ADA Universitetində 12-ci Karyera sərgisi keçirilib. “İstedadlarla karyera yolları arasında körpü” devizi altında keçirilən sərgidə dövlət və özəl sektordan olan 137 qurum təmsil olunub.
Təhsilin İnkişafı Fondu da baş tutan sərgidə təmsil olunub. Burada tələbələrə Fondda iş imkanları, işə qəbul prosesi, ali təhsil müəssisələrinin tələbələri üçün təşkil edilən layihələr, təqaüd proqramları barədə ətraflı məlumat verilib.
Karyera sərgisi ADA Universitetinin tələbə və məzunları üçün potensial işəgötürənlərlə tanış olmaq, tərcümeyi-halını birbaşa onlara təqdim etmək və yerindəcə müsahibələrdə iştirak etmək fürsəti yaradıb.
Azərbaycan Texnologiya Universitetində “GreenTech” Startap və Yaşıl Texnologiyalar” müsabiqəsi keçirilib.
Tədbir Azərbaycan Respublikasının Prezidenti İlham Əliyevin sərəncamı ilə elan edilmiş “Yaşıl dünya naminə həmrəylik ili” çərçivəsində baş tutub.
Yarış Azərbaycan Texnologiya Universitetinin təşkilatçılığı (ATU), Təhsilin İnkişafı Fondu (TİF), İnnovasiya və Rəqəmsal İnkişaf Agentliyi (İRİA), Kapital Bank, “Bir” Tələbə-Könüllü Təşkilatı, Azersun, ATS Food və AzGranatanın dəstəyi ilə həyata keçirilib.
Açılış mərasimində ATU-nun rektoru v.m.i.e. dos. Yaşar Ömərov çıxış edərək bildirib ki, müsabiqənin keçirilməsində məqsəd universitetlərdə yaşıl texnologiyaların inkubasiya mühitinin inkişafına dəstək, tələbələrin innovativ bacarıqlarının formalaşdırılması, həmçinin universitetlər arası əməkdaşlığın genişləndirilməsidir.
Gəncə şəhər İcra Hakimiyyətinin başçısı Niyazi Bayramov, TİF-in İdarə Heyətinin sədri Elnur Nəsibov, Azərbaycan Dövlət Neft və Sənaye Universitetinin rektor əvəzi dos. Vazeh Əskərov, GDU-nun rektoru Yusif Yusibov, İRİA-nın Səriştələrin inkişafı departamentinin müdiri Fatimə Ələkbərova, “Bir” Tələbə-Könüllü Təşkilatının rəhbəri Leyla Zeynalova da çıxış edərək müsabiqə iştirakçılarına uğurlar arzu ediblər.
Daha sonra yarışa təqdim olunan layihələrdən ibarət stendlərə baxış keçirilib.
Müsabiqədə 17 universitetin 200 tələbədən ibarət 60-dan çox komandası 5 kateqoriya üzrə mübarizə aparıb. Robototexnika, Mexatronika, Enerji sistemləri mühəndisliyi, İnsanlıq naminə texnologiyalar, Davamlılıq üçün Sİ olmaqla hər kateqoriya üzrə I, II, III və həvəsləndirici yerlər müəyyənləşib. Münsiflər heyətinin dəyərləndirməsindən sonra qalib komandalar sertifikat və qiymətli hədiyyələrlə mükafatlandırılıb.
Təhsilin İnkişafı Fondu Azərbaycan Respublikası Prezidentinin 2021-ci il 14 iyul tarixli 1399 nömrəli Fərmanı ilə yaradılmış publik hüquqi şəxsdir. Fondun əsas fəaliyyət istiqamətləri təhsilin inkişafı ilə bağlı dövlət siyasətinin formalaşdırılması, təhsilin inkişafını təşviq edən mexanizmlərin hazırlanması və həyata keçirilməsində də iştirak etmək, dövlət təhsil müəssisələrinin maddi-texniki bazasının müasir tələblərə uyğunlaşdırılması, təhsil işçilərinin sosial müdafiəsinin gücləndirilməsi və maddi təminatının yaxşılaşdırılmasıdır.
