Təhsilin İnkişafı Fondunun təqaüd proqramlarının iştirakçıları üçün “Mexanika mühəndisliyində rəqəmsal simulyasiya texnikaları” mövzusunda təlim sessiyası təşkil edilib. Təlim ADA Universitetinin İnformasiya Texnologiyaları və Mühəndislik fakültəsinin dosenti Burcu Ramazanlı tərəfindən aparılıb.
“Sessiya çərçivəsində iştirakçılara Sonlu Elementlər Metodu (Finite Element Method) və Sonlu Həcm Metodu (Finite Volume Method) barədə ümumi məlumat verilib, hər iki metodun tətbiqi və iş prinsipləri haqqında ətraflı izahlar təqdim olunub.Təlim zamanı həmçinin ön emal (preprocessing), həll etmə (solving) və sonraki emal (postprocessing) mərhələləriətraflı müzakirə olunub.
Bundan əlavə, Burcu Ramazanlı öz tədqiqat sahəsi üzrə əldə etdiyi nəticələri iştirakçılarla bölüşüb və impulsun saxlanma qanunu kontekstində Navier-Stokes tənliklərinin həll yollarını təqdim edib. Təqaüdçülər üçün mühəndislik sahəsində simulyasiya texnikalarının praktiki tətbiqini öyrənmək məqsədilə təşkil edilən sessiya iştirakçılar tərəfindən böyük maraqla qarşılanıb.
Təhsilin İnkişafı Fondu və “STP Şirkətlər Qrupu”nun birgə təşkilatçılığı ilə həyata keçirilən “Zərif Mühəndislər” təqaüd proqramının iştirakçıları üçün mentorla görüş təşkil edilib.
Görüşdə çıxış edən Elm və Təhsil Nazirliyinin Strateji planlaşdırma və təhlil şöbəsinin müdiri, Birinci Yüksəliş müsabiqəsinin qalibi Leyla Xəlilova-Rzazadə qadın mütəxəssislərin cəmiyyətin inkişafındakı rolunun əhəmiyyətinə toxunub. O, qadınların iş dünyasında uğur qazanmasının əsas amillərindən birinin öz bilik və bacarıqlarına inam olduğunu vurğulayıb. L.Xəlilova-Rzazadə bildirib ki, qadınlar yalnız mühəndislik sahəsində deyil, müxtəlif ixtisaslarda da böyük uğurlar əldə edə bilərlər.
Leyla Xəlilova-Rzazadə, həmçinin iş həyatında müasir texnologiyalardan və elmi yeniliklərdən xəbərdar olmağın əhəmiyyətini qeyd edərək, iştirakçılara biliklərin davamlı şəkildə yenilənməsinin və öyrənmənin peşəkar inkişafın əsas şərti olduğunu bildirib.
Görüş zamanı gənc mühəndislərlə interaktiv müzakirələr aparılıb, onları maraqlandıran suallar cavablandırılıb.
Təhsilin İnkişafı Fondunun NEQSOL Holding ilə əməkdaşlığı çərçivəsində ikinci ildir ki, Azərbaycanda tələbə qızlar üçün “Parla” təqaüd və inkişaf proqramı həyata keçirilir. Bu il 50 yeni tələbə seçilərək proqrama qəbul olunub, beləliklə ümumi iştirakçı sayı 100 nəfərə çatıb.
Qalib tələbələr 791 ərizəçi arasından seçilib, bu isə ötən ilki 674 müraciətlə müqayisədə daha yüksək rəqabəti əks etdirir. Seçim prosesinin yekun mərhələsində 120 namizədlə müsahibə əsasında 50 nəfər proqrama qəbul olunub. Əvvəlki ildə olduğu kimi, seçim meyarları tələbələrin akademik uğurlarına və sosial-iqtisadi vəziyyətinə əsaslanıb.
Tədbirdə çıxış edən Təhsilin İnkişafı Fondunun İdarə Heyətinin sədri Elnur Nəsibov “Parla” proqramının dövlət və özəl sektorlarının güclü əməkdaşlığı ilə əldə edilə biləcək uğurun nümunəsi olduğunu bildirib. “Parla”nın qadın tələbələrinin təhsil yolunu daha da zənginləşdirdiyini qeyd edən sədr, proqramın həmçinin onlara peşəkar dünyada uğur qazanmaq və cəmiyyətin inkişafına töhfə vermək üçün yeni bacarıqlar və özünəinam qazandırdığını vurğulayıb.
