Category: Xəbərlər

“Bir Könüllü” Tələbələrin Əməkdaşlığı İctimai Birliyi yay tətilinin son günlərini daha əyləncəli və maraqlı keçirmək məqsədilə Zuğulba Tədris İdman Bazasında bütün ali təhsil müəssisələrində təhsil alan tələbələr üçün “StudentFest 2022” adlı silsilə tələbə düşərgəsinin ikinci mərhələsinə start verib.

Açılış mərasimində iştirak edən elm və təhsil nazirinin müşaviri, Təhsilin İnkişafı Fondunun İdarə Heyətinin sədri Elnur Nəsibov tələbələrdə yeniliklərə qarşı yaradıcı təfəkkür və açıq düşüncə tərzini formalaşdırmaq, yeni dostluqlar qazanmaq, eyni zamanda, asudə vaxtı daha səmərəli keçirmək baxımından faydalı olan bu tip düşərgələrin davamlı olmasını vurğulayıb.

Daha sonra Elm və Təhsil Nazirliyinin İnformasiya və vətəndaşlara xidmət şöbəsinin müdir müavini Səbuhi Rzayev Elm və Təhsil Nazirliyinin dəstəyi ilə bundan öncəki dövrlərdə təşkil olunan tələbə düşərgələri haqqında ümumi məlumat verərək, tələbələri düşərgəboyu fəallıq nümayiş etdirməyə və yeni biliklər əldə etməyə çağırıb.

Düşərgənin ilk günü Bakı Mühəndislik Universitetinin müəllimi Tahirə Salayeva, Elm və Təhsil Nazirliyinin Beynəlxalq Əməkdaşlıq şöbəsinin əməkdaşları Niftalı Qasımlı və Elçin Hüseynov, Dövlət Məşğulluq Agentliyinin Karyera planlaması şöbəsinin müdiri Əli Qurbanlının təqdimatında müxtəlif mövzularda informativ sessiyalar təşkil olunub.

Düşərgə çərçivəsində məşqçi-müəllimlərin və idman mütəxəssislərinin dəstəyi ilə müxtəlif idman yarışları və tələbələ üçün digər əyləncəli proqramlar təşkil olunur.

Modern İnformasiya Agentliyinin təşkilatçılığı və Nar Mobile şirkətinin dəstəyi ilə ali məktəblərə qəbul imtahanlarında yüksək nəticə göstərən 10 abituriyent mükafatlandırılıb.

Tədbirin məqsədi ölkə birincilərini ictimaiyyətə tanıtmaq, eyni zamanda, gələcək hədəflərində uğura çatmaq üçün onlara yardımçı olmaqdır. Tədbirdə Milli Məclisin deputatları, Elm və Təhsil nazirliyinin əməkdaşları, Təhsilin İnkişafı Fondunun idarə heyətinin sədri, dövlət rəsmiləri, tanınmış ictimaiyyət nümayəndələri və valideynlər iştirak ediblər.

Tədbiri giriş nitqi ilə açan Elm və Təhsil nazirinin müşaviri, Təhsilin İnkişafı Fondunun İdarə Heyətinin sədri Elnur Nəsibov gəncləri təbrik edib:
“Nazirlik adından abituriyentləri təbrik edirik. Ali təhsil bizim həyatımızda çox vacib məqamdır. Bu gün təhsil bizim üçün böyük nailiyyət hesab olunur. Bu, həmçinin məsuliyyət deməkdir. Gənclərimiz də bunu çox yaxşı başa düşürlər. Son illərdə nazirliyin üzərinə çox vacib məsələlər düşür. Bizim gənclərimizin yüksək nəticə əldə etməsi bizim üçün böyük uğur deməkdir. Dünyanın top universitetlərinə qəbul, bakalavr yerlərinin tam dolması bizim gələcəyə uğurlu addım atmağımızdan xəbər verir. Bu gün hər bir təhsil müəssisəsinin əsas vəzifəsi yüksək kadrlar yetişdirməkdir. Gənclərimizi təbrik edir, karyeralarında uğur arzulayırıq”.

Təhsilin İnkişafı Fondunun (TİF) İdarə Heyətinin sədri Elnur Nəsibov Malala Fondunun həmtəsisçisi Ziauddin Yousafzai ilə onlayn görüş keçirib. Görüşün əsas məqsədi əməkdaşlıq perspektivlərini müzakirə etmək olub.

Görüşdə Z.Yousafzai qurumun yaranma tarixi, məqsədi və icra etdikləri layihələr haqqında məlumat verib.

E.Nəsibov da Təhsilin İnkişafı Fondunun məqsədi, fəaliyyəti, əsas prioritetləri və gələcək planları haqda ətraflı məlumat təqdim edib.

Görüş zamanı Malala Fondu ilə birgə qızların təhsilə inteqrasiyası mövzusunda layihələrin icrasına dair imkanlar barədə danışılıb. Gələcəkdə birgə əməkdaşlıq istiqamətləri müzakirə edilib.

