Category: Xəbərlər

Naxçıvan Müəllimlər İnstitutu (NMİ) ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Müqaviləni NMİ-nin rektoru Azad Novruzov və TİF-in İdarə Heyətinin sədri Elnur Nəsibov imzalayıblar.

İmzalanma mərasimində NMİ, TİF, Kapital Bankın əməkdaşları, təhsilin müxtəlif pillələrindən tələbələr və media nümayəndələri iştirak edib.

Açılış nitqi ilə çıxış edən rektor Azad Novruzov ölkəmizdə aparılan təhsil siyasəti haqqında danışaraq bildirib ki, inkişaf etmiş ölkələrdə istifadə olunan bu təcrübənin birgə layihə əsasında ölkəmizdə, eyni zamanda Naxçıvan Müəllimlər İnstitutunda tətbiqi təqdirəlayiq addımdır və bu imzalanan əməkdaşlıq müqaviləsi gənclər üçün daha geniş imkanlara hədəflənib.

Təhsilin İnkişafı Fondunun İdarə Heyətinin sədri Elnur Nəsibov Fondun əsas missiyalarından, təhsilin bütün pillələrinə şamil olunan “TələbəPlus” layihəsinin məqsədlərindən, layihə çərçivəsində görülən işlərdən, tələbələr üçün mövcud güzəştlərdən danışıb. Vurğulayıb ki, kart vasitəsilə tələbələr layihə tərəfdaşlarının təqdim etdiyi xüsusi keşbek, endirim, promokodlardan yararlana biləcəklər. Bu imkanlar restoran, kafe, kitab, geyim, dəftərxana ləvazimatları mağazası, tibb müəssisəsi və s. məkanlarda mövcud olacaq. Həmçinin yerli və xarici şirkətlərlə müqavilələrin imzalanması və tələbələr üçün xüsusi güzəştlərin əldə olunması istiqamətində addımlar atılır.

Görüşün sonunda Təhsilin İnkişafı Fondunun fəaliyyətinə və həyata keçirdiyi layihələrin təqdimatına həsr edilmiş videoçarx nümayiş etdirilib.

Qeyd edək ki, “TələbəPlus” kartı eyni anda bir neçə funksiyanı yerinə yetirəcək. Həm universitetə giriş-çıxışı təmin edəcək, həm debet bank kartı kimi fəaliyyət göstərəcək, həm də tələbələrin təqaüd kartı olacaq. Tələbələr bütün bank əməliyyatlarını bu kart vasitəsilə rahat şəkildə yerinə yetirə biləcəklər.

Həmçinin tələbələrin işini mümkün olduğu qədər asanlaşdırmaq məqsədilə, BirBank mobil tətbiqində “TələbəPlus” bölməsi yaradılacaq ki, orada bütün endirimlər haqqında məlumat və proqrama qoşulan şirkətlərin siyahısı yer alacaq.

Təhsilin İnkişafı Fondu və Təhsildə Keyfiyyət Təminatı Agentliyi İdarə Heyətlərinin Naxçıvan Dövlət Universitetində müəllim və tələbələrlə görüşü keçirilib.

Naxçıvan Dövlət Universitetinin rektoru Elbrus İsayev ali təhsil ocağında təhsilin keyfiyyətinin inkişafı istiqamətində görülən işləri qonaqların diqqətinə çatdırıb. Bildirilib ki, universitetin əsas prinsipi ali təhsil ocağını dünyanın qabaqcıl təhsil sistemlərinə inteqrasiya edərək Azərbaycan ali təhsil məkanında lider bir quruma çevirmək, tədqiqat potensialını artıraraq universitetin əmək bazarı və sənaye ilə əlaqələrini gücləndirmək eyni zamanda tədqiqatyönümlü tədris mədəniyyəti formalaşdıraraq tələbələr və əməkdaşlar arasında demokratik prinsipləri izləmək və vətəndaş məsuliyyətini inkişaf etdirməkdir. Vurğulanıb ki, NDU özünüqiymətləndirmə və təkmilləşdirmə istiqamətinə sadiq qalaraq çoxşaxəli fəaliyyətini uğurla davam etdirir.

