Category: Xəbərlər

Bu gün BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində “Təhsil və təqaüdlərin Dayanıqlı İnkişaf Məqsədlərinə nail olunmasında rolu” mövzusunda müzakirə keçirilib.

Müzakirədə çıxış edən Təhsilin İnkişafı Fondunun İdarə Heyətinin sədri Elnur Nəsibov iqlim dəyişikliklərinin təhsilə təsirinin aktual məsələlərdən biri olduğunu vurğulayıb. Fond sədri TİF-in tərəfdaşları sırasında “NEQSOL Holding”, STP Şirkətlər Qrupu, SOCAR, bp kimi böyük enerji şirkətlərinin olduğunu və onların hər birinin siyasətində yaşıllaşdırma, təhsil vasitəsilə maarifləndirilmənin artırılması, yaşıl bacarıqların, dəyərlərin formalaşdırılması sahəsində mühim addımlar atdıqlarını diqqətə çatdırıb. Xüsusi ilə təhsil sahəsində dövlət-özəl əməkdaşlığının önəmini vurğulayan Elnur Nəsibov, maraqlı tərəfləri bu sahədə birgə tərəfdaşlığa dəvət edib.

“NEQSOL Holding Azərbaycan” ofisinin rəhbəri İmran Əhmədzadə iqlim dəyişikliklərinin aradan qaldırılmasında təhsilin vacib rolunun olduğunu vurğulayıb. O qeyd edib ki, “NEQSOL Holding” hər zaman təhsillə bağlı təşəbbüsləri dəstəkləyib. “NEQSOL Holding” Azərbaycanda bir neçə təhsil müəssisəsinin təmirini həyata keçirib, tələbələrə təqaüdlərin verilməsində iştirak edib. Təhsilin İnkişafı Fondu ilə birgə həyata keçirilən “Parla” təqaüd və inkişaf proqramının da təhsilə dəstək sahəsində uğurlu nümunələrdən biri olduğu vurğulanıb. İ.Əhmədzadənin təhsillə bağlı məsələlərin həllinin təkcə dövlətin üzərinə düşməli olduğunu deyil, özəl qurumların da bu istiqamət üzrə təşəbbüskar olmalarını və dövlətlə sıx əməkdaşlıq etmələrini bildirib.

Ümumdünya Səhiyyə Təşkilatı Fondunun Baş icraçı direktoru Anil Soni insanların, xüsusilə gənclərin bəzən özlərini iqlim dəyişikliyinin təsirlərindən kənarda, gücsüz hiss etdiklərini qeyd edib. Bu təsirlərin aradan qaldırılması üçün hazırda yeni imkanların axtarıldığını vurğulayan Anil Soni əlavə edib ki, hamı iqlim dəyişikliyinin şiddətləndirici təsirinin olmaması üçün çalışmalı, bunun üçün hansı imkanlar yarada biləcəyini araşdırmalıdırlar. Anil Soni bütün bu məsələlərin bir fərd və ya bir qrup tərəfindən təkbaşına həll edilə bilməyəcəyini və insanları potensiallarının imkanlarından daha geniş istifa edərək,  bu çağırışlara cavab verməyə səsləyib.

“NEQSOL Holding”in departament rəhbəri Dilarə Cəfərli tədqiqatlara əsasən, yoxsulluğun aradan qaldırılmasında təhsilin dəyişdirici güc olduğunu, qızlara təhsilverən məktəblərin icmaları “yoxsulluğun amansız dövründən” “imkanlar dövrü”nə qədər inkişaf etdirdiyini bildirib.  Dilarə Cəfərli qızlara təhsilin verilməsi ilə bağlı təşəbbüslərin davamlı təsirlər yaratdığını, o cümlədən iqtisadi şəraitin, sağlamlıq göstəricilərinin yaxşılaşdırılması və cəmiyyətin rifahının gücləndirilməsinə töhfə verdiyini vurğulayıb.