NEQSOL Holding Azərbaycanın rəhbəri İmran Əhmədzadə təhsilin həyatları dəyişmək və müsbət təsir yatarmaq gücünə malik olduğuna inandığını bildirib. O, “NEQSOL Holding Azərbaycan”ın bu təşəbbüsə dəstək olmasında əsas məqsədinin tələbələrin parlaması, uğur qazanması və başqalarına ilham verməsi olduğunu deyib. Təhsil və inklüzivliyə sərmayə edərək, cəmiyyətimizin parlaq gələcəyinə töhfə verdiyimizi vurğulayan İ.Əhmədzadə bu yanaşmanın yalnız fərdi inkişafı deyil, eyni zamanda daha geniş bir cəmiyyətin rifahına və inkişafına töhfə vermək məqsədi daşıdığını diqqətə çatdırıb.
“Təhsil və insan kapitalının inkişafı NEQSOL Holding-in korporativ sosial məsuliyyət strategiyasının əsas prioritet sahələridir. Parla proqramı vasitəsilə gənc istedadları yeni bilik, bacarıq və imkanlarla dəstəkləyirik. Təhsilə yatırım davamlı inkişafı təşviq edir, innovasiyanı dəstəkləyir və daha inklüziv bir cəmiyyətin inkişafına töhfə verir,” – NEQSOL Holding-in Baş Direktoru Yusif Cabbarov adından qeyd edilib.
Tədbirdən sonra Təhsilin İnkişafı Fondunun Layihələrin idarə olunması şöbəsinin baş mütəxəssisi Aysel Məhərrəmova tərəfindən proqram iştirakçıları ilə qarşılıqlı əlaqənin qurulmasına və bir-birlərini daha yaxından tanımağa kömək edən interaktiv oyunlar keçirilib.
Xatırladaq ki, “Parla” təqaüd və inkişaf proqramı çərçivəsində iştirakçılar təhsil aldıqları müddət ərzində təqaüd almaqla yanaşı, ingilis dili kursları, IELTS imtahanına hazırlıq və imtahanın ödənişi, təcrübə proqramları, mentorluq, master-klasslar, eləcə də NEQSOL Academy vasitəsilə dünyanın aparıcı universitetlərinin onlayn proqramlarına və LinkedIn Learning platformasının alətlərinə çıxış əldə edirlər.
Martın 5-də Azərbaycan Texniki Universitetində (AzTU) TələbəPlus kartı ilə bağlı infosessiya keçirilib.
İnfosessiyanın keçirilməsində əsas məqsəd tələbələri TələbəPlus kartı və onun təqdim etdiyi imkanlar barədə daha ətraflı məlumatlandırmaq, onların suallarını cavablandırmaq olub. Tədbir zamanı tələbələrə kartın qazandırdığı üstünlüklər, əməkdaşlıq edilən şirkətlərdə mövcud endirimlər barəsində məlumat verilib.
Təhsilin İnkişafı Fondunun Layihələrin idarə olunması şöbəsinin baş mütəxəssisi Aysel Məhərrəmova təqdimatla çıxış edərək TələbəPlus layihəsinin məqsədləri, tələbələr üçün yaradılan imkanlar barəsində məlumat verib. Layihənin gələcək perspektivlərinə də toxunan Aysel Məhərrəmova, yaxın gələcəkdə yeni tərəfdaşlarla əməkdaşlıqların qurulacağı və endirim şəbəkəsinin daha da genişlənəcəyini bildirib. Aysel Məhərrəmova çıxışının sonunda TələbəPlus kartının tələbələrə xüsusi imtiyazlar təqdim etməklə yanaşı, onların gündəlik həyatlarını daha rahat və rəqəmsal bir müstəviyə keçirəcəyini, gündəlik xərclərini daha səmərəli şəkildə izləmək fürsəti yaradılacağını diqqətə çatdırıb.
