Category: Xəbərlər

Azərbaycan Texniki Universitetində (AzTU) yerinə yetirilən “Şəhərdaxili hərəkət (mobillik) planının hazırlanması” məsləhət xidmətinin – layihəsinin hesabat konfransı keçirilib.

Tədbirdə Nazirlər Kabineti Aparatının Nəqliyyat, kommunikasiya və innovasiya şöbəsinin müdiri Musa Pənahov, Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev, Təhsilin İnkişafı Fondunun İdarə Heyətinin sədri Elnur Nəsibov, AzTU-nun rektoru Vilayət Vəliyev, müxtəlif qurumların nümayəndələri iştirak ediblər.

Layihə haqqında məlumat verən AzTU-nun rektoru Vilayət Vəliyev  bildirib ki, universitet-sənaye-dövlət tandemində həyata keçirilən ilk layihələrdən olan mobillik planının icrası istiqamətində işlərin görülməsinə 2022-ci ildə başlanılıb. Layihə AzTU-nun Logistika və Nəqliyyat İnstitutunda yerinə yetirilib. 2023-cü ildə ilkin olaraq universitetlə 16 şəhər və rayon (Yevlax şəhər, Şəki şəhər, Göyçay rayon, Ağcabədi rayon, Göygöl rayon, Şəmkir rayon, Naftalan şəhər, Mingəçevir şəhər, Tovuz rayon, Quba rayon, Qusar rayon, Xaçmaz rayon, Lənkəran şəhər, Biləsuvar rayon, Masallı rayon və Şirvan şəhər) icra hakimiyyətləri arasında müqavilə imzalanıb.

Daha sonra Təhsilin İnkişafı Fondunun İdarə Heyətinin sədri Elnur Nəsibov və AYNA-nın İdarə Heyətinin sədri Anar Rzayev çıxış edərək sözügedən layihədə universitet-sənaye-dövlət tandeminin iştirakını müsbət dəyərləndiriblər. Qeyd olunub ki, AzTU-nun nəqliyyat sahəsində yüksəkixtisaslı kadrlar hazırlayan universitet olaraq bu istiqamətdə dəstəyi hər zaman hiss olunur.

AzTU-nun Logistika və Nəqliyyat İnstitutunun direktoru Fuad Daşdəmirov görülən işlərin hesabatı ilə bağlı geniş təqdimatla çıxış edib. Bildirib ki, AzTU-nun Logistika və Nəqliyyat İnstitutunda yerinə yetirilən layihə üzrə bölgələrdə əhali arasında sorğuların aparılmasına 100-ə yaxın tələbə (77 bakalavr, 22 magistr) və 15 müəllim cəlb olunub. Bundan başqa, Özbəkistan və Türkiyənin mobilliklə bağlı təcrübəsi öyrənilib.

Daha sonra Mingəçevir Şəhər İcra Hakimiyyətinin nümayəndəsi Hafiz Yolçuyev təqdim edilən hesabatla bağlı fikirlərini bölüşüb. 

Tədbir sual-cavab sessiyası ilə davam edib. 

19 dekabr 2023-cü il tarixində Davamlı İnkişaf Mərkəzində doktorantlar üçün “Açıq tədqiqat mənbələrindən istifadə mexanizmləri” mövzusunda təlim keçirilib.

Təhsilin İnkişafı Fondunun təşəbbüsü, Azərbaycan Gənc Alim, Doktorant və Magistrlər Cəmiyyətinin dəstəyi ilə həyata keçirilən təlimin məqsədi gənc tədqiqatçıları açıq təhsil resursları, onların prinsipləri və  istifadə qaydaları, beynəlxalq indeksli jurnallarda çap olunmaq üçün elmi məqalələrin hazırlanması metodologiyası haqqında məlumatlandırmaq olub.

Tədbirdə Təhsilin İnkişafı Fondunun Layihələrin idarə olunması və biznesin inkişafı şöbəsinin müdiri Nərgiz İsmayılova, Azərbaycan Gənc Alim, Doktorant və Magistrlər Cəmiyyətinin sədri,  Azərbaycan Respublikası Elm və Təhsil Nazirliyi yanında İctimai Şuranın üzvü İlqar Orucov, Fondun Layihələrin idarə olunması və biznesin inkişafı şöbəsinin əməkdaşı, layihənin koordinatoru Fəridə Hüseynzadə iştirak ediblər.