Tədbirdə daha sonra iştirakçıların mövzu ilə bağlı sualları cavablandırılıb.

Qırmızı Ürəklər Fondu və Təhsilin İnkişafı Fondu arasında Əməkdaşlıq Memorandumu imzalanıb. Sənədi Təhsilin İnkişafı Fondunun İdarə Heyətinin sədri Elnur Nəsibov və Qırmızı Ürəklər Fondunun prezidenti Yusif Poladov imzalayıblar.

Memorandumun məqsədi təhsil sisteminin inkişafına yönəlmiş proqram və layihələr üzrə əməkdaşlığın qurulması, eləcə də tələbələr üçün uzunmüddətli təqaüd proqramının təsis edilməsi və həyata keçirilməsidir.

Təhsilin İnkişafı Fondunun İdarə Heyətinin sədri Elnur Nəsibov Fondun həyata keçirdiyi layihələr barəsində ətraflı məlumat verərək, sırf təqaüd layihələrinə hər zaman xüsusi diqqətin ayrıldığını bildirib. Belə ki, Fondun ilk layihələrindən birinin məhz “Hənifə Məlikova-Zərdabi adına gənc qızların təhsilinə dəstək” təqaüd proqramının olduğu, ilkin olaraq qızların sayının 25, qısa müddət ərzində isə artıq 300-dək çatdığı vurğulanıb.  

Qırmızı Ürəklər Fondunun prezidenti Yusif Poladov Fondun artıq üçüncü ildir ki, sosial həssas qruplardan olan gənclərin təhsilini dəstəkləyən “Qırmızı Ürəklər Təhsil Təqaüdü Proqramı”nı həyata keçirildiyini və bu günə qədər 51 nəfər tələbənin proqramdan yararlandığını qeyd edib. Yusif Poladov proqramın əsas məqsədinin savadlı və istedadlı gənclərin inkişafına dəstək olmaq, gələcəkdə cəmiyyətə faydalı vətəndaşlar yetişdirmək olduğunu vurğulayıb.

Qeyd edək ki, Qırmızı Ürəklər Fondunun başlatdığı “Onu oxut” ianə toplama aksiyası çərçivəsində 2024/2025-ci tədris ilindən etibarən Təhsilin İnkişafı Fondu ilə birgə 600-dən yuxarı bal toplamış 23 nəfər birinci kurs tələbəsinə təhsil müddətində aylıq 200 manat təqaüd veriləcəkdir.

Bakı Mühəndislik Universitetində (BMU) Təhsilin İnkişafı Fondu (TİF), Kapital Bank və “Visa” beynəlxalq ödəmə texnologiyaları şirkətinin tələbələr üçün birgə layihəsi olan “TələbəPlus” kartlarının təqdimetmə mərasimi keçirilib.

BMU-nun rektoru Yaqub Piriyev tədbirdə iştirak edən hər üç qurumun nümayəndə heyətinə qısa müddətdə reallaşdırılan bu layihəyə görə təşəkkürünü bildirib və güzəştli kartların universitet tələbələri tərəfindən məmnunluqla qarşılandığını deyib. Rektor bütün ali məktəblərin tələbələrinə endirim, güzəşt və keşbek imkanları yaradan kartların sosial dəstək xarakteri daşıdığını təqdir edib, gənclər üçün perspektivdə daha əlverişli layihələrin, ideya və təşəbbüslərin irəli sürüləcəyinə inandığını söyləyib. Rektor çıxışında universitetin inkişafı barədə, habelə nəzərdə tutulan tələbəyönümlü layihələr haqda da məlumat verib.

