Category: Xəbərlər

Daha 1000 nəfər istifadəçi “4Sİ Akademiyası” çərçivəsində Coursera platformasında 6 həftəlik təlimlərə başlayır. Beləliklə layihə başladığı tarixdən (15 sentyabr 2023-cü il) bu günə kimi 8000 nəfər təlimlərdən faydalanıb.

Yeni istifadəçilərdən 546 nəfər ölkəmizin orta təhsil müəssisələrində İnformasiya Kommunikasiya Texnologiyaları və STEAM sahəsində tədrislə məşğul olan müəllimlərdir. Digər istifadəçilər Azərbaycan Milli Elmlər Akademiyası, SABAH.HUB ekosistemindən olan startapların təmsilçiləri, Dördüncü Sənaye İnqilabının Təhlili və Koordinasiya Mərkəzinin keçirdiyi müxtəlif müsabiqələrin qalibləri və hazırda aktiv iş axtarışında olan şəxslərdir.

“4Sİ Akademiyası”nın istifadəçiləri bu günə kimi 2700-ə yaxın kursu uğurla bitirərək Coursera platformasında sertifikatlar əldə ediblər. Platforma istifadəçiləri 4-cü Sənaye İnqilabının komponentləri olan “Süni İntellekt və Maşın Öyrənməsi”, “Blokçeyn texnologiyaları” kimi mövzular üzrə 16764, “Şəxsi inkişaf” üzrə 7365 və “Karyera və dil bilikləri” üzrə 2125 kursu dinləyib.

Hazırda Coursera platformasında 2600-dən çox kurs süni intellekt vasitəsilə Azərbaycan dilinə tərcümə olunub və istifadəçilər ana dilimizdə alt yazı ilə kursun materialını izləyə bilir.

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi, Elm və Təhsil Nazirliyinin tabeliyində Təhsilin İnkişafı Fondu və ABŞ-nin “Coursera” şirkətinin birgə əməkdaşlığı ilə həyata keçirilən “4Sİ Akademiyası” layihəsi çərçivəsində onlayn təhsil platforması olan “Coursera”-da 4-cü sənaye inqilabı komponentləri olan süni intellekt, böyük verilənlər (Big Data), maşın öyrənməsi, blokçeyn və bulud texnologiyaları, həmçinin, liderlik, kommunikasiya və ingilis dili bacarıqları da daxil olmaqla 40 nüfuzlu universitetin və aparıcı texnologiya şirkətlərinin 800-ə yaxın kursu tam ödənişsiz təqdim olunur.

Bakı Dövlət Universitetində (BDU) Təhsilin İnkişafı Fondunun təşkilatçılığı ilə IELTS imtahanında uğur qazanmış tələbələrin təltifolunma mərasimi keçirilib.

Mərasimdə çıxış edən BDU-nun rektoru Elçin Babayev qeyd edib ki, universitetlərin elmi-pedaqoji heyət üzvləri və təhsilalanların IELTS imtahanına təşviq edilməsini hədəfləyən layihənin icrasına 2022-ci ilin oktyabr ayından başlanılıb. Layihənin əsas məqsədi təhsilin keyfiyyətini, xarici dil biliklərinin səviyyəsini yüksəltməkdir. Rektor bunun tələbələr üçün böyük fürsət, dövlətin gənclərə qayğısının daha bir bariz nümunəsi olduğunu vurğulayıb: “Xarici dillərin, o cümlədən elm, inkişaf dili sayılan ingilis dilinin öyrənilməsi günün tələbidir. Bunu nəzərə alaraq BDU-da dövlət-özəl əməkdaşlığı formatında “You will speak” Dil Mərkəzi yaradılıb”.

Təhsilin İnkişafı Fondunun İdarə Heyətinin sədri Elnur Nəsibov isə bu layihənin tələbələrin inkişafı üçün böyük əhəmiyyət daşıdığını bildirib. O qeyd edib ki, 3 il əvvəl Təhsilin İnkişafı Fondu və Təhsildə Keyfiyyət Təminatı Agentliyinin birgə icra etdiyi layihənin 6 tərəfdaş ali təhsil müəssisəsi (Bakı Dövlət Universiteti, Azərbaycan Dövlət Neft və Sənaye Universiteti, Azərbaycan Dövlət Pedaqoji Universiteti, Azərbaycan Texniki Universiteti, Azərbaycan Memarlıq və İnşaat Universiteti və Azərbaycan Dövlət Mədəniyyət və İncəsənət Universiteti) vardı. Artıq Bakı Slavyan Universiteti, Bakı Mühəndislik Universiteti və Sumqayıt Dövlət Universiteti də layihəyə qoşulub. Layihə çərçivəsində IELTS imtahanında iştirak edən və yüksək bal toplayan 350-dək akademik heyət üzvü və tələbənin bu imtahan üzrə ödənişləri Təhsilin İnkişafı Fondu tərəfindən qarşılanır.