Tədbirin gedişatında Təhsilin İnkişafı Fondunun fəaliyyətinə dair videoçarx izlənilib.

Təhsilin İnkişafı Fondunun İdarə Heyətinin sədri Elnur Nəsibov Fond tərəfindən həyata keçirilən layihələr haqqında məlumat verib. Qeyd olunub ki, Fondun əsas missiyası Azərbaycan Respublikasında təhsil sisteminin inkişafına yönəlmiş proqram və layihələrin dəstəklənməsi və dövlət təhsil müəssisələrinin maddi-texniki bazasının müasir tələblərə uyğunlaşdırılması yolu ilə təhsilin dayanıqlı inkişafına nail olmaqdır. Bu istiqamətdə NDU-nun fəaliyyətini yüksək qiymətləndirən Elnur Nəsibov “TələbəPlus” və “IELTS imtahanına təşviq” layihələrinin önəmindən də bəhs edib. Diqqətə çatdırılıb ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Təhsilin İnkişafı Fondunun öz tərəfdaşları ilə birlikdə 250-dən çox şirkətlə razılaşma əldə edilib.

Təhsildə Keyfiyyət Təminatı Agentliyinin İdarə Heyətinin sədri Tural Əhmədov agentliyin fəaliyyət istiqamətini tədbir iştirakçılarının nəzərinə çatdırıb. Bildirilib ki, agentlik təhsil müəssisələrinin akkreditasiyasının həyata keçirilməsi üçün tövsiyələrin hazırlanması və təlimlərin təşkili, təhsil müəssisələrində daxili keyfiyyət təminatı sistemlərinin qurulması və inkişaf etdirilməsi ilə bağlı məsləhət və metodiki dəstəyin təşkil edilməsi və bir çox sahələrdə xidmət göstərir. 

Görüşün yekununda “TələbəPlus” və “IELTS imtahanına təşviq” layihələri çərçivəsində ikitərəfli və üçtərəfli birgə əməkdaşlıq müqavilələri imzalanıb.

29 oktyabr 2024-cü il tarixində Naxçıvan Muxtar Respublikası Təhsil Nazirliyində Təhsilin İnkişafı Fondunun və Təhsildə Keyfiyyət Təminatı Agentliyinin nümayəndələri ilə görüş keçirilib.  

Görüşdə Naxçıvan Muxtar Respublikası təhsil naziri Elxan Nəcəfov, Təhsilin İnkişafı Fondunun İdarə Heyətinin sədri Elnur Nəsibov, Təhsildə Keyfiyyət Təminatı Agentliyinin İdarə Heyətinin sədri Tural Əhmədov və hər üç qurumun təmsilçiləri iştirak edib.

Naxçıvan Muxtar Respublikasının təhsil naziri Elxan Nəcəfov Ölkə başçısının Sərəncamı ilə təsdiqlənən “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda təhsil sahəsində nəzərdə tutulan və son dövrlərdə proqrama uyğun  həyata keçirilən məqsədyönlü tədbirlərdən danışıb. Qeyd olunub ki, Elm və Təhsil Nazirliyi ilə  birgə ölkə üzrə mərkəzləşmiş qaydada Müəllimlərin Sertifikasiya prosesi və Müəllimlərin İşə Qəbul Müsabiqəsi, həmçinin direktorların işə qəbul və digər  müsabiqələr keçirilib, məktəbəqədər təhsil müəssisələrində uşaqların qeydiyyatı elektron sistem üzərindən ölkə üzrə mərkəzləşmiş qaydada həyata keçirilib, Elm və Təhsil Nazirliyinin 12-ə yaxın elektron resursuna qoşulub. Bildirilib ki, Təhsilin İnkişafı Fondu və Təhsildə Keyfiyyət Təminatı Agentliyi ilə keçirilən görüşün  məqsədi hər iki qurumla əməkdaşlığı genişləndirməkdir.