2024-cü il üzrə əsas fəaliyyət istiqamətlərindən biri olan “təhsil müəssisələrinin fiziki infrastrukturunun və maddi-texniki təminatının təkmilləşdirilməsi” istiqaməti sahəsində Təhsilin İnkişafı Fondu və “Silk Vey Vest aviaşirkəti” MMC şirkəti arasında ianə müqaviləsi imzalanıb. Dövlət-özəl əməkdaşlığının bariz nümünəsi olan layihə çərçivəsində ölkəmizin müxtəlif şəhər və rayonlarında 6 ümumi təhsil müəssisəsinin tikintisinin həyata keçirilməsinin dəstəklənməsi nəzərdə tutulur. 5 məktəb Abşeron rayonunda, 1 isə Kürdəmir rayonunda yerləşir.
Ümumilikdə, layihə çərçivəsində Bakı şəhərində yerləşən 5 məktəbin və Kürdəmir rayonunda yerləşən 1 məktəbin əsaslı təmiri və bərpası işlərinin davam etdirilməsi nəzərdə tutulur. Layihənin uğurlu icrası nəticəsində təhsil müəssisələrində 4596 şagirdin təhsil şəraiti yaxşılaşdırılacaqdır.
Belə ki, layihə çərçivəsində Novxanı kəndi, M.Hüseynzadə adına 1 saylı 640 şagird yerlik orta məktəb binasının əsaslı təmiri və 400 şagird yerlik əlavə korpusun tikilməsi;
Nərimanov rayonu 57 nömrəli tam orta məktəbin sökülərək yerində 480 şagird yerlik yeni binanın tikilməsi;
Nəsimi rayonu 151 nömrəli tam orta məktəbin sökülərək yerində 624 şagird yerlik yeni binanın tikilməsi;
Sabunçu rayonu 68 nömrəli tam orta məktəbin sökülərək yerində 528 şagird yerlik yeni binanın tikilməsi;
Suraxanı rayonu 141 nömrəli 940 şagird yerlik tam orta məktəbin əsaslı təmiri və yararsız korpusun sökülərək yerində 720 şagird yerlik əlavə korpusun tikilməsi;
Kürdəmir rayonu, Axtacı kənd tam orta məktəbin sökülərək yerində 264 şagird yerlik yeni binanın tikilməsi gözlənilir.
Təhsilin İnkişafı Fondu bütün maraqlı tərəfləri dövlət-özəl tərəfdaşlığı çərçivəsində təhsilin inkişafı və təhsil müəssisələrinin infrastrukturunun yaxşılaşdırılması məqsədilə əməkdaşlığa dəvət edir.
26–28 aprel tarixlərində Sənaye və İnnovasiyalar üzrə Bakı Dövlət Peşə Təhsil Mərkəzində hakaton formatında təşkil olunan tələbə müsabiqəsi yekunlaşıb.
Hakatonda müvafiq istiqamətlər üzrə təyin edilmiş 10 mentor tələbələrə konstruktiv rəylər verərək onlara ideyalarının təkmilləşdirilməsi istiqamətində dəstək olub. Hakatonun finalında isə tərkibi 10 nəfərdən ibarət 30 komanda 5 dəqiqə ərzində layihə təqdimatlarını həyata keçirib.
Qeyd edək ki, təqdimatlar BMT-nin ölkəmizdəki rezident əlaqələndirci ofisinin iqtisadçısı Hurşid Rüstəmov, “Tedroid” şirkətinin həmtəsisçisi Tariyel Ağazadə, SABAH.HUB-ın əməkdaşı İnqilab Süleymanov və Kapital Bankın rəqamsal xidmət sahəsinin məhsul sahibi Cəlal Hüseynzadədən ibarət münsiflər heyəti tərəfindən qiymətləndirilib.
Münsiflər heyətinin qərarı ilə “Genesis” komandası I, “Cookers 404” komandası II, “Hexagon Bhos” komandası III yerə layiq görülüblər. Qaliblər müvafiq olaraq 2000, 1500, 1000 manat məbləğində mükafat və “bp Azərbaycan” tərəfindən təqdim olunan hədiyyə ilə mükafatlandırılıblar.
Tələbə müsabiqəsinin qalib komandası eyni zamanda layihənin tərəfdaşı olan SABAH.HUB Mərkəzində inkubasiya proqramına cəlb ediləcəkdir.
