkdaşlıq əlaqələrinin qurulmasının əhəmiyyətini qeyd edib. E.Nəsibov həmçinin bu il ilk dəfə təşkil ediləcək “Təhsilin İnkişafı Forumu” na Agentliyi tərəfdaş olaraq dəvət edib.
Daha sonra iki qurum arasında əməkdaşlıq perspektivlərinə dair müzakirələr aparılıb.
“Gənc Qızların Təhsilinə Dəstək” layihəsi çərçivəsində tələbələrin şəxsi və peşəkar inkişafına töhfə verəcək təlim proqramlarına start verildi.
İlk təlim Təhsilin İnkişafı Fondunun Layihələrin idarə olunması və biznesin inkişafı şöbəsinin əməkdaşı Rəsul Həşimov tərəfindən “Şəxsi inkişaf və karyera planlaşdırması” mövzusunda olub.
Təlimin keçirilməsində əsas məqsəd qızların karyera planlaması mövzusunda məlumatlandırılması, onlara müasir iş axtarışı bacarıqlarının aşılanmasıdır.
R.Həşimov karyera planlamasının mərhələləri, planlama üsulları və karyera inkişafının addımları barədə ətraflı məlumat verib.
Daha sonra təlim iştirakçılarının öz zəif və güclü cəhətlərini müəyyən etmələri məqsədilə strateji menecmentdə ən effektiv alətlərdən biri olan SWOT (GZİT) təhlili aparılıb.
Tədbir çərçivəsində, həmçinin təlim iştirakçıları ilə müzakirələr aparılıb və onları maraqlandıran suallar cavablandırılıb.