Açılış nitqi ilə çıxış edən Təhsilin İnkişafı Fondunun şöbə müdiri Nərgiz İsmayılova layihənin keçirilməsində əsas məqsədin keyfiyyətli elmi tədqiqatların sayının artırılması olduğunu bildirib. N.İsmayılova müasir çağırışlara cavab verən tədqiqatın ərsəyə gəlməsi üçün universitet-sənaye əməkdaşlığının vacibliyini vurğulayıb.

Azərbaycan Gənc Alim, Doktorant və Magistrlər Cəmiyyətinin sədri,  Azərbaycan Respublikası Təhsil Nazirliyi yanında İctimai Şuranın üzvü İlqar Orucov ölkədə gənclərin şəxsi və peşəkar inkişafı üçün yaradılan şəraitdən söz açıb. O, bidirib ki, bu layihənin də tətbiqi gənc doktorantların tədqiqat bacarıqlarının inkişaf etdirilməsinə xidmət edəcək.

Təlim Azərbaycan Gənc Alim, Doktorant və Magistrlər Cəmiyyətinin eksperti Sevinc Ədilova tərəfindən Bakı Dövlət Universiteti, Azərbaycan Dövlət İqtisad Universiteti, Azərbaycan Dövlət Pedaqoji Universiteti, Azərbaycan Texniki Universiteti, Bakı Mühəndislik Universiteti və Azərbaycan Memarlıq və İnşaat Universitetinin doktorantları üçün keçirilib.

“Bir Könüllü” Tələbələrin Əməkdaşlığı İctimai Birliyinin “Elm və İnnovasiya” proqramının təşkilatçılığı, Təhsilin İnkişafı Fondu və Azərbaycan Texniki Universitetinin dəstəyi ilə “Azərbaycan Tələbələrinin Elm və İnnovasiya Forumu” həyata keçirilib.

Tələbələri elm və innovasiyalar istiqamətində davamlı fəaliyyətə cəlb etmək, Azərbaycan tələbələrinin elm sahəsində aparıcı mövqe tutmaqlarına yön vermək, həmçinin elmi araşdırmaların və sərbəst məqalə yazmağın əsaslarını öyrətmək məqsədi ilə həyata keçirilmiş forumda ali təhsil müəssisələrinin təbiət elmləri ixtisaslarında bakalavr və magistr pilləsində təhsil alan 80 tələbə iştirak edib.

Forum Azərbaycan Respublikasının Dövlət Himninin səsləndirilməsi, daha sonra Ulu Öndər Heydər Əliyevin və bütöv Azərbaycan uğrunda canından keçmiş qəhrəmanlarımızın əziz xatirəsinin ehtiram və qürur hissi ilə yad edilməsi ilə başlayıb.

Giriş nitqi ilə çıxış edən Təhsilin İnkişafı Fondunun Layihələrin idarə olunması və biznesin inkişafı şöbəsinin əməkdaşı Rəsul Həşimov tələbələri salamlayıb və elm yolunda daim öz üzərində çalışan tələbələrin fəaliyyətinin təqdirə layiq olduğunu qeyd edərək ölkəmizdə tələbələr üçün yaradılan bir çox təhsil imkanlarına əlçatanlıqdan bəhs edib.

Forumun açılış mərasimi “Bir Könüllü” Tələbələrin Əməkdaşlığı İctimai Birliyinin sədri Leyla Zeynalovanın çıxışı ilə davam edib. O, forumun elm sahəsindəki gələcək liderləri bir araya toplamaq, həmçinin tələbələri öyrətmək və ilhamlandırmaq məqsədi ilə təşkil edilməsindən bəhs edib.