Təhsildə Keyfiyyət Təminatı Agentliyinin İdarə Heyətinin sədri Tural Əhmədov imtahanda uğur qazanan tələbələri təbrik edib. O bildirib ki, elmi-pedaqoji heyətin və təhsilalanların dil biliklərinin yüksək olması onların özlərinin, təmsil etdikləri ali təhsil müəssisəsinin və ölkənin inkişafına fayda verir. Təsadüfi deyil ki, ötən il Dövlət Proqramı çərçivəsində 49 gəncimiz dünyanın ən yaxşı 10 universitetinə qəbul olunub.

Sonda BDU-nun IELTS imtahanında uğurlu nəticə göstərən 17 tələbəsinə müvafiq sertifikatlar təqdim olunub.

Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə icra olunan “Maarifçi” tələbə-məzun təcrübə proqramı başa çatıb. 

İyulun 1-də elm və təhsil naziri Emin Əmrullayev təcrübə proqramının iştirakçıları ilə görüş keçirib. Görüşdə ali təhsil müəssisələrinin rektorları da iştirak ediblər. 

Əvvəlcə “Maarifçi” tələbə-məzun təcrübə proqramına dair videoçarx nümayiş olunub.  

Daha sonra çıxış edən Emin Əmrullayev sözügedən proqramın gənc kadrların dövlət qulluğunu düzgün anlaması, istedadlı gənclərin dövlət qurumlarında işləməyə həvəs göstərməsi baxımından faydalı olduğunu qeyd edib və iştirakçılara uğurlar arzulayıb.  

Çıxış edən proqram iştirakçıları da öz növbəsində proqram sayəsində öyrəndikləri bilik və bacarıqların onların karyera hədəflərində mühüm rol oynayacağını dilə gətiriblər.

Görüş çərçivəsində “Maarifçi”lərin proqram müddətində fəaliyyətləri, onların ictimai iştirakçılığın təmin olunmasında rolu, gənclərin karyera inkişafı və digər məsələlər haqqında fikir mübadiləsi də aparılıb, həmçinin təkliflər dinlənilib.  

Sonda proqram iştirakçılarına sertifikatlar təqdim edilib, xatirə şəkli çəkdirilib. 

Qeyd edək ki, Elm və Təhsil Nazirliyi, eləcə də qurumlarında təcrübə imkanları yaradan və 3 ay davam edən “Maarifçi” proqramını 25 nəfər müvəffəqiyyətlə bitirib. Proqramın təşkilində məqsəd elm və təhsil sahəsində insan resurslarının formalaşdırılması, praktiki fəaliyyətlə tələbə və məzunların sahəvi bilik, bacarıqlarının artırılması, onların təhsil sahəsində müasir yanaşmaları öyrənmələri, həmçinin təhsil islahatlarının həyata keçirilməsi prosesinə dəstək göstərmək olub.

“Azərbaycan Hava Yolları” QSC-nin Milli Aviasiya Akademiyasının və Təhsilin İnkişafı Fondunun nümayəndələri arasında görüş keçirilib.

Görüşün əsas məqsədi Milli Aviasiya Akademiyası və Təhsilin İnkişafı Fondunun qarşılıqlı əməkdaşlığı ilə sənaye və ali təhsil müəssisələri arasında mövcud boşluqların müəyyən edilməsi və onların aradan qaldırılması olub. Təhsilin İnkişafı Fondunun dəstəyi ilə sənaye nümayəndələri cəlb edilərək Milli Aviasiya Akademiyasının maddi texniki bazasının və tədris laboratoriyalarının təkmilləşdirilməsi, birgə layihələrin icrası və ümumilikdə Akademiya və Fond arasında əməkdaşlıq imkanları müzakirə edilib.

