Azərbaycan Texnologiya Universiteti “TələbəPlus” layihəsinə qoşuldu

Azərbaycan Texnologiya Universiteti (ATU) ilə Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb.

Bu məqsədlə baş tutan görüşdə ATU və TİF-in rəhbərliyi, Kapital Bankın nümayəndələri, professor-müəllim heyəti və tələbələr iştirak edib.

Görüş zamanı ATU-nun rektoru Yaşar Ömərov vahid tələbə kartlarının istifadəyə verilməsinin təhsil sahəsində mühüm yeniliklərdən olduğunu bildirib və bu yeniliyin tələbələrin akademik və sosial imkanlarını genişləndirəcəyinə əminlik ifadə edib.

TİF-in İdarə Heyətinin sədri Elnur Nəsibov Yaşar Ömərovu Azərbaycan Respublikasının Prezidenti Cənab İlham Əliyevin Sərəncamı ilə Azərbaycan Texnologiya Universitetinin rektoru təyin edilməsi münasibətilə təbrik edib, daha sonra layihənin əhəmiyyətindən danışaraq bütün ölkə üzrə tələbələrin eyni güzəşt və endirimlərdən yararlanmalarını təmin etmək, eyni zamanda onların sosial həyatlarına dəstək göstərmək məqsədi daşıdığını bildirib.

Görüşdə qeyd olunub ki, TİF-in alış-veriş mərkəzlərində və tələbələrin ən çox istifadə etdiyi müxtəlif iaşə obyektlərində tələbələrə özəl güzəştlər edilməsi üçün TİF öz tərəfdaşları ilə birlikdə 200-dən artıq şirkətlə razılaşma əldə edib. Bundan əlavə, Mədəniyyət Nazirliyi ilə əldə olunan ilkin razılaşmaya əsasən, muzeylər, qalereyalar və sərgi salonlarında tələbələr üçün xüsusi güzəştlər nəzərdə tutulur.

Müzakirələrdən sonra ATUnun rektoru Yaşar Ömərovla TİF-in İdarə Heyətinin sədri Elnur Nəsibov “TələbəPlus” layihəsi çərçivəsində əməkdaşlıq müqaviləsinə imza atıblar.

Qeyd edək ki, TİF-in Kapital Bank və “Visa” beynəlxalq ödəmə texnologiyaları şirkəti ilə əməkdaşlığı çərçivəsində həyata keçirilən “TələbəPlus” layihəsi vahid tələbə kartlarının tətbiq edilməsini nəzərdə tutur. Layihə çərçivəsində ilkin olaraq yeni tədris ilindən 150 min tələbə kartının istifadəyə verilməsi planlaşdırılır.

“Məktəblərə kitab ianəsi” layihəsi çərçivəsində növbəti görüş Şəmkir rayonunda keçirilib

5 dekabr 2024-cü il tarixində Şəmkir şəhər Fərman Salmanov adına tam orta məktəbdə Qazax-Tovuz Regional Təhsil İdarəsinin tabeliyində fəaliyyət göstərən ümumi təhsil müəssisələrinin şagirdləri və müəllimləri ilə görüş baş tutub.

Görüşün əsas məqsədi Təhsilin İnkişafı Fondu ilə “Inci Group of Companies” şirkətinin birgə həyata keçirdiyi “Məktəblərə kitab ianəsi” layihəsi çərçivəsində Qazax-Tovuz Regional Təhsil İdarəsinə kitabların təhvil verilməsi olub.

Tədbirdə Təhsilin İnkişafı Fondunun İdarə Heyətinin sədri Elnur Nəsibov, Qazax-Tovuz Regional Təhsil İdarəsinin müdiri Anar Məcidov, “Inci Group of Companies” şirkətinin təsisçisi Mikayıl Yusifov, eləcə də müxtəlif məktəblərin direktor, müəllim və şagirdləri iştirak ediblər.

