2022-ci il sentyabrın 30-da Təhsilin İnkişafı Fondunun orta ixtisas təhsili üzrə strateji fəaliyyət istiqamətlərinin müzakirəsinə həsr olunmuş iclası keçirildi.
Tədbir elm və təhsil nazirinin müşaviri Nicat Məmmədli, nazirliyin elm, ali və orta ixtisas təhsili şöbəsinin əməkdaşı Səbinə Ənvərli, Fondun əməkdaşları və 35 orta ixtisas təhsili müəssisələrinin (kolleclərin) rəhbərlərinin iştirakı ilə baş tutdu.
Fondun İdarə Heyətinin sədri Elnur Nəsibovun TİF haqda təqdimatından sonra orta ixtisas təhsili müəssisələri ilə Fond arasında tərəfdaşlığa dair ətraflı müzakirələr aparıldı.
Kolleclərdə təhsilin əmək bazarı iştirakçılarının tələblərinə uyğunlaşdırılmasının vacibliyi, ali təhsilə keçidin təmin olunması, kolleclərin fəaliyyətlərinin əlaqələndirilməsi, davamlı inkişaf fəaliyyətlərinin qurulması üzrə səmərəli fikir mübadiləsi keçirildi.
Azərbaycan Gənclərinin Nailiyyəti (AGN) təşkilatının icraçı direktoru Sevinc xanım Məmmədova Təhsilin İnkişafı Fondunun qonağı olub.
AGN təşkilatı ölkənin 26 bölgəsində minlərlə gəncin iştirakı ilə sahibkarlıq, maliyyə savadılılığı və karyera hazırlığı istiqamətində müxtəlif layihələr həyata keçirib.
Bu müsbət təcrübənin genişləndirilməsi istiqamətdə Azərbaycan Gənclərinin Nailiyyətı təşkilatı və Təhsilin İnkişafı Fondu arasında tərəfdaşlıq imkanları müzakirə edildi.
Bu gün Elm və Təhsil Nazirliyi yanında İctimai Şuranın sədri Günel Səfərova, Şuranın üzvləri Gülməmməd Məmmədov, Pərvanə Məmmədova, Rüfət Əsədzadə, eləcə də Azərbaycan Respublikası Elm və Təhsil Nazirliyinin beynəlxalq əməkdaşlıq şöbəsinin sektor müdiri Müjdat Həsənov Təhsilin İnkişafı Fondunun qonağı olublar.
Təhsilin İnkişafı Fondunun İdarə Heyətinin sədri Elnur Nəsibov qonaqları salamladı və Fondun əsas məqsədləri, strategiyası, fəaliyyət istiqamətləri və gələcək planları haqqında qonaqlara məlumat verdi.
Daha sonra Müjdat Həsənov müxtəlif təhsil proqramları, o cümlədən Hökümətələrarası Təqaüd Proqramları (HTP) haqqında geniş təqdimat etdi. M.Həsənov HTP çərçivəsində təhsil imkanları, müraciət qaydaları, ümumi statistik məlumatlar eyni zamanda əcnəbilərin Azərbaycanda təhsili ilə bağlı məsələlərə ətraflı izahat verdi.
Görüş zamanı Elm və Təhsil nazirliyi yanında İctimai Şura üzvlərini maraqlandıran suallar cavablandırılıb, müzakirələr aparılıb və təkliflər irəli sürülüb.
Sentyabrın 15-də İsmayıllı rayonu Sumağallı kənd tam orta məktəbi üçün yeni tikilmiş tədris binasının açılış mərasimi keçirilib.
Açılış mərasimində elm və təhsil nazirinin müşaviri, Təhsilin İnkişafı Fondunun İdarə Heyətinin sədri Elnur Nəsibov, İsmayıllı Rayon İcra Hakimiyyətinin başçısı Nahid Bağırov, Dağlıq Şirvan Regional Təhsil İdarəsinin müdiri vəzifəsini icra edən Rövşən Əliyev və məktəbin pedaqoji kollektivi iştirak edib.
İsmayıllı rayonu Sumağallı kənd tam orta məktəbində 12 sinif komplektində 224 şagird təhsil alır və onların təlim-tərbiyəsi ilə 20 nəfər müəllim məşğul olur. Məktəb zəruri mebel və avadanlıqlarla, fənn kabinetləri və laboratoriyalar əyani vəsaitlərlə təchiz olunub.