Təhsilin İnkişafı Fondunun İdarə Heyətinin sədri Elnur Nəsibov, Təhsildə Keyfiyyət Təminatı Agentliyinin İdarə Heyətinin sədri Tural Əhmədov təmsil etdikləri qurumlarının fəaliyyəti və əməkdaşlıq perspektivlərindən danışıblar.

Görüşdə hər iki qurumla əməkdaşlığın genişləndirilməsi, naxçıvanlı şagirdlərin olimpiada  nailiyyətlərinin artırılması, ali təhsil müəssisələrində ingilis dili müəllimlərinin bilik və bacarıqlarının artırılması, IELTS imtahanının təşkili, məktəblərdə peşətəmayüllü siniflərin formalaşdırılması, peşə təhsili müəssisələrində və ümumtəhsil məktəblərində birgə monitorinqlərin təşkili, dövlət qulluqçularının peşə hazırlığının yüksəldilməsi və digər məsələlərlə bağlı müzakirələr aparılıb.

Sonra qonaqlar Azərbaycan Respublikası Elm və Təhsil Nazirliyi ilə Çin Xalq Respublikasının ticarət nazirliyi arasında imzalanmış “Naxçıvan Muxtar Respublikasına İnteraktiv Təhsil Yardımı” layihəsi çərçivəsində yaradılan data mərkəzi və “Telekonfrans” otağı ilə tanış olublar.

Daha sonra Heydər Əliyev muzeyində olan qonaqlar dahi şəxsiyyətin həyatı və siyasi fəaliyyətini əks etdirən eksponatlarla da tanış olublar.

Oktyabrın 28-də elm və təhsil naziri Emin Əmrullayev “Maarifçi” tələbə-məzun təcrübə proqramının ikinci mərhələsinin iştirakçıları ilə görüşüb.    

“Maarifçi”ləri salamlayan elm və təhsil naziri Emin Əmrullayev proqramın gənclərə böyük təcrübə qazanmaq imkanı yaratdığını deyib və bu təşəbbüsün mahiyyəti haqqında danışıb. Emin Əmrullayev bildirib ki, proqram iştirakçıları hazırda nazirliyin müxtəlif struktur bölmələrində təcrübə keçməklə iş prosesi ilə tanış olurlar və bu da onların peşəkar kadr kimi formalaşmalarında mühüm rol oynayır.  

Elm və təhsil naziri həmçinin iştirakçılardan gözləntilər və yaxşı mütəxəssis olmaq üçün vacib şərtlər barədə danışıb. 

Görüşdə “Maarifçi”lər gənclərə belə bir fürsət yaradıldığı üçün təşəkkürlərini ifadə ediblər və proqramın üstünlüklərini vurğulayıblar. 

Tədbirdə iştirakçıları maraqlandıran suallar da cavablandırılıb. 

Qeyd edək ki, 37 nəfər “Maarifçi” tələbə-məzun təcrübə proqramının II mərhələsində iştirak hüququ qazanıb. 3 ay davam edəcək proqram çərçivəsində iştirakçılar Elm və Təhsil Nazirliyi, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçəcəklər. 

Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilən proqramın məqsədi tələbə və məzunlara nəzəri biliklərini real iş mühitində tətbiq etmək və təcrübə imkanı yaratmaq, iştirakçıların bilik və bacarıqlarını artırmaq, eləcə də gənclərə peşəkar vərdişlər qazandırmaqdır.

Təhsilin İnkişafı Fondu və “STP Şirkətlər Qrupu”nun birgə əməkdaşlığı çərçivəsində həyata keçirilən “Zərif Mühəndislər” təqaüd proqramının iştirakçıları üçün “İqlim dəyişikliyi və Azərbaycan” mövzusunda məlumat sessiyası təşkil olunub.

