“Women in Tech” təşkilatının Azərbaycandakı nümayəndəliyinin səfiri Leyla Seyidzadə və təşkilatın təhsil proqramları üzrə tərəfdaşı Leyla Hacıyeva Təhsilin İnkişafı Fondunun qonaqları oldular.
L.Seyidzadə təşkilatın fəaliyyəti və layihələri barədə ətraflı məlumat verdi. Bildirildi ki, “Women in Tech” təşkilatı Azərbaycan daxil olmaqla 50-dən çox ölkədə qadınların İKT sahəsində təşəbbüslərinin reallaşmasına dəstək göstərir.
Fondun İdarə Heyətinin sədri Elnur Nəsibov Fondun məqsədləri, fəaliyyət istiqamətləri və gələcək hədəfləri barədə məlumat verdi.
Görüşün gedişatında “Women in Tech” təşkilatı və Təhsilin İnkişafı Fondu arasında qızların təhsilinə dəstək istiqamətində əməkdaşlıq perspektivləri müzakirə olundu.
İctimai və sahibkarlıq sahəsində fəal xanımlar Təhsilin İnkişafı Fondunun qonağı olublar.
Fondun İdarə Heyətinin sədri Elnur Nəsibov qonaqları salamlayaraq Fondun fəaliyyəti, hazırda icra olunan, eyni zamanda yaxın gələcəkdə həyata keçiriləcək layihələr haqqında ətraflı məlumat verib.
Tədbirdə Elm və Təhsil Nazirliyi yanında İctimai Şuranın üzvü Pərvanə Məmmədova, Bakı Təhsil Məlumat Mərkəzinin direktoru Günay Məsimova, Qırmızı Ürəklər Fondunun prezidenti Sevda Haqverdiyeva, Azərbaycanda Qadın Sahibkarlığının İnkişafı Assosiasiyasının İdarə Heyətinin sədri Səkinə Babayeva, Bakı Şəhəri üzrə Təhsil İdarəsinin nümayəndəsi Ofelya Salmanova, “Əli və Nino” kitab mağazaları şəbəkəsinin və Milli Kitab Mükafatının təsisçisi Nigar Köçərli iştirak ediblər.
Görüşün məqsədi “Qızların Təhsilinə Dəstək” layihəsi ətrafında müzakirələrin aparılması, birgə əməkdaşlıq perspektivlərinin müzakirəsi, ümumiyyətlə qızların təhsilə cəlb edilməsi, bu sahədə olan problemlərin araşdırılması və onların həllinə nail olmaq istimaqətində birgə işlərin görülməsidir.
Tədbirdə iştirak edən Qırmızı Ürəklər Fondunun vitse-prezidenti Yusif Poladov da “Qızların Təhsilinə Dəstək” mövzusu ilə bağlı fikirlərini paylaşıb.
Masaətrafı müzakirələr zamanı maraqlı fikirlər irəli sürülüb, qızların təhsili ilə bağlı regionlarda aparılan araşdırmaların nəticələri diqqətə çatdırılıb və gələcək əməkdaşlıqla bağlı təkliflər müzakirə edilib.
Yığıncağın sonunda Elnur Nəsibov qonaqları qarşıdan gələn Novruz bayramı münasibətilə təbrik edərək, bu görüşlərin ənənəvi olmasını istədiyini bildirdi.
Martın 2-də Təhsilin İnkişafı Fondunun təşkilatçılığı, Azərbaycan Respublikası Elm və Təhsil Nazirliyinin, Ailə, Qadın və Uşaq Problemləri üzrə Dövlət Komitəsinin tərəfdaşlığı ilə 8 Mart – Beynəlxalq Qadınlar Gününə həsr edilmiş “Qızların təhsilinə dəstək” mövzusunda konfrans keçirilib.