Qazax-Tovuz Regional Təhsil İdarəsinin müdiri Anar Məcidov tədbirin təşkilatçılarına təşəkkür edib. O, layihənin region məktəblərində mütaliə mədəniyyətinin yüksəldilməsinə və tədris keyfiyyətinin artırılmasına göstərdiyi töhfədən danışıb. Anar Nəcəfov bü cür təşəbbüslərin gələcək nəsillərin maariflənməsi baxımından böyük əhəmiyyət kəsb etdiyini bildirib.

Təhsilin İnkişafı Fondunun İdarə Heyətinin sədri Elnur Nəsibov çıxışında Fondun fəaliyyət istiqamətləri və məqsədlərindən bəhs edib. Fondun dövlət-özəl tərəfdaşlığını təşviq etdiyini bildirən sədr, “Məktəblərə kitab ianəsi” layihəsinin şagirdlərin dünyagörüşünü artırmaq və mütaliə vərdişlərini inkişaf etdirmək üçün əhəmiyyətli olduğunu qeyd edib. Çıxışının sonunda Elnur Nəsibov tədbirdə iştirak edən şagird və müəllimlərlə fikir mübadiləsi aparıb, onları maraqlandıran sualları cavablandırıb.

“Inci Group of Companies” şirkətinin təsisçisi Mikayıl Yusifov layihənin bir parçası olmaqdan qürur duyduğunu ifadə edib. O, bu təşəbbüsün yalnız kitabların ianəsi ilə məhdudlaşmadığını, həm də şagirdlərin intellektual inkişafına dəstək verdiyini bildirib. Tədbir zamanı şagirdlər arasında viktorina təşkil olunub. Doğru cavab verən şagirdlərə əlavə kitablar və həvəsləndirici hədiyyələr təqdim edilib.

Fərman Salmanov adına tam orta məktəbin direktoru Alidə Hüseynova çıxışında təmsil etdiyi məktəbin uğurlarından danışıb. O qeyd edib ki, məktəbin şagirdləri ali təhsil müəssisələrinə qəbul imtahanlarında yüksək nəticələr göstərir, hər il qəbul faizi artmaqdadır. Bununla yanaşı, məktəbin şagirdləri respublika fənn olimpiadalarında fəal iştirak edir, yüksək yerlər qazanır və məktəbi layiqincə təmsil edirlər. Direktor bu layihənin şagirdlərin mütaliə mədəniyyətinə və intellektual inkişafına daha böyük töhfə verəcəyinə inandığını bildirib.

Tədbir şagirdlər və müəllimlər arasında böyük maraqla qarşılanıb və məktəblərin maarifləndirilməsi yolunda növbəti bir addım kimi qiymətləndirilib.

Mingəçevir Dövlət Universiteti “IELTS imtahanına təşviq” və “TələbəPlus” layihələrinə qoşulub

Təhsilin İnkişafı Fondu və Təhsildə Keyfiyyət Təminatı Agentliyinin nümayəndə heyəti Mingəçevir Dövlət Universitetində müəllim və tələbələrlə görüş keçirib.

Mingəçevir Dövlət Universitetinin rektor v.m.i.e., Tədris məsələləri üzrə prorektor Üzeyir Zeynalov universitetdə təhsilin modernləşdirilməsi istiqamətində son illərdə görülən çoxşaxəli işləri qonaqların diqqətinə çatdırıb. Ü.Zeynalov Təhsilin İnkişafı Fondunun gördüyü işləri yüksək qiymətləndirərək, Fond ilə əməkdaşlığın Mingəçevir Dövlət Universiteti üçün faydalı olacağını bildirib.

Tədbirdə Təhsilin İnkişafı Fondunun fəaliyyətinə dair videoçarx izlənilib.