TİF-in İdarə Heyətinin sədri Elnur Nəsibov çıxışında beynəlxalq təcrübə əsasında nüfuzlu tərəfdaşlarla birgə həyata keçirilən bu layihə istiqamətində universitetlərlə imzalanmış əməkdaşlıq müqavilələrini xatırladaraq, qısa zamanda ölkə üzrə bütün tələbələr üçün kartların hazırlandığını, həmin kartların tez bir vaxtda paylanılacağını diqqətə çatdırıb. BMU-nun kartların paylanıldığı ilk universitetlərdən biri olduğunu önə çəkən Fond sədri tələbələrə hazırda güzəştin tətbiq olunduğu və gələcək üçün nəzərdə tutulan xidmət sahələrini sadalayaraq, imtiyazlarda məqsədin tələbə məmnuniyyəti yaratmaq, gənclərin tələbəlik həyatını asanlaşdırmaq, sosial rifahına dəstək göstərmək olduğunu deyib. Əlavə edilib ki, irəli mərhələdə vahid tələbə kartlarından peşə və orta ixtisas təhsili müəssisələrində təhsilalanlar, növbəti tədris ilində isə təhsil sahəsində çalışan əməkdaşların da faydalanması üçün işlər aparılır.

Sonra universitetə yüksək balla qəbul olan I kurs tələbələrinin bir qisminə  “TələbəPlus” kartları təqdim edilib.

5 noyabr tarixində Təhsilin İnkişafı Forumunda iştirak edən könüllülər Təhsilin İnkişafı Fondunun qonaqları olublar.

Təhsilin İnkişafı Fondunun İdarə Heyətinin sədri Elnur Nəsibov könüllülük fəaliyyətinin gənclərin müxtəlif sahələr üzrə təcrübə qazanması və mühüm biliklərə yiyələnməsi baxımından əhəmiyyətini qeyd edərək, “Bir Könüllü” Tələbələrin Əməkdaşlığı İctimai Birliyinin könüllülərinə Təhsilin İnkişafı Forumu zamanı göstərdikləri dəstəyə görə  təşəkkür edib, onlara fəaliyyətlərində müvəffəqiyyətlər diləyib.

Müzakirələrlə davam edən görüşün sonunda könüllülər 8 oktyabr 2024-cü il tarixində ümummilli lider Heydər Əliyevin 101 illiyinə həsr olunan Təhsilin İnkişafı Forumunda aktiv könüllü fəaliyyətinə görə təltif ediliblər.

Xatırladaq ki, “Tərəfdaşlıqdan Tərəqqiyə” şüarı ilə təşkil olunan forumun keçirilməsində əsas məqsəd dövlət-universitet-sənaye tərəfdaşlığının dayanıqlı və davamlı inkişafına töhfə verməkdir. Forum hər il dövlət-özəl tərəfdaşlığı, təhsilin iqtisadiyyata inteqrasiyası və universitet-sənaye əməkdaşlığına dair ən vacib məsələlərin müzakirəsi üçün faydalı platforma təmin edir.

Bakı Dövlət Universitetində (BDU) “TələbəPlus” kartlarınun təqdimetmə mərasimi keçirilib. “TələbəPlus” kartları ilk dəfə olaraq BDU-nun 14 tələbəsinə təqdim olunub.

Mərasimdə çıxış edən BDU-nun rektoru Elçin Babayev Təhsilin İnkişafı Fondu (TİF), Kapital Bank və “Visa” beynəlxalq ödəmə texnologiyaları şirkətinin birgə reallaşdırdığı bu layihənin gənclərin təhsil həyatında önəmli rol oynayacağını bildirib. Təhsilin İnkişafı Fondunun yarandığı gündən etibarən tələbəyönümlü müxtəlif layihələr həyata keçirdiyini diqqətə çatdıran rektor, “TələbəPlus” kartlarının verilməsini də bu uğurlu layihələrdən biri hesab edir. Elçin Babayev ali təhsil müəssisələrinin yaradılan imkandan kifayət qədər bəhrələnəcəyini, bu kartların tələbələrə ən müxtəlif istiqamətlərdə geniş imtiyazlar təqdim edəcəyini, tələbələrin təhsil, səhiyyə, mədəniyyət və digər xidmətlərlə bağlı endirimlərdən faydalana biləcəklərini vurğulayıb. 

