Təhsildə Keyfiyyət Təminatı Agentliyinin nümayəndə heyəti Təhsilin İnkişafı Fondunun qonağı olub.
Təhsildə Keyfiyyət Təminatı Agentliyinin İdarə Heyətinin sədri Tural Əhmədov TKTA-nın peşəkar kadrların əmək bazarına çıxış imkanlarını genişləndirmək məqsədi ilə peşə təhsili üzrə formal təhsilə çıxış imkanı olmayan vətəndaşların, qeyri-formal və informal yollarla əldə etdikləri bilik, bacarıq və səriştələrinin qiymətləndirilməsini həyata keçirdiyi bildirib. Bu missiyanın həyata keçirilməsi üçün Agentliyin müxtəlif sektorlarından olan əsas işəgötürənlərlə əməkdaşlıq əlaqələrinin genişləndirməkdə davam etdiyini vurğulayan sədr, Təhsilin İnkişafı Fondu ilə birgə bu istiqamətdə görülə biləcək işlərdən bəhs edib.
Təhsilin İnkişafı Fondunun İdarə Heyətinin sədri Elnur Nəsibov Fondun 2023-cü il ərzində gördüyü işlər, eləcə də 2024-cü il üçün təqsdiq edilən fəaliyyət istiqamətləri haqqında məlumatı diqqətə çatdıraraq, hər iki qurumun fəaliyyətinin kəsişdiyi layihələr üzrə əməkdaşlığa hazır olduğunu vurğulayıb.
Görüş zamanı Təhsilin İnkişafı Fondu, Təhsildə Keyfiyyət Təminatı Agentliyi və 7 ali təhsil müəssisəsi arasında “Universitetlərin elmi-pedaqoji heyət üzvləri və təhsilalanların IELTS imtahanına təşviq edilməsi” layihəsinin icra vəziyyəti və carı il üçün hədəfləri müzakirə olunub.
“Bir Könüllü” Tələbə Təşkilatının təşəbbüsü, Təhsilin İnkişaf Fondunun dəstəyi ilə 7 mart tarixində 50 tələbənin iştirakı ilə ADA Universitetində “FutureFem: Qadın Sahibkarlığının İnkişafı” Konfransı keçirilib.
Konfrans qadın sahibkarların fəaliyyətlərinin kəmiyyət və keyfiyyət göstəricilərini artırmaq üçün edilə biləcək mümkün addımları, dövlətin və cəmiyyətin bu xüsusda üzərinə düşən öhdəlikləri müzakirə etmək, həmçinin, tələbələrə qadın liderlərdən ilhamlanmaq imkanı yaratmaq məqsədi ilə təşkil olunub.
Açılış nitqi ilə çıxış edən “Bir Könüllü” Tələbələrin Əməkdaşlığı İctimai Birliyinin sədri Leyla Zeynalova qadın sahibkarların iqtisadiyyata daha geniş nüfuz etməsinin əhəmiyyətindən bəhs edərək, bu cür tədbirlərin tələbələrin fərdi inkişafında xüsusi rol oynadığını vurğulayıb.
Konfransda spiker qismində çıxış edən Təhsilin İnkişafı Fondunun İdarə Heyətinin sədr müavini Xanım Daşdəmirova “Təhsildən gözləntilər: XXI əsrin tələblərinə uyğun insan kapitalının formalaşması”mövzusunda, Ailə, Qadın və Uşaq Problemləri üzrə Dövlət Komitəsinin Qadın və gender məsələləri şöbəsinin baş məsləhətçisi Aytəkin Hacıyeva isə “Azərbaycanda qadın sahibkarlar üçün çətinliklər və imkanlar” mövzusunda çıxış ediblər.
Konfransın ikinci hissəsində Azərbaycan Qadınları Elmdə Təşkilatının CEO və təsisçisi Günel Ağabəyli “Techpreneurship: Sahibkarlıq sistemində innovasiya layihələri və innovasiya istiqamətli təşəbbüslərin stimullaşdırılmasında elmin rolu” mövzusunda, Kapital Bankın İşçi bağlılığı və motivasiya şöbəsinin müdiri Gülnarə Əkbərova isə “Korporativ mühitdə gender bərabərliyinin təmini” mövzusunda ətraflı danışıblar.
Qadınların iş dünyasında sahibkar kimi fəal iştirak etmələrinin ölkə iqtisadiyyatında inkişaf və çeşidliliyin təmin olunmasında əhəmiyyətli bir rola malik olduğunu xüsusi qeyd edən spikerlər sessiyalar ərzində tələbələrin suallarını da ətraflı şəkildə cavablandırıb və bu istiqamətdə idealara sahib olan tələbələrə öz tövsiyələrini veriblər.