Təhsilin İnkişaf Fondunun İdarə Heyətinin sədri Elnur Nəsibov Fondun ümumi fəaliyyəti, strateji hədəfləri, həmçinin tamamlanma mərhələsində olan digər təşəbbüsləri barədə tədbir iştirakçılarını məlumatlandırıb. Elnur Nəsibov “IELTS imtahanına təşviq” layihəsinin ali təhsil müəssisələri ilə tərəfdaşlıq, elmi jurnal, nəşr və dərsliklərin hazırlanmasında universitetlərə dəstək və akademik mobillik proqramlarının həyata keçirilməsi üçün əhəmiyyətli komponent olduğunu bildirib. Son illərdə Mingəçevir Dövlət Universitetində aparılan dəyişikliklərin, yeniliklərin təhsil ictimaiyyətini sevindirdiyini bildirən sədr universitetin rəhbərliyinə öz təşəkkürünü bildirib. Daha sonra Elnur Nəsibov “TələbəPlus” layihəsi barədə təqdimatla ətraflı çıxış edib, tələbələri Mingəçevir Dövlət Universitetinin hər iki layihəyə qoşulması münasibətilə təbrik edib, onların suallarını cavablandırıb.

Tədbirdə çıxış edən Təhsildə Keyfiyyət Təminatı Agentliyinin İdarə Heyətinin sədrinin müavini Kamran Rəsulov ali təhsil müəssisələrində ingilis dilinin təkmilləşdirilməsinin əhəmiyyətinə toxunub. K. Rəsulov hazırkı dövrdə elm və təhsilin inkişafında xarici dil biliklərinin, xüsusilə, ingilis dilinin önəmli olduğunu qeyd edərək sözügedən layihənin ən başlıca məqsədinin məhz ali təhsil ocaqlarının müəllim və tələbələrinin bu dili mənimsəməsi, beynəlxalq jurnallarda elmi məqalələrin nəşri üçün əlverişli şəraitin yaradılması olduğunu bildirib.

Görüşün yekununda “TələbəPlus” və “IELTS imtahanına təşviq” layihələri çərçivəsində birgə əməkdaşlıq müqavilələri imzalanıb.

Lənkəran Dövlət Universiteti “TələbəPlus” və “IELTS imtahanına təşviq” layihələrinə qoşulub

Təhsilin İnkişafı Fondunun nümayəndə heyəti Lənkəran Dövlət Universitetində müəllim və tələbələri ilə görüş keçirib.

Görüşün məqsədi Fondun fəaliyyəti, həyata keçirdiyi layihələr barəsində universitetin elmi-pedaqoji heyətinin, tələbələrinin məlumatlandırılması olub.

Lənkəran Dövlət Universitetinin rektoru, prof.Natiq İbrahimov universitetdə təhsilin modernləşdirilməsi istiqamətində son illərdə görülən çoxşaxəli işləri qonaqların diqqətinə çatdırıb. N.İbrahimov Təhsilin İnkişafı Fondunun gördüyü işləri yüksək qiymətləndirərək, Fond ilə əməkdaşlığın Lənkəran Dövlət Universiteti üçün faydalı olacağını bildirib.

Tədbirin gedişatında Təhsilin İnkişafı Fondunun fəaliyyətinə dair videoçarx izlənilib.

Təhsilin İnkişaf Fondunun İdarə Heyətinin sədri Elnur Nəsibov çıxışında son illərdə Lənkəran Dövlət Universitetində aparılan dəyişikliklər, yeniliklər təhsil ictimaiyyətini sevindirdiyini və buna görədə rektor Natiq İbrahimova eləcə də, LDU kollektivinə öz təşəkkürünü bildirib. “TələbəPlus” layihəsi barədə təqdimatla çıxış edən E.Nəsibov tələbələrin sözügedən layihə və digər layihələr barəsində suallarını cavablandırıb.

Görüşün yekununda “TələbəPlus” və “IELTS imtahanına təşviq” layihələri çərçivəsində birgə əməkdaşlıq müqavilələri imzalanıb.