Qeyd edək ki, ötən il bu kiçik kənd məktəbini bitirmiş 2 məzun 650 baldan yuxarı balla ali məktəblərə qəbul olub. Onlardan biri Prezident təqaüdçüsüdür.
2022-ci il sentyabrın 13-də Azərbaycan Respublikası Elm və Təhsil Nazirliyi tabeliyində Təhsilin İnkişafı Fondunun (TİF) “Ali təhsil üzrə strateji fəaliyyət istiqamətləri” mövzusunda dəyirmi masa keçirilib. Toplantıda elm və təhsil naziri, nazir müavinləri, ali təhsil müəssisələrinin rektorları və təhsil işçiləri iştirak ediblər.
TİF İdarə Heyətinin sədri Elnur Nəsibov Fondun ali təhsil üzrə strateji fəaliyyət istiqamətləri barədə təqdimatla çıxış edib. Qeyd olunub ki, Fondun fəaliyyətləri təhsil və iqtisadiyyatın inteqrasiyasının gücləndirilməsi, ictimai və sosial əhəmiyyətli layihələrin həyata keçirilməsi, təhsil müəssisələrin maddi-texniki bazasının müasir tələblərə uyğunlaşdırılması və təhsilin inkişafını təstiq edən mexanizmlərin hazırlanmasından ibarətdir. Elnur Nəsibov həmçinin, Təhsilin İnkişafı Fondunun fəaliyyətlərinin yalnız ali və orta ixtisas təhsili deyil, peşə təhsili istisna olmaqla təhsilin bütün pillələrini əhatə edəcəyini bildirib.
Təhsilin İnkişafı Fondunun sədri rektorlarla müzakirələr nəticəsində ali təhsil üzrə 5 strateji fəaliyyət istiqamətlərinin, o cümlədən akademik mobillik proqramlarının icrası, ali təhsil müəssisələrinin institusional inkişafı, elmi jurnal, nəşrlər və dərsliklərin hazırlanması, universitet-sənaye iş birliyinin inkişafında iştirak və ali təhsil müəssisələri tələbələrinin inkişafına dəstək olaraq müəyyən edildiyini qeyd edib.
Yekunda, TİF İdarə Heyətinin sədri universitetlər arasında tərəfdaşlıq fəaliyyətlərinin əlaqələndirilməsi məqsədilə məsul şəxsin təyin olunmasını xahiş edib və yeni tədris ilində ali təhsil müəssisələri rəhbərlərinə uğurlar arzulayıb.
Azərbaycan Respublikası Elm və Təhsil Nazirliyinin təşkilatçılığı ilə “Media və təhsil dialoqu” mövzusunda ikigünlük təlim-seminar keçirilir. Azərbaycan-Fransız Universitetində təşkil edilən təlim-seminarın məqsədi təhsildən yazan jurnalistlərin bu sahə ilə bağlı daha dolğun məlumatlandırılması, media ilə səmərəli əməkdaşlığın gücləndirilməsi və görülən işlərin KİV vasitəsilə ictimaiyyətə çatdırılmasıdır.
Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov tədbiri açaraq təlim-seminarın əhəmiyyətindən danışıb. Qeyd edib ki, bu formatda tədbirlərə 2014-cü ildən başlanılıb.
Təlim-seminarın birinci günündə Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyət istiqamətləri və məqsədləri barədə məlumat verib.
E.Nəsibov bildirib ki, Fond Azərbaycan Respublikası Prezidentinin 14 iyul 2021-ci il tarixli fərmanına uyğun olaraq, Azərbaycan Respublikasının Nazirlər Kabinetinin 1 mart 2022-ci il tarixli qərarı ilə yaradılıb. Təhsilin İnkişafı Fondunun əsas vəzifəsi təhsilin inkişafı ilə bağlı dövlət siyasətinin formalaşdırılmasında, təhsil və iqtisadiyyatın inteqrasiyasının gücləndirilməsində iştirak etmək, təhsil sisteminin inkişafına yönəlmiş ictimai və sosial əhəmiyyətli proqram və layihələri maliyyələşdirmək, təhsil müəssisələrinin maddi-texniki bazasının müasir tələblərə uyğunlaşdırılmasına dəstək, təhsilin inkişafını təşviq edən mexanizmlərin hazırlanması və icrasında iştirak etmək, nazirliyin işçilərinin sosial müdafiəsinin gücləndirilməsinə və maddi təminatının yaxşılaşdırılmasına yardım etməkdən ibarətdir.