Tədbirin davamında tələbələr üçün Milli Onkologiya Mərkəzinin Molekulyar Onkologiya laboratoriyasının müdiri Leylaxanım Məlikova, Amerika Psixoloqlar Assosiyasının üzvü, Psixi alqoritimlər nəzəriyyəsinin müəllifi Klinik Psixoloq Rövşən Nəzərli, Eksperimental Psixoloji laboratoriyanın direktoru Fidan Qənbərli, Milli Onkologiya Mərkəzinin həkimi Səbinə Mehdizadə, Elm və Təhsil Nazirliyinin Molekulyar Biologiya və Biotexnologiyalar İnstitutunun Gənc Alim və Mütəxəssislər Şurasının sədri Nərgiz Bayramova, ADA Universitetinin müəllimi, sosial tədqiqatçı İnqilab Şahbazov, İRİA-nın İnnovasiya Ekosistemi departamentinin baş layihə meneceri Camal Ağayev, “Zəhra kosmosda” platformasının təsisçisi Zəhra İmanova, ADMİU-nun Keyfiyyətin Təminatı və Strateji Planlaşdırma şöbəsinin müdir müavini Elçin Cəfərov və Corc Vaçinqton Universitetinin doktorantı Sani Salehin iştirakı ilə panel sessiyalar həyata keçirilib.

“Yeni nəsil elmdə səyahət”, “Məqalə yazmaq sənəti”, “İnnovasiya və gələcəyə yönəlik həllər” mözularında keçirilmiş panel sessiyaların sonunda forum iştirakçılarının sualları cavablandırılıb və maraqlı müzakirələr aparılıb.

Qeyd edək ki, forum çərçivəsində elm və innovasiya sahəsindəki geniş spektrdəki tədqiqatları və ideyaları özündə əks etdirən 9 poster təqdimat sərgilənib və spikerlər tərəfindən dəyərləndirilib.

Universitet-Sənaye Tərəfdaşlığına dair Dialoq və Əməkdaşlıq Platforması çərçivəsində Azərbaycan Texniki Universitetində yerləşən Davamlı İnkişaf Mərkəzində növbəti görüş keçirilib.  

Tədbirdə Təhsilin İnkişafı Fondu, Kiçik və Orta Biznes Subyektləri və Klublarının Assosiasiyası, “Baku Design Academy”, “Baku Project Management Center”, “Barratson Academy”, “İnnab”, Karyera və İşə Hazırlıq Mərkəzi, “BRIDGE Academy Baku”, “Gİ Academy”, “Handex.az”, “DİV Academy”, “Codeart”, “3d Academy”, “Mars Academy”, Sahibkarlıq Akademiyası, Dreamlanguage, “Developia.az” və digər şirkətlərin nümayəndələri iştirak ediblər.

Açılış nitqi ilə çıxış edən Təhsilin İnkişafı Fondunun İdarə Heyətinin sədri Elnur Nəsibov Fondun məqsədləri, planları və layihələr barədə məlumat verib. Sədr həmçinin görüş iştirakçılarına ATU-da TİF tərəfindən qurulmuş Davamlı İnkişaf Mərkəzi və bu çərçivədə əməkdaşlıq imkanları barədə danışıb.

Kiçik və Orta Biznes Subyektləri və Klublarının Assosiasiyasının direktoru Nigar Ələsgərova rəhbəri olduğu Assosiasiyanın universitet-sənaye tərəfdaşlığının inkişafı istiqamətində dəstəklədiyi layihələr haqda məlumat verib. N.Ələsgərova Təhsilin İnkişafı Fondu ilə əməkdaşlığa hazır olduqlarını və yaxın gələcəkdə ilkin əməkdaşlıq tədbiri təklif ediləcəyini bildirib. 

İştirakçılar təmsil etdikləri qurumların fəaliyyəti, təlim proqramları haqqında ətraflı müzakirələr aparıb, dövlət-özəl tərəfdaşlığı çərçivəsində əməkdaşlıq potensialı haqqında müzakirələrdə iştirak ediblər. Növbəti mərhələdə şirkətlər tərəfindən layihə təkliflərinin Fonda təqdim olunması, təhlil edilərək birgə layihələrin icra olunması razılaşdırılıb.

13 dekabr 2023-cü il tarixində Beynəlxalq Kouçinq Federasiyasının Azərbaycan Bölməsi ilə Təhsilin İnkişafı Fondu arasında Anlaşma Memorandumu imzalanıb. Sənədi Təhsilin İnkişafı Fondunun İdarə Heyətinin sədri Elnur Nəsibov və Beynəlxalq Kouçinq Federasiyasının Azərbaycan Bölməsinin direktoru İlham Musayev imzalayıblar.