Ətraf mühit üzrə ekspert Tural Məhərrəmov tərəfindən keçirilən təlim zamanı əsas diqqət iqlim dəyişikliyi və Azərbaycanda bu sahədə görülən işlərə yönəlib . Belə ki, təlim zamanı iqlim dəyişikliyinə təsir edən əsas səbəblər, istilik effekti yaradan qazlar və onların törətdiyi fəsadlar haqqında məlumat verilib, eləcə də bu təsirlərin aradan qaldırılması mövzusunda fikir mübadiləsi aparılıb.

Fərdi “Karbon ayaq izi”nin hesablanması üzrə nümunələr göstərən ekspert həmçinin “Dayanıqlı İnkişaf Məqsədləri”nin önəmi və bu məqsədlərə çatmaq üçün görülməsi vacib olan tədbirlər üzrə beynəlxalq praktikalar haqqında ətraflı danışıb.

Təlim tələbə qızlar tərəfindən çox böyük maraqla qarşılanıb.  Sessiyanın sonunda iştirakçılar ilə interaktiv fəaəliyyətlər keçirilib, onları maraqlandıran suallar cavablandırılıb. 

Oktyabrın 24-ü Azərbaycan Dövlət Mədəniyyət və İncəsənət Universiteti (ADMİU) ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Müqavilə universitetin rektoru professor Ceyran Mahmudova və TİF-in İdarə Heyətinin sədri Elnur Nəsibov tərəfindən imzalanıb.

İmzalanma mərasimində qonaqları salamlayan rektor C.Mahmudova təhsil sahəsindəki son nailiyyətlər və gələcək inkişaf planları barədə söhbət açıb. Rektor qeyd edib ki, insan ömrünün ən yaddaqalan dövrlərindən biri olan tələbəlik illərinin daha yaxşı keçirilməsi, tələbələrin rifahının nisbətən yaxşılaşdırılması baxımından onlar üçün bir sıra güzəştlər nəzərdə tutan “TələbəPlus” layihəsi son dərəcə ümidverici və sevindiricidir.

Təhsilin İnkişafı Fondunun İdarə Heyətinin sədri Elnur Nəsibov bildirib ki, Fondun əsas missiyası təhsilin dayanıqlı inkişafına nail olmaq, dövlətin təhsil siyasətinin təmin edilməsində yaxından iştirak etməkdir. Təhsilin İnkişafı Fondunun həyata keçirdiyi “TələbəPlus” layihəsi tələbələrin eyni güzəşt və endirimlərdən faydalanmalarını təmin etmək, onların sosial həyatına dəstək göstərmək məqsədi daşıyır.

Elnur Nəsibov qeyd edib ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Təhsilin İnkişafı Fondunun öz tərəfdaşları ilə birlikdə 250-dən çox şirkətlə razılaşma əldə edilib. Bundan başqa, Mədəniyyət Nazirliyi ilə müəyyən istiqamətlərdə tələbələr üçün xüsusi güzəştlər nəzərdə tutulur. Gələcəkdə “TələbəPlus” kartının ali təhsil müəssisələri ilə yanaşı, kollec və peşə təhsili müəssisələrində oxuyan tələbələrə də mərhələli şəkildə verilməsi nəzərdə tutulur.

Daha sonra Təhsilin İnkişafı Fondunun əməkdaşları ilə ADMİU-nun tələbələrinin görüşü baş tutub. Görüşdə E.Nəsibov tələbələrə Fondun həyata keçirdiyi layihələrlə bağlı ətraflı məlumat verib. Görüşün davamında tələbələrin sualları cavablandırılıb, təklifləri qeydə alınıb.

Sonda ADMİU-dan IELTS imtahanında iştirak edən və yüksək bal toplayaraq bu imtahan üzrə ödənişləri Təhsilin İnkişafı Fondu tərəfindən qarşılanan iki nəfərə sertifikatlar təqdim olunub.

