6 iyun tarixində “Baku EduEXPO Beynəlxalq Təhsil sərgi-satış yarmarkası”nda iştirak edən şirkətlər ilə Təhsilin İnkişafı Fondu və 4SİM Azərbaycan arasında görüş keçirilib.
Görüşdə Təhsilin İnkişafı Fondunun İdarə Heyətinin sədr müavini Xanım Daşdəmirova, 4SİM Azərbaycanın Rəqəmsal İqtisadiyyat şöbəsinin rəhbəri Xəyalə Fətullayeva, Kiçik və Orta Biznes Subyektləri və Klublarının Assosiasiyasının (KOBSKA) sədri Nigar Ələsgərova, KOBSKA Təhsil Komitəsinin sədri Aysel Gülməmmədova və 20-dən çox şirkət nümayəndələri iştirak edib.
Görüş müddətində “Baku EduEXPO Beynəlxalq Təhsil sərgi-satış yarmarkası”nın yekun hesabatı üzərindən rəy və təkliflər dinlənilib və gələcəkdə keçirilməsi planlaşdırılan layihələrdə birgə əməkdaşlıq imkanları müzakirə olunub.
Təhsilin İnkişafı Fondu, Azərbaycan Mətbuat Şurası və “Azərbaycan müəllimi” qəzetinin birgə əməkdaşlığı çərçivəsində Təhsilin İnkişafı Fondunun yaradılmasının üçüncü ildönümü ilə bağlı “Qızların təhsilinə dəstək” mövzusunda media subyektlərinin (qəzet, jurnal, informasiya agentliyi, internet informasiya resursu) təmsilçiləri arasında yazı müsabiqəsi elan edilir.
Müsabiqənin mövzusu
Müsabiqə iştirakçıları qızların təhsili ilə bağlı mövcud duruma, imkanlara, göstərilən dəstəyə, yeni istiqamətlərə, təkliflərə və yanaşma yollarına diqqət yetirməlidirlər.
Müsabiqə üzrə mükafatlandırma
Müsabiqə üzrə 3 (üç) qalib müəyyənləşəcək:
I yer – Planşet Lenovo Tab M10
II yer – Planşet Lenovo Tab M9
III yer – Smartfon Motorolla G14
Müsabiqə şərtləri
Müsabiqəyə təqdim olunmuş yazılarda üstünlük veriləcək:
Nəzərdə tutulan istiqamətləndirici mövzuların dolğun əhatə etmə səviyyəsinə;
Analitik keyfiyyətlərə, faktların və məsələlərin düzgün təhlilinə;
Faktlardan istifadə xüsusiyyətlərinə və yazının keyfiyyətinə;
İfadə vasitələrinin zənginliyinə;
Oxucu üçün informasiyalılıq dərəcəsinə;
Qabaqcıl dünya təcrübəsi ilə məzmunlu müqayisənin aparılmasına.
Müsabiqəyə 7 iyun 2024-cü il tarixindən 5 iyul 2024-cü il tarixinədək qəzet, jurnal və informasiya agentliklərində, xəbər saytlarında yayımlanacaq analitik yazılar, müsahibələr buraxılacaq.
Müsabiqə üçün dil və janr məhdudiyyəti nəzərdə tutulmur.
Yazılar 9-11 min işarədən (1 A3 formatlı qəzet vərəqindən) çox olmamalıdır.
Qeyd 1: Yazılarda “Təhsilin İnkişafı Fondunun, Azərbaycan Mətbuat Şurasının və “Azərbaycan müəllimi” qəzetinin “Qızların təhsilinə dəstək” müsabiqəsinə təqdim olunur” qeydi olmalıdır.
Qeyd 2: Yazı materialının müəllifi kütləvi informasiya vasitəsində çalışmalıdır. Müsabiqə üçün təqdim ediləcək material müəllifin çalışdığı KİV-də yayımlanmalıdır.
Yazıların təqdim edilməsi
Müsabiqə üçün yazı materiallarının təqdimatı 2 yolla aparılır – şəxsən və elektron qaydada.