Çıxış edən “Family School” tədris mərkəzinin direktoru Aydan İbadzadə, tələbələrə mərkəzin fəaliyyəti haqqında məlumat verib. O, “Family School” tədris mərkəzinin tələbələrə ingilis dili təhsili, xaricdə təhsil imkanları, mütəxəssis hazırlığı və beynəlxalq sertifikatlaşdırma üzrə müxtəlif proqramlar təklif etdiyini qeyd edib. Aydan İbadzadə, “Family School” tədris mərkəzinin TələbəPlus təşəbbüsünün tərəfdaşı olaraq, tələbələrə bu sahələrdə 10% endirim təklif etdiyini vurğulayıb.
Çıxışların sonunda sual-cavab sessiyası təşlkil olunub. Təhsilin İnkişafı Fondunun nümayəndələri Aysel Məhərrəmova və Vəli Babayev tələbələrin suallarını ətraflı cavablandırıblar. Sual-cavab sessiyası zamanı tələbələr TələbəPlus kartının hansı yeni tərəfdaşlarla əməkdaşlığa başladığını və gələcəkdə hansı yeniliklərin gözlənildiyini öyrəniblər. Məlumat verilib ki, bu yaxınlarda kartın təqdim etdiyi endirim şəbəkəsinə daha bir neçə yeni partnyor şirkət qoşulub, bu da tələbələr üçün əlavə üstünlüklər yaradacaq.
Qeyd edək ki, “TələbəPlus” layihəsi Təhsilin İnkişafı Fondu, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü ilə həyata keçirilir. Layihənin məqsədi tələbələrə eyni güzəşt və endirimlər təqdim etməklə yanaşı, onların tələbəlik dövründən maliyyə əlçatanlığını təmin etmək, gündəlik xərclərini daha səmərəli şəkildə izləmək fürsəti, həmçinin onların sosial həyatlarına dəstək göstərmək məqsədi daşıyır.
Martın 4-də Azərbaycan Dövlət Pedaqoji Universitetində (ADPU) TələbəPlus kartı ilə bağlı infosessiya keçirilib.
Tədbirdə açılış nitqi ilə çıxış edən ADPU-nun Sosial və humanitar məsələlər üzrə prorektoru, filologiya elmləri doktoru, professor Fikrət Rzayev qonaqları salamlayaraq “Tələbə Plus” layihəsinin tələbələr üçün yaratdığı imkanların əhəmiyyətini vurğulayıb. O, bildirib ki, bu kart tələbələrə müxtəlif güzəştlər və üstünlüklər təqdim etməklə yanaşı, onların akademik və sosial həyatını daha da asanlaşdırmağa xidmət edir. Prorektor universitet olaraq bu təşəbbüsü yüksək qiymətləndirdiklərini diqqətə çatdırıb, Təhsilin İnkişafı Fondu və tərəfdaşlarına təşəkkürünü bildirib.
Təhsilin İnkişafı Fondunun İdarə Heyətinin sədrinin müavini Xanım Daşdəmirova TələbəPlus layihəsinin yaranma ideyasını və məqsədini təqdim edərək, layihənin tələbələrə eyni güzəşt və endirimlər təqdim etməklə yanaşı, onların sosial həyatlarına dəstək göstərmək məqsədi daşıdığını bildirib. X.Daşdəmirova əməkdaşlıq müqaviləsi imzalanmış 23 universitet üzrə bakalavriat, magistratura və doktorantura pillələrində təhsil alan 190000 tələbənin TələbəPlus kartı ilə təmin edilməkdə olduğunu diqqətə çatdıraraq, bu siyahıya Naxçıvan, Gəncə, Mingəçevir və Lənkəranda yerləşən ali təhsil müəssisələrin də daxil olduğunu bildirib.
Daha sonra, “Code Academy”nin Qəbul və Tələbə İşləri Departamentinin rəhbəri Xatirə Cəfərova çıxış edərək, akademiyanın fəaliyyətindən bəhs edib. O, akademiyanın tələbələrə proqramlaşdırma, dizayn, rəqəmsal marketinq, kiber təhlükəsizlik, data analitika və digər texnoloji sahələrdə geniş çeşidli kurslar və proqramlar təqdim etdiyini vurğulayıb. Xatirə Cəfərova, “Code Academy”nin “TələbəPlus” layihəsinin tərəfdaşı olaraq, tələbələrə sadalanan kurslardan daha əlverişli şərtlərlə yararlanma imkanı yaratdıqlarını qeyd edib. O, bu əməkdaşlığın tələbələrin təhsil həyatını daha əlçatan və səmərəli etməyə xidmət etdiyini bildirib.