Aprelin 26-da Azərbaycan Nəşriyyatları Assosiasiyası (ANAİB), AMEA, Mədəniyyət Nazirliyi və Təhsilin İnkişafı Fondunun təşkilatçılığı ilə Azərbaycan Naşirlərinin I Forumu keçirilib.
Azərbaycanın müstəqillik dövründə inkişaf edən özəl nəşriyyat sektorunun bir növ hesabatlılığına, ümumi problemlərin həlli ilə bağlı təkliflərin formalaşmasına, yeni layihələrin hazırlanması üçün şəbəkələşmənin təmin olunmasına töhfə verən Azərbaycan Naşirlərinin I Forumunun açılış mərasimində ANAİB sədri Şəmil Sadiq, AMEA prezidenti İsa Həbibbəyli, Təhsilin İnkişafı Fondunun sədri Elnur Nəsibov, Milli Məclisin Mədəniyyət komitəsinin sədri Fazil Mustafa, Türkiyə Mətbəə və Nəşriyyatlar Birliyinin başqanı Mustafa Karagüllüoğlu çıxış edib, ölkə tarixində ilk olan bu mötəbər tədbirin ölkə mədəni-ictimai həyatına, nəşriyyat və kitabçılıq işinə göstərəcəyi təsirdən danışıb, öz təkliflərini irəli sürüblər.
Forumda nəşriyyat məhsulları və strategiyalarının sərgisindən, nəşriyyat problemlərinə kompleks yanaşma təmin edən panellər təşkil olunub.
5 paneldə ümumilikdə 15 spikerin çıxış etdiyi, xarici mütəxəssislərin də cəlb olunduğu forum yerli nəşriyyat sektorunun real problemlərinə işıq tutmaq, eləcə də beynəlxalq təcrübədən yararlanmaq məqsədi daşıyır.
İlk – “Nəşriyyat menecmentliyi və kitab marketinqi” mövzusundakı panelin moderatoru “Parlaq İmzalar” nəşriyyatının direktoru Nurman Tariq, spikerləri D&R-ın e-ticarət satış direktoru Özgür Topyıldız, Türkiyə Mətbəə və Nəşriyyatlar Birliyinin rəhbəri Mustafa Karagüllüoğlu olub.
İkinci panel “Redaktə və tərcümə problemləri”nə həsr olunub. Panelin moderatoru “Altun Kitab” nəşriyyatının direktoru Rafiq İsmayılov, spikerləri “XAN Nəşriyyatı”nın direktoru Səbuhi Şahmursoy, Azərbaycan Yazıçılar Birliyinin beynəlxalq əlaqələr və tərcümə məsələləri üzrə katibi Səlim Babullaoğlu olub.
Üçüncü panel isə “Müəllif hüquqları və beynəlxalq əməkdaşlıqlar”a həsr edilib. Panelin moderatoru “Qədim Qala” nəşriyyatının xarici əlaqələr departamentinin rəhbəri Elnarə Əli, spikerləri “İntrotema” Müəllif Hüquqları Agentliyinin rəhbəri Məhəmməd Ağırakça, “Yazar ol”un təsisçisi Ramil Əhməd olub.
Dördüncü paneldə “Tərtibat, dizayn və qrafika” mövzusu müzakirəyə çıxarılıb. Panelin moderatoru “MİMTA Yayımları”nın direktoru Əsəd Aslanoğlu, spikerləri “Erdem Yayınları”nın baş dizayneri Aişə Adaş, “Coders” şirkətinin art-direktoru Rəsul Həsən olub.
Sonuncu – beşinci paneldə “Uşaq nəşrləri və yeni yanaşmalar” mövzusu ətrafında müzakirələr aparılıb. Panelin moderatoru “Ağıllı Bala” nəşriyyatının direktoru Fatimə Alxaz, spikerləri “Erdem Yayınları”nın rəhbəri Məlikə Günyüz, “Libra Kitab” nəşriyyatının direktoru Veysəl Məmmədov olub.
Sənaye və İnnovasiyalar üzrə Bakı Dövlət Peşə Təhsil Mərkəzində 300 tələbənin iştirakı ilə “Azərbaycan 2030 və dayanıqlı inkişaf” milli tələbə müsabiqəsinin rəsmi açılış mərasimi keçirilib.
