Elm və Təhsil Nazirliyində “Maarifçi” tələbə-məzun proqramının mentorları üçün “Effektiv mentorluq: Potensialın aşkarlanması və inkişafı” mövzusunda təlim keçirilib.

Təlimdə Təhsilin İnkişafı Fondunun İdarə Heyətinin sədr müavini Xanım Daşdəmirova və Elm və Təhsil Nazirliyinin Monitorinq və qiymətləndirmə sektorunun məsləhətçisi, “Maarifçi” proqramının İşçi Qrupunun katibi Tünzalə Vəliyeva təlimçi qismində çıxış ediblər.

Təlim çərçivəsində “Maarifçi” proqramının məqsəd və hədəfləri, mentorların proqramdakı rolu, mentor və menti arasında effektiv ünsiyyətin qurulması, eləcə də gənclərin potensialının müəyyənləşdirilməsi və inkişaf etdirilməsi istiqamətində yanaşmalar barədə məlumat verilib.

Praktiki hissədə mentorlar real situasiyalar üzərində çalışaraq müxtəlif mentorluq yanaşmalarını müzakirə edib, iştirakçıların fəaliyyətinin qiymətləndirilməsi meyarlarını tətbiq ediblər.