Çıxışların sonunda sual-cavab sessiyası təşlkil olunaraq tələbələrin sualları cavablandırılıb.
Qeyd edək ki, “TələbəPlus” layihəsi Təhsilin İnkişafı Fondu, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü ilə həyata keçirilir. Layihənin məqsədi tələbələrə eyni güzəşt və endirimlər təqdim etməklə yanaşı, onların tələbəlik dövründən maliyyə əlçatanlığını təmin etmək, gündəlik xərclərini daha səmərəli şəkildə izləmək fürsəti, həmçinin onların sosial həyatlarına dəstək göstərmək məqsədi daşıyır.
27 fevral 2025-ci il tarixində Təhsilin İnkişafı Fondu və Ailə, Qadın və Uşaq Problemləri üzrə Dövlət Komitəsinin birgə əməkdaşlığı çərçivəsində həyata keçirilən “Hənifə Məlikova-Zərdabi adına qızların təhsilinə dəstək” təqaüd proqramının iştirakçıları üçün “Gündəlik həyatda hüquqi biliklər” mövzusunda təlim sessiyası təşkil olunub.
Təhsilin İnkişafı Fondunun Hüquq və insan resursları sektorunun müdiri – baş hüquqşünası Aysel Allahverdiyeva tərəfindən keçirilən təlim zamanı iştirakçılara gündəlik həyatlarında hüquq sahəsində bilik və bacarıqlarının artırılması məqsədilə əhəmiyyətli məlumatlar təqdim edilib. Sessiya çərçivəsində “Müqavilələrin mahiyyəti və növləri”, “İstehlakçı hüquqları”, “Vətəndaşların əsas hüquqi müdafiə mexanizmləri” mövzuları müzakirə edilib.
Təlim iştirakçıları real həyat nümunələri əsasında müqavilə bağlanarkən nəzərə alınmalı əsas məqamlarla tanış olublar. Eyni zamanda, tələbələr öz hüquqlarını qorumaq üçün atmalı olduqları hüquqi addımlar və mübahisəli hallarda müraciət edə biləcəkləri qurumlar haqqında məlumat alıblar.
Mövzular üzrə kazus müzakirəsindən sonra təlimdə iştirak edən qızların sualları cavablandırılıb.
Fevralın 20-də Azərbaycan Dövlət Neft və Sənaye Universitetində (ADNSU) TələbəPlus kartı ilə bağlı infosessiya keçirilib.
Tədbirdə açılış nitqi ilə çıxış edən ADNSU-nun rektoru, dosent Rüfət Əzizov qonaqları universitet adından salamlayaraq layihənin tələbələrin sosial fəaliyyətlərindəki əhəmiyyətindən bəhs edib. Dövlətin vətəndaşlarının ali təhsil imkanlarının yaxşılaşdırılması, əlçatanlığı təmin etmək, həmçinin elmi innovasiya fəaliyyətlərinin inkişaf etdirilməsi istiqamətində görülən işlərdən danışan rektor, TələbəPlus kartının bu mənada tələbələr üçün innovativ təşəbbüs olduğunu bildirib. Rüfət Əzizov ölkəmizdə tələbələr üçün geniş imkanların mövcud olduğunu qeyd edərək, Təhsilin İnkişafı Fondunun həyata keçirdiyi layihələrin təhsilin inkişafına mühüm töhfələr verdiyini vurğulayıb. O, Fondun fəaliyyətini yüksək qiymətləndirərək, bu sahədəki uğurların davamlı olacağına inandığını bildirib.
Təhsilin İnkişafı Fondunun İdarə Heyətinin sədri Elnur Nəsibov təhsilin məzmunun inkişafı sahəsində görülən mühüm işlərdən və ölkə başçısının bu layihələrə göstərdiyi dəstəyi qeyd edib. Elnur Nəsibov həmçinin TələbəPlus layihəsinin yaranmasının ideyasından və məqsədindən danışaraq TələbəPlus kartlarının bütün ölkə üzrə tələbələrin eyni güzəşt və endirimlərdən yararlanmalarını təmin etmək, eyni zamanda onların sosial həyatlarına dəstək göstərmək məqsədi daşıdığını vurğulayıb. İdarə Heyətinin Sədri əməkdaşlıq müqaviləsi imzalanmış 23 universitet üzrə bakalavriat, magistratura və doktorantura pillələrində təhsil alan 190000 tələbənin TələbəPlus kartı ilə təmin edilməkdə olduğunu diqqətə çatdıraraq, bu siyahıya Naxçıvan, Gəncə, Mingəçevir və Lənkəranda yerləşən ali təhsil müəssisələrin də daxil olduğunu bildirib.