Malala Fondu 2013-cü ildə Malala və atası tərəfindən qızların təhsilinin sosial və iqtisadi dəyərini vurğulamaq üçün təsis edilən qlobal Fonddur. Fondun əsas məqsədi bütün dünyada qızların ümumi təhsilə əlçatanlılığı və onların eşidilmə hüququnu təmin etməkdir.

Azərbaycan Respublikası Təhsil Nazirliyinin tabeliyində Təhsilin İnkişafı Fondunun (TİF) Məşvərət Şurasının ilk iclası 14 iyul 2022-ci il tarixdə keçirilib.

İclasda Məşvərət Şurasının sədri, təhsil naziri Emin Əmrullayev, təhsil nazirinin müavini İdris İsayev, Təhsilin İnkişafı Fondu İdarə Heyətinin sədri Elnur Nəsibov, Bakı Dövlət Universitetinin rektoru Elçin Babayev, Azərbaycan Dövlət İqtisad Universitetinin rektoru Ədalət Muradov, Azərbaycan Texniki Universitetinin rektoru Vilayət Vəliyev, Azərbaycan Dövlət Neft və Sənaye  Universitetinin rektoru Mustafa Babanlı, Bakı Şəhəri üzrə Təhsil İdarəsinin müdiri Mehriban Vəliyeva, Azərbaycan Respublikasının Təhsil İnstitutunun direktoru Rüfət Əzizov, Təhsil Nazirliyinin Təsərrüfathesablı Əsaslı Tikinti və Təchizat İdarəsinin rəisi Valeh Mirzalıyev, Təhsilin iqtisadiyyatı və statistikası şöbəsinin müdiri Kənan Kərimzadə, Maliyyə şöbəsinin müdir müavini Vüqar Əsgərov iştirak ediblər.

Təhsil naziri E.Əmrullayev Azərbaycan Respublikasının Prezidenti cənab İlham Əliyevin 14 iyul 2021-ci il tarixdə imzaladığı Fərmanı ilə yaradılmış Təhsilin İnkişafı Fondunun məqsədləri, təhsil sisteminin inkişafında qurumun rolu, dövlət təhsil müəssisələrinin müasir tələblərə uyğunlaşdırılması, eləcə də təhsil və iqtisadiyyat arasında inteqrasiyasının güclənməsi vacibliyini qeyd edib. Nazir, həmçinin, Fondun gələcək prioritet fəaliyyət istiqamətləri ilə bağlı fikirlərini Şura üzvləri ilə bölüşüb.

TİF İdarə Heyətinin sədri E.Nəsibov qurumun məqsədi, fəaliyyətləri, yaradılması, görülmüş təşkilati işlər barədə Məşvərət Şurası üzvlərinə təqdimat etdi. Sədr bildirdi ki, qurumun strateji məqsədləri və planını hazırlamaq məqsədilə ali və orta ixtisas təhsil müəssisələrinin iştirakı ilə dəyirmi masa görüşləri keçiriləcəkdir. Bundan əlavə, Təhsilin İnkişafı Fondunun digər dövlət və özəl qurumlarla tərəfdaşlıq imkanları və perspektivləri barədə məlumat təqdim olunub.

Ali təhsil müəssisələrinin rektorları, Məşvərət Şurasının digər üzvləri də Fondun məqsədləri, gələcək fəaliyyətləri və gözləntilər barədə müzakirələrdə iştirak ediblər. 

İyulun 13-də Təhsil Sisteminin İnformasiyalaşdırılması İdarəsi, Təhsilin İnkişafı Fondu və “BestComp Group” MMC arasında Niyyət Protokolunun imzalanması mərasimi keçirilib.

Mərasimdə təhsil nazirinin müavini Muxtar Məmmədov, Təhsil Sisteminin İnformasiyalaşdırılması idarəsinin rəisi Vüsal Xanlarov, Təhsilin İnkişafı Fondunun sədri Elnur Nəsibov, “BestComp Group” MMC-nin baş direktoru Fərid Həsənov və digər nümayəndələr iştirak edib.

İmzalanmış sənədə əsasən “BestComp Group” MMC şirkəti tərəfindən işğaldan azad olunmuş ərazilərdə yerləşən təhsil müəssisələrinə 1000 ədəd kompüter avadanlıqları ianə olunacaq.

Azərbaycan Respublikasının təhsil naziri Emin Əmrullayevin əmri ilə 17 mart 2022-ci il tarixdə Elnur Ramiz oğlu Nəsibov Təhsil Nazirliyinin tabeliyində Təhsilin İnkişafı Fondunun İdarə Heyətinin sədri təyin edilib.

Bundan əvvəl E.Nəsibov Təhsil Nazirinin müşaviri, ona qədər isə Peşə Təhsili üzrə Dövlət Agentliyində direktor müavini vəzifəsində çalışıb.

Qeyd edək ki, ölkə prezidenti İlham Əliyev 2021-ci il iyulun 14-də “Azərbaycan Respublikası Təhsil Nazirliyinin tabeliyində Təhsilin İnkişafı Fondunun yaradılması haqqında” Fərman imzalayıb.