Qeyd edək ki, hibrid şəkildə təşkil olunmuş konfransda ümumilikdə 10 ali təhsil müəssisəsini təmsil edən tələbələr iştirak ediblər.
Martın 4-də STP Şirkətlər Qrupu və Təhsilin İnkişafı Fondunun birgə əməkdaşlığı çərçivəsində “Zərif mühəndislər” xanımların inkişafı layihəsinin təqdimat mərasimi keçirilib.
Tədbirdə Ailə, Qadın və Uşaq Problemləri üzrə Dövlət Komitəsinin sədri Bahar Muradova, Milli Məclisin deputatı Nigar Arpadai, STP Şirkətlər Qrupunun baş icraçı direktoru Hicran Valehov, Təhsilin İnkişafı Fondunun İdarə Heyətinin sədri Elnur Nəsibov iştirak ediblər.
Layihənin başlıca məqsədi yüksək akademik göstəricilərə malik, texniki sahələr üzrə fərqli ixtisaslarda təhsil alan aztəminatlı ailələrdən olan tələbə qızların təhsilinə, onların peşəkar mütəxəssis kimi yetişdirilməsinə dəstək göstərməkdir. Layihə çərçivəsində 50 nəfər qız tədris ilinin sonuna qədər STP Şirkətlər Qrupunun xüsusi təqaüdünü almaq imkanını əldə edəcəklər.
Açılış nitqi ilə çıxış edən STP Şirkətlər Qrupunun baş icraçı direktoru Hicran Valehov gənc kadrların yetişdirilməsinin vacibliyindən danışıb. H.Valehov ötən il ərzində “Sabahın Gücü” İnkişaf Proqramının 50 gənc mütəxəssis yetişdirdiyini, hazırda onların böyük əksəriyyətinin bu gün peşəkar mütəxəssis kimi STP Şirkətlər Qrupu və digər müxtəlif müəssislərdə çalışdığını bildirib. Uğurlu nəticələr əldə edilən bu təşəbbüsün davamı olaraq “Zərif mühəndislər” layihəsinə start verilib.
Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Bahar Muradova bu kimi layihələrin gender bərabərliyi baxımından vacib olduğunu vurğulayıb.
Gender bərabərliyinin cəmiyyətdə müzakirə olunan əsas məsələlərdən biri olduğunu vurğulayan Komitə sədri sənaye sahəsində fəaliyyət göstərən mühəndislərə baxdıqda bu sahəyə xanımların marağının az olmasının hiss olunduğunu və bu məsələdə uzun illər ərzində formalaşmış stereotiplərin də öz rolunu bu məsələdə oynadığını bildirib. B.Muradova, bu təşəbbüsün məhz formalaşmış stereotipləri qırmaq, xanımlarımıza öz fərdi və peşəkar inkişaflarında kəşf edə biləcəkləri yeni sahələri göstərmək üçün uğurlu bir layihə olacağına əmin olduğunu vurğulayıb.
Daha sonra çıxış edən Milli Məclisin deputatı Nigar Arpadarai sənaye sahəsində kadr yetişdirilməsi üçün vacib olan bu təşəbbüsdən dolayı təşkilatçıları təbrik edib. N.Arpadarai gender bərabərliyi ilə yanaşı bu kimi layihələrin gənc kadrların yetişdirlməsi, sözügedən sahədə mütəxəssislərin formalaşdırlması baxımından cəmiyyət üçün çox faydalı olduğunu bildirib. Təhsilin İnkişafı Fondunun İdarə Heyətinin sədri Elnur Nəsibov bu günədək Fond tərəfindən, tərəfdaş qurumların dəstəyilə təqaüd proqramlarında iştirak edən xanımların sayının 180 nəfərə qədər yüksəldiyini bildirib. Qeyd olunub ki, “Zərif mühəndislər” layihəsinin digər vacib xüsusiyyəti təqaüdlə yanaşı qızlara mentorluq, təcrübə və təlimlərin təşkil olunmasından ibarətdir. Ali təhsilin əsas məqsədlərindən biri kimi əmək bazarı tələblərinə uyğun kadr hazırlığı olduğunu vurğulayan sədr, dövlət-özəl tərəfdaşlığının uğurlu nümunəsi olan layihənin də sırf bu məqsədə xidmət etdiyini bildirib.