Bununla yanaşı, qurumun rəhbəri Təhsilin İnkişafı Fonduna ianələrin edilməsi formaları açıqlayıb. “İanələr aşağıdakı formada oluna bilər. Birincisi Təhsilin İnkişafı Fonduna, ikincisi hər hansı konkret tematik layihə üçün (məsələn, inklüziv təhsil, qızların təhsili, STEAM, infrastruktur və s.), üçüncüsü isə öz məktəbinə ianə etmək yolu ilə mümkündür. İanələri edən fiziki və hüquqi şəxslər açıq və ya anonim şəkildə qala bilər. Qeyri-maddi vəsaitlə ianə edən fiziki və ya hüquqi şəxslərə tərəfdaş sertifikatları təqdim oluna bilər.
Çıxışın sonunda Elnur Nəsibov media nüməyəndələrinin suallarını cavablandırdı.
Təlim-seminar “regional təhsil idarələri və məktəbəqədər təhsil müəssisələri”, “peşə təhsilindən gözləntilər”, “ümumi təhsil müəssisələrində çalışan təhsilverənlərin sertifikatlaşdırılması prosesi”, “elm və ali təhsil sahəsində yeni addımlar” və “müəllimlərin işə qəbulu prosesi”mövzularında çıxış və təqdimatlarla davam etdi.
Türk Əməkdaşlıq və Koordinasiya Agentliyinin (TİKA) Bakı Koordinatoru Fatih Yılmaz və Təhsilin İnkişafı Fondunun İdarə Heyətinin sədri Elnur Nəsibov arasında görüş keçirilib.
TİF İdarə Heyətinin sədri Elnur Nəsibov Fondun fəaliyyəti və məqsədləri barədə məlumat verib. Bildirib ki, Azərbaycan Respublikası Elm və Təhsil Nazirliyinin tabeliyində Təhsilin İnkişafı Fondu publik hüquqi şəxsi Azərbaycan Respublikası Prezidentinin fərmanına uyğun olaraq Azərbaycan Respublikasının Nazirlər Kabinetinin 1 mart 2022-ci il tarixli qərarı ilə yaradılıb. Fondun əsas vəzifəsi təhsilin inkişafı ilə bağlı dövlət siyasətinin formalaşdırılmasında, təhsil və iqtisadiyyatın inteqrasiyasının gücləndirilməsində iştirak etmək, təhsil sisteminin inkişafına yönəlmiş ictimai və sosial əhəmiyyətli proqram və layihələri maliyyələşdirmək, təhsil müəssisələrinin maddi-texniki bazasının müasir tələblərə uyğunlaşdırılmasına dəstək, təhsilin inkişafını təşviq edən mexanizmlərin hazırlanması və icrasında iştirak etmək, nazirliyin işçilərinin sosial müdafiəsinin gücləndirilməsinə və maddi təminatının yaxşılaşdırılmasına yardım etməkdən ibarətdir.
Görüşdə Azərbaycanın və Türkiyənin təhsil sahəsindəki uğurlarına toxunulub, gələcək əməkdaşlıq perspektivləri müzakirə edilib.
“Bir Könüllü” Tələbələrin Əməkdaşlığı İctimai Birliyi yay tətilinin son günlərini daha əyləncəli və maraqlı keçirmək məqsədilə Zuğulba Tədris İdman Bazasında bütün ali təhsil müəssisələrində təhsil alan tələbələr üçün “StudentFest 2022” adlı silsilə tələbə düşərgəsinin ikinci mərhələsinə start verib.
Açılış mərasimində iştirak edən elm və təhsil nazirinin müşaviri, Təhsilin İnkişafı Fondunun İdarə Heyətinin sədri Elnur Nəsibov tələbələrdə yeniliklərə qarşı yaradıcı təfəkkür və açıq düşüncə tərzini formalaşdırmaq, yeni dostluqlar qazanmaq, eyni zamanda, asudə vaxtı daha səmərəli keçirmək baxımından faydalı olan bu tip düşərgələrin davamlı olmasını vurğulayıb.