Təhsilin İnkişafı Fondunun İdarə Heyətinin sədri Elnur Nəsibov açılış nitqi ilə çıxış edərək, qonaqları salamlayıb. O, Fondun fəaliyyət istiqamətləri haqqında məlumatları diqqətə çatdıraraq bildirib ki, qurumun məqsədi ölkəmizdə təhsil sisteminin inkişafına yönəlmiş proqram və layihələri dəstəkləmək, dövlət təhsil müəssisələrinin infrastrukturunun inkişafı ilə bağlı proqramlar həyata keçirmək, təhsilin və iqtisadiyyatın inteqrasiyasına və gücləndirilməsinə töhfə verməkdir. Fondun fəaliyyəti dövründə önəm verdiyi məsələlərdən birinin gənc qızların təhsilinə dəstək olduğunu qeyd edən E. Nəsibov bildirib ki, “Qızların təhsilinə dəstək” layihəsi əvvəlcə kiçik bir layihə kimi başlayaraq tədricən genişlənmişdir. Qızların təhsilinə yönəlik layihələrin həyata keçirilməsi həm sosial, həm səhiyyə, həm də təhsil sahəsində bir sıra müsbət dəyişikliklərə səbəb olur.
Layihənin reallaşmasında iştirak edən qurumlara və özəl təşkilatlara təşəkkürünü bildirən E. Nəsibov hamını – dövlət qurumlarını, ictimai təşkilatları, özəl sektorun nümayəndələrini, ümumilikdə vətəndaş cəmiyyətini bu nəcib təşəbbüsə dəstək verməyə çağırıb.
Tədbir “Təhsil TV”nin təqdimatında “Gənc Qızların Təhsilinə Dəstək” layihəsinə dair video-çarxın nümayişi ilə davam edib.
Çıxış edən elm və təhsil naziri Emin Əmrullayev qadınların ölkənin iqtisadi baxımdan inkişafına göstərdiyi təsirlərdən bəhs edərək, onların təhsil və elmdə təmsilçiliyinin vacibliyini vurğulayıb. Qızların təhsilinin Azərbaycandakı vəziyyətinə diqqət çəkən E.Əmrullayev ali təhsili qazana bilmək üçün kiçik yaşlardan müəyyən bilik bazasının formalaşdırılmasının önəmini qeyd edib. O, son aparılan araşdırmalara əsasən, ibtidai təhsil dövründə qızların oğlan həmyaşıdlarından daha yüksək nəticə göstərdiyini, irəliləyən illərdə isə əksinə, oğlanların qızları üstələdiyini qeyd edib.
Ailə, Qadın və Uşaq Problemləri üzrə Dövlət Komitəsinin sədri Bahar Muradova “Qızların təhsilinə dəstək” layihəsinə diqqət çəkərək, zamanında təsadüfdən yaranan bir ideyanın qısa müddət ərzində reallığa çevrilməsinin sevindirici olduğunu qeyd edib. Müsəlman Şərqində ilk dünyəvi məktəbin-Qızlar məktəbinin fəaliyyətə başlamasının 100 illiyinə təsadüf edən layihənin başladığı dövrdə Dövlət Komitəsinin regionlarda fəaliyyət göstərən mərkəzləri vasitəsilə aztəminatlı ailələrdən olan, ali məktəblərə qəbul imtahanında yüksək bal toplamış 11 qıza dəstək göstərildiyini vurğulayan Komitə sədri, təşkilatçılara ötən ildən başlayaraq qaldırılan bu təşəbbüsə dəstək verdiklərinə görə təşəkkürünü bildirib.
Təhsilin İnkişafı Fondunun şöbə müdiri Nərgiz İsmayılova “Hənifə Məlikova – Zərdabi adına qızların təhsilinə dəstək” təqaüd proqramının təsis olunması haqqında məlumat verib. O, təqaüdün adına həsr olunduğu Hənifə Məlikovanın Azərbaycanın ilk maarifçi qadınlarından biri və Bakıda ilk qızlar məktəbinin yaradıcısı kimi Azərbaycan qadınlarının inkişafına vacib töhfələr verdiyini diqqətə çatdırıb. N. İsmayılova təqaüd proqramını qazanmaq üçün müraciət forması və namizədlərə dair tələbləri qeyd edib.
Bildirilib ki, təqaüd proqramının məqsədi cəmiyyətin diqqətini qızların təhsilinə cəlb etmək, dövlətimizin inkişafında gənclərin, xüsusilə qızların rolunun artırılmasını təşviq etmək və onların müasir təhsil imkanlarından faydalanmasına dəstək olmaqdır.