Təhsilin İnkişafı Fondunun NEQSOL Holding ilə əməkdaşlığı çərçivəsində Azərbaycanda hər il 50 tələbə qız üçün “Parla” təqaüd və inkişaf proqramı həyata keçirilir.
“Parla” təqaüd proqramının 50 uğurlu iştirakçısı tərəflərin müəyyən etdiyi meyarlar əsasında müraciət edən 674 tələbə qız arasından ötən il seçilib. Seçim zamanı tələbə qızların təhsildə müvəffəqiyyətləri və iqtisadi vəziyyətləri nəzərə alınıb. Seçilmiş tələbələr təhsili başa vurana qədər aylıq təqaüd ödənişləri alacaq. Bundan əlavə NEQSOL Holding tələbə qızlara təcrübə proqramı, mentorluq, NEQSOL Akademiyası vasitəsilə dünyanın aparıcı universitetlərinin proqramlarına və LinkedIn öyrənmə vasitələrinə çıxış kimi kompleks proqramlar təklif edir.
Tədbirdə çıxış edən “NEQSOL Holding Azərbaycan” ofisinin rəhbəri İmran Əhmədzadə qeyd edib ki, təhsilə dəstək həm də holdinqin korporativ sosial məsuliyyət strategiyasının mühüm bir hissəsidir, inklüzivlik isə holdinqin əsas dəyərlərindən biridir. Proqramın “Parla” adlanmasına diqqəti çəkərək İmran Əhmədzadə deyib: “Sizdən gözlədiyimiz yalnız bir şey var: parla! Potensialınızı göstərin. Güclü, yaxşı təhsilli və yeni çağırışlara hazır olun. O qədər parlaq olun ki, digər qızların da yolunu işıqlandırın. Sadəcə parla! Bu yolda Sizə dəstək olmaq üçün yanınızda olacağıq.”
Təhsilin İnkişafı Fondunun İdarə Heyətinin sədri Elnur Nəsibov proqramı dövlət-özəl tərəfdaşlığının uğurlu nümunəsi adlandırdı. Qızların şəxsi və peşəkar inkişafı üçün xüsusi proqram hazırlandığını qeyd edən EInur Nəsibov dedi: “Parla” proqramının köməyi ilə tələbə qızlarımız universitetdə daha yaxşı oxumaqla yanaşı əmək bazarında iştirak üçün daha hazırlıqlı olacaqlar.”
Proqram iştirakçılarının və digər qonaqların qatıldığı tədbirdə təhsil və işəgötürmə üzrə ekspertlər, eləcə də digər ölkələrdə oxşar proqramlar həyata keçirən fondların nümayəndələri çıxış etdilər.
Azərbaycan Texniki Universitetində Davamlı İnkişaf Mərkəzinin yaradılmasında əsas məqsəd təhsilalan və təhsilverənlərin şəxsi və peşəkar bacarıqlarının inkişafına dəstək olmaqdır.
Mərkəz universitet-sənaye əməkdaşlığı çərçivəsində Təhsilin İnkişafı Fondunun təşəbbüsü ilə Azərbaycan Texniki Universitetində yaradılıb.
20-dən çox tələbənin qatıldığı ilk təlim “Handex” şirkəti tərəfindən “MS Office” proqramları üzrə nəzəri və texniki biliklərin artırılması istiqamətində keçirilib.
Davamlı İnkişaf Mərkəzində mütəmadi olaraq digər ixtisas sahələrinə yönəlmiş təlimlərin keçirilməsi planlaşdırılır.
Ekvita şirkətinin baş direktoru İlqar Mehti və şirkətin İdarəetmə Konsaltinq üzrə partnyoru Fərid Baxşıyev Təhsilin İnkişafı Fondunun qonaqları olublar.
Təhsilin İnkişafı Fondunun İdarə Heyətinin sədri Elnur Nəsibov qonaqları salamlayaraq Fondun əsas məqsədləri, strategiyası, fəaliyyət istiqamətləri, dövlət-özəl tərəşdaşlığı çərçivəsində icra olunan və yaxın gələcəkdə keçirilməsi planlaşdırılan sosial və biznes layihələri haqqında ətraflı məlumat verib. Ali təhsil müəssisələrinin tələbələri üçün yataqxanaların dövlət-özəl tərəfdaşlığı çərçivəsində təmiri və idarəedilməsi fəaliyyətinin təşkili mexanizmləri müzakirə edilib.