Görüşün nəticəsi olaraq müxtəlif istiqamətlər üzrə əməkdaşlıq üçün ilkin razılıqlar əldə edilib, görüşləri və müzakirələri mütəmadi olaraq davam etdirmək, birgə lahiyələrin icrası üçün təkliflərin hazırlanması qərarı verilib.

27 iyun tarixində Davamlı İnkişaf Mərkəzində Təhsilin İnkişafı Fondunun təşkilatçılığı ilə “VISA” beynəlxalq ödəmə texnologiyaları şirkəti tərəfindən ali təhsil müəssisələrinin rəhbər heyəti üçün universitetlərdə vahid tələbə kartının yaradılması layihəsinin təqdimatı keçirilib. Tədbirdə Elm və Təhsil Nazirliyinin tabeliyində olan, Fondla sıx əməkdaşlıq edən 9 universitetin nümayəndəsi iştirak edib.

Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq cari ilin mart ayında Bakıda keçirilən “Visa Cashless Forum 2024 – Rəqəmsal Azərbaycan” tədbirində “VISA” ilə əməkdaşlıq razılaşması imzalandığını deyib. O, bu əməkdaşlığın məqsədinin ölkə üzrə ali təhsil müəssisələrinin təhsilalanlarının sosial-maddi rifahının yaxşılaşdırılması istiqamətində bir sıra layihələrin həyata keçirilməsi olduğunu bildirib.

“VISA”nın Azərbaycan üzrə regional meneceri Nurlan Hacıyev şirkətin Azərbaycandakı fəaliyyətlərindən danışıb. O, mart ayında rəsmi olaraq Fondla əməkdaşlıqlarını elan etdiklərini və bundan sonra maraqlı layihələr həyata keçirəcəklərini deyib.

Daha sonra “VISA”nın Rəqəmsal təcrübə və təhsil fəaliyyətləri üzrə meneceri Anton Kuçma təqdimatla çıxış edib. O, tələbələr arasında aparılan araşdırmanın nəticələrini tədbir iştirakçıları ilə bölüşüb. Anton Kuçma yeni yaradılacaq tələbə kartlarının təhsilalanların dərsdənkənar fəaliyyətləri zamanı faydalana biləcəyi xüsusi imtiyazlara sahib olacağını qeyd edib.

Təqdimatın sonunda sual-cavab sessiyası keçirilib, yarana biləcək çətinliklər və risklər, eləcə də qarşılıqlı əməkdaşlıq çərçivəsində mümkün həll yolları müzakirə olunub.

13 iyun 2024-cü il tarixində Təhsilin İnkişafı Fondunun təşəbbüsü ilə Təhsilin İnkişafı Forumuna hazırlıq və universitet-sənaye tərəfdaşlığı çərçivəsində innovasiya ekosisteminin inkişafı məqsədilə Davamlı İnkişaf Mərkəzində dövlət və özəl sektor nümayəndələri və Tükiyənin “CATALYSADE Technology Transfer and Innovation Inc” şirkətinin təsisçisi və direktoru Sanem Yalçıntaş arasında görüş keçirilib.

Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq, onlara ötən il Fondun təşkilatçılığı ilə “Təhsildən tərəqqiyə” devizi ilə keçirilən Təhsilin İnkişafı Forumun əsas məqsədi barəsində bəhs edib. E.Nəsibov qonaqlara məruzəçini təqdim edərək, ötən gün eyni görüşün ali təhsil müəssisələrinin nümayəndələri ilə keçirildiyini diqqətə çatdırırb.

“CATALYSADE Technology Transfer and Innovation Inc”şirkətinin təsisçisi və direktoru Sanem Yalçıntaş “Azərbaycanda İnnovasiya Ekosistemi” mövzusunda geniş təqdimatla çıxış edib. Çıxışı zamanı innovasiya ekosisteminin aparıcı iştirakçılarının rolundan bəhs edən S.Yalçıntaş, bu sahədə müəyyən bir nəticəyə çatmaq üçün bütün maraqlı tərəflərin sıx əməkdaşlıq çərçivəsində fəaliyyət göstərməli olduğunu vurğulayıb.  Spiker bu əməkdaşlığın nümunəsi olaraq, ötən il baş tutan Təhsilin İnkişafı Forumunu misal çəkərək, bu il keçiriləcək sayca ikinci Təhsilin İnkişafı Forumda innovasiya ekosistemini inkişaf etdirməyə çalışacağımızı bildirib.