Dövlət Statistika Komitəsinin sədri, YAP sədrinin müavini Tahir Budaqov bildirib ki, Azərbaycanda təhsilin inkişafı bu gün yüzilliyini qeyd etdiyimiz Heydər Əliyevin adı ilə əlaqədardır. Ulu Öndərin təşəbbüsü ilə bu istiqamətdə təqaüd proqramının ərsəyə gətirilməsi və Azərbaycan gənclərinin ən qabaqcıl təhsil müəssisələrinə göndərilməsi ölkəmizin sonrakı inkişafında müstəsnə rol oynayan addımlardan olmuşdur. Bu gün də cənab İlham Əliyevin rəhbərliyi ilə azərbaycanlı gənclər dünyanın ən öndə olan ali təhsil müəssisələrində dövlət xətti ilə təhsil alır və Azərbaycanın inkişafı üçün öz töhfələrini verirlər. T. Budaqov qeyd edib ki, təhsilinin inkişafı, eləcə də gender bərabərliyinin təmin olunması YAP-ın proqramında da prioritet bir məsələ kimi qoyulub və bundan sonra da YAP-ın üzvü olan sahibkarların da bu prosesə daha aktiv cəlb olunması istiqamətində addımlar atılacaq.
Konfransın yekununda Təhsilin İnkişafı Fonduna ianə edən tərəfdaş qurumlara ianə sertifikatları təqdim edilib.
Azərbaycan Turizm və Menecment Universitetinin rektoru İlham Mədətov Təhsilin İnkişafı Fondunun qonağı olub.
Görüş zamanı Fondun İdarə Heyətinin sədri Elnur Nəsibov Fond, cari layihələr, qarşıda duran hədəflər, strateji fəaliyyət istiqamətləri və gələcək planlar haqqında rektoru məlumatlandırıb.
Daha sonra, Azərbaycan Turizm və Menecment Universitetinin rektoru İlham Mədətov universitetin ümumi fəaliyyəti, yerli və beynəlxalq əməkdaşlıqlar barəsində ətraflı məlumat verib. Qeyd edilib ki, turizm sahəsi beynəlxalq aləmdə neft sektorundan sonra ən gəlirli sahə hesab olunur. Azərbaycan digər sahələrdə olduğu kimi, turizm üzrə də dünya miqyasında aparıcı mövqelərdə dayanmağı hədəfləyir, bu istiqamətdə peşəkar kadrların hazırlanması məqsədilə universitet geniş çeşiddə ixtisaslar üzrə təhsili təmin edir, eləcə də müxtəlif layihələr icra edir.
Görüş zamanı Təhsilin İnkişafı Fondu və Azərbaycan Turizm və Menecment Universiteti arasında gələcək əməkdaşlıq perspektivləri və birgə layihələrin icra edilməsi mövzusunda müzakirələr aparılıb.
Təhsilin İnkişafı Fondunun dəstəyi, “Bir Könüllü” Tələbələrin Əməkdaşlığı İctimai Birliyinin təşkilatçılığı və “BRIDGE Academy” şirkətinin təlim tərəfdaşlığı ilə 3-7 fevral tarixlərində Qubada təşkil olunan maliyyə və iqtisadiyyat sahələri üzrə tələbələrin “WinterCamp 2023” Qış Universiteti yekunlaşıb.
Qış Universitetində iştirak üçün 500-ə yaxın müraciət qeydə alınıb, qeydiyyat və müsahibə mərhələlərindən sonra 35 tələbə iştirak imkanı əldə edib. Tədbirin açılışında İctimai Birliyin sədri Leyla Zeynalova Qış Universitetinin keçirilməsində əsas məqsədin tələbələrin asudə vaxtlarının daha səmərəli və faydalı təşkilinə şərait yaratmaq, əlaqəli ixtisaslar üzrə təhsil alan tələbələri dərsdən kənar mühitdə bir araya gətirərək onlar arasında kommunikasiyanın daha da möhkəmləndirilməsi, bilik və təcrübə mübadiləsinin artırılması və inkişaf etdirilməsi istiqamətində xüsusi rol oynayacağını vurğulayıb.