Tədbirdə iştirak edən Azərbaycan Təhsil İşçiləri Azad Həmkarlar İttifaqının (ATİAHİ) sədri Araz Paşayev çıxışında, ittifaqın fəaliyyətindən söz açaraq, ATİAHİ Respublika Komitəsinin yeni layihələrlə təhsilin inkişafını daim dəstəklədiyini, eyni zamanda ittifaq üzvləri üçün əlçatanlığı təmin etmək məqsədilə bir sıra layihələrin həyata keçirildiyini diqqətə çatdırıb. Araz Paşayev komitənin elm və təhsil sahəsində həyata keçirilən ən innovativ layihələrin daim yanında olduğunu bildirib. Bu nöqtədən, sədr ötən il ATİAHİ ilə TİF arasında imzalanan əməkdaşlıq memorandumundan sonra daha sıx əməkdaşlıq etdiklərini vurğulayaraq, ATİAHİ-nin TələbəPlus təşəbbüsünə dəstək göstərməsindən məmnunluq duyduqlarını qeyd edib.
CELT Tədris və İnkişaf Mərkəzinin direktoru Xəyyam Dəmirov ADNSU-da belə bir tədbirdə iştirakdan məmnunluğunu bildirib və layihənin tərəfdaşı kimi tələbəbə yönümlü layiənin bir parçası olmaqdan qürur hissi keçirdiyini vurğulayıb. Sonra CELT Tədris və İnkişaf Mərkəzinin nümayəndələri Nərminə Abdullayeva və Fərid Kərimov mərkəz haqqında təqdimatla çıxış ediblər.
Qeyd edək ki, “TələbəPlus” layihəsi Təhsilin İnkişafı Fondu, Kapital Bank və “Visa” beynəlxalq ödəmə texnologiyaları şirkətinin birgə təşəbbüsü ilə həyata keçirilir. Layihənin məqsədi tələbələrə eyni güzəşt və endirimlər təqdim etməklə yanaşı, onların tələbəlik dövründən maliyyə əlçatanlığını təmin etmək, gündəlik xərclərini daha səmərəli şəkildə izləmək fürsəti, həmçinin onların sosial həyatlarına dəstək göstərmək məqsədi daşıyır.
Fevralın 20-də Bakı Dövlət Universiteti (BDU), Ailə, Qadın və Uşaq Problemləri üzrə Dövlət Komitəsi (AQUPDK) və Təhsilin İnkişafı Fondunun (TİF) birgə təşkilatçılığı ilə “Konstitusiya və Suverenlik İli” çərçivəsində “Qızların təhsil hüququ” mövzusunda konfrans keçirilib.
Əvvəlcə Dövlət himni səsləndirilib, şəhidlərimizin əziz xatirəsi bir dəqiqəlik sükutla yad edilib.
Konfransın açılışında çıxış edən Bakı Dövlət Universitetinin rektoru Elçin Babayev bildirib ki, hər bir cəmiyyətdə qızların və qadınların təhsilə və elmi fəaliyyətə cəlb edilməsi gender bərabərliyinin mühüm istiqamətlərindən biridir. Qızların təhsili yalnız onların gələcək həyat rifahının təmin olunması üçün deyil, həm də ailə dəyərlərinin qorunması və möhkəmlənməsi, övladlarının düzgün tərbiyə olunması, bütövlükdə isə cəmiyyətin tərəqqisi üçün həlledici rola malikdir.
Rektor qeyd edib ki, BDU-da hazırda bakalavriatura və magistratura təhsil səviyyələrində 25000-ə yaxın tələbə təhsil alır. Onlardan 16 641 nəfəri, təxminən 67, 2 %-i qızlardır.