BKF Azərbaycan Bölməsinin prezidenti İlham Musayev Federasiya haqqında Fondun nümayəndələrinə geniş məlumat verib. Beynəlxalq Kouçinq Federasiyasının 1995-ci ildə təsis olunduğunu, 160-dan çox ölkə və ərazidə yerləşdiyini bildirən İ.Musayev Federasiyanın dünya üzrə 50000-dən çox üzvü olduğunu, onların etika və səriştənin ən yüksək standartları dəstəklədiyini vurğulayıb. O, BKF Azərbaycan Bölməsinin hal-hazırda ölkədə insan kapitalının üzə çıxarılması, inkişafı və idarə edilməsi prosesində aktiv iştirak etməklə cəmiyyətə öz töhfəsini verməyi hədəflədiyini qeyd edib.

Görüşün yekununda Federasiyanın vitse-prezidenti Xanım Şabanova Fondun rəhbərliyi və əməkdaşları ilə vörkşop keçirib, sualları cavablandırıb.

Təhsilin İnkişafı Fondunun “NEQSOL Holding” ilə əməkdaşlığı çərçivəsində tələbə qızlar üçün elan edilən təqaüd proqramının müsahibə mərhələsinə dəvət olunacaq qızların adları açıqlandı.

Siyahı ilə keçidə daxil olaraq tanış ola bilərsiniz – https://t.ly/JockL

9 dekabr 2023-cü il tarixində Azərbaycan Texniki Universitetində yerləşən Davamlı İnkişaf Mərkəzində Universitet-Sənaye Tərəfdaşlığına dair Dialoq və Əməkdaşlıq Platformasının növbəti görüşü keçirilib.

Tədbirdə Təhsilin İnkişafı Fondu, Mədəniyyət nazirliyi, İqtisadiyyat nazirliyinin tabeliyində 4SİM Təhlili və Koordinasiya Mərkəzi, Kiçik və Orta Biznesin İnkişafı Agentliyi, Azərbaycan Texniki Universiteti, “PSG-Kapital İnvestisiya Şirkəti”, “Bilişim Vadisi Bakı” və “Baku Design Academy” nin nümayəndələri iştirak ediblər.

“Universitet, sənaye və dövlət əməkdaşlığı modeli: “Bilişim Vadisi” texnoparkı nümunəsi” mövzusu ilə çıxış edən “Bilişim Vadisi Bakı”nın direktoru Qamət Kərimov texnoparkların, eləcə də Bilişim Vadisinin işləmə prinsipləri, qeyri-hökumət təşkilatları və dövlət müəssisələrinin texnoparklar ilə əməkdaşlıq nümunələrindən bəhs edib.

Daha sonra “Baku Design Academy”nin təsisçisi və direktoru Aysel Gülməmmədova akademiyanın fəaliyyəti, nailiyyətləri və hədəfləri haqqında görüş iştirakçılarını məlumatlandırıb. A.Gülməmmədova “Müasir dövrün kadr tələbləri” mövzusunda ətraflı təqdimat ilə çıxış edib.

Mədəniyyət nazirliyinin Yaradıcı sənayelər və rəqəmsal inkişaf şöbəsinin müdiri Rəşad Məmmədov hal-hazırda nazirliyin daha müasir yanaşma və innovativ idarəetmə mövqeyində olduğunu bildirərək bu istiqamətdə müvafiq layihə və təşəbbüslərin dəstəkləndiyini qeyd edib.

Dəyirmi masa və müzakirələr zamanı həm universitet, həm də özəl sektor nümayəndələri yaradılan Platformadan gözləntiləri haqqında fikir bildiriblər.

Azərbaycan Texnologiya Universitetində Təhsilin İnkişafı Fondunun Gəncədə yerləşən ali təhsil müəssisələri üçün təqdimatı keçirilib.

Tədbirdə Azərbaycan Texnologiya Universitetinin rektoru v.m.i.e. dos.Yaşar Ömərov, Gəncə Dövlət Universitetinin rektoru Yusif Yusibov, Azərbaycan Dövlət Aqrar Universitetinin rektoru Zəfər Qurbanov və hər üç universitetin struktur bölmə rəhbərləri iştirak edib.