Tədbirin ilk spikeri Warwick Business School məzunu, SOCAR-ın İqtisadi göstəricilər və maliyyə modelləşdirilməsi şöbəsinin iqtisadçısı, Azərbaycan Dövlət İqtisad Universitetinin müəllimi Nuray İsgəndərovanın təqdimatında “Maliyyə uçotunun əsasları” mövzusu üzrə 2 hissəli məlumat və təlim sessiyası həyata keçirilib.
Düşərgənin ikinci günü II “Yüksəliş” müsabiqəsinin qalibi Hüseyn Mahmudovun və “The Bankers Club” qurucusu və rəhbəri Rüfət Kərimovun təqdimatında “İqtisadiyyata giriş” və “Bank sektorunun iqtisadiyyatda rolu” mövzuları üzrə informativ sessiya və startap təlimləri təşkil edilib.
Düşərgə çərçivəsində növbəti günlərdə Böyük Britaniyanın Bristol Universitetinin məzunu, II “Yüksəliş” müsabiqəsinin qalibi Elmir Hüseynov, Böyük Britaniyanın Lester Universitenin məzunu, I Yüksəliş müsabiqəsinin qalibi Ziya Mürsəlzadə, və Böyük Britaniyanın York və Fransanın Starsburq universitetlərinin məzunu, II “Yüksəliş” müsabiqəsinin qalibi Əli Əhmədov, PashaPay MMC-nın büdcə və maliyyə modelləri üzrə baş mütəxəssisi Orxan Talıbzadə və Azərbaycan Respublikası Maliyyə Nazirliyinin əməkdaşı Elmar Hacıyevin təqdimatında “Azərbaycan vergi qanunvericiliyinə giriş”, “İdarəetmə uçotunun prinsipləri”, “Daxili auditə giriş”, “Maliyyə modelləri və şirkətin qiymətləndirilməsi” və “Maliyyə savadlılığının artırılması” mövzuları üzrə 2 hissəli məlumat və təlim sessiyaları həyata keçirilib.
Daha sonra gənclər asudə vaxtın səmərəli və faydalı təşkili, həmçinin Qubanın əsrarəngiz təbiət mənzərələrini seyr etmək məqsədilə İkinci Nügədi kəndindəki Çənlibel gölünə səyahət ediblər.
Düşərgənin sonuncu günü bağlanış mərasimində çıxış edən Elm və Təhsil Nazirliyinin İnformasiya və vətəndaşlara xidmət şöbəsinin sektor müdiri Səbuhi Rzayev gənc tələbələrin innovativ potensialını stimullaşdırmaq, onların elmi və nəzəri biliklərini artırmaq və bu istiqamətdə təcrübə mübadiləsini həyata keçirmək üçün peşəkar mütəxəssislərin, spikerlərin və təlimçilərin cəlb olunması yolu ilə qış və yay düşərgələrinin mütəmadi təşkil edilməsinin əhəmiyyətindən bəhs edib. Sonda təlim iştirakçılarına sertifikatlar, müxtəlif mükafatlar təqdim edilib.
Məlumat üçün bildirək ki, düşərgə boyu tələbələrin fiziki hazırlığını təmin etmək məqsədilə hər səhər məşqçi-müəllimlərin və idman mütəxəssislərinin dəstəyi ilə tələbələr üçün 1 saatlıq bədən tərbiyəsi dərsləri keçirilib.
Axşam saatlarında asudə vaxtın səmərəli təşkili məqsədilə iştirakçılar arasında hər gün məşqçi-müəllimlərin müşaiyəti ilə voleybol, stolüstü tennis yarışları keçirilib. Günün sonunda isə tələbələr üçün sənədli film nümayişi, müxtəlif əyləncəli oyunlar, maraqlı simulyasiya yarışları, intellektual fəaliyyətlər və s. təşkil olunub.
“2 fevral – Gənclər Günü” münasibətilə Təhsilin İnkişafı Fondu və Ailə, Qadın və Uşaq Problemləri üzrə Dövlət Komitəsinin birgə həyata keçirdiyi “Gənc Qızların Təhsilinə Dəstək” layihəsi çərçivəsində tələbə qızlar ilə görüş baş tutub.