Daha sonra görüşdə iştirak edən dövlət və özəl qurumların nümayəndələri öz fəaliyyətləri, eləcə də Təhsilin İnkişafı Fondu ilə birgə həyata keçirilən layihələr barəsində ətraflı məlumat veriblər. Tədbir iştirakçıları innovasiya ekosistemi sahəsində mövcud olan çətinliklər və həll yolları istiqamətində interaktiv müzakirələr aparılıb.

Müzakirələrdə Dördüncü Sənaye İnqilabının Təhlili və Koordinasiya Mərkəzinin, Kiçik və Orta Biznes Subyektləri və Klublarının Assosiasiyasının, STP Şirkətlər Qrupunun, “AzerGold” QSC-nin, “SABAH.HUB”ın, Professional IT şirkətinin, Azərbaycan Banklar Assosiasiyasının, ABB-nin, Kapital Bankın, “Azər Türk Bank”-ın və “Yellow Bank”ın nümayəndələri iştirak ediblər.

12 iyun 2024-cü il tarixində Təhsilin İnkişafı Fondunun təşəbbüsü ilə Təhsilin İnkişafı Forumuna hazırlıq və universitet-sənaye tərəfdaşlığı çərçivəsində innovasiya ekosisteminin inkişafı məqsədilə Davamlı İnkişaf Mərkəzində ali təhsil müəssisələrinin nümayəndələri və Tükiyənin “CATALYSADE Technology Transfer and Innovation Inc” şirkətinin təsisçisi və direktoru Sanem Yalçıntaş arasında görüş keçirilib.

Açılış nitqi ilə çıxış edən Azərbaycan Texniki Universitetinin rektoru Vilayət Vəliyev qonaqları salamlayaraq,  ötən il keçirilən Təhsilin İnkişafı Forumu nəticəsində yaradılmış “Universitet-Sənaye Dialoq Platforması”nın faydalarından bəhs edib. Rektor bu görüşün 2024-cü ildə keçirilməsi planlaşdırılan “Təhsilin İnkişafı Forumu 2024”-ün hazırlığında mühüm rol oynadığını vurğulayıb.

Təhsilin İnkişafı Fondunun İdarə Heyətinin sədri Elnur Nəsibov ilk növbədə Azərbaycanın ali təhsil müəssisələrinin “QS World University Rankings” kimi nüfuzlu reytinqlərdə irəlləyişinin təqdirəlayiq olduğunu bildirib.  Universitet-sənaye işbirliyinin inkişaf etdirilməsi və innovasiya sisteminin inkişafı istiqamətində əməkdaşlıq əlaqələrinin qurulmasının əhəmiyyətindən bəhs edən E.Nəsibov elm və innovasiya istiqamətində faəliyyətin daha da gücləndirilməsi, eləcə də  birgə innovativ layihələrin həyata keçirilməsinin vacib olduğunu qeyd edib. Məhz bu səbəbdən “CATALYSADE Technology Transfer and Innovation Inc”şirkətinin təsisçisi və direktoru Sanem Yalçıntaşın növbəti görüşlərinin özəl şirkətlər ilə keçiriləcəyi bildirilib.

Elm və Ali Təhsil üzrə Dövlət Agentliyinin (EATDA) şöbə müdiri Samir Həmidov Təhsilin İnkişafı Fondunun gördüyü işləri yüksək qiymətləndirərək EATDA-nın bundan sonraki fəaliyyətlərdə də hər zaman olduğu kimi Fonda dəstək olacağını qeyd edib.

“CATALYSADE Technology Transfer and Innovation Inc”şirkətinin təsisçisi və direktoru Sanem Yalçıntaş sənaye sahəsində yetərincə təcrübəsi olduğunu, 2006-cı ildən universitet-sənaye əməkdaşlığı modelinin Türkiyədə qurulduğunu bildirib. “Azərbaycanda İnnovasiya Ekosistemi” mövzusunda geniş təqdimatla çıxış edən S.Yalçıntaş təqdimat sonrası ünvanlanan bütün sualları cavablandırıb. Görüş müzakirələrlə davam edib.

Masaətrafı müzakirələrdə Bakı Slavyan Universitetinin, Bakı Mühəndislik Universitetinin, Azərbaycan Texniki Universitetinin, Qarabağ Universitetinin, Azərbaycan Dövlət Neft və Sənaye Universitetinin, Azərbaycan Dövlət İqtisad Universitetinin, Sumqayıt Dövlət Universitetinin və Azərbaycan Texnologiya Universitetinin nümayəndələri iştirak ediblər.