“Qırmızı Ürəklər Təhsil Təqaüd Proqramı”na qəbul başladı

Proqram haqqında

Təhsilin İnkişafı Fondu ilə Qırmızı Ürəklər Fondunun birgə əməkdaşlığı çərçivəsində həyata keçirilən “Qırmızı Ürəklər Təhsil Təqaüd Proqramı”na qəbul açıq elan edilir. Proqrama ölkə üzrə bütün ali təhsil müəssisələrinin I kursunda bakalavriat təhsili alan tələbə oğlan və qızlar müraciət edə bilərlər. Proqram çərçivəsində seçilmiş tələbələr aylıq təqaüd qazanmaq imkanı əldə edəcəklər.

Seçim şərtləri

Təqaüd proqramında iştirak etmək üçün tələb olunan meyarlar aşağıdakılardır:
Azərbaycan Respublikasının vətəndaşı olmalıdır.
Azərbaycan Respublikasının elmi-müəssisə və təşkilatlarında əyani təhsilalma forması üzrə bakalavriat təhsili (1-ci kurs) almalıdır.
Ali təhsil müəssisəsinə minimum qəbul balı 600 olmalıdır.
Dərsdənkənar fəaliyyətdə aktiv olmalıdır (könüllü, sosial fəaliyyət və s.).
Aşağıdakı sosial kriteriyalardan birinə uyğun olmalıdır:
– ünvanlı dövlət sosial yardımı alan ailələrin üzvü;
– I, II və ya III dərəcə əlilliyi müəyyən edilmiş şəxslər;valideynləri olmayan və ya uşaq evində böyümüş şəxslər.
– hər iki valideyni (tək valideyni olduqda isə həmin şəxs) aşağıda qeyd olunan kateqoriyaların hər hansı birinə aid olan şəxs:
– I, II və ya III dərəcə əlilliyi müəyyən edilmiş şəxslər;işsiz kimi qeydiyyatda olanlar;iş yeri olmayan və yaşa görə əmək pensiyası alanlar;
– iş yeri olmayan və yaşa görə sosial müavinət alanlar.

Qeyd: Yuxarıdakı sosial meyarlara cavab verən I kurs tələbələrinin seçimi zamanı qəbul imtahanında toplanılan bal əsas götürülür.

Seçim prosesi onlayn müraciət, qiymətləndirmə və müsahibə mərhələlərindən ibarət olacaqdır. Seçim zamanı akademik göstəricilər və motivasiya məktubu nəzərə alınacaqdır. Yekun seçimdə müsahibə mərhələsində göstərilən nəticə əsas götürülür. Müsahibə zamanı namizədlərə hədəfləri, sosial vəziyyəti, fəaliyyəti, tələbələrin həyatı ilə bağlı suallar veriləcəkdir. Bütün mərhələlərdən uğurla keçən 23 tələbə aylıq 200 manat məbləğində təqaüd əldə edəcəkdir.

Müraciət forması

Bu linkə keçid etməklə proqrama müraciət edə bilərsiniz.

Müraciət üçün son tarix: 15 dekabr 2024-cü il.

Qeyd: Təhsilin İnkişafı Fondunun təşkil etdiyi digər təqaüd proqramlarından yararlanmış şəxslər bu layihəyə müraciət edə bilməz.

Azərbaycanda “Silicon Vadisi” bazası əsasında yeni İT Akademiyası fəaliyyətə başlayır

“NEQSOL Academy”, Təhsilin İnkişafı Fondu və “Technology SNI”nin birgə tərəfdaşlığı ilə, Azərbaycanda innovativ tədris proqramları təqdim edəcək “Peerstack Academy” adlı yeni və inqilabi İT təhsil layihəsi yaradılıb. Bu layihə “peer-to-peer” modeli əsasında həyata keçirilir.