“Universitetlərin elmi-pedaqoji heyət üzvləri və təhsilalanların IELTS imtahanına təşviq edilməsi haqqında” layihəsi çərçivəsində 9 ali təhsil müəssisəsindən ümumilikdə 420-dən çox tələbə və təhsilverənlərin yararlandığını diqqətə çatdırıb.

23 oktyabr 2024-cü il tarixində Nazim İsmayılov adına 80 nömrəli tam orta məktəbdə 8, 9, 10, 11-ci sinif şagird qızlar üçün  “Bəxtini özü yazan qadınlar” layihəsi həyata keçirildi.

Görüşün qonaqları Azərbaycan Respublikası Elm və Təhsil Nazirliyi nəzdində De-institutlaşma və Uşaqların Müdafiəsi İdarəsinin rəis müavini Günel Səfərova, Təhsilin İnkişafı Fondunun Layihələrin idarə olunması şöbəsinin baş mütəxəssisi Aysel Məhərrəmova və Kiçik və Orta Biznes Subyektləri və Klublarının Assosiasiyasının İdarə Heyətinin sədri Nigar Ələsgərova oldu.

Qonaqlar motivasiya çıxışları edərək məktəbli qızlarla öz təcrübələrini və tövsiyələrini bölüşüblər. Şagirdlərə doğru peşə və ixtisas seçiminin edilməsi, universitetə qəbul olduqdan sonra fəal tələbəlik həyatının olması üçün tövsiyələr verilib, uğur qazanmaq üçün disiplinli olmağın önəmi vurğulanıb.

“Bəxtini özü yazan qadınlar” layihəsi məktəbli qızların gələcək həyatına, seçimlərinə dəstək olmaq, gələcəyin ziyalı xanımlarınının formalaşdırılmasına dəstək məqsədilə həyata keçirilir.

Sözügedən layihə Nazim İsmayılov adına 80 nömrəli tam orta məktəbinin tarix müəllimi Afət Nəbiyevanın təşəbbüsü ilə həyata keçirilib.

Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilən 2-ci “Maarifçi” tələbə-məzun təcrübə proqramının iştirakçıları ilə görüş keçirilib.

Görüşdə Azərbaycan Texniki Universitetinin rektoru Vilayət Vəliyev, Təhsilin İnkişafı Fondunun İdarə Heyətinin sədri Elnur Nəsibov, Elm və Təhsil Nazirliyinin İnsan resursları şöbəsinin müdiri Çapay Məmmədov, nazirliyin və fondun nümayəndələri iştirak edib.

Azərbaycan Texniki Universitetinin rektoru Vilayət Vəliyev tələbə və məzunları salamlayaraq, bu kimi proqramların gənclərlə ünsiyyət, onların dövlət qurumlarının fəaliyyəti barədə məlumatlandırılması baxımından faydalılığını bildirib.

Təhsilin İnkişafı Fondunun İdarə Heyətinin sədri Elnur Nəsibov proqramın mahiyyəti barəsində məlumat verib. Sədr “Maarifçi” tələbə-məzun təcrübə proqramının gənc kadrların hazırlanması baxımından faydalı olduğunu vurğulayaraq proqram iştirakçılarına uğurlar arzulayıb.

Elm və Təhsil Nazirliyinin İnsan resursları şöbəsinin müdiri Çapay Məmmədov proqrama qəbul edilən namizədləri təbrik edərək onları fəal olmağa dəvət edib, uğurlar arzu edib.

Görüşün davamında Təhsilin İnkişafı Fondunun Layihələrin idarə olunması şöbəsinin müdiri Rəsul Həşimov Fondun fəaliyyətini əks etdirən geniş təqdimatla çıxış edib.

Daha sonra I “Maarifçi” tələbə-məzun təcrübə proqramının iştirakçısı Səbinə Hüseynova öz təəssüratlarını bölüşərək, yeni iştirakçılara uğurlar arzulayıb.