6 iyun tarixində “Baku EduEXPO Beynəlxalq Təhsil sərgi-satış yarmarkası”nda iştirak edən şirkətlər ilə Təhsilin İnkişafı Fondu və 4SİM Azərbaycan arasında görüş keçirilib.

Görüşdə Təhsilin İnkişafı Fondunun İdarə Heyətinin sədr müavini Xanım Daşdəmirova, 4SİM Azərbaycanın Rəqəmsal İqtisadiyyat şöbəsinin rəhbəri Xəyalə Fətullayeva, Kiçik və Orta Biznes Subyektləri və Klublarının Assosiasiyasının (KOBSKA) sədri Nigar Ələsgərova, KOBSKA Təhsil Komitəsinin sədri Aysel Gülməmmədova və 20-dən çox şirkət nümayəndələri iştirak edib.

Görüş müddətində “Baku EduEXPO Beynəlxalq Təhsil sərgi-satış yarmarkası”nın yekun hesabatı üzərindən rəy və təkliflər dinlənilib və gələcəkdə keçirilməsi planlaşdırılan layihələrdə birgə əməkdaşlıq imkanları müzakirə olunub.

Təhsilin İnkişafı Fondu, Azərbaycan Mətbuat Şurası və “Azərbaycan müəllimi” qəzetinin birgə əməkdaşlığı çərçivəsində Təhsilin İnkişafı Fondunun yaradılmasının üçüncü ildönümü ilə bağlı “Qızların təhsilinə dəstək” mövzusunda media subyektlərinin (qəzet, jurnal, informasiya agentliyi, internet informasiya resursu) təmsilçiləri arasında yazı müsabiqəsi elan edilir.

Müsabiqənin mövzusu

Müsabiqə iştirakçıları qızların təhsili ilə bağlı mövcud duruma, imkanlara, göstərilən dəstəyə, yeni istiqamətlərə, təkliflərə və yanaşma yollarına diqqət yetirməlidirlər.

Müsabiqə üzrə mükafatlandırma

Müsabiqə üzrə 3 (üç) qalib müəyyənləşəcək:

I yer – Planşet Lenovo Tab M10

II yer – Planşet Lenovo Tab M9

III yer – Smartfon Motorolla G14

Müsabiqə şərtləri

Müsabiqəyə təqdim olunmuş yazılarda üstünlük veriləcək:

• Nəzərdə tutulan istiqamətləndirici mövzuların dolğun əhatə etmə səviyyəsinə;
• Analitik keyfiyyətlərə, faktların və məsələlərin düzgün təhlilinə;
• Faktlardan istifadə xüsusiyyətlərinə və yazının keyfiyyətinə;
• İfadə vasitələrinin zənginliyinə;
• Oxucu üçün informasiyalılıq dərəcəsinə;
• Qabaqcıl dünya təcrübəsi ilə məzmunlu müqayisənin aparılmasına.

Müsabiqəyə 7 iyun 2024-cü il tarixindən 5 iyul 2024-cü il tarixinədək qəzet, jurnal və informasiya agentliklərində, xəbər saytlarında yayımlanacaq analitik yazılar, müsahibələr buraxılacaq.

Müsabiqə üçün dil və janr məhdudiyyəti nəzərdə tutulmur.

Yazılar 9-11 min işarədən (1 A3 formatlı qəzet vərəqindən) çox olmamalıdır.

Qeyd 1: Yazılarda “Təhsilin İnkişafı Fondunun, Azərbaycan Mətbuat Şurasının və “Azərbaycan müəllimi” qəzetinin “Qızların təhsilinə dəstək” müsabiqəsinə təqdim olunur” qeydi olmalıdır.

Qeyd 2: Yazı materialının müəllifi kütləvi informasiya vasitəsində çalışmalıdır. Müsabiqə üçün təqdim ediləcək material müəllifin çalışdığı KİV-də yayımlanmalıdır.

Yazıların təqdim edilməsi

Müsabiqə üçün yazı materiallarının təqdimatı 2 yolla aparılır – şəxsən və elektron qaydada.