1. Yazılar şəxsən təqdim edilərkən təqdimat zərfində yer almalıdır:
müəllifin kütləvi informasiya vasitəsində işlədiyini təsdiqləyən sənədin surəti;
şəxsin şəxsiyyət vəsiqəsinin surəti;
şəxsin əlaqə vasitələri – ev, iş telefonu və mobil telefonu;
müsabiqə üçün verilmiş yazının dərc olunduğu qəzet və jurnalın 1 nüsxəsi,
materialın yazılı formada A4 formatlı kağız vərəqində 3 nüsxəsi (nüsxələrdə müəllifinin adı göstərilməməlidir);
diskdə materialın elektron forması (Times New Roman şriftində, müəllifin adı qeyd olunmaqla);
2. Yazılar elektron qaydada təqdim edilərkən aşağıdakılar nəzərə alınmalıdır. Təqdimat göndərişində yer almalıdır:
Müsabiqə yazısı (“Word” faylında, imzasız);
Müsabiqə yazısının dərc olunduğu qəzetin, jurnalın nüsxəsi (PDF, JPG, yaxud “Word” faylında);
Yazı elektron media resursunda yayımlanıbsa, bunu təsdiqləyən link və sair vasitələr;
Yazı materialının müəllifinin şəxsiyyət vəsiqəsi, iş vəsiqəsi və ya müəllifin KİV-də çalışdığını təsdiqləyən sənəd (PDF, JPG, yaxud “Word” faylında);
Yazı müəllifinin əlaqə vasitələri (PDF, JPG, yaxud “Word” faylında).
Müsabiqə üçün materiallar həm şəxsən, həm də elektron poçt vasitəsilə 7 iyun 2024-cü il tarixdən 5 iyul 2024-cü il tarixinədək saat 17.00-dək qəbul ediləcək.
Şəxsən qəbul həmin tarixlərdə həftənin iş günləri saat 11.00-dan 17.00-dək Bakı şəhəri, Məmməd Araz 4 ünvanında (əvvəlki Teymur Əliyev 38 ünvanı) – Azərbaycan Mətbuat Şurasında həyata keçiriləcək.
Elektron qaydada təqdimat zamanı sadalanan sənədlər və müsabiqə yazısı info@presscouncil.az elektron ünvanına göndərilməlidir.
Qeyd: Təqdimat prosesində müsabiqə şərtlərinin hər hansı birinin yerinə yetirilməməsi qaydaların pozulması kimi qiymətləndiriləcək və yazı qəbul edilməyəcək.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və ABŞ-nin “Coursera” şirkətinin birgə əməkdaşlığı ilə həyata keçirilən “4Sİ Akademiyası” layihəsinin istifadəçiləri “Coursera” platformasında aparıcı şirkətlərin təlim və kurslarına maraq göstərirlər.
Platforma isitfadəçiləri ən çox “DeepLearning.AI” şirkətinin kurslarından istifadə ediblər. Layihə başlayandan bu günə qədər 254 nəfər bu şirkətin təqdim etdiyi təlimləri uğurla bitirərək sertifikat əldə edib. Onlardan 231 istifadəçi şirkətin “Süni İntellekt hamı üçün” proqramını başa vurub.
“IBM” şirkətinin təklif etdiyi kursları isə 240 nəfər uğurla bitirib. Şirkətin “Data elmi nədir?” proqramı üzrə 91 istifadəçi sertifikat əldə edib.
“Coursera” platformasında təklif olunan kurslar üzrə “4Sİ Akademiyası” istifadəçiləri tərəfindən əldə olunan sertifikat sayına görə şirkətlərin TOP 5-liyi belədir:
“4Sİ Akademiyası” layihəsi çərçivəsində onlayn təhsil platforması olan “Coursera”da 4-cü sənaye inqilabı komponentləri, liderlik, kommunikasiya və ingilis dili bacarıqları da daxil olmaqla 40 nüfuzlu universitetin və aparıcı texnologiya şirkətlərinin 800-ə yaxın kursu təqdim olunur. Layihə başladığı tarixdən (15 sentyabr 2023-cü il) bu günə kimi 7000 nəfər ondan faydalana bilib.
3 iyun 2024-cü il tarixində Azərbaycan Dövlət Neft və Sənaye Universitetində “Women in Tech” təşkilatının Azərbaycan nümayəndəliyi və Təhsilin İnkişafı Fondunun birgə əməkdaşlığı çərçivəsində həyata keçirilən “Maya Hacıyeva adına İKT bacarıqları” təqaüd proqramının qalibləri ilə görüş keçirilib.