TİF-in İdarə Heyətinin sədri Elnur Nəsibov “TələbəPlus” kartlarının ilk istifadəçiləri olan BDU tələbələrini təbrik edib. O, bir ildən artıq üzərində çalışdıqları layihənin artıq reallaşdığını və tədbirdə iştirak edən tələbələrin “TələbəPlus” kartlarının ilk istifadəçiləri olacaqlarını diqqətə çatdırıb. Elnur Nəsibov Təhsilin İnkişafı Fondunun daim dövlət-özəl tərəfdaşlığı, universitet-sənaye işbirliyinə xüsusi önəm verdiyini və bu layihənin də dövlət-özəl tərəfdaşlığının uğurlu nümunəsi olduğunu qeyd edib. Layihənin növbəti mərhələsində peşə və orta ixtisas təhsilinə də şamil ediləcəyini bildirən sədr növbəti tədris ilində təhsil sahəsində çalışan əməkdaşların da layihədən yararlana biləcəklərini vurğulayıb.

Fondun İdarə Heyətinin sədri diqqətə çatdırıb ki, indiyədək 200-dən artıq şirkətdə geyim, yemək, qida sahələri üzrə tələbələrin ən çox müraciət etdikləri yerlərdə güzəşt və imtiyazların, endirimlərin edilməsinə nail olunub. Mədəniyyət Nazirliyi ilə imzalanan müqaviləyə əsasən, mədəniyyət obyektləri, muzeylər, sərgi salonlarından istifadədə də güzəştlər olacaq. Gələcəkdə idman, səhiyyə, nəqliyyat sahələrində də xidmətlər “TələbəPlus”a qoşulacaq. 

“Kapital Bank”ın Korporativ satışlar departamentinin direktoru Qara Əbdülrəhmanov, ölkənin maliyyə qurumları arasında ən böyük işəgötürən şirkətlərindən biri olan Kapital Bankın hər zaman təhsilə xüsusi diqqət ayırdığını vurğulayıb. Tələbələri təbrik edən Qara Əbdülrəhmanov maliyyə savadlılığının müasir dövrümüzdə peşəsindən, sosial statusundan asılı olamayaraq hər kəs üçün aktual bir mövzu olduğunu bildirib. O, “TələbəPlus” kartının tələbələrə xüsusi imtiyazlar təqdim etməklə yanaşı, onların gündəlik həyatlarını daha rahat və rəqəmsal bir müstəviyə keçirəcəyini,  gündəlik xərclərini daha səmərəli şəkildə izləmək fürsəti yaradılacağını diqqətə çatdırıb.

 “Visa”nın Azərbaycan üzrə ölkə meneceri Nurlan Hacıyev isə bildirib ki, təhsil sahəsi və insan kapitalının inkişafı hər zaman şirkətin diqqət mərkəzindədir. O, rəqəmsal ödəmələrdə dünya lideri olan “Visa” beynəlxalq ödəmə texnologiyaları şirkətinin Azərbaycan təhsilinə dəstək göstərməyə hər zaman hazır olduğunu qeyd edib və bu layihənin bir hissəsi olmasından məmnunluq hissini bildirib.

“TələbəPlus” kartı təqdim edilən “Hüquqşünaslıq” ixtisası üzrə I kurs tələbəsi Məhəmməd Qasımov layihənin ərsəyə gəlməsində iştirak edən qurumlara təşəkkürünü bildirib.

Tədbirin sonunda qəbul imtahanlarında ən yüksək bal toplayaraq BDU-ya qəbul olan 14 I kurs tələbəsinə “TələbəPlus” kartı təqdim olunub.