Ekvita şirkətinin baş direktoru İlqar Mehti şirkətin yaranma tarixi, icra etdiyi layihələr barəsində görüş iştirakçılarını məlumatlandırıb. O, Ekvita şirkətinin ölkə xaricinə çıxan ilk yerli konsaltinq şirkəti olmaqla həm ölkəmizdə, həm də ölkə xaricində layihələr icra etdiyini bildirib. Ekvita şirkətinin hüquq, vergi, maliyyə, audit və idarəetmə üzrə tam əhatəli konsaltinq xidməti göstərdiyini qeyd edən baş direktor, şirkətin beynəlxalq reytinq təşkilatları tərəfindən və müvafiq beynəlxalq standartlarla tanındığını diqqətə çatdırıb.
Görüş zamanı həmçinin Təhsilin İnkişafı Fondu ilə Ekvita şirkətinin 2024-cü ilin fəaliyyət planına uğun olaraq əməkdaşlıq çərçivəsi barədə fikir mübadiləsi aparılıb.
Təhsilin İnkişafı Fondunun nümayəndə heyəti “AzerGold” Qapalı Səhmdar Cəmiyyətinin qonağı olub.
“AzerGold” QSC-nin müşaviri Rəşxan Qaraşlı qurumun fəaliyyət sahələri üzrə əldə etdiyi nailiyyətlər, strateji planları və dağ-mədən sektorunda görülən işlər haqqında danışıb. R.Qaraşlı Azərbaycanda dağ-mədən sahəsinin neft-qaz sənayesi ilə müqayisədə yeni sahə olmasına baxmayaraq, son illər xüsusilə qızıl hasilatında böyük uğurlar əldə edildiyini qeyd edib.
“AzerGold” QSC tərəfindən təhsil, sağlamlıq, mikro sahibkarlıq, aqrar inkişaf, ekologiya, qadınların məşğulluğu, tarixi və mədəni irsə töhfə və digər istiqamətlər üzrə sosial layihələrin həyata keçirildiyini vurğulayan R.Qaraşlı, “Gələcəyin mədənçisi” layihəsi barəsində görüş iştirakçılarını məlumatlandırıb.
Təhsilin İnkişafı Fondunun İdarə Heyətinin sədri Elnur Nəsibov Fondun fəaliyyət istiqamətləri haqqında məlumatı diqqətə çatdıraraq bildirib ki, qurumun məqsədi ölkəmizdə təhsil sisteminin inkişafına yönəlmiş proqram və layihələri dəstəkləmək, təhsilin və iqtisadiyyatın inteqrasiyasına və gücləndirilməsinə töhfə vermək, dövlət təhsil müəssisələrinin infrastrukturunun inkişafı ilə bağlı proqramlar həyata keçirməkdir. Təhsilin İnkişafı Fondunun həm dövlət, həm özəl şirkətlər ilə əməkdaşlığa açıq olduğunu qeyd edən sədr, tərəfdaşlarla birgə sosial və biznes yönlü layihələrin həyata keçirildiyini diqqətə çatdırıb.
Universitet-sənaye tərəfdaşlığı çərçivəsində Azərbaycan Texniki Universiteti və Azərbaycan Dövlət Pedaqoji Universitetində fəaliyyət göstərən Davamlı İnkişaf Mərkəzi haqqında bəhs edən E.Nəsibov, yaxın zamanda qərb regionlarında yeni Davamlı İnkişaf Mərkəzlərinin yaradılacağını bildirib. Bu mərkəzlərin dövlət-özəl əməkdaşlığı çərçivəsində yarandığı, tələbələrin bilik və bacarıqlarının artırılması, onlara karyera və inkişaf dəstəyinin göstərilməsi məqsədilə yaradıldığı vurğulanıb.
Görüş çərçivəsində qarşılıqlı maraq doğuran məsələlər, eləcə də iki qurum arasında gələcək əməkdaşlıq perspektivləri müzakirə edilib.
15 fevral 2024-cü il tarixində Azərbaycan Milli Konservatoriyasında Təhsilin İnkişafı Fondu ilə görüş keçirilib. Görüşün məqsədi qurumlar arasında tanışlıq və əməkdaşlıq imkanlarının müzakirəsi olub. Görüşdə Xalq Artisti, professor, Azərbaycan Milli Konservatoriyasının rektoru Siyavuş Kərimi, Təhsilin İnkişafı Fondunun İdarə Heyətinin sədri Elnur Nəsibov və Universitetin nümayəndələri iştirak ediblər.