Yekunda gənclərlə qarşılıqlı fikir mübadiləsi aparılıb, proqramla bağlı onları maraqlandıran suallar cavablandırılıb.

Qeyd edək ki, “Maarifçi” tələbə-məzun təcrübə proqramına II mərhələdə 37 nəfər təcrübəçi seçilib.

3 ay davam edəcək proqram çərçivəsində seçilmiş iştirakçılar Elm və Təhsil Nazirliyi, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçəcəklər. İştirakçılar onlar üçün təşkil olunan təlimlərdən yararlanacaq və sosial bacarıqlarını inkişaf etdirəcəklər.

Proqramın məqsədi tələbə və məzunlara təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmək və gənclərə peşəkar vərdişlər qazandırmaqdır.

Azərbaycan Rəssamlıq Akademiyası ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Müqavilə akademiyanın rektoru Xalq rəssamı, professor Natiq Əliyev və TİF-in İdarə Heyətinin sədri Elnur Nəsibov tərəfindən imzalanıb.

İmzalanma mərasimində çıxış edən rektor Natiq Əliyev təhsil sahəsindəki son nailiyyətlər və gələcək inkişaf planları barədə söhbət açıb. Rektor qeyd edib ki, Azərbaycan Rəssamlıq Akademiyası son illərdə tədris prosesində və mədəni sahədə böyük uğurlara imza atır, bu uğurlar tələbələrimizin inkişafına və yaradıcılıqlarının daha da təşviqinə xidmət edir. Sonuncu böyük addımlardan biri, COP 29 çərçivəsində keçirilən “Yaşıl Dünya Naminə Həmrəylik” adlı sərgi oldu. Sərgidə tələbələrimizin yüksək səviyyədə rəngkarlıq işləri nümayiş olundu və bu sərgi tələbələrə böyük ruh verməklə yanaşı, akademiyanın sənət təhsili sahəsində də nə qədər irəlilədiyinin göstəricisi oldu.

Tədbirdə çıxış edən Təhsilin İnkişafı Fondunun İdarə Heyətinin sədri Elnur Nəsibov bildirib ki, Fondun əsas missiyası təhsilin dayanıqlı inkişafına nail olmaq, dövlətin təhsil siyasətinin təmin edilməsində yaxından iştirak etməkdir. Təhsilin İnkişafı Fondunun həyata keçirdiyi “TələbəPlus” layihəsi tələbələrin eyni güzəşt və endirimlərdən faydalanmalarını təmin etmək, onların sosial həyatına dəstək göstərmək məqsədi daşıyır.

Elnur Nəsibov qeyd edib ki, “TələbəPlus” layihəsi çərçivəsində müxtəlif alış-veriş və iaşə obyektlərində tələbələrin güzəştlər əldə etməsi üçün Təhsilin İnkişafı Fondunun öz tərəfdaşları ilə birlikdə 250-dən çox şirkətlə razılaşma əldə edilib. Bundan başqa, Mədəniyyət Nazirliyi ilə müəyyən istiqamətlərdə tələbələr üçün xüsusi güzəştlər nəzərdə tutulur. Hazırda ictimai nəqliyyatda da güzəştlərin tətbiq edilməsi ilə bağlı müzakirələr aparılır. “TələbəPlus” layihəsi çərçivəsində ilkin olaraq 150 min tələbə kartının istifadəyə verilməsi planlaşdırılır. Tələbələrin sosial və akademik həyatında yenilik yaratmağa yönələn “TələbəPlus” kartlarının oktyabr ayının sonundan ilkin istifadəyə verilməsi nəzərdə tutulur. Gələcəkdə “TələbəPlus” kartının ali təhsil müəssisələri ilə yanaşı, kollec və peşə təhsili müəssisələrində oxuyan tələbələrə də mərhələli şəkildə verilməsi nəzərdə tutulur.