Mərasimdə giriş nitqi ilə çıxış edən “Bir Könüllü” Tələbə Təşkilatının rəhbəri Leyla Zeynalova müsabiqə, həmçinin şərtləri barədə ətraflı məlumat verib və komandalara uğurlar arzu edib.
Tədbirdə iştirak edən BMT-nin Azərbaycandakı rezident əlaqələndiricisi Vladanka Andereeva, Azərbaycan Respublikası Gənclər Fondunun icraçı direktor vəzifəsini icra edən Qədir Xəlilov gənclər üçün təşkil olunan və yekununda ortaya məhsul qoyan bu cür layihələrin böyük əhəmiyyətindən bəhs edib.
Ardınca Təhsilin İnkişafı Fondunun rəhbəri Elnur Nəsibov və Elm və Təhsil Nazirliyinin İctiamiyyətlə əlaqələr və kommunikasiya şöbəsinin müdiri Səbuhi Rzayev öz nitqləri ilə çıxış ediblər. Tələbəlik illərində təhsilin müxtəlif faydalı imkanlarını dəyərləndirməyi tövsiyə edən qonaqlar iştirakçılara hakaton günlərində nəaliyyət arzu ediblər.
Qeyd edək ki, hakaton formatında keçirilən müsabiqənin əsas məqsədi iqlim dəyişikliklərinə uyğunlaşma və onun təsirlərinin azaldılması istiqamətində tələbələrin innovativ layihə ideyalarının dəyərləndirilməsidir.
Aprelin 23-də Kürdəmir şəhər Heydər Əliyev adına Parkda Mərkəzi Aran Regional Təhsil İdarəsinin və Kürdəmir Rayon İcra Hakimiyyətinin təşkilatçılığı, Təhsilin İnkişafı Fondunun dəstəyi ilə “Ümumdünya Kitab və Müəlliflik Hüququ Günü” ilə əlaqədar kitab festivalı keçirilib.
Festivalın keçirilməsində məqsəd şagirdlərin kitaba və bədii qiraətə olan mütaliə marağının artırılmasıdır.
Festivalda Azərbaycan Respublikası Elm və Təhsil Nazirliyinin Daxili Nəzarət Şöbəsinin baş məsləhətçisi Rövşən Ağayev, Mərkəzi Aran Regional Təhsil İdarəsinin müdiri Elçin Kərimov, Kürdəmir Rayon İcra Hakimiyyəti başçısının müavini Ağali Kərimli, Təhsilin İnkişafı Fondunun şöbə müdiri Ramin Cəfərov, regional təhsil idarəsinin struktur bölmə rəhbərləri, məktəb direktorları, ictimaiyyət nümayəndələri, şəhid ailələri və şagirdlər iştirak edib.
Keçirilən festivalda 250-yə yaxın kitab sərgisi keçirilib, əl işləri nümayiş olunub.
Dövlət-özəl tərəfdaşlığı çərçivəsində “Hədəf Şirkətlər Qrupu” tərəfindən Təhsilin İnkişafı Fonduna sərgidə iştirak üçün 150 ədəd kitab ianə edilib.
Festival şagirdlərin ifasında ədəbi-bədii kompozisiyalarla davam etdirilib.
Azərbaycan Nəşriyyatları Assosiasiyası (ANAİB), Təhsilin İnkişafı Fondu (TİF) və Azərbaycan Gənc Müəllimlər Assosiasiyasının (AGMA) birgə təşkilatçılığı, Hədəf Şirkətlər Qrupunun baş sponsorluğu ilə IV Kitabqurdu Müəllimlərin Oxu Marafonuna start verilir.
Marafonun şərtləri aşağıdakı kimidir:
Marafonun keçirilmə müddəti 3 aydır (20 aprel 2024 – 20 iyul 2024).
Marafonda hazırda müəllimlik fəaliyyəti ilə məşğul olanlar iştirak edə bilər.
Layihə müddətində 6 kitab oxunacaq.
İştirakçı marafonun rəsmi teleqram səhifəsinə qoşulmalıdır. Səhifədə kitablar, imtahan mərhələsi və ümumiyyətlə, marafonla bağlı məlumatlar paylaşılacaq.