Təhsilin İnkişafı Fondunun İdarə Heyətinin sədri Elnur Nəsibov təqdimatla çıxış edib. Sədr Fondun yaradılması, məqsədləri, missiyası, Fond tərəfindən həyata keçirilən layihələr, təqaüd proqramları barədə ətraflı məlumat verib, perspektivdə yeni layihələrin olduğunu qeyd edib.

Sonda tədbir iştirakçılarının təklifləri dinlənilib, sualları cavablandırılıb.

Azərbaycan Texnologiya Universitetində (ATU) Ümummilli lider Heydər Əliyevin 100 illiyinə həsr olunmuş “Gənc İnnovatorlar” startap müsabiqəsi keçirilib.

Yarış ATU İnnovasiya Mərkəzinin təşkilatçılığı, Təhsilin İnkişafı Fondu, “Huawei” şirkəti, “Bir” Tələbə Könüllü Təşkilatının dəstəyi ilə reallaşıb.

ATU-nun rektoru v.m.i.e. dos.Yaşar Ömərov, Təhsilin İnkişafı Fondunun İdarə Heyətinin sədri Elnur Nəsibov, “BİR” Könüllü Tələbə Təşkilatının Region üzrə sədri Əsli Məhərrəmova stendləri gəzib, startap layihələri ilə ətraflı tanış olublar.

Müsabiqədə 56 tələbədən ibarət komandalar tərəfindən qida, yüngül sənaye, İKT, nəqliyyat sahəsini əhatə edən bir-birindən maraqlı 28 startap təqdim edilib.

“Laser Eye” komandası Mina axtaran dron startapı ilə müsabiqənin qalibi olub. İkinci yeri “Alpha Soldier” startap oyunu ilə “Yarostı Geym” komandası tutub. Üçüncü yerə isə “Yeah Crypto” startap ilə eyni adlı komanda layiq görülüb.

Qalib komandalar pul mükafatı, sertifikat və hədiyyələrlə təltif edilib.

Qeyd edək ki, startap yarışın keçirilməsində məqsəd universitetdə startap ekosistemini inkişaf etdirmək, yeni startapların yaradılmasına kömək etmək, bu sahəyə marağı və istedadı olan gənclərdə stimul yaratmaqdan ibarətdir.

Dövlət- özəl tərəfdaşlığı çərçivəsində Təhsilin İnkişafı Fondu ilə “Inci Group of Companies” şirkətinin birgə həyata keçirdiyi “Məktəblərə kitab ianəsi” layihəsinin növbəti benefisiarı Gəncə-Daşkəsən Regional Təhsil İdarəsi oldu.  Regionun aparıcı təhsil müəssisələrindən biri olan Gəncə şəhər M.Hadi adına 10 nömrəli tam orta məktəbində baş tutan görüşdə region məktəblərinə 800 kitab hədiyyə edildi.

Görüşdə Təhsilin İnkişafı Fondunun İdarə Heyətinin sədri Elnur Nəsibov, Gəncə-Daşkəsən Regional Təhsil İdarəsinin müdiri Anar Qədiməliyev, “Inci Group of Companies” şirkətinin bölgə müdiri Babək Həsənov, müəllim, şagird və valideynlər iştirak etdilər.

Təhsilin İnkişafı Fondunun İdarə Heyətinin sədri Elnur Nəsibov görüş iştirakçılarını Fondun hədəfləri, əsas fəaliyyət istiqamətləri, icra olunan layihələr haqqında məlumatlandırdı. O, ümumi təhsil müəssisələrində şagirdlərin mütaliəsi işinin təşkili, onların mütaliəyə həvəsinin daha da artırılması istiqamətində görülən işlərin əhəmiyyətindən danışdı.

Gəncə-Daşkəsən Regional Təhsil İdarəsinin müdiri Anar Qədiməliyev mütaliənin uşaqların dünyagörüşünün formalaşmasında, nitqinin inkişafındakı əhəmiyyətini vurğuladı və bu işdə dəstək olan Təhsilin İnkişafı Fondu və “Inci Group of Companies” heyətinə minnətdarlığını bildirdi.

Görüşün davamında şagirdlərlə qarşılıqlı fikir mübadiləsi aparıldı, mütaliə ilə bağlı şagirdləri maraqlandıran suallar cavablandırıldı.