“Peerstack Academy” tədris prosesi iştirakçıların birgə çalışmasına əsaslanan və dünya miqyasında tanınan “Qwasar Silicon Valley” platformasından istifadə edən bir tədris metodikasını təklif edir. Bu yanaşma tələbələrə komanda ilə iş bacarıqlarını inkişaf etdirməyə və tədris proqramını uğurla mənimsəməyə kömək edəcəkdir.

Qeyd edək ki, “Qwasar Silicon Valley”, Şimali Amerikada İT təhsili sahəsində aparıcı şirkətlərdən biri kimi tanınır. Bu layihə çərçivəsində dünya üzrə 25 000-dən çox iştirakçıya təlim keçirilmişdir. “Qwasar Silicon Valley”nin təsisçisi Kvame Yamgnane həmçinin, innovativ İT tədris metodları ilə beynəlxalq səviyyədə tanınmış “42 school” məktəbinin həmtəsisçisidir. Kvame və komandası bu zəngin təcrübəyə və “42 school”un uğurlu nəticələrinə əsaslanaraq, tələbələrin inkişafını və nəticələrini daha da səmərəli etmək üçün təsdiqlənmiş metodologiyalar tətbiq edib.

Tədris haqqının böyük bir hissəsi “NEQSOL Academy” tərəfindən qarşılanacaqdır. İlk mərhələdə proqramdan 250 iştirakçının yararlanması nəzərdə tutulub. Dərslər Azərbaycan Texniki Universitetinin yeni kampusunda layihə üçün xüsusi ayrılmış məkanda keçiriləcəkdir.

“Peerstack Academy” haqqında daha ətraflı məlumatı akademiyanın rəsmi saytından (peerstack.tech) və sosial media hesablarından əldə etmək mümkündür (facebook.com/peerstack.tech, instagram.com/peerstack.tech və linkedin.com/company/peerstack-academy/).

“Təhsil və təqaüdlərin Dayanıqlı İnkişaf Məqsədlərinə nail olunmasında rolu” mövzusunda müzakirə keçirilib.

Bu gün BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində “Təhsil və təqaüdlərin Dayanıqlı İnkişaf Məqsədlərinə nail olunmasında rolu” mövzusunda müzakirə keçirilib.

Müzakirədə çıxış edən Təhsilin İnkişafı Fondunun İdarə Heyətinin sədri Elnur Nəsibov iqlim dəyişikliklərinin təhsilə təsirinin aktual məsələlərdən biri olduğunu vurğulayıb. Fond sədri TİF-in tərəfdaşları sırasında “NEQSOL Holding”, STP Şirkətlər Qrupu, SOCAR, bp kimi böyük enerji şirkətlərinin olduğunu və onların hər birinin siyasətində yaşıllaşdırma, təhsil vasitəsilə maarifləndirilmənin artırılması, yaşıl bacarıqların, dəyərlərin formalaşdırılması sahəsində mühim addımlar atdıqlarını diqqətə çatdırıb. Xüsusi ilə təhsil sahəsində dövlət-özəl əməkdaşlığının önəmini vurğulayan Elnur Nəsibov, maraqlı tərəfləri bu sahədə birgə tərəfdaşlığa dəvət edib.

“NEQSOL Holding Azərbaycan” ofisinin rəhbəri İmran Əhmədzadə iqlim dəyişikliklərinin aradan qaldırılmasında təhsilin vacib rolunun olduğunu vurğulayıb. O qeyd edib ki, “NEQSOL Holding” hər zaman təhsillə bağlı təşəbbüsləri dəstəkləyib. “NEQSOL Holding” Azərbaycanda bir neçə təhsil müəssisəsinin təmirini həyata keçirib, tələbələrə təqaüdlərin verilməsində iştirak edib. Təhsilin İnkişafı Fondu ilə birgə həyata keçirilən “Parla” təqaüd və inkişaf proqramının da təhsilə dəstək sahəsində uğurlu nümunələrdən biri olduğu vurğulanıb. İ.Əhmədzadənin təhsillə bağlı məsələlərin həllinin təkcə dövlətin üzərinə düşməli olduğunu deyil, özəl qurumların da bu istiqamət üzrə təşəbbüskar olmalarını və dövlətlə sıx əməkdaşlıq etmələrini bildirib.