Açılış sözü ilə çıxış edən Azərbaycan Dövlət Neft və Sənaye Universitetinin prorektoru Qasım Məmmədov bu təşəbbüsü yüksək qiymətləndirərək, qaliblər arasında ADNSU-nun 7 tələbəsinin olma sevincini xüsusi vurğulayıb.
Təhsilin İnkişafı Fondunun İdarə Heyətinin sədr müavini Xanım Daşdəmirova qonaqları salamlayaraq layihənin başlıca məqsədinin qadınların İnformasiya Texnologiyaları və Yüksək Texnologiyalar üzrə bilik və bacarıqlarının artırılması və cəmiyyətdə müvafiq olaraq öz rollarını tuta bilmələri üçün onlara bu sahədə təqaüdlərin ayrılması olduğunu bildirib.
“Women in Tech” təşkilatının Azərbaycandakı nümayəndəliyinin təhsil proqramları üzrə tərəfdaşı Leyla Hacıyeva təqaüd proqramı barədə geniş təqdimatla çıxış edib. Layihəyə ümumilikdə 482 müraciətin daxil olduğunu vurğulayan L.Hacıyeva, müraciət ərizələrinə təşkilat komitəsi tərəfindən baxılaraq, uyğun namizədlərin (30 nəfər) təqaüd almaq imkanı qazandığını vurğulayıb.
Azərbaycan Respublikası Mərkəzi Bankının Fintech və İnnovasiyalar Departamentinin direktoru, eyni zamanda “Maya Hacıyeva adına İKT bacarıqları” təqaüd proqramının təşkilat komitəsinin üzvü Fidan Tofidi layihə təşkilatçılarına təşəkkürünü bildirərək gəncləri dövlət və özəl qurumları tərəfindən yaradılmış imkanlardan faydalanmağa səsləyib.
Qeyd edək ki, 30 nəfər qalibin 7-si işsiz, 8-i işləyən şəxs, 17 nəfər isə tələbə adını daşıyır.
7 nəfər Azərbaycan Dövlət Neft və Sənaye Universitetinin, 3 nəfər Azərbaycan Dövlət Pedaqoji Universitetinin, 2 nəfər Milli Aviasiya Akademiyasının, 1 nəfər Dövlət İdarəçilik Akademiyası, 1 nəfər isə Azərbaycan Dillər Universitetinin tələbəsidir.
Təhsilin İnkişafı Fondu və “NEQSOL Holding”in birgə əməkdaşlığı çərçivəsində həyata keçirilən “Parla” təqaüd və inkişaf proqramının iştirakçıları üçün xaricdə təhsil haqqında məlumat sessiyası təşkil olunub.
Tələbələrin şəxsi və peşəkar inkişaf fəaliyyətləri çərçivəsində Davamlı İnkişaf Mərkəzində baş tutan tədbirdə “Azərbaycan-Britaniya Məzunları” İctimai Birliyinin (AUKAA) İdarə Heyətinin üzvləri, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı”nın İdarəetmə Qrupunun (DPİQ) mütəxəssisi və xaricdə təhsil üzrə mütəxəssis spiker qismində çıxış ediblər.
Panel çıxışlar formatında təşkil olunan tədbirin əsas məqsədi tələbə qızları Birləşmiş Krallıq və digər ölkələrdə təhsil imkanları barədə məlumatlandırmaq olub. DPİQ-in mütəxəssisi Aygül İsmayılova xaricdə təhsil üzrə dövlət proqramına müraciət şərtləri, seçim mərhələləri və s. barədə geniş təqdimatla çıxış edib. AUKAA-nın İdarə Heyətinin sədri Sabir Məmmədov, sədr müavini Nərmin Bağırzadə və üzvü Aslan Mirzəyev Böyük Britaniyada həyat və təhsil, eləcə də xaricdə təhsillə bağlı öz təcrübələrini bölüşərək, üzləşdikləri çətinliklərdən bəhs ediblər. Xaricdə təhsil üzrə mütəxəssis Nigar Bayramlı isə xarici ölkələrdə təhsilə müraciət edən zaman tələbələrin diqqət yetirməli olduqları məqamları vurğulayıb. Çıxışların sonunda sual-cavab sessiyası təşlkil olunaraq tədbir iştirakçılarının sualları cavablandırılıb.