Azərbaycan Milli Konservatoriyasının rektoru Siyavuş Kərimi qonaqları salamlayıb və Azərbaycan Milli Konservatoriyasında görməkdən məmnun olduğunu bildirib. Rektor konservatoriyanın 24 illik fəaliyyəti haqqında məlumat verib, onun strateji məqsədləri və hədəflərindən danışıb.
Təhsilin İnkişafı Fondunun İdarə Heyətinin sədri Elnur Nəsibov Fondun yaradılması, məqsədləri, missiyası barəsində ətraflı məlumat verib. Sədr ali təhsil müəssisələri ilə dövlət-özəl tərəfdaşlığı çərçivəsində əməkdaşlıq imkanları barəsində bəhs edib.
13 fevral Azərbaycan Texniki Universitetində yerləşən Davamlı İnkişaf Mərkəzində “Bilişim Vadisi Bakı” Mərkəzinə üzv olan 20 şirkətin nümayəndələri ilə görüş keçirilib.
“Bilişim Vadisi Bakı”nın direktoru Qamət Kərimov qonaqları salamlayaraq, görüşün əsas məqsədinin dövlət-universitet-sənaye sahəsində əməkdaşlıq imkanlarının qurulması, innovativ layihələrin həyata keçirilməsi istiqamətində müzakirələrin aparılması olduğunu bildirib.
Azərbaycan Texniki Universitetinin rektoru Vilayət Vəliyev dünyada texnopark anlayışının çox əhəmiyyətli məsələyə çevrildiyini bildirib. V.Vəliyev Bilişim Vadisi ilə əməkdaşlığın əsas hədəfinin Bilişim Vadisinə üzv şirkətlərinin Azərbaycan Texniki Universiteti, eləcə də digər universitetlərə müəyyən texnoloji dəstəyin verilməsi olduğunu vurğulayıb.
Təhsilin İnkişafı Fondunun İdarə Heyətinin sədri Elnur Nəsibov Fondun yaranması, əsas fəaliyyət istiqamətləri, hazırda icra edilən layihələr haqqında görüş iştirakçılarını məlumatlandırıb. Təhsilin İnkişafı Fondunun həm dövlət, həm özəl şirkətlər ilə əməkdaşlığa açıq olduğunu qeyd edən sədr, tərəfdaşlarla birgə sosial və biznes yönlü layihələrin həyata keçirildiyini diqqətə çatdırıb. E.Nəsibov iclasın keçirildiyi Davamlı İnkişaf Mərkəzinin də Fondla əməkdaşlıq çərçivəsində qurulduğunu qeyd edib.
Görüş “Bilişim Vadisi Bakı” Mərkəzinə üzv olan şirkət nümayəndələrinin təqdimatları və müzakirələrlə davam edib.
“Women in Tech” təşkilatının Azərbaycan nümayəndəliyi və Təhsilin İnkişafı Fondunun birgə təşkilatçılığı ilə “Maya Hacıyeva adına İKT bacarıqları” təqaüd proqramına müraciət başladı.
Təqaüd Proqramının təsis məqsədi qadınların İnformasiya Texnologiyaları və Yüksək Texnologiyalar üzrə bilik və bacarıqlarının artırılmasıdır. Layihə Azərbaycan vətəndaşı olan 15-40 yaş arası xanımların İKT sahəsində yeni bilik və bacarıqlar əldə etməsinə yönəlmişdir.
Təqaüd proqramı müasir texnologiyalar sahəsində ixtisas təlimləri verən yerli kurs və akademiyalarda tədris haqqını qarşılamaqla, xanımların əmək bazarında ən çox ehtiyac duyulan peşələr üzrə biliklərə yiyələnmələrinə şərait yaradır.
Təqaüd proqramı üçün müəyyən edilmiş istiqamətlər:
– UI/UX dizayn – Rəqəmsal Marketing – Flutter texnologiyası ilə mobil aplikasiyalarının yazılması – Kiber Təhlükəsizlik – QA Tester – BI Developer
Müraciətçilərin ərizələri təşkilat komitəsi tərəfindən baxıldıqdan sonra, uyğun namizədlər tərəfdaş tədris müəssisələri tərəfindən təşkil edilən müvafiq proqram üzrə imtahanda iştirak edəcəklər. İmtahandan məqbul nəticə əldə edən şəxslər yekun mərhələdə – müsahibədə iştirak haqqı qazanacaqlar. Müsahibə mərhələsini uğurla yekunlaşdıran namizədlər təqaüd almaq imkanı əldə edəcəklər.