Ümumdünya Səhiyyə Təşkilatı Fondunun Baş icraçı direktoru Anil Soni insanların, xüsusilə gənclərin bəzən özlərini iqlim dəyişikliyinin təsirlərindən kənarda, gücsüz hiss etdiklərini qeyd edib. Bu təsirlərin aradan qaldırılması üçün hazırda yeni imkanların axtarıldığını vurğulayan Anil Soni əlavə edib ki, hamı iqlim dəyişikliyinin şiddətləndirici təsirinin olmaması üçün çalışmalı, bunun üçün hansı imkanlar yarada biləcəyini araşdırmalıdırlar. Anil Soni bütün bu məsələlərin bir fərd və ya bir qrup tərəfindən təkbaşına həll edilə bilməyəcəyini və insanları potensiallarının imkanlarından daha geniş istifa edərək, bu çağırışlara cavab verməyə səsləyib.

“NEQSOL Holding”in departament rəhbəri Dilarə Cəfərli tədqiqatlara əsasən, yoxsulluğun aradan qaldırılmasında təhsilin dəyişdirici güc olduğunu, qızlara təhsilverən məktəblərin icmaları “yoxsulluğun amansız dövründən” “imkanlar dövrü”nə qədər inkişaf etdirdiyini bildirib. Dilarə Cəfərli qızlara təhsilin verilməsi ilə bağlı təşəbbüslərin davamlı təsirlər yaratdığını, o cümlədən iqtisadi şəraitin, sağlamlıq göstəricilərinin yaxşılaşdırılması və cəmiyyətin rifahının gücləndirilməsinə töhfə verdiyini vurğulayıb.

Tədbirdə daha sonra iştirakçıların mövzu ilə bağlı sualları cavablandırılıb.

Qırmızı Ürəklər Fondu və Təhsilin İnkişafı Fondu arasında Əməkdaşlıq Memorandumu imzalanıb

Qırmızı Ürəklər Fondu və Təhsilin İnkişafı Fondu arasında Əməkdaşlıq Memorandumu imzalanıb. Sənədi Təhsilin İnkişafı Fondunun İdarə Heyətinin sədri Elnur Nəsibov və Qırmızı Ürəklər Fondunun prezidenti Yusif Poladov imzalayıblar.

Memorandumun məqsədi təhsil sisteminin inkişafına yönəlmiş proqram və layihələr üzrə əməkdaşlığın qurulması, eləcə də tələbələr üçün uzunmüddətli təqaüd proqramının təsis edilməsi və həyata keçirilməsidir.

Təhsilin İnkişafı Fondunun İdarə Heyətinin sədri Elnur Nəsibov Fondun həyata keçirdiyi layihələr barəsində ətraflı məlumat verərək, sırf təqaüd layihələrinə hər zaman xüsusi diqqətin ayrıldığını bildirib. Belə ki, Fondun ilk layihələrindən birinin məhz “Hənifə Məlikova-Zərdabi adına gənc qızların təhsilinə dəstək” təqaüd proqramının olduğu, ilkin olaraq qızların sayının 25, qısa müddət ərzində isə artıq 300-dək çatdığı vurğulanıb.

Qırmızı Ürəklər Fondunun prezidenti Yusif Poladov Fondun artıq üçüncü ildir ki, sosial həssas qruplardan olan gənclərin təhsilini dəstəkləyən “Qırmızı Ürəklər Təhsil Təqaüdü Proqramı”nı həyata keçirildiyini və bu günə qədər 51 nəfər tələbənin proqramdan yararlandığını qeyd edib. Yusif Poladov proqramın əsas məqsədinin savadlı və istedadlı gənclərin inkişafına dəstək olmaq, gələcəkdə cəmiyyətə faydalı vətəndaşlar yetişdirmək olduğunu vurğulayıb.