Xatırladaq ki, “Parla” təqaüd və inkişaf proqramının 50 uğurlu iştirakçısı müraciət edən 674 tələbə qız arasından ötən il seçilib. Seçim zamanı tələbə qızların təhsildə müvəffəqiyyətləri və iqtisadi vəziyyətləri nəzərə alınıb. Seçilmiş tələbələr aylıq təqaüd ödənişləri ilə təmin olunur. Bundan əlavə tələbə qızlara təcrübə proqramı, mentorluq, NEQSOL Akademiyası vasitəsilə dünyanın aparıcı universitetlərinin proqramlarına və LinkedIn öyrənmə vasitələrinə çıxış kimi kompleks proqramlar təklif edilir.
Təhsilin İnkişafı Fondu və Kiçik və Orta Biznesin İnkişafı Agentliyinin rəsmi tərəfdaşlığı, Kiçik və Orta Biznes Subyektləri və Klublarının Assosiasiyası və “Baku Design Academy”nin birgə təşkilatçılığı ilə “Yaşıl dünya naminə öyrənək” şüarı ilə “Baku EduEXPO 2024” Beynəlxalq təhsil sərgi-satış yarmarkasının açılış mərasimi keçirilib.
Kiçik və Orta Biznes Subyektləri və Klublarının Assosiasiyasının İdarə Heyətinin sədri Nigar Ələsgərova açılış nitqi ilə çıxış edib. Daha sonra çıxış edən Azərbaycan Respublikası Elm və Təhsil Nazirliyinin Aparat rəhbəri Mətin Kərimli, Təhsilin İnkişafı Fondunun İdarə Heyətinin sədri Elnur Nəsibov, Bakı Dövlət Universitetinin rektoru Elçin Babayev, Azərbaycan Texniki Universitetinin rektoru Vilayət Vəliyev, Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov və Kiçik və Orta Biznesin İnkişafı Agentliyinin İdarə Heyətinin sədrinin müavini Hikmət Məmmədov dövlət-özəl əməkdaşlığının önəmindən, vətəndaş cəmiyyətinin əməkdaşlığı ilə keçirilən layihələrin əhəmiyyətindən və cari layihənin müsbət təsirləri haqqında fikirlərini bölüşüblər.
Dövlət rəsmilərinin, Azərbaycan Dövlət Pedaqoji Universitetinin, Azərbaycan Dövlət Neft və Sənaye Universitetinin, Bakı Slavyan Universiteti və Bakı Ali Neft Məktəbinin rektorlarının qatıldığı sərginin ilk günündə 5000 çox ziyarətçi iştirak edib.
Sərgidə ali təhsil müəssisələri, yerli və beynəlxalq özəl məktəblər, xarici dil kursları və imtahan mərkəzləri, psixoloji xidmət göstərən mərkəzlər, xaricdə təhsil xidmətləri göstərən qurumlar, uşaq inkişaf mərkəzləri və bağçalar, təlim-tədris mərkəzləri və s. kimi təhsil sektoruna aid şirkətlər təmsil olunub. Sərgi-satış yarmarkası 25 may tarixində də davam edəcəkdir. Tədbirdə müxtəlif ekspertlərin çıxışları və konsert proqramının keçirilməsi nəzərdə tutulub.
Mayın 24-də 1000 nəfər yeni istifadəçi “4Sİ Akademiyası” çərçivəsində Coursera platformasında 6 həftəlik təlimlərə başlayır. Beləliklə layihə başladığı tarixdən (15 sentyabr 2023-cü il) bu günə kimi 7000 nəfər ondan faydalana bilib.
İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və ABŞ-nin “Coursera” şirkətinin birgə əməkdaşlığı ilə həyata keçirilən “4Sİ Akademiyası” layihəsi çərçivəsində onlayn təhsil platforması olan “Coursera”-da 4-cü sənaye inqilabı komponentləri olan süni intellekt, böyük verilənlər (Big Data), maşın öyrənməsi, blokçeyn və bulud texnologiyaları, həmçinin, liderlik, kommunikasiya və ingilis dili bacarıqları da daxil olmaqla 40 nüfuzlu universitetin və aparıcı texnologiya şirkətlərinin 800-ə yaxın kursu təqdim olunur.
“4Sİ Akademiyası”nın istifadəçiləri bu günə kimi 2500-ə yaxın kursu uğurla bitirərək Coursera platformasında sertifikatlar əldə ediblər. Bu günədək “4Sİ Akademiyası” çərçivəsində 4-cü Sənaye İnqilabına hazırlıq istiqaməti üzrə 2415 nəfər, Data Analitikası istiqaməti üzrə 5001 nəfər, Karyera və dil bilikləri üzrə 1528 nəfər, Şəxsi inkişaf üzrə kurslardan isə 1775 nəfər istifadə edib.