Daha sonra Elm və Təhsil Nazirliyinin İnformasiya və vətəndaşlara xidmət şöbəsinin müdir müavini Səbuhi Rzayev Elm və Təhsil Nazirliyinin dəstəyi ilə bundan öncəki dövrlərdə təşkil olunan tələbə düşərgələri haqqında ümumi məlumat verərək, tələbələri düşərgəboyu fəallıq nümayiş etdirməyə və yeni biliklər əldə etməyə çağırıb.
Düşərgənin ilk günü Bakı Mühəndislik Universitetinin müəllimi Tahirə Salayeva, Elm və Təhsil Nazirliyinin Beynəlxalq Əməkdaşlıq şöbəsinin əməkdaşları Niftalı Qasımlı və Elçin Hüseynov, Dövlət Məşğulluq Agentliyinin Karyera planlaması şöbəsinin müdiri Əli Qurbanlının təqdimatında müxtəlif mövzularda informativ sessiyalar təşkil olunub.
Düşərgə çərçivəsində məşqçi-müəllimlərin və idman mütəxəssislərinin dəstəyi ilə müxtəlif idman yarışları və tələbələ üçün digər əyləncəli proqramlar təşkil olunur.
Modern İnformasiya Agentliyinin təşkilatçılığı və Nar Mobile şirkətinin dəstəyi ilə ali məktəblərə qəbul imtahanlarında yüksək nəticə göstərən 10 abituriyent mükafatlandırılıb.
Tədbirin məqsədi ölkə birincilərini ictimaiyyətə tanıtmaq, eyni zamanda, gələcək hədəflərində uğura çatmaq üçün onlara yardımçı olmaqdır. Tədbirdə Milli Məclisin deputatları, Elm və Təhsil nazirliyinin əməkdaşları, Təhsilin İnkişafı Fondunun idarə heyətinin sədri, dövlət rəsmiləri, tanınmış ictimaiyyət nümayəndələri və valideynlər iştirak ediblər.
Tədbiri giriş nitqi ilə açan Elm və Təhsil nazirinin müşaviri, Təhsilin İnkişafı Fondunun İdarə Heyətinin sədri Elnur Nəsibov gəncləri təbrik edib: “Nazirlik adından abituriyentləri təbrik edirik. Ali təhsil bizim həyatımızda çox vacib məqamdır. Bu gün təhsil bizim üçün böyük nailiyyət hesab olunur. Bu, həmçinin məsuliyyət deməkdir. Gənclərimiz də bunu çox yaxşı başa düşürlər. Son illərdə nazirliyin üzərinə çox vacib məsələlər düşür. Bizim gənclərimizin yüksək nəticə əldə etməsi bizim üçün böyük uğur deməkdir. Dünyanın top universitetlərinə qəbul, bakalavr yerlərinin tam dolması bizim gələcəyə uğurlu addım atmağımızdan xəbər verir. Bu gün hər bir təhsil müəssisəsinin əsas vəzifəsi yüksək kadrlar yetişdirməkdir. Gənclərimizi təbrik edir, karyeralarında uğur arzulayırıq”.
Təhsilin İnkişafı Fondunun (TİF) İdarə Heyətinin sədri Elnur Nəsibov Malala Fondunun həmtəsisçisi Ziauddin Yousafzai ilə onlayn görüş keçirib. Görüşün əsas məqsədi əməkdaşlıq perspektivlərini müzakirə etmək olub.
Görüşdə Z.Yousafzai qurumun yaranma tarixi, məqsədi və icra etdikləri layihələr haqqında məlumat verib.
E.Nəsibov da Təhsilin İnkişafı Fondunun məqsədi, fəaliyyəti, əsas prioritetləri və gələcək planları haqda ətraflı məlumat təqdim edib.
Görüş zamanı Malala Fondu ilə birgə qızların təhsilə inteqrasiyası mövzusunda layihələrin icrasına dair imkanlar barədə danışılıb. Gələcəkdə birgə əməkdaşlıq istiqamətləri müzakirə edilib.
Malala Fondu 2013-cü ildə Malala və atası tərəfindən qızların təhsilinin sosial və iqtisadi dəyərini vurğulamaq üçün təsis edilən qlobal Fonddur. Fondun əsas məqsədi bütün dünyada qızların ümumi təhsilə əlçatanlılığı və onların eşidilmə hüququnu təmin etməkdir.