Qeyd edək ki, Qırmızı Ürəklər Fondunun başlatdığı “Onu oxut” ianə toplama aksiyası çərçivəsində 2024/2025-ci tədris ilindən etibarən Təhsilin İnkişafı Fondu ilə birgə 600-dən yuxarı bal toplamış 23 nəfər birinci kurs tələbəsinə təhsil müddətində aylıq 200 manat təqaüd veriləcəkdir.

BMU tələbələrinə “TələbəPlus” kartları təqdim olunub

Bakı Mühəndislik Universitetində (BMU) Təhsilin İnkişafı Fondu (TİF), Kapital Bank və “Visa” beynəlxalq ödəmə texnologiyaları şirkətinin tələbələr üçün birgə layihəsi olan “TələbəPlus” kartlarının təqdimetmə mərasimi keçirilib.

BMU-nun rektoru Yaqub Piriyev tədbirdə iştirak edən hər üç qurumun nümayəndə heyətinə qısa müddətdə reallaşdırılan bu layihəyə görə təşəkkürünü bildirib və güzəştli kartların universitet tələbələri tərəfindən məmnunluqla qarşılandığını deyib. Rektor bütün ali məktəblərin tələbələrinə endirim, güzəşt və keşbek imkanları yaradan kartların sosial dəstək xarakteri daşıdığını təqdir edib, gənclər üçün perspektivdə daha əlverişli layihələrin, ideya və təşəbbüslərin irəli sürüləcəyinə inandığını söyləyib. Rektor çıxışında universitetin inkişafı barədə, habelə nəzərdə tutulan tələbəyönümlü layihələr haqda da məlumat verib.

TİF-in İdarə Heyətinin sədri Elnur Nəsibov çıxışında beynəlxalq təcrübə əsasında nüfuzlu tərəfdaşlarla birgə həyata keçirilən bu layihə istiqamətində universitetlərlə imzalanmış əməkdaşlıq müqavilələrini xatırladaraq, qısa zamanda ölkə üzrə bütün tələbələr üçün kartların hazırlandığını, həmin kartların tez bir vaxtda paylanılacağını diqqətə çatdırıb. BMU-nun kartların paylanıldığı ilk universitetlərdən biri olduğunu önə çəkən Fond sədri tələbələrə hazırda güzəştin tətbiq olunduğu və gələcək üçün nəzərdə tutulan xidmət sahələrini sadalayaraq, imtiyazlarda məqsədin tələbə məmnuniyyəti yaratmaq, gənclərin tələbəlik həyatını asanlaşdırmaq, sosial rifahına dəstək göstərmək olduğunu deyib. Əlavə edilib ki, irəli mərhələdə vahid tələbə kartlarından peşə və orta ixtisas təhsili müəssisələrində təhsilalanlar, növbəti tədris ilində isə təhsil sahəsində çalışan əməkdaşların da faydalanması üçün işlər aparılır.

Sonra universitetə yüksək balla qəbul olan I kurs tələbələrinin bir qisminə “TələbəPlus” kartları təqdim edilib.

“Parla” təqaüd və inkişaf proqramının müsahibə mərhələsinə dəvət olunacaq tələbə qızların adları açıqlandı

Təhsilin İnkişafı Fondu ilə “NEQSOL Holding”in birgə əməkdaşlığı çərçivəsində həyata keçirilən “Parla” təqaüd və inkişaf proqramının müsahibə mərhələsinə dəvət olunacaq qızların adları açıqlandı.

Siyahı ilə keçidə daxil olaraq tanış ola bilərsiniz – bit.ly/3UExUMM

Qeyd edək ki, təqaüd proqramına ümumilikdə 791 nəfər müraciət edib, bütün seçim şərtlərinə cavab verən 128 namizəd müsahibə mərhələsinə vəsiqə qazanıb.