Görüşdə Elm və Təhsil Nazirliyinin, Ailə, Qadın və Uşaq Problemləri üzrə Dövlət Komitəsinin, Elm və Təhsil Nazirliyi yanında İctimai Şuranın, Azərbaycan Həmkarlar İttifaqları Konfederasiyasının nümayəndələri və layihə çərçivəsində təqaüd proqramına cəlb olunan yüksək akademik göstəricilərə malik tələbə qızlar iştirak ediblər.
Tədbirdə açılış nitqi ilə çıxış edən Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq gənc qızları “2 Fevral – Gənclər Günü” münasibətilə təbrik edib. E.Nəsibov çıxışı zamanı savadlı və bacarıqlı gənclərin dəstəklənməsinin Fond üçün prioritet istiqamətlərdən biri olduğunu bildirib və bu işdə tərəfdaş qurumlar ilə əməkdaşlığın vacibliyini vurğulayıb.
Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova layihənin “Hacı Zeynalabdin Tağıyevin Qızlar Məktəbinin 100 illiyi” tədbirləri çərçivəsində formalaşması və onun ənənəsini davam etdirmək məqsədi daşıması barədə məlumat verib.
Elm və Təhsil nazirinin müşaviri Nicat Məmmədli layihəni xüsusi qiymətləndirərək sağlam ruhlu cəmiyyətin formalaşmasında savadlı qadınların birbaşa rolundan bəhs edib. Qadınların elmə verdikləri töhfələri vurğulayan N.Məmmədli iki müxtəlif istiqamət üzrə Nobel mükafatına layiq görülən yeganə şəxsin məhz zərif cinsin nümayəndəsi olması barədə də danışıb.
Elm və Təhsil Nazirliyi yanında İctima Şuranın sədri Günel Səfərova İkinci Qarabağ müharibəsi zamanı gənclərimizin göstərdikləri şücaət və qəhrəmanlıqları xatırladaraq təhsilli, peşəkar mütəxəssislərə müharibədən sonrakı dövrdə daha çox ehtiyac olduğunu bildirib.
Tədbir ATİAHİ Respublika Komitəsinin sədr müavini Mirzə Cəfərzadə, Elm və Təhsil Nazirliyi yanında İctimai Şuranın üzvləri Pərvanə Məmmədova və Məleykə Əlizadənin çıxışları ilə davam edib.
Görüşün yekununda tələbə qızlar təhsildəki uğurları, gözləntiləri və gələcək planlarını tədbir iştirakçıları ilə bölüşüblər, göstərilən qayğıya görə təşkilatçılara minnətdarlıqlarını bildiriblər.
1 Fevral 2023-cü il tarixində Təhsilin İnkişafı Fondu “Universitetlərin elmi-pedaqoji heyət üzvləri və təhsilalanların IELTS imtahanına təşviq edilməsi” layihəsi çərçivəsində işçi görüş keçirib.
Görüşdə tərəfdaş qurumlar olaraq, Təhsildə Keyfiyyət Təminatı Agentliyi, Bakı Dövlət Universiteti, Azərbaycan Dövlət Neft və Sənaye Universiteti, Azərbaycan Dövlət Pedaqoji Universiteti, Azərbaycan Texniki Universiteti, Azərbaycan Memarlıq və İnşaat Universiteti və Azərbaycan Dövlət Mədəniyyət və İncəsənət Universitetinin nümayəndələri iştirak edib.
Tədbiri giriş sözü ilə açan Təhsilin İnkişafı Fondunun İdarə Heyətinin sədri Elnur Nəsibov Fondun məqsədləri, strateji hədəfləri, fəaliyyət istiqamətləri, icra vəziyyətində olan layihələr barədə tədbir iştirakçılarını məlumatlandırıb.
Fondun inzibati idarəetmə şöbəsinin müdiri Ramin Cəfərov proqramın icrası, müraciətlər, kvotalar, tələb olunan sənədlər, rüsumların ödəniş prosedurları barədə ətraflı izah edib və iştirakçıları maraqlandıran suallara cavab verib.
Qeyd edək ki, sözügedən layihə çərçivəsində IELTS imtahanında iştirak edən və yüksək bal toplayan 300-dək akademik heyət üzvü və tələbənin bu imtahan üzrə rüsumları Təhsilin İnkişafı Fondu tərəfindən qarşılanır.