Ailə, Qadın və Uşaq Problemləri üzrə Dövlət Komitəsinin sədri Bahar Muradova çıxışında qeyd edib ki, ölkəmizdə təhsil dünyəvi və fasiləsiz xarakter daşımaqla, vətəndaşın, cəmiyyətin və dövlətin maraqlarını əks etdirən strateji əhəmiyyətli prioritet fəaliyyət sahəsidir. Qızların təhsil imkanlarının genişləndirilməsi istiqamətində həyata keçirilən mühüm layihələrdən söz açan Bahar Muradova bildirib ki, qızların təhsili həm də cəmiyyətin tərəqqisi və iqtisadi güclənməsi baxımından vacib amil olmaqla gələcəyə qoyulan sərmayə kimi dəyərləndirilməlidir. Aidiyyəti qurumlarla əməkdaşlıq çərçivəsində qızların ali təhsil müəssisələrinə qəbulunu təşviq etmək, onların akademik inkişafına dəstək olmaq və təhsildə gender bərabərliyini təmin etmək əsas hədəflərdən biridir.
Daha sonra çıxış edən elm və təhsil naziri Emin Əmrullayev öz növbəsində Azərbaycanda qızların təhsilinin uzunmüddətli hədəflərdən olduğunu vurğulayıb. Qeyd edib ki, qızların təhsilə əlçatanlığı və keyfiyyətli təhsil alması vacib amildir. Nazir bildirib ki, bu gün daha çox qız müxtəlif pillələrdə təhsilə cəlb olunur. Azərbaycanda 20 il əvvəllə müqayisədə bu gün üç dəfə çox gənc təhsil alır. Təhsil alanlar arasında gənc xanımların sayının artması savadlı anaların, ailələrin olması deməkdir. Təhsil Azərbaycan gənclərinin, xüsusilə qızların növbəti mərhələlərdə özünün və cəmiyyətin inkişafını şəkilləndirən amil olacaq. Beynəlxalq təhsil tədqiqatları da ali təhsil almış valideynlərin övladlarının nəticələrinin daha yüksək olduğunu göstərir. PİSA (Beynəlxalq Şagird Qiymətləndirmə Proqramı) nəticələri də bunu təsdiqləyir. Təhsilli ailələrdə böyüyən uşaqların akademik uğurları daha yüksəkdir. Bu, təhsilin uzunmüddətli təsirini göstərən vacib faktordur. Təhsilə daha çox qız cəlb olunarsa, dünyada təxminən 3 milyona yaxın insan yoxsulluqdan qurtula bilər.
Konfransın gedişatında BDU və AQUPDK arasında birgə əməkdaşlıq haqqında memorandum imzalanıb.
Çıxış edən Təhsilin İnkişafı Fondunun İdarə Heyətinin sədri Elnur Nəsibov Fond tərəfindən qızların təhsilinə dəstək istiqamətində aparılan layihələrdən söz açıb. Bildirib ki, Ailə, Qadın və Uşaq Problemləri üzrə Dövlət Komitəsi ilə birgə “Hənifə Məlikova – Zərdabi adına təqaüd proqramı, “NEQSOL Holding” ilə birgə “Parla” təqaüd və inkişaf proqramı, STP Şirkətlər Qrupu ilə birgə “Zərif mühəndislər” xanımların inkişafı layihəsi və “Women in Tech” təşkilatının Azərbaycan nümayəndəliyi ilə birgə “Maya Hacıyeva adına İKT bacarıqları” təqaüd proqramları həyata keçirilib. Bu proqramlara 2600-ə yaxın müraciət edilib, ümumilikdə 336 qız təqaüd alıb. Bu cür proqramlar dövlət-özəl tərəfdaşlığı vasitəsilə davam etdiriləcək və qızlarımızın təhsilinə təşviqi işi gücləndiriləcək.
Deputat Mehriban Vəliyeva, BDU-nun Fizika fakültəsinin Maddə quruluşu kafedrasının müdiri Sacidə Əbdülvahabova, Dövlət Gömrük Akademiyasının İnformasiya texnologiyaları fakültəsinin tələbəsi, “Gənc qızların təhsilinə dəstək” layihəsinin iştirakçısı Fidan Mehdiyeva, şəhid polkovnik-leytenant Anar Əliyevin həyat yoldaşı, “Sən tək deyilsən” layihəsi çərçivəsində “Gələcəyə əmin addımlarla” şəhid xanımlarının təhsilinə dəstək proqramının iştirakçısı Vüsalə Əliyeva çıxışlarında ölkədə qızların təhsil almaları üçün yaradılan yüksək şərait və göstərilən qayğıdan danışıb, bunun cəmiyyətin inkişafı üçün vacib addımlardan olduğunu bildiriblər.