Oxu müddəti bitəndən sonra qaliblər seçim turu və finaldan ibarət imtahan nəticəsində seçiləcəklər. Suallar iştirakçıların mütaliə etdiyi 6 kitab əsasında hazırlanacaq.
Birinci imtahan onlayn formada həyata keçiriləcək. Bu mərhələdə ən yüksək göstəriciyə malik on nəfər final turuna vəsiqə qazanacaq.
Final mərhələsi təyin olunmuş oyun zalında on nəfər arasında baş tutacaq.
Birinci yer 1000 AZN, ikinci yer 600 AZN, üçüncü yer isə 400 AZN pul mükafatı əldə edəcək. Digər 7 nəfərə isə kitab hədiyyələri və sertifikaflar veriləcək.
IV Kitabqurdu Müəllimlərin Oxu Marafonunu müddətində oxunacaq kitablar:
Şəmil Sadiq – “İnsan mühəndisi” (Hədəf Nəşrləri)
Nihat Büyükbaş – “Türk təhsili” (XAN Nəşriyyatı)
Rafiq İsmayılov – “Düzgün yazaq” (Altun Kitab Nəşriyyatı)
Rövşən Abdullaoğlu – “Üzləşmə” (Qədim Qala Nəşriyyatı)
Gülüş Xəlilova – “Günəşə baxmaq” (Libra Kitab Nəşriyyatı)
Qeydiyyatdan keçmək üçün linkə daxil olmanız (qeydiyyatdan keçəndən sonra “Marafona qoşul” səhifəsinə keçid edərək müvafiq xanaları doldurmağınız xahiş olunur.
Kitabları endirimlə sifariş vermək və sürətli çatdırılmadan faydalanmaq üçün əlaqə nömrəsi: +994 55 877 24 44
Aprelin 23-də Təhsilin İnkişafı Fondu (TİF), Bakı Mühəndislik Universiteti (BMU) və Təhsildə Keyfiyyət Təminatı Agentliyi (TKTA) arasında “Universitetlərin elmi-pedaqoji heyət üzvləri və təhsilalanların IELTS imtahanına təşviq edilməsi haqqında” üçtərəfli əməkdaşlıq müqaviləsi imzalanıb.
BMU-nun rektoru Yaqub Piriyev, TİF-in İdarə Heyətinin sədri Elnur Nəsibov və TKTA-nın İdarə Heyətinin sədri Tural Əhmədov tərəfindən imzalanan sənəd ali təhsil müəssisəsinin cari il üçün Fəaliyyət Planında nəzərdə tutulmuş insan kapitalının formalaşdırılmasının gücləndirilməsi məqsədi daşıyır.
Müqavilə elmi-pedaqoji heyət və tələbələrin ingilis dilini mənimsəməsi üçün uyğun əlverişli şəraitin yaradılması fəaliyyətinin dəstəklənməsi çərçivəsində üçtərəfli əməkdaşlığı ehtiva edir. Sənədə əsasən, ali təhsil müəssisəsində sözügedən istiqamət üzrə bacarıqların artırılması məqsədilə həyata keçiriləcək təşviqat işləri çərçivəsində imtahan iştirakçılarının sayı müəyyənləşdiriləcək və hər iştirakçıya yalnız bir dəfə müraciət etmək şansı veriləcək. IELTS imtahanında yüksək bal toplayan, uğurlu nəticə əldə edən akademik heyət üzvü və tələbələrin imtahan üzrə ödənişləri TİF tərəfindən qarşılanacaq.
Müqavilənin qarşılıqlı faydaları, kadrların peşəkarlıq səviyyəsinin yüksəldilməsi sahəsinə verəcəyi töhfələr baxımından yüksək dəyərləndirən rektor Yaqub Piriyev bu istiqamətdə tədbirlərin universitetin hazırlanmaqda olan Strateji İnkişaf Proqramında (SİP) da yer aldığını deyib. Rektor SİP-də ali təhsil müəssisəsinin missiya və gələcəyə baxışı, inkişaf məqsədləri, orada qoyulan hədəflərin təmin olunması ilə bağlı qonaqları ətraflı məlumatlandırıb.