Təhsilin İnkişafı Fondunun İdarə Heyətinin sədri Elnur Nəsibov Karyera və İşə Hazırlıq Mərkəzinin qonağı olub.
E.Nəsibov Mərkəzin fəaliyyəti ilə yaxından tanış olub, işçi və təcrübəçi heyəti üçün “Karyera planlaması” mövzusunda maarifləndirici təqdimatla çıxış edib.
Görüş çərçivəsində Təhsilin İnkişafı Fondu və Karyera və İşə Hazırlıq Mərkəzi arasında əməkdaşlıq perspektivləri də müzakirə edilib.
Qeyd edək ki, Mərkəz tərəfindən tələbələrə mühasibatlıq, insan resurslarının idarə olunması, pedaqoqika, İKT və digər sahələr üzrə praktiki təlimlər təşkil olunur, tələbələrin iş ilə təmin olunması istiqamətində dəstək göstərilir.
Yanvarın 25-də Azərbaycan Dövlət Pedaqoji Universitetində (ADPU) Təhsilin İnkişafı Fondu (TİF), Təhsildə Keyfiyyət Təminatı Agentliyi (TKTA) və Britaniya Şurası (BŞ) ilə tərəfdaşlıq əsasında təşkil olunan IELTS imtahanlarında iştirak edən universitetin bir qrup müəllim və tələbələrinə sertifikatların təqdim olunması mərasimi keçirilib. Mərasimdə ADPU rəhbərliyi, müvafiq qurumların əməkdaşları, universitetin Filologiya fakültəsinin müvafiq struktur rəhbərləri və namizəd müəllim və tələbələr iştirak ediblər.
Açılış nitqi ilə çıxış edən ADPU-nun rektoru professor Cəfər Cəfərov deyib: “Pedaqoji Universitetlə Təhsildə Keyfiyyət Təminatı Agentliyi və Təhsilin İnkişafı Fondu arasında imzalanmış əməkdaşlıq müqaviləsi əsasında insan kapitalının formalaşdırılmasının gücləndirilməsi və istedadlı tələbələrin ingilis dilini mənimsəməsi məqsədilə universitetimizin bir qrup müəllim və tələbəsi üçün IELTS imtahanı təşkil edilmişdır. Britaniya Şurasının təşkilatçılığı ilə keçirilən imtahanda universitetdaxili müsabiqə əsasında seçilmiş 9 müəllim və 10 tələbə iştirak etmiş və hər biri yüksək nəticə ilə beynəlxalq dil sertifikatı qazanmışdır. Cari il ərzində daha artıq tələbənin imtahanlara cəlb olunması nəzərdə tutulur.”
Təhsilin İnkişafı Fondunun İdarə Heyətinin sədri Elnur Nəsibov, Təhsildə Keyfiyyət Təminatı Agentliyinin İdarə Heyətinin sədri Ülkər Səttarova və Britaniya Şurasının Cənubi Qafqaz üzrə İmtahanlar Meneceri Nərgiz Əkbərova qeyd ediblər ki, bu imtahanların təşkilində məqsəd universitetlərdə beynəlxalq dil sertifikatlarının təşviqi, gələcəkdə tədris prosesində IELTS sertifikatı kimi akkreditasiya olunmuş beynəlxalq dil sertifikatına malik olan tələbələrin müvafiq proqramların tədrisindən azad olunmalarını stimullaşdırmaqdır. Xüsusilə vurğulanıb ki, ötən ilin sonunda 6 dövlət ali təhsil müəssisəsi ilə birgə icra olunan layihənin ilk ilində Pedaqoji Universitetdən namizədliyi irəli sürülmüş bütün müəllim və tələbələr yüksək nəticə ilə IELTS sertifikatı almağa müvəffəq olmuşlar və növbəti illərdə də layihə davam etdiriləcək.
Daha sonra müəllim və tələbələrə müvafiq sertifikatlar təqdim olunub.
Sertifikatların təqdimatından sonra qonaqlar ADPU-da qış imtahan sessiyasının gedişi, imtahanların nəticələrinin yoxlanılması və apellyasiya prosesi ilə yaxından tanış olub, imtahanların yüksək səviyyədə təşkilindən məmnunluqlarını ifadə ediblər.