17 fevral 2025-ci il tarixində Təhsilin İnkişafı Fondu və “CELT Tədris və İnkişaf Mərkəzi” arasında əməkdaşlıq müqaviləsi imzalanıb.
Sənədi Təhsilin İnkişafı Fondunun İdarə Heyətinin sədri Elnur Nəsibov və “CELT Tədris və İnkişaf Mərkəzi”nin direktoru Xəyyam Dəmirov imzalayıblar.
Təhsilin İnkişafı Fondunun İdarə Heyətinin sədri Elnur Nəsibov çıxış edərək Fond tərəfindən həyata keçirilən layihələr haqqında məlumat verib. Elnur Nəsibov vurğulayıb ki, TələbəPlus layihəsi bütün ölkə üzrə tələbələrin eyni güzəşt və endirimlərdən yararlanmalarını təmin etmək, eyni zamanda onların sosial həyatlarına dəstək göstərmək məqsədi daşıyır. Sədr bu təşəbbüsün tələbələrin akademik və peşəkar inkişafına töhfə verərək yeni imkanlar yaradacağını və müsbət dəyişikliklərə təsir göstərəcəyinə əminliyini ifadə edib.
“CELT Tədris və İnkişaf Mərkəzi”nin direktoru Xəyyam Dəmirov çıxışında şirkətin fəaliyyəti barədə məlumat verərək, bu növ əməkdaşlıqların təhsil sahəsində innovasiyaların tətbiqi və gənclərin inkişafına böyük təsir edəcəyini vurğulayıb. O, həmçinin Fondun həyata keçirdiyi sosial layihələrin əhəmiyyətini yüksək qiymətləndirərək, gələcəkdə əməkdaşlığı genişləndirmək niyyətində olduqlarını bildirib.
İmzalanmış müqaviləyə əsasən tələbələr TələbəPlus kartı ilə “CELT Tədris və İnkişaf Mərkəzi”nin bütün bütün xidmətlərinə 10% endirim, xaricdə təhsil üzrə məsləhət xidmətlərinə isə 20% endirim əldə edəcəklər.
Təhsilin İnkişafı Fondu və “STP Şirkətlər Qrupu”nun birgə əməkdaşlığı çərçivəsində həyata keçirilən “Zərif Mühəndislər” təqaüd proqramının iştirakçıları üçün “Maliyyə savadlılığı” mövzusunda təlim sessiyası təşkil olunub.
Access Bank-ın Təhsil və İnkişaf üzrə meneceri Xumar Hüseynova tərəfindən keçirilən təlim çərçivəsində karyera üstünlüyü modeli (Career Edge Model), məşğulluğun əsas komponentləri və maliyyə stresinin iş yerinə təsiri kimi vacib mövzular müzakirə olunub. Təlim iştirakçıları iş həyatında uğurlu olmaq üçün vacib olan bacarıqlar, eləcə də karyera inkişafına təsir edən amillərlə tanış olublar.
Sessiya zamanı tələbələr aylıq büdcə planlaşdırması haqqında praktiki biliklər əldə edərək, gəlirlərini daha səmərəli idarə etməyi öyrəniblər. Təlim çərçivəsində “İstək, yoxsa ehtiyac?” prinsipi üzərində müzakirələr aparılıb, bu da iştirakçılara maliyyə qərarlarını daha şüurlu şəkildə verməyə kömək edib.
Bundan əlavə, Xumar Hüseynova Azərbaycan Respublikasının Mərkəzi Bankının təqdim etdiyi virtual təhsil platformasının üstünlükləri haqqında danışaraq, tələbələrin bu platformadan istifadə edərək maliyyə savadlılığını artırmaq imkanlarını vurğulayıb. O, rəqəmsal resursların təhsil və inkişaf üçün yaratdığı imkanların önəmini qeyd edib.