TələbəPlus kartı ilə bağlı ətraflı məlumat: https://bit.ly/48Ep0Vl

Azərbaycan Texnologiya Universitetinin (ATU) təşkilatçılığı, Təhsilin İnkişafı Fondunun, “Coca-Cola” və “ATS Food” şirkətlərinin dəstəyi ilə “Zəfərimiz əbədidir” adlı regional intellektual yarış keçirilib.

Azərbaycan Respublikasının Dövlət Himninin səsləndirilməsi, Vətənimizin ərazi bütövlüyü uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə başlayan tədbirdə Texnologiya Universitetinin rektoru v.m.i.e. dos. Yaşar Ömərov yarış iştirakçılarını salamlayıb, tədbirin ənənəvi olaraq hər il keçirildiyini bildirərək komandalara uğurlar arzu edib.

Yarışda respublikanın 16 ali və orta ixtisas təhsili müəssisəsinin komandaları iştirak edib. Suallar əsasən Ulu Öndər Heydər Əliyevin fəaliyyəti, Zəfər tarixi və ümumi dünyagörüşü ilə bağlı olub.

3 mərhələdən ibarət yarış Qarabağ Universiteti tələbələrinin qalibiyyəti ilə yekunlaşıb. İntellektual oyunda ikinci yeri Azərbaycan Dövlət Aqrar Universiteti, üçüncü yeri isə Bakı Dövlət Universitetinin Qazax filialının tələbələri tutub.

Qalib komandalara kubok və pul mükafatı verilib.

Qeyd edək ki, yarışın keçirilməsində məqsəd gənclərin intellektual səviyyəsinin inkişaf etdirilməsinə, o cümlədən, tariximiz və milli-mənəvi dəyərlərimiz haqqında biliklərinin genişləndirilməsinə imkan yaratmaq, asudə vaxtlarının səmərəli keçməsinə nail olmaqdır.

Təhsilin İnkişafı Fondunun İdarə Heyətinin sədri Elnur Nəsibov Naxçıvan Muxtar Respublikası Təhsil Nazirliyində təcrübə keçən “Maarifçi”lərlə görüşüb.

Görüş zamanı Elnur Nəsibov gənclərə Təhsilin İnkişafı Fondunun fəaliyyəti, həyata keçirilən layihələr haqqında məlumat verib, onları bu layihələrdə fəal iştirak etməyə səsləyib. E.Nəsibov tələbələri “Maarifçi” proqramında qalib gəlməri münasibətilə bir daha təbrik edib, onlara uğurlar arzu edib və sözügedən proqram çərçivəsində həyat üçün vacib təcrübə qazanacaqlarına inandığını bildirib.

“Maarifçi”lər Naxçıvan Muxtar Respublikası Təhsil Nazirliyinin Vətəndaşlara xidmət və sənədlərlə iş, Ümumi təhsil və Maliyyə sektorlarında təcrübə keçirlər. Onlar kommunikasiya və əməkdaşlıq qabiliyyətlərinin inkişaf etdirilməsi məqsədilə Direktorların İşə Qəbulu müsabiqəsinin təşkilati işlərinə cəlb olunmaları, qeydiyyat, koordinasiya, sənədləşmə proseslərində fəal iştirak etdiklərindən bəhs ediblər. Gənclər belə bir fürsətin yaradıldığı üçün ETN və TİF-ə öz təşəkkürlərini bildirib, proqramın onların şəxsi və peşəkar inkişafında müsbət təsirini vurğulayıblar.

Qeyd edək ki, 37 nəfər “Maarifçi” tələbə-məzun təcrübə proqramında iştirak hüququ qazanıb. 3 ay davam edəcək proqram çərçivəsində iştirakçılar Elm və Təhsil Nazirliyi, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçirlər.

Proqramın məqsədi tələbə və məzunlara nəzəri biliklərini real iş mühitində tətbiq etmək və təcrübə imkanı yaratmaq, iştirakçıların bilik və bacarıqlarını artırmaq, eləcə də gənclərə peşəkar vərdişlər qazandırmaqdır.