1. Yazılar şəxsən təqdim edilərkən təqdimat zərfində yer almalıdır:

• müəllifin kütləvi informasiya vasitəsində işlədiyini təsdiqləyən sənədin surəti;
• şəxsin şəxsiyyət vəsiqəsinin surəti;
• şəxsin əlaqə vasitələri – ev, iş telefonu və mobil telefonu;
• müsabiqə üçün verilmiş yazının dərc olunduğu qəzet və jurnalın 1 nüsxəsi,
• materialın yazılı formada A4 formatlı kağız vərəqində 3 nüsxəsi (nüsxələrdə müəllifinin adı göstərilməməlidir);
• diskdə materialın elektron forması (Times New Roman şriftində, müəllifin adı qeyd olunmaqla);

2. Yazılar elektron qaydada təqdim edilərkən aşağıdakılar nəzərə alınmalıdır. Təqdimat göndərişində yer almalıdır:

• Müsabiqə yazısı (“Word” faylında, imzasız);
• Müsabiqə yazısının dərc olunduğu qəzetin, jurnalın nüsxəsi (PDF, JPG, yaxud “Word” faylında);
• Yazı elektron media resursunda yayımlanıbsa, bunu təsdiqləyən link və sair vasitələr;
• Yazı materialının müəllifinin şəxsiyyət vəsiqəsi, iş vəsiqəsi və ya müəllifin KİV-də çalışdığını təsdiqləyən sənəd (PDF, JPG, yaxud “Word” faylında);
• Yazı müəllifinin əlaqə vasitələri (PDF, JPG, yaxud “Word” faylında).

Müsabiqə üçün materiallar həm şəxsən, həm də elektron poçt vasitəsilə 7 iyun 2024-cü il tarixdən 5 iyul 2024-cü il tarixinədək saat 17.00-dək qəbul ediləcək.

Şəxsən qəbul həmin tarixlərdə həftənin iş günləri saat 11.00-dan 17.00-dək Bakı şəhəri, Məmməd Araz 4 ünvanında (əvvəlki Teymur Əliyev 38 ünvanı) – Azərbaycan Mətbuat Şurasında həyata keçiriləcək.

Elektron qaydada təqdimat zamanı sadalanan sənədlər və müsabiqə yazısı info@presscouncil.az elektron ünvanına göndərilməlidir.

Qeyd: Təqdimat prosesində müsabiqə şərtlərinin hər hansı birinin yerinə yetirilməməsi qaydaların pozulması kimi qiymətləndiriləcək və yazı qəbul edilməyəcək.

Əlaqə: (+994 12) 441 35 96; (+994 50) 242 09 91; (+994 55) 789 85 03.

İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi (4SİM), Elm və Təhsil Nazirliyinin tabeliyində Təhsilin İnkişafı Fondu (TİF) və ABŞ-nin “Coursera” şirkətinin birgə əməkdaşlığı ilə həyata keçirilən “4Sİ Akademiyası” layihəsinin istifadəçiləri “Coursera” platformasında aparıcı şirkətlərin təlim və kurslarına maraq göstərirlər.

Platforma isitfadəçiləri ən çox “DeepLearning.AI” şirkətinin kurslarından istifadə ediblər. Layihə başlayandan bu günə qədər 254 nəfər bu şirkətin təqdim etdiyi təlimləri uğurla bitirərək sertifikat əldə edib. Onlardan 231 istifadəçi şirkətin “Süni İntellekt hamı üçün” proqramını başa vurub.

“IBM” şirkətinin təklif etdiyi kursları isə 240 nəfər uğurla bitirib. Şirkətin “Data elmi nədir?” proqramı üzrə 91 istifadəçi sertifikat əldə edib.

“Coursera” platformasında təklif olunan kurslar üzrə “4Sİ Akademiyası” istifadəçiləri tərəfindən əldə olunan sertifikat sayına görə şirkətlərin TOP 5-liyi belədir:

1. “DeepLearning.AI” – 254 sertifikat
2. “IBM” – 240 sertifikat
3. “Coursera” – 103 sertifikat
4. “Google” – 100 sertifikat
5. “Deep Teaching Solutions” – 75 sertifikat

“4Sİ Akademiyası” layihəsi çərçivəsində onlayn təhsil platforması olan “Coursera”da 4-cü sənaye inqilabı komponentləri, liderlik, kommunikasiya və ingilis dili bacarıqları da daxil olmaqla 40 nüfuzlu universitetin və aparıcı texnologiya şirkətlərinin 800-ə yaxın kursu təqdim olunur. Layihə başladığı tarixdən (15 sentyabr 2023-cü il) bu günə kimi 7000 nəfər ondan faydalana bilib.