Bu ildən Coursera platformasında 2500-dən çox kursu süni intellekt əsaslı Azərbaycan dilində alt yazı ilə də izləmək mümkündür. Bu istifadəçilərin ana dilimizdə yeni biliklər əldə etməsini xeyli asanlaşdıracaq.
Hazırda 4SİM, TİF və Coursera şirkəti bu layihənin Milli Proqram şəklində davam etdirilməsi istiqamətində işlər görür. Milli Proqram çərçivəsində 200000 vətəndaş ödənişsiz olaraq Coursera platformasında öz bilik və bacarıqlarını inkişaf etdirə biləcək.
“Parla” təqaüd və inkişaf proqramının iştirakçıları üçün “Ünsiyyət bacarıqları” mövzusunda təlim keçirilib.
“NEQSOL Holding”in Korporativ kommunikasiya üzrə meneceri Əli Verdiyev tərəfindən keçirilən təlim zamanı əsas diqqət ünsiyyət bacarıqlarının yaxşılaşdırılması, o cümlədən emosional intellektin, liderliyin və effektiv ünsiyyət üsullarının bəzi aspektlərinə yönəlib.
Təlim tələbə qızlar tərəfindən çox böyük maraqla qarşılanıb, belə ki, tələbə qızların əksəriyyəti diqqətin yumşaq bacarıqlara yönəlməsini vacib hesab ediblər. “Bu sessiyada emosional intellekt və liderliklə bağlı əldə etdiyimiz məlumat və biliklər bizə öz təhsilimizdə və peşəkar həyatımızda məqsədlərə nail olmağa çox kömək edəcək”, deyə tələbə qızlardan biri vurğulayıb.
“Parla” təqaüd və inkişaf proqramı çərçivəsində tələbə qızlara təqaüdlə yanaşı, onların inkişaf etdirilməsi üçün mentorluq və təcrübə keçmə imkanları, habelə NEQSOL Akademiyası vasitəsilə beynəlxalq təhsil resurslarına, o cümlədən “Enocta Premium Catalogue”, “Skillsoft” və ADA Universitetinin kurslarına çıxış təmin edilir. Onlayn kurslarla yanaşı “Parla” proqramının iştirakçıları “Roof Academic Training” ilə birlikdə artıq ingilis dili və IELTS dərslərinə başlayıb.
Xatırladaq ki, “Parla” təqaüd və inkişaf proqramı Təhsilin İnkişafı Fondu və “NEQSOL Holding”in birgə əməkdaşlığı çərçivəsində həyata keçirilir. Proqrama tərəflərin birgə müəyyən etdiyi meyarlar əsasında 674 namizəd arasından 50 uğurlu iştirakçı seçilib.
Bakı Mühəndislik Universitetində (BMU) “CareerFest BEU 2024” adlı karyera festivalı təşkil olunub. Azərbaycanın bütün ali təhsil ocaqlarının tələbə və məzunları üçün açıq olan festivalda 104 nüfuzlu şirkət tərəfindən 1000-dən artıq aktiv vakansiya və təcrübə proqramları təqdim edilib. Tədbirdə Təhsilin İnkişafı Fondunun, Dövlət Məşğulluq Agentliyinin, Təhsil Tələbə Krediti Fondunun və digər qurumların rəhbər şəxsləri iştirak ediblər.
Festivalın açılışında çıxış edən BMU-nun rektoru Yaqub Piriyev dövlətin gənclərin məşğulluğunun təminatı istiqamətində həyata keçirdiyi mühüm tədbirlərə diqqət çəkib və Prezident İlham Əliyev tərəfindən bu məqsədlə təsdiq olunmuş dövlət proqramlarının uğurla gerçəkləşdirildiyini bildirib. Karyera festivalının tələbə və məzunlar üçün önəmini vurğulayan rektor belə tədbirlərin həm mövcud əmək bazarındakı tələbat barədə məlumat əldə etmək, həm də iş, təcrübə imkanları, müxtəlif şirkətlərin insan resursları üzrə mütəxəssisləri ilə birbaşa ünsiyyət qurmaq baxımından mühüm rol oynadığını söyləyib.
Təhsilin İnkişafı Fondunun İdarə Heyətinin sədri Elnur Nəsibov təhsil müəssisəsinin uğurunun əsas göstəricilərindən birinin əmək bazarında onun məzunlarına olan tələbatlılıq səviyyəsi ilə ölçüldüyünü bildirib. O, bugünkü karyera festivalına çoxsaylı işəgötürənin qatıldığını və bunun BMU-da verilən ali təhsilin yüksək qiymətləndirilməsinin göstəricisi olduğunu fikirlərinə əlavə edib. Fondun tələbələrin uğurlu karyera qurması və digər istiqamətlərdə həyata keçirdiyi müxtəlif layihələri nəzərə çatdıran Elnur Nəsibov sahibkarlarla ali təhsil müəssisələri arasında əlaqələrin daha da gücləndirilməsinin vacib olduğunu deyib.
Dövlət Məşğulluq Agentliyinin İdarə Heyətinin sədri Mustafa Abbasbəyli təmsil etdiyi qurumun il ərzində əhalinin məşğulluğunun təmin edilməsi istiqamətində gördüyü çoxşaxəli tədbirlər barədə məlumat verib. Bu gün əmək bazarında çox ciddi transformasiyaların baş verdiyini, yanaşmaların dəyişdiyini deyən Mustafa Abbasbəyli tələbə və məzunlara bu dəyişikliklərə uyğunlaşmaqla bağlı tövsiyələrini çatdırıb.
Sonra festivalda Kiçik və Orta Biznes Subyektləri və Klublarının Assosiasiyasının sədri Nigar Ələsgərova, Azərbaycan Korporativ İş Adamları Birliyi idarə heyətinin sədri Şirin Şərifov, “Norm ASC”-nin insan resursları üzrə kordinatoru Ruslan Osmanlı çıxış ediblər. Çıxışlarda işəgötürənlərlə birbaşa ünsiyyətin qurulmasına əlverişli imkanlar yaradan karyera festivalının rolundan, həmçinin ali təhsil ocaqları ilə sənaye müəssisələri arasında əməkdaşlığın genişləndirilməsinin əhəmiyyətindən danışılıb.
Digər universitetlərdən 2500-dən artıq məzun və tələbənin qeydiyyatdan keçdiyi, ümumilikdə 5000-ə yaxın iştirakçının qatıldığı karyera festivalı çərçivəsində interaktiv fəaliyyətlər, oyunlar, əyləncəli təcrübələr təşkil olunub, tanınmış müğənnilərin ifasında musiqi nömrələri tədqim edilib.
Təhsilin İnkişafı Fondu və STP Şirkətlər Qrupunun birgə əməkdaşlığı çərçivəsində həyata keçirilən “Zərif mühəndislər” xanımların inkişafı proqramının qaliblərinin adları açıqlandı.
Layihəyə ümumilikdə 573 müraciət daxil olub. 105 nəfərin müraciət ərizəsi təşkilat komitəsi tərəfindən baxıldıqdan sonra, müsahibə mərhələsinə vəsiqə qazanıb. Həmin mərhələni uğurla yekunlaşdıran 50 nəfər isə “Zərif mühəndislər” təqaüd proqramının qalıbi olub.
“Zərif mühəndislər” xanımların inkişafı proqramının başlıca məqsədi yüksək akademik göstəricilərə malik, texniki sahələr üzrə fərqli ixtisaslarda təhsil alan tələbə qızların təhsilinə, onların peşəkar mütəxəssis kimi yetişdirilməsinə dəstək göstərməkdir.
Layihə çərçivəsində qalib gələn 50 nəfər qız tədris ilinin sonuna qədər STP Şirkətlər Qrupunun xüsusi təqaüdünü almaq imkanını əldə edəcəklər. Təqaüdlə yanaşı, qızlara mentorluq, təcrübə və təlimlər təşkil olunacaqdır.
Namizədlərin seçimi onlayn müraciət, qiymətləndirmə və müsahibə mərhələsindən ibarət olub. Seçim zamanı akademik göstəricilər və motivasiya məktubu nəzərə alınıb. Yekun seçimdə müsahibə mərhələsində göstərilən nəticə əsas götürülüb. Müsahibə zamanı namizədlərə hədəfləri, sosial vəziyyəti, fəaliyyəti, tələbə həyatı ilə bağlı suallar verilib.