Müqavilənin “IELTS imtahanına təşviq” layihəsinin tərkib hissəsi olduğunu deyən TİF-in İdarə heyətinin sədri Elnur Nəsibov BMU-nun ali təhsil müəssisələri arasında bu layihəyə qoşulan sayca 8-ci universitet olması münasibətilə təbrik edib. Layihənin üstünlükləri, gözlənilən müsbət nəticələrdən söz açan sədr Fondun ümumi fəaliyyəti, strateji hədəfləri, plan və məqsədləri, növbəti layihə və təşəbbüsləri haqqında da danışıb, həmçinin BMU-nun bu prosesin yaxın iştirakçısı olacağına inandığını bildirib.
TKTA-nın İdarə Heyətinin sədri Tural Əhmədov da qloballaşan təhsil mühitində, eləcə də akademik müstəvidə IELTS-in vacibliyinə diqqət çəkərək, bu addımın tələbə və müəllimlərin gələcək fəaliyyətində yeni istiqamətlərə yol aça biləcəyini vurğulayıb.
Gələcək əməkdaşlıq istiqamətlərinin müzakirə olunduğu tədbirdə akademik heyət və təhsilalanların dil biliklərinin gücləndirilməsi, xüsusən ingilis dilinin təkmilləşdirilməsi üzrə müxtəlif layihələrin həyata keçirilməsinin vacibliyi bildirilib, həmçinin beynəlxalq dil sertifikatını yüksək nəticə ilə almağın üstünlüklərdən, verdiyi geniş imkanlardan danışılıb. Bu səriştə və bacarıqların elmi-tədqiqat fəaliyyətinə müsbət təsiri, elmi məqalələrin yazılması, tələbə və müəllimlərin beynəlxalq səviyyəli platformlarda, akademik layihələr üzrə təcrübə mübadiləsində fəal iştirakına yol açması, nəticə etibarilə ali təhsil müəssisəsinin reytinqlərdə nüfuzunun müəyyənləşməsindəki rolu qeyd olunub.
Daha 1000 nəfər “Coursera” onlayn təhsil platformasında rəqəmsal və kommunikasiya bacarıqlarının inkişafı ilə bağlı kurslarda ödənişsiz iştirak edəcək.
Azərbaycanda daha 1000 nəfər ABŞ-nin “Coursera” platformasında ödənişsiz əsaslarla 6 həftəlik təhsil proqramlarına başlayıb. Bu imkan İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu və “Coursera” şirkətinin birgə əməkdaşlığı ilə həyata keçirilən “4Sİ Akademiyası” layihəsi çərçivəsində reallaşdırılır.
Layihənin məqsədi ölkədə rəqəmsal bacarıqların inkişafı, qabaqcıl texnologiyalar sahəsində bilik və bacarıqların artırılması və əmək bazarında ixtisaslı kadrların hazırlanmasına dəstək olmaqdır. 100 milyondan çox insanın təhsil aldığı “Coursera” onlayn təhsil platformasında 280-ə yaxın universitet və qabaqcıl şirkətlərin süni zəka, böyük verilənlər (Big Data), data analitika, blokçeyn, bulud texnologiyaları, liderlik, kommunikasiya, ingilis dili və digər istiqamətlər üzrə 10 minə yaxın kursu tədris olunur. “4Sİ Akademiyası” çərçivəsində platformada Yel, Dyuk, Miçiqan, İllinois, Virciniya kimi 40-a qədər nüfuzlu universitetin, həmçinin, “Google”, “IBM”, “Microsoft”, “Meta” kimi qabaqcıl texnologiya şirkətlərinin ümumilikdə 800-ə yaxın kursu vətəndaşlarımıza ödənişsiz təqdim edilir.
Təlimləri uğurla bitirənlərə sertifikat, “4Sİ Akademiyası” tərəfindən tövsiyə olunan ən azı 2 və ya 3 kursu keçən istifadəçilərə isə rəqəmsal nişanlar (digital badge) verilir. 15 sentyabr 2023-cü il tarixində start verilmiş 1 illik pilot layihəyə qeydiyyat tamamlanıb və qeydiyyatdan keçmiş 10 min nəfər növbəli şəkildə “Coursera” onlayn təhsil platformasından yararlanacaq. Bu günə kimi platformadan 6000 nəfər faydalanıb, onlardan 2000 nəfəri sertifikat əldə edib. Layihənin davamı ilə bağlı əlavə məlumat